ھشت جون گار ءُ بیگواھیں بلوچانی روچ

یک ایردست ءُ گلامیں راجےءِ بستارءَ بلوچ ھمک سال باریں چینکس ناوش، تورناک ءُ سیاھیں روچ برجم دار ایت۔ چہ 27 مارچ 1947 ءَ بگر داں مرچی ھمک سالءِ ھسابءَ اے سیاہ ءُ تہاریں روچاں روچے پِر بوگءَ اِنت۔ ما گند ایں کہ روچے چاگیءِ دلبندءَ آس روک کنگ بیت ءُ روچے توتک گونگیں کبرستان دیمءَ کاینت۔ برے بچار کہ تپلیں یاسمین تیرانی آماچ اِنت ءُ برے حیاتءِ ڈولیں ورناہانی جون تلام اَنت۔ گار ءُ بیگواہی، ٹپ ءُ ٹوریں جون، ٹارگٹ کلنگ، پئوجی آپریشن ایش پہ بلوچاں روچ روزینی کسّہ اَنت۔ ءُ اے درستیں زلم ءُ زوراکیانی مستریں سوب راجی گلامی ءُ ایردستیءِ جند اِنت۔چوناھا وَ ایردستءِ ھمک روچ یک سیاھیں روچے زانگ بیت بلئے لہتیں ھاسیں روچ کہ چہ ایردستیں راجانی مہلوکانی نیمگءَ دارگ بنت آھانی دارگءِ مول ءُ مراد ایش انت کہ گلامیں راجءَ وتی گلامی ءُ ایردستیءِ مارشت گیش بہ بیت، ھمک روچ روزینی زوآورءِ زلم ءُ زوراکیانی ھاسیں سوبءَ سرپد بہ بیت، وتی چاگردءِ ھاسیں جیڑہءِ جندءِ مارشت ءُ آئیءِ توجیلءِ راہ ءُ درانی باروءَ باشعور بیت۔ھمے ڈول چہ ھمے روچاں یکے 8 جون انت کہ آ چہ ” گار ءُ بیگواھیں بلوچانی روچ” ءِ نامءَ زانگ بیت۔

!شرپمندیں وانوک
8 جون “گار ءُ بیگواھیں بلوچانی روچ” اے ھما روچ اِنت کہ چرے روچءِ آسءَ بلوچءِ ھچ گسے نہ رکّ اتگ۔ ھمک کہولے مرگ ءُ زندءِ نیامءِ وداراں سُچگءَ انت۔ کسےءِ زہگے، کسےءِ براتے، کسےءِ پس ءُ دگہ سیاد ءُوارسے۔ چہ سالاں سال مات ءُ پت وتی رودینتگیں زہگانی وداران اَنت، تپلیں زہگ پہ وتی پساں وداریگ انت، کئے بزانت آ رسترانی دستءَ چے پئیمیں جاورانی دیمپان انت، است اَنت یا نیست انت؟ ءُ مرچی ئیں روچ ھمے بیگواھیں مردمانی نامءَ نامینگ بوتگ۔ کہ چہ مرچیءَ سینزدہ سال پیسر 8 جون 2009ءَ بلوچءِ توار، بلوچ نودربرانی راھشون ءُ بی ایس او آزاد ءِ گوستگیں سنیئر وائس چیئرمین زاکرمجید آوار جنگ بوت، دانکہ مرچیءَ آئیءِ ھچ پئیمیں ھالے نیست۔ زاکرمجیدءَ ھوار چہ بلوچ ڈیھءَ دگہ ہزارانی کچءَ بلوچ نودربر ءُ سیاسی جہدکار گار ءُ بیگواہ انت۔
چیءَ کہ زورآور مدام چہ ایردستءِ زانت ءُ شعورءَ ترس ایت، پمیشکہ آ ھرچ ھما شےءَ ولگوج کنگءِ جہدءَ کنت کہ آئیءِ بنیات یا نزیکی گوں ایردستءِ شعورءَ بہ بیت۔ علم ءُ آگہی ءُ پکر ءُ فلسفہ آنی لٹریچراں بگر دانکہ باسَما ءُ سسا ساچیں ورنا ءُ ایدگہ چاگردی مردماں ، زورآور چہ ایشاں ھچ شے یے اوپار کت نہ کنت۔ چیا کہ زورآورءِ جند دُز اِنت۔ آ لٹ ءُ پل کنگءِ نیتءَ کیت، دانکہ آ ایردستءِ زہنانی سرءَ ارش مہ کنت، آھانی جیڑگانی دراں بند مہ کنت۔ آئیءِ زورآوریءِ وجود ترسءِ آماچ بیت۔ایردست جیڑایت ءُ آئیءِ سرءَ جُست چست کنت۔ پمیشکہ آ وتی ناھکّیں کبزہءَ را جائز کرار دیگءُ منارینگءِ ھاترءَ مہلوکءِ جیڑگ ءُ ھیال کنگءِ دراں بند کنت۔ بلئے اے زورآورانی کم ھیالی اِنت کہ شعور ءُ آگہی ءُ جیڑگ ءُ پکر کنگءِ سنچ پہ آشوبی جہدکارانی گرگ ءُ بند کنگ یا جنگ ءُ کشگءَ ھلاس بنت، بگندئے آ ھمینکس مردم بارت ، ھمینکس مردم جنت ءُ کش ایت دگہ دو ھمینکس مہلوک پاد کئیت، آھانی سرءَ جیڑایت، آھانی پکر ءُ فلسفہاں سرپد بیت ءُ دیمءَ بارت۔ ھمے پئیم مرچی زاکرءَ ھوار بی ایس اوءِ یک مزنیں لڑے ماں بندیگجاہاں بند انت، سدانی کچءَ نودربرانی جون دست کپتگ انت، بلئے گل وتی جاہءَ مہکم اِنت، استیں ڈیھی جاورانی ردءَ وتی جہد ءُ وسءَ وتی کردءَ پیلو کنگءَ انت۔ ھمیش راھشونانی جہد ءُ جپاہاں بلوچ ورناہانی تہءَ کربانی دیگءِ فلسفہ ءُ زانت ءُ شعور پیداک کتگ۔

!بلوچ راج
مرچی بلوچ اگاں پدمنتگ، آ وتی سائل ءُ وسائلانی وتواجہ نہ انت، آئیءَرا وانگجاہ ءُ نادراہجاہ نیست، آئیءِ زند محفوظ نہ انت، ھمک روچءِ ھسابءَ زلم ءُ زوراکیانی دیمپان انت، زندگ بوگءِ بنیادی آسراتیاں چہ زبہر انت۔ اے درستیں جیڑہانی سوب تہنا ” راجی گلامی” انت۔ ھما روچ کہ بلوچءَ دوبر وتی آجوئی گپت، وتی ڈیھءَ وتواک بوت، چہ ھما روچءَ اے دراھیں جیڑہ وت پشت نہ کپ انت۔ پہ راجی گلامیءِ سانکلانی سندگءِ ھاترءَ بلوچ جتائیں اداراہ ءُ جتائیں پلیٹ فارمانی شکلءَ کار کنگءَ انت۔ بلوچ لس مہلوک ءَ را کہ ھرچ ھما جنز کہ پہ بلوچءِ آجوئیءِ توارءَ دیمءَ کئیت آئیءِ ھمتوار بوگی انت۔ آ مہکم ءُ منظم کنگی انت۔ ھمے ڈول مرچی ئیں 8 جون “گار ءُ بیگواھیں بلوچانی روچ” گلامیں بلوچ راجمانءِ ھما روچ انت کہ چہ آئیءِ آسءَ کسے نہ رک اتگ، گڑا چہ ھاموش ءُ بے توار بوگ یاکہ جتا جتا بوگءَ گہتر انت اے ڈولیں روچاں بیا ات یکجاہ بئیں ءُ وتی بیگواھیں مردمانی توار جوڑ بئیں دانکہ یکے مئے راجی کربانی ءِ فلسفہ مہکم بہ بیت ءُ دومی دنیاءِ مردمی اکبالانی میاں استمانی ادارہ مئے توارءَ سرپد بہ بنت ءُ زورآورءِ ھلاپ گامگیج بہ زور انت۔ پرچہ کہ دنیاءِ بندپترءَ موومنٹانی پادآیگ گوں ھم سنتی ءُ یکمشتیءَ بوتگ، بہر ءُ بانگ راجانءَ تاوان بار کنت۔