سینزدہ نومبر بلوچ نمیرانیں پُسگانی روچ

گُلیں راج

ماں دنیاءَ روچے ہزارانی کچءَ مردم ودی بنت ءُ ہزارانی کچءَ چہ اے دنیاءَ سپر کن اَنت۔  ہمے پیم بنیادمءِ سنگءِ دورءَ بگر داں ھستیں دورءَ درا انسانی دپتر چہ جتائیں وش رنگ ءُ بدرنگیں کسہاں سرچکار اِنت۔ اے کسہانی تہءَ انسانی زِند، زندمانءِ پیچ ءُ تاباں ہوار سیاستءِ گِر ءُ چِل ءُ جنگءِ ڈکھ ءُ چاگردءِ ابیتکیءِ تاکانی زردی ءُ ھون چکاری ہوار اَنت۔ انسان وتی بُنکی روچاں بگِر داں مرچی ہمے تچ ءُ تاگءَ اِنت کہ آ چوں گیشتر زندگ بوت کنت ءُ  وتی امبرءَ ودینت کنت بلے اے ہم انسانی راستی یے کہ انسان ستر کوشست بہ کنت کہ آ بہ رک ایت بلے رک اِت نہ کنت بلکیں روچے نہ روچے مرگءِ امبازاں الم کپ ایت ءُ ہمودءَ آئیءِ جسدی ہستانک پہ مدامی گار بیت۔ بلے ماں دنیاءَ دگہ ہم یک پگرے ھست کہ آ پگر پہ گیش زندگ بوگ ءُ پہ وتءَ زندگ بوگءِ چپ اِنت بلکیں آ پگر پہ دگراں زندگ بوگءِ منوک اِنت ءُ اے منوگریءَ ہوار پہ دگراں مِرگءِ ہاترءَ ہم چک ءُ پد نہ بیت۔ ہما پگر کہ گیش زِندگ بوگءِ رندءَ نہ کپتگ بلکیں ہمے زِند کہ رستگ اشیءَ پہ پہر گوازینگ ءُ پہ دِگراں زِندگ بوگءِ سرءَ سِتک دار ایت۔  اے ہما پگر اِنت  کہ اشیءِ بروردءَ نہ تہنا چاگرداں دیمروئی کتگ بلکیں ہما چاگرد کہ سیاہ ءُ تہاریءِ دوراں چہ گوستگ اَنت گڑا آ چاگرداں پہ وت آجوئیں ءُ وشہالیں بامسارے در جتگ۔ اے پگر پہ یک عظیمیں مکسدےءَ نمیران بوگ ءُ نمیرانیءِ پگر اِنت۔

گرانمذہبیں بلوچ راج

دنیاءِ دپترءَ اگاں چمّے بہ جن  اِت گڑا جنگ ءُ کُشت ءُ کوشانی مزنیں داستانے گندگءَ کیت اِنت۔اے جنگ ہما زلم ءُ زوراکیانی ہلاپءَ بوتگ اَنت کہ آہاں چہ چاگرد نپسگیر کتگ اَنت ءُ ساہ اِش کش اِت نہ کتگ بلے ہمے کہ اِشانی بگیریءَ ہما پگر کہ آہاں جنگ کنگ پرماتگ  ہما پگر ءُ سوچءِ بروردءَ اے چاگرد ءُ راجاں نہ تہنا ایمنیں ساہے کشگءِ امیت رستگ بلکیں آوکیں پدریچاں وتی چمّاں گوں ایمنیں ءُ وشہالیں آجوئی ہم دیستگ۔ ہمے پیم وہدیکہ بلوچ راجءِ گپ کیت گڑا ما گند ایں کہ لکانی کچءَ بلوچ پُسگاں پہ وتی ڈیھءِ رکینگ ءُ بلوچ راجءِ دیمروئی ءُ آجوئیءِ ہاترءَ وتی نُگرہیں ساہ ندر کتگ اَنت۔ اے ہمے نمیرانی ءُ ندر بوگءِ فلسفہ اِنت کہ بلوچ راجءِ آجوئی جہد مرچی مہکم ءُ توانگریں رنگےءَ دیمءَ جنزان اِنت۔ مرچی کہ بلوچ راجءِ  سر جہل نہ اِنت  ءُ پہ پہر بُرز اِنت ہما نمیران بوتگیں بلوچ پُسگانی کُربانیءِ برورد اِنت۔ ہما سراں کہ آہاں پہ وت زندگی کنگءِ ھُل ءُ واھشت نہ بوتگ بلکیں پہ وتی راج ءُ پہ وتی گلزمینءَ زندگی کنگ ءُ پہ ہماہاں ندر بوگءِ ستک بوتگ۔

تمردیں بلوچ ورناھاں

ماں دنیاءَ ہما راج عظیم گُشگ بنت کہ آئیءِ مہلوکءَ آجوئیءِ وڑیں عظیمیں مکسدانی واستہ نمیرانیءِ مزن شانیں راہ پہ وت گچین کتگ۔ دنیاءِ دپترءَ اے نکش اِنت کہ ہما راجاں وتی مچانکی نپءِ ہاترءَ آجوئیءِ راہءَ وتءَ ندر کتگ گڑا آ راجاں ہمک مزنیں زالم ءُ زوراک شکست داتگ۔ ءُ ھمے پیم بلوچ راجءِ گورءَ پہ وتی ڈیھ ءُ پہ زمینءَ ندر بوگءِ فلسفہءِ مہکمیءِ درور تنگوھیں بلوچ زہگانی نمیرانی کہ آہانی تہءَ بلوچ ورنا ءُ کماشاں بگِر داں زہگ ءُ زالبولاں درا کُل پرک ءُ درکءَ بُرز یک راجےءِ بستارءَ یکجاہی ءُ ہوریءَ گوں ندر بوگءَ اَنت۔ انچو کہ بلوچ پُسگ آجوئیءِ واباں گوں پہ وتی راجءَ ندر بوگءَ اَنت ہمے پیم بلوچ ماتانی جُرت ءُ جزبگ چو برزیں آزمانءَ بلند اِنت، اے بلوچ راجی جہدءِ مہکمی اِنت کہ بلوچ مات وتی نمیران بوتگیں بچانی ژانگولیں جونانی دیمءَ نند اَنت ءُ موتکءِ جاہءَ لیلو ءُ نازینک جن اَنت ءُ دلیریءَ گوں وتی پُسگاں نازین اَنت۔

بلوچ پُسگاں

دنیاءِ ہمک راج وتی نمیرانیں سراں یات کن اَنت ءُ آہانی کربانی دیگءِ فلسفہءَ کدر ءُ شرپءِ نگاہءَ چار اَنت ءُ آہاں سُھرچکیں دروت ندر کنگءَ پہ آہاں ھاسیں روچے ہم ایر کنگ بیت۔ ہمے پیم بلوچ راج ہم  وتی نمیران بوتگیں بلوچ  پُسگانی یات ءُ آہاں دروت ندر کنگءَ پہ آہاں یک ھاسیں روچے ایر کتگ۔ بلوچ نمیرانیں سرانی روچ سینزدہ 13 نومبر ایر کنگ بوتگ، اے ہمے روچ اِنت کہ 1839ءَ انگریز لشکر بلوچ سرڈگارءِ قبضہ کنگءَ پہ آئیءِ سرءَ اُرش کنت، اے زوراکیءِ ہلاپءَ بلوچ وتی سرءَ جھل نہ کنت ءُ سلاہاں چگل نہ دنت بلکیں گَہگیریءِ راہءَ زیر ایت ءُ مھراب خانءِ سروکیءَ انگریز لشکرءَ گوں دلیری ءُ تمردیءَ جنگ کنت ءُ ہمے جنگءَ مھراب خان گوں وتی ہمراہاں بلوچ ڈیھءِ رکینگءَ پہ نمیران بیت۔ ہما روچءَ بگِر داں روچء مرچیگءَ بلوچ راجءَ ناں وتی سلاہ چگل داتگ اَنت ءُ نئیکہ سر جھل کتگ بلکیں نمیرانیءِ فلسفہ زرتگ ءُ گوں جوریں بداں دیم پہ دیم اِنت ءُ جنگءَ اَنت۔ بلوچءَ پہ وتی ڈیھءِ رکینگءَ عظیمیں فلسفہ کہ پہ ڈیھءَ نمیران بوگءِ فلسفہ اِنت، زرتگ ءُ وتی دود ءُ ربیدگ، زبان، زمین ءُ راجءَ بندوکیں ہمک بہراں رکینگءَ پہ جہدءَ اِنت۔ اے نمیران بوگءِ فلسفہءَ نہ تہنا بلوچ چاگردءَ ساہے بکشاتگ ءُ آئیءِ سر پہ پہر بُرز کتگ بلکیں دژمن انچو ترسینتگ ءُ دلسیاہ کتگ کہ آئیءَ بلوچ ڈیھ وَ قبضہ کتگ بلے ایمنیءَ نہ نشتگ بلکیں ہمک سھت ءُ دمان مرگءِ تُرسءَ گوں دچار بیت ءُ نفسیاتی ہوالہءَ ہمروچ مر ایت۔

باسمائیں بلوچ راج

بلوچ وتی دود ءُ ربیتانی پاسداریءَ کنانءَ وتی ڈیھءَ نمیران بوگءَ چک ءُ پد بوگءَ نہ اِنت۔ ہمے نمیران بوتگیں پُسگانی کربانی ءُ ھمتءَ یات کنگ ءُ آہانی رندگیریءَ پہ سینزدہ نومبر روچ کہ ایر کنگ بوتگ اے روچ تہنا  نمیرانیں سرانی یات کنگءِ روچ نہ اِنت بلکیں آہانی کربانی دیگءِ فلسفہءَ زانگ ءُ آئیءَ وتی مہلوکءَ سر کنگءَ ہوار آہانی ہمک کردار ءُ عملءِ رندگیری کنگ ہم مئے سرءَ الم اِنت۔ مئے نمیرانانی ھوناں چہ پُل رستگ ءُ ہمے پُلانی وشبوھاں چہ بلوچ ڈیھ سبز ءُ آباد اِنت ءُ بلوچ جنز روچ پہ روچ توانا ءُ مہکمتر بیان اِنت، بلے اے پُل مدام ھون لوٹ اَنت کہ ہمے ھوناں چہ گوڑگیں پُل بلوچ جنزءَ سوبینیءِ منزلءَ روچے سر کن اَنت۔ اے روچ پہ مارا اہد ءُ پیمان کنگءِ روچ اِنت  کہ ما وتی نمیران بوتگیں بلوچ پُسگانی ہونانی نہ تہنا جستءَ گر ایں بلکیں ہمے ھوناں چہ بلوچستانءِ آجوئیءِ سُھریں بامءَ ھم ودی کنیں۔

چاپ ءُ شِنگ: بلوچ اسٹوڈنٹس آرگنائزیشن آزاد