اے روچ اہد ءُ پیمان ءِ روچ انت

گلیں راج
دنیا ءِ تہ ءَ جتائیں روچ جتائیں ناماں یات کنگ بنت۔ اے روچانی نامینگ ءُ اے روچاں جتائیں مراگش برجم دارگ ءِ جتائیں مکسد انت۔ دنیا ءِ جتائیں ادارہ کہ وتی جتائیں ایجنڈایانی سر ءَ کار ءَ انت ایشاں دیم ءَ برگ ءِ واستہ جتائیں روچاں مراگش اڈ دینت داں مھلوک ءَ وتی ایجنڈایانی بارو ءَ سرپدی بہ دینت۔ چو کہ یو این او وت ءَ را انسانی ھکانی پاسدار لیک ایت، آئی ءَ دہ دسمبر ءَ میان استمانی انسانی ھکانی روچ نامینتگ کہ اے روچ ءَ انسانی ھکانی بارو ءَ سرپدی دیگ ءُ آیانی رکینگ ءَ پہ جتائیں سیمنار ءُ مراگش اڈ دنت۔ آزاتیں راج وتی آجوئیانی روچاں گوں شاتکامی ءَ برجاہ دار انت ءُ وتی ہما شھیدیں سراں یات کن انت کہ پہ آیانی آجوئی ءَ وتی سر اش کربان کتگ انت۔

ایردستیں راج ءِ پُسگاں
ھمے داب ءَ ایردستیں راجانی واستہ جتائیں روچانی نامینگ مزنیں ارزشتے داریت داں آ وتی مچانکی یاتاں بہ رکین انت۔ بلے پہ ایردستیں راجاں اے روچ تھنا یاتگیری نہ انت بلکیں اہد ءُ پیمان ءِ روچ انت۔ ہمے روچاں آ اہد ءُ پیمان کن انت کہ آ پہ وتی راج ءِ آجوئی ءُ وتواجھی ءَ عملی جُھد کن انت۔ بی ایس او چہ وتی بنداتی روچاں بلوچ ءِ مچانکی یاتانی رکینگ ءَ پہ جتائیں روچ نامینگ ءَ انت چو کہ بلوچ شھیدانی روچ، گار ءُ بیگواھیں بلوچانی روچ ءُ ہمے ڈول ءَ بی ایس او ءَ 21 دسمبر بلوچ زالبولانی روچ نامیتگ۔

بلوچ جھدکاراں
21 دسمبر ہما روچ انت کہ بی ایس او ءِ گوستگیں کماش ءُ بلوچ راجی جُنز ءِ سرکیلیں رھشون لمہ وطن بانک کریمہ ءِ جون ماں کینڈا ءِ شھر ٹورینٹو ءَ دست کپیت ءُ کریمہ بلوچ راجدپتر ءَ نمیران بیت۔ اے روچ ءِ نامینگ ءِ مکسد تھنا اے نہ انت کہ ما اے روچ ءَ سیمنار، کیمپین ءُ مراگش اڈ بہ دیں بلکیں ما اے روچ ءَ اے پیمان ءَ بہ کن ایں کہ ما کریمہ ءِ مکسد ءَ وتی زند ءِ بھر کن ایں ءُ آئی ءِ گرگ ءَ پہ ھچ وڑیں کربانی ءِ دیگ ءَ چک ءُ پد نہ بیں۔

بلوچ ورنایاں
کریمہ وتی سرجمیں زند ورنایانی ھیلکاری، آیاں چہ استان ءِ داتگیں چاگردی ءُ سیاسی سلکاریاں رکینگ ءُ جُنز ءِ بھر کنگ ءَ ندر کت۔ اے سپر ءِ نیام ءَ آ جتائیں اڈاندانی دیمپان بوتگ۔ استانی زلم ءُ زوراکیاں بگر داں وتگڈیں سیاسی مردمانی بھتامانی دیم ءَ کریمہ چو چلتن ءِ کوہ ءَ مِک بوتگ ءُ ساہتے ھم چہ وتی جُھد ءَ پُشت کِنز نہ بوتگ۔ کریمہ پمیشکا اے سرجمیں جیڑہانی دیمپان بوتگ کہ آ بلوچ ورنایانی ھیلکاری ءُ جُنز ءَ گوں بندوک بوتگ ناں کہ اے جیڑہ زاتی بوتگ انت۔

سیاسی جھدکاراں
شُما کہ اے جُنز ءِ بھر بوتگ ات، اے سیاسی سپر ءِ نیام ءَ کسان ءُ مزنیں کچے ءَ داں شُمے دیم ءَ ھم کاینت پمیشکا ہما سنگت کہ اے سپر ءِ بھر بوتگ انت گڑا وت ءَ را پگری ھساب ءَ انچو مھکم بہ کن انت کہ استانی زوراکیاں بگر داں اندر ءِ دو تل ءُ دو پوستیں وتگڈیں سیاسی مردمانی پندل آیاں چہ راجی جُنز ءَ گستا کنگ ءَ سوبمند کت مہ کن انت۔

بی ایس او ءِ باسکاں
کریمہ ءِ پند، کربانی ءُ بودشتاں بی ایس او ءِ پِگر ءُ ڈسپلن گیش مھکم کتگ۔ کریمہ ءِ پگر ءَ بندوکیں بی ایس او ءِ بھر بوگ پہ شُما شرپے بلے شرپ ءَ ھوار مزنیں زمہ واری یے کہ شما بلوچ ورنیانی ھیلکاری، آیاں چہ چاگردی سلکاریاں رکینگ ءُ جُنز ءَ بھر کنگ ءَ ھچ ڈول ءَ چک ءُ پد نہ بئیت۔ وتی زاتی تب، زاتی واھشت، زاتی سنگتیاں یک کر کن ات ءُ بلوچ ورنایاں گوں جُنز ءَ ھوار کنگ ءَ وتی شپ ءُ روچاں یک کن ات۔