‎ 27 مارچ پہ بلوچ ءَ سیاہیں روچ
‎گَہگیری آجوئیءِ مانزمان اِنت

‎بلوچ راج
‎دنیاءَ ہرکجام ملک یا راجے بیت آئیءِ گوْرءَ پہ یات کنگ ءَ وشیں روچ ہست ءُ سیاہیں روچ ہم۔ وشیں روچ ہما وشی اَنت کہ راجے یک عملے یا جنگے ءَ سوبین بیت گُڑا ہمے روچ ءَ پہ وشی ءُ شات یات کنت۔ دومی ہما سیاہیں روچ بنت کہ راجے ءَ سکی ءُ گرانی گِر اَنت ءُ انچیں روچے کہ آ راج ءَ مزیں راجی تاوانے رستگ گُڑا آ راج ہمے روچ ءَ سیاہیں روچے ھسابءَ یات کنت۔ دنیاءَ بازیں ملکے جتائیں روچ ءُ ویلاں سیاہیں روچ ءِ ہساب ءَ یات کنت پہ درور جاپان ءِ واستہ ہما روچ سیاہ اِنت کہ آ روچ ءَ ملک ءِ سرءَ ایٹمی تراکے کنگ بیت، روس ءِ گوْرءَ سوویت یونین ءِ پروشگ ءِ روچ، جرمنی ءِ کِرّءَ دومی مزنیں جنگءِ روچ سیاہے، پولینڈ ءِ گورءَ ہولوکاسٹ ءُ بنگلہ دیش ءِ گْور ءَ 1971 ءِ پاکستان ءِ دستءَ چُکچینی ءِ ویل سیاہیں روچ ءِ بستار ءَ زانگ بیت۔ اِشاں ھوار دگہ بازیں راج ہست اَنت کہ آ جتائیں روچ ءُ ویلاں سیاہیں روچ ءِ بستار ءَ یات کن اَنت۔ اے ہمے ویل اَنت کہ اے ملک اے ویلاں سیاہیں روچ ءِ بستار ءَ یات کن اَنت ءُ سرجمیں راج اے روچ ءَ یک ءُ دومی ءَ گوں تِپاکی ءُ مُچانکی درد ءِ درانگازی ءَ ہوار بنت۔

‎گُلیں زمین ءِ واھُند بلوچ مہلوک،
‎ہمے پیم بلوچ راج ءِ گور ءَ انچو کہ پہ وشی ءَ 11 اگست ءِ روچ اِنت ہمے پیم پہ گم ءُ درد ءَ 27 مارچ ءِ روچ اِنت۔ 27 مارچ پہ بلوچ راج ءَ ہما سیاہیں روچ اِنت کہ اے روچ ءَ وتگڑین ملک پاکستانءَ بلوچ گُلزمین ءِ سر ءَ تاکت ءِ زور ءَ قبضہ کنت ءُ بلوچ راجءِ آجوئی ءَ پُلیت۔ اے ہما روچ اَت کہ ناپاکیں استان گوں وتی بیمکار ءُ باڑہءِ سر ءَ زُرتگیں لشکر ءَ بلوچستان ءِ سر ءَ اُرش کنت ءُ بلوچستان ءِ زِر ءُ زمین ءَ پہ تاکت قبضہ کنت ءُ بلوچ ءِ گُلیں سرزمین ءَ وتی چنگُلاں بندیگ کنت۔ روچ مرچی ہم پاکستان ءِ ناپاکیں لشکر ءِ قبضہ بلوچ سرڈگار ءِ سر ءَ برجاہ اِنت۔

‎گُلیں بلوچ راج
‎اے روچ پہ بلوچ ءَ پمیشکہ سیاہ ءُ بدیں روچ ءِ ہساب ءَ یات کنگ بیت کہ اے روچ ءَ بلوچ ءَ چہ آئی ءِ آجوئی پُلگ بیت۔ اے ہمے بدیں روچ بیت کہ پاکستانی زالمیں لشکر بلوچستان ءِ سر ءَ چاریں نیمگاں چہ اُرُش کنت ءُ بلوچستان ءِ سرءَ وتی ناپاکیں قبضہ ءَ کنت۔ اشی ءَ چہ پیسر پاکستانی ھکمران کہ آہانی تہءَ جناح ءُ ایدگہ انگریز کاردار ہوار بنت۔ بلوچستانءَ اسلام ءِ نام سر ءَ پاکستان ءَ ھور کنگ ءِ گپ ءَ جن اَنت، اے گپ وھدے بلوچ ءِ پارلیمنٹ( ایوانِ بالا ءُ ایوانِ زیریں) ءِ دیم ءَ ایر کنگ بیت گڑا بلوچ رہشون ءُ سیاستدان اے گپ ءَ نہ منّ اَنت ءُ گش اَنت کہ اسلامءِ نامءِ سر ءَ ما ہچبر وتی ڈیھ ءَ دگہ استانےءَ گوں ھوار کُت نہ کنیں۔ بلوچ وہدے اے گپ ءَ رد کن اَنت گُڑا پاکستانی پہ زور بلوچ سرڈگار ءِ سر ءَ زمینی، آپی ءُ بالی وسیلہءَ وتی لشکر کشی بندات کن اَنت ءُ مکُران، کلات، شال، لسبیلہ، ھاران ءُ مری، بگُٹی استانانی سرءَ اُرش کن اَنت ءُ اود ءِ ھکومت ءَ پروش اَنت ءُ وتی ھکومتی یے جوڑ کن اَنت۔

‎باسمائیں بلوچ ورناھاں
‎روچ 27 مارچ1948 ءَ بگِر داں روچء مرچی بلوچ راج ءَ اے گُلامی نہ منّ اتگ ءُ زوراک ءُ زورگیر ءِ ھلاپ ءَ گَہگیری کُتگ۔ ہما روچ ءَ کہ بلوچستان ءِ سر ءَ پاکستان اُرش کنت، آغا عبدالکریم گہگیری کنت ءُ پاکستانءِ ھلاپ ءَ جنگ کنت۔ بلوچ ءَ زی ہم سر جہل نہ کُتگ ءُ نئیکہ مرچی سراں جہل کنگ اِنت بلکیں سرانی کربانی دیان ءَ گہگیری ءِ کِشک داشتگ ءُ دیمءَ جُنزان اِنت۔ ہما مردم کہ آ وتی زمین، زبان، دود ءُ دودمان، راج ءُ مہلوکءَ گوں مِہر کنت آ الم اے سما کنت کہ آ چونیں ڈیھ یے ءِ واھُند اِنت بلے واھُند ءُ واجہ بیگ ءَ پد ہم مرچی گُلامی ءِ زِند گوْازینگ اِنت۔ بلوچ ءِ سر ءَ زوریں قبضہ بیتگ بلے بلوچ ءَ اے گُلامی نہ منیتگ ءُ جنگ ءَ اِنت۔ اے دنیا ءِ دپتر ءَ نبشتگیں راستی یے کہ ہما راجاں زوراکانی دیم ءَ گہگیری کُتگ، آہاں گوں جنگ کُتگ ءُ زمین رکینگءِ جہد کتگ آہاں الم آجوئی گِپتگ ءُ مرچی آجوئیں استانانی واھُند اَنت۔ ہما راجاں کہ گُلامی منّ اتگ ءُ جنگ نہ کُتگ گُڑا آ راج دنیا ءِ دپترءِ تاکانی تہءَ ہمءَ گار اَنت۔

‎باکردیں بلوچ پُسگاں،
‎اے سیاہیں روچ چو سُپتگیں تیر ءَ مئے دلاں پیوست اِنت کہ چوں اے روچ ءَ مئے آجوئی چہ مارا پُلگ بیت، ہما آجوئی کہ آئی ءِ دارگءَ پہ راجاں سرانی سر کُربان کنگی اَنت ہما آجوئی چہ مارا پُلگ بیت۔ بلے آجوئی پُلگ بیتگ، مئے زمین مئیگ اِنت، راج مئے زِندگ اِنت، دود ءُ زبان مئے زِندگ ءُ برجاہ اَنت، اِش تہنا مئے گہگیریءِ سوب اِنت کہ ما اے دنیا ءَ گار ءُ گُمسار نہ ایں۔ گہگیری یک راجے ءِ زِندگ مانگ ءِ بنکی پدیانک اِنت۔ مرچی ہزاراں بلوچ مہلوک ءُ ورناھاں وتی ساہ نْدر کُتگ اَنت۔ ہزار زورانسری گار ءُ بیگواہ اَنت ءُ لکانی کچءَ مئے مردم بلوچ جہد ءِ بہر اَنت ءُ سیاسی ءُ جنگ ءِ سنگراں ساہ ندر کنان ءَ جُہد ءَ اَنت۔ بلوچ ءِ دود اِنت ءُ آ پہ پھر گش ایت کہ آئی ءَ سر داتگ ءُ دنت بلے سراں جہل نہ کنت۔ بلوچ ورناھانی سر ءَ اِنت کہ آ چوں اے آجوئی جُہد ءَ ھوار بنت ءُ جہدکارانی ھمکوپگ بنت ءُ جنگ ءَ دیم ءَ برانءَ مہکم کن اَنت ءُ بلوچستان ءَ دوبر آجو کن اَنت۔
‎آجو بلوچستان زِندگ بات

‎شنگار: بلوچ اسٹوڈنٹس آرگنائزیشن آزاد