کبزہ گیریں استانی زلم ءُ زوراکی ءُ آھانی کاسگ چٹانی پندل

!بلوچ اوبادگاں

یک جنگ آماچیں راجےءِ بستارءَ ھمک روچءِ بنیاتءَ راجی دژمنءِ زلم ءُ زوراکی ءُ مکّاری نوک نوکیں شکل ءُ دروشماں مئے دیمءَ آھان انت۔ دانکہ گلامیءِ سانکل چہ ھنڈالاں سندگ نہ بنت بلوچ ڈیھءَ ھچ ڈولیں ایمنی ءُ آسودگی اتک کت نہ کنت۔ ءُ چوشیں جاوراں پہ ایردستیں راجاں الم بیت کہ آ سیاسی بنیاتءَ سرجم آگاہ بوگءِ جہدءَ بہ کن انت۔ اگاں نا ما چہ دژمن ءُ آئیءِ سیاسی پندلاں ھچبر وتارا کش ات نہ کن ایں۔ پرچہ کہ دژمن وتی ھرچی پالیسیءَ ایردستءِ دیمروئی یے نامے دنت ءُ دیمءَ کار ایت۔ ءُ گوں وتی جتائیں ٹولانی بنیاتءَ ایردستءَ باور کنائینگءِ جہدءَ کنت کہ منی ھمک پالیسی پہ تئی دیمروئیءِ ھاترءَ انت۔ پمیشکہ بلوچءَ را چہ ایدگہ آجوئیں راج ءُ مہلوکءَ گیش سیاسی بستارءَ باسَما بوگی انت۔ دانکہ دژمنءِ ھمک دیمءَ آؤکیں پندل چہ بنداتءَ سرپد بہ بیت ءُ آئیءِ پندل بے سوب بہ بنت۔

!بلوچ پُسّگاں

ھمک روچءِ بنیاتءَ گوستگیں ھپتگءِ میانءَ دو ھاسیں ویل کہ یک راجےءِ بستارءَ مئے دیمءَ اتکگ انت۔ ماہل بلوچ ءُ آئیءِ تپلیں زہگانی گار ءُ بیگواہی بہ بیت یا کہ بارکھانءِ پیرزال ءُ زہگانی دلپدردیں کوشءِ ویل۔ زورآوریں استانءِ زلم ءُ زوراکیانی برجاھی انت۔ بلے چوشکہ ما پیسرءَ گشتگ ات زورآور وتی ھچ پیمیں زلم ءُ زوراکیاں وتی کوپگاں زورگ نہ لوٹ ایت۔ چوشکہ ما گند ایں کہ آ یک نیمگے بلوچ ڈیھءِ مادنیات ءُ مال ءُ مڈیاں لُٹگ ءُ پلگ ءُ برگءَ انت ءُ آھاں بلوچءِ وشہالیءِ نام دیگءَ انت۔ بلوچ راجءِ پرزنداں جنگ ءُ کشگءَ انت، لشکرکشی(پوجی آپریشن) کنگءَ انت ءُ آھانءَ بلوچ ڈیھءَ ایمنی آرگءِ نام دیگءَ انت۔ بلے مارا سرپد بوگی انت کہ بزگی، بے وارسی، مردمانی زورانسری گار ءُ بیگواہی ءُ تیرسپتگیں جون، ڈیھءِ ھد بنداں کارمرزگ ءُ آئیءِ مادنیاتانی لُٹ ءُ پُل ءُ چوشیں جاوراں ڈیھانی دیمروئی نہ گش انت بگندئے چوشیں جاور ءُ اہد گلامی ءُ ایردستیءِ اہد باریگ انت۔ کہ ایشانی دیمءِ دارگءِ مستریں توجیل راجی جنزءِ ھمک مھازانی مہکم کنگ انت۔

!مڈاھداریں وانوک

چہ بلوچ ڈیھءِ زورآوریءِ بنداتی روچاں زورآوریں استان میان استمانی دنیا ءُ ایدگہ مہلوکءِ رد دیگ ءُ بلوچ راجی جنزءَ را ردیں رنگے دیگءِ ھاترءَ بازیں کسان مزنیں ردیں پروپیگنڈا ءُ تران ءُ باوست دیمءَ آؤرتگ ءُ جتائیں پروگرامانی شکلءَ آھانی مہکم کنگءِ ھاترءَ کار کنگءَ انت۔ چوشکہ آئیءِ یک ردیں پروپیگنڈا یے کہ بلوچ ڈیھءَ ھچ ڈولیں راجی آجوئیءِ جنز وجود نہ دار ایت۔ بگندئے ادءَ لہتیں دمگی سطحی جیڑہ انت کہ آھانی سوبءَ بلوچ ڈیھءِ جاور نگیگ انت۔ بلے نا کہ دنیاءِ راستیں بندپترءَ کسے رد کت کنت ءُ نئیکہ زمینی راستی رد کنگ بوت کن انت۔ چوشکہ بلوچ زالبول ماہل بلوچءَ را ناشرکارئے نام دیگ ءُ بارکھان تپلیں زہگانی کوشءَ را نام نہادیں سردارےءِ سرءَ دیگ زورآوریں استانءِ ھمےوتگڈ ءُ بے بنیاتیں پروپیگنڈہانی بہر انت کہ آھانی بنیاتءَ گشگ بیت کہ بلوچستانءَ راجی جنز وجود نہ دار ایت۔ مرچی استان بارکھانءِ تپلیں زہگانی کوشءَ گیشءَ گیش ھمے ھاترءَ پروپیگنڈا بنیاتءَ دیمءَ آرگءَ انت تا کہ مہلوک ھمے باور بہ کنت کہ آھانی جیڑہ گوں سرداران انت۔ بلے راستی چہ ایشیءَ سرجم چپ انت، اے زلم ءُ زوراکیانی مستریں سوب پاکستانءِ جند انت۔ توتکءَ وھدے کہ بلوچ پرزندانی زانگولیں جون دست کپ انت گڑا اودءَ شفیق مینگلءِ پشتءِ تاکت پاکستانی استان بیت، 2010 ءَ رند وھدے کہ سرجمیں بلوچستانءَ ھوار مکران ءِ دمگاں پوجی لشکرکشی(آپریشن) تہءَ ترندی آرگ بیت گڑا اودءَ ڈاکٹر مالک ءُ ایدگہ نامی ئیں راجدوستانی پشتءَ اوں پاکستانی استانءِ تاکت بیت، ھمے ڈولءَ مرچی اوں بارکھانیءِ کوشءِ زمہ دار عبدالرحمن کیتھران نہ انت بگندئے پاکستانی استانءِ مشینری انت۔

!شرپداریں اُلس

بوت کنت بلوچ ڈیھءِ جتائیں ہند ءُ دمگانی تہءَ استانی زوراکیانی شکل یا وڈ ءُ ڈول ءُ پالیسی جتا بہ بنت۔ بلے بلوچ ڈیھءِ یکیں ءُ مزنیں جیڑہ راجی گلامی انت۔ ءُ چہ راجی گلامیءَ دراہگءِ یکیں وسیلہ مہلوکی یکجاھیں گہگیری انت۔ پمیشکہ وھدے لوٹانی ردءَ یک راجےءِ بستارءَ یکجاہ بہ بیں ءُ دری زوراکیانی دیمءَ بہ دار ایں۔ چیا کہ بلوچ ڈیھءِ وشہالیءِ مانزمان راجی آجوئی انت۔

بلوچ اسٹوڈنس آرگنائزیشن آذاد