بی ایس او نا پنجاہ او پنچُمی بنہشتی نا دے
!بلوچ راج
سیاست دنیا نا راجمانی ردوم او مونیا ہننگ نا بُن چاننگیک، کہ اونا وسیلہ آں اینو آں ہزار سال مُست بندغ آک زند آنا جتاؤ بدیانکا تیا ہینسا بننگ او، ارا راجمان او الُس نا میان ئٹ جوانو سیاست ئس ءِ نا کش او کیر محکم مسونو او داسکان اریر۔ او راجمان او الُس اینو تینا ڈیھ او سیمسر آتا رکھ آ تون اوار جتاؤ ربیدگی او دودمانی جوانو زند ئس ءِ نا خواجہ او۔ اندا ڈُول ئت اگہ بلوچ دیھ او راجمان ئٹ سیاست نا ہیت مرے گوڈا اوڑے بی اس او بلوچ سیاست نا روتغاتا محکم کننگ نا بُن چاننگیک۔ بی اس او اندُونو وخت ئس ءِ ٹی مونا بریک کہ او وخت آ ٹی جہان آ ٹی جتاؤ راجی انکلابی جنز جُنزگ آ ٹی مرور اندُن کہ تینا اسٹرکچر نا مُست نا دے تیاں اینو اسکان بلوچ ورنا تا اوار کننگ او اوفتا زانشتی ہیلکاری کن بلوچ راجمان آٹی بی اس او نا ائسے جتاؤ کڑدئس ءِ اندا وجغہ آں نن خنینا کہ دشمن او زوراور او طاغت بی اس او نا جوڈ مننگ تون اونا مونا یا میان ئٹ جتاؤ رکاوٹ آتا در تے ملیرا، کہ اونا سوب ئٹ بی اس او تینا جوڈ مننگ نا ملا سال آں پد تقسیم در تقسیم نا گواچی مریک۔ ولے بدو وہشت آتا جتاؤ پندل سازی تیاں پد ولہ ہم پنجاہ او پنچ سال تیاں پد اینو ہم بی اس او اینو ارے او بلوچ راجی جہد کین تینا کڑد ءِ پورا کننگ ءِ۔
!بلوچ خواننداک
بلوچ راجی چہنداری او استانی ولدا بہالی کین پر ایمنی تون بی اس او نا سیاسی سفر برجا ءِ۔ دا وخت ئٹ بلوچ چاکڑد دشمن او زوراور نا جتاؤ پندل تا مون آ ٹی ءِ، بلوچ ورنا تے بلوچ جہد او زرمبشت آں مُر کننگ نا خاطر آں ہر دے نا بنیات ئٹ وڈ وڈ نا پندل سازی کننگ ءِ، ائسے نیمغہ آں زوراور آ خواننگ نا نظام ءِ کہ اوڈے بلوچ ورناک زہنی بستار ئٹ خلنگنگو، افتےاندُنو موٹیویشنل یا رومنٹک لٹرچیر تننگ مننگ ءِ کہ ورنا تینا زاتی کید او بند آتیاں پیشتمنگ کپس، چاس کہ اودے کمفارٹ زون آں بارو دام ئس بلوچ خوانندہ ورنا تیکن جوڈ کرینے اندا وجغہ او زہنی بستار ئت تینا زات آں پیشتمنگ کپاسہ یا کہ زوراور آ رہبند افتا اُست ؤ دماغ ٹی اندا خس جاغہ کرینے کہ اوفتا خواننگ زانت نازانتی ٹی اوفتا جِند نا دیھ او الُس نا خلاف ئٹ کارمرز مننگ ءِ۔ اندن کہ ہینوکہ ملا تُو تا میان ئٹ ہزار آں زیات ورنا سی ٹی ڈی نا بہر جوڈ مسونو۔ کہ سی ٹی ڈی اینو ترندی تون پاکستانی فوج( افسی، آرمی) تون بلوچ چکچینی نا بھلو بہر ئس جوڈ مسونے۔ داڈ آں ابید ارٹمی کو کُندا بلوچ راجمان آ ٹی بلوچ سیاست نا ذی آ سرجم ئٹ بندش خلننگ مسونے۔ بی اس او تون اوار بلوچ جہد نا ایلو گل او پارٹی آتا ہزارہ تا باسک ؤ رہشون ہرفننگ او شہید کننگ مسونو ۔ بے ہساب سنگت اینو دہ دہ سال آں زیات زوراور تا ٹارچر سیل آتا تہٹی بندی او بلوچ راجمان ٹی اندنو جاورہال جوڈ کننگ مسونے کہ کس ئس جوانو سیاست ئس ءِ نا پِن ءِ ہلننگ کپک داڈے یکہ زوراور نا دُو نا شیفا ہمو گل او پارٹی تے سیاست کننگ نا موکل ارے کہ او بلوچ راجی جہد نا سرجم ئت خلاف سلوک او بلوچ ماڈی تا لُٹ او پُل آٹی زوراک تون وڈ نا وڈئس ءِ ٹی ہمگرنچ او گلامی نا زمزیل تے زیات مہکم کننگ او۔ بلوچ دیھ نا مال او مڈی تا بیپاری تون اوار بلوچ راجی پجار او ربیدگ تا ختم کننگ ءُ بلوچ چکچینی ءِ زانت نازانتی ٹی زوراور انگا استان نا بہر جوڈ ءِ۔ ولے دا کُل زوراکی او پندل تیاں ابید بلوچ راجی جہد نا گل او پارٹی تا باسک او رہشون آتا مہکمو توکل او راجی جوش او راجی جوزہ غاک بلوچ جہد ءِ برجا تخانو۔
!بلوچ ورناک
دنیا نا کوزہ مروکہ راج آ تا راجی جہد آٹی ورنا تا بھلو کڑد ئس مسونے او ارے۔ ائسے گلام او راج ئس ءِ نا بستار ئٹ داوخت ئٹ بلوچ ڈیھ آ ٹی بلوچ ورنا تا ائسے خاسو کڑد ئس نا پکار ء۔ بلوچ ورنا تے خوائک کہ او تینا زاتی زند عیش او نوش نا دنیا آں پیش تمیر او سرجم ئٹ بلوچ جہد نا بہر جوڈ مریر۔ بلوچ جہد نا جتائنگا پہلو تیاں تینا بود او وس نا رِدئٹ تینا گڈی وس ءِ تینا کُل کڑد ءِ پورا کیر۔ راست ئس ءِ کہ دا سفر نا خواست باز ترند او خولیس ءِ ولے راجی سما او انکلابی فکر نا مونا دنیا نا ھچ وڈ ئس ءِ نا طاغت توننگ کپک۔ او ورنا تا اینو نا مہکم انگا جوزہ بلوچ دیھ ءِ آجوئ نا ولدا ہلننگ او راجی بگا نا خوشہالی نا منزمان چاننگیک۔
بی اس او آزاد