برجائیں اپریلءِ ماہءَ گلءِ بیست ءُ سیمی بنجاہی لس مجلس بیادءِ لمہء وتن کریمہ بلوچ ءُ آجوئیءِ نمیران ءُ بنامءِ بیگوائیں بلوچانی نامءَ اڈ دیگ بیت۔
بی ایس او آزاد
بلوچ اسٹوڈنٹس آرگنائزیشن آزادءِ بنجاہی جارکشءَ رسانکدرءَ شنگ کتگیں وتی یک درشانےءَ گشتگ کہ بی ایس او آزادءِ ششمی بنجاہی مجلسءِ دیوان بنجاہی کماش ابرم بلوچءِ سروکیءَ برجم دارگ بوتگ۔ دیوانءَ کارگشاد اھوال، نگدی نشست، راھبند (آئین سازی)، تنظیمی امور ءُ آوکیں گامگیجءِ ایجنڈاہانی سرءَ گپ ءُ تران کنگ بوتگ۔ بنجاہی مجلسءِ دیوانءِ بندات بلوچ نمیرانانی یاتءَ دو ساھتءِ بیتواریءَ گوں کنگ بوتگ۔ دیوانءِ کلیں ایجنڈاہانی سرءَ بنجاہی مجلسءِ باسکانی میانءَ گوں دلجمی ءُ الکاپیءَ گوں گپ ءُ تران کنگ بوتگ۔
بنجاہی کماش ابرم بلوچءَ دیوانءَ تران کنانءَ گشت کہ وھد ءُ جاورانی لوٹ مدام مٹ بوان بنت ءُ وھدے کہ یک راجے چہ جنگی جاوراں گوزگءَ بیت گڑا پرائیءَ ھمک وھد ءُ پاس بے کساس ارزشت دار انت۔ مرچی ھما ڈُبّہ ءُ زمہ واری کہ بلوچ ورنا ءُ ھاسکار بی ایس او آزادءِ باسکانی کوپگان انت آ باز سنگینیں زمہ واری انت کہ اودءَ یک نیمگے آ گوں زورآوریں دژمنءِ زوراکی ءُ ناروائیانی دیمپان انت کہ دومی نیمگءَ راجی آجوئی جہدءَ را گیش فعال کنگ ءُ دیمءَ برگءِ زمہ واری آھانی کوپگان انت۔ ھرچ راجےءِ گورءَ ورنا آئیءِ سرین ہڈءِ بستار دار انت ءُ پاکستان چہ گوستگیں بازیں سال ءُ مدتاں بلوچ راجءِ سرین ہڈءِ سرءَ زورآور اِنت ءُ آئیءَ نزور ءُ ھلاس کنگءِ جہدءَ انت کہ آئیءِ سوبءَ مدام بی ایس او آزادءِ باسک آئیءِ زوراکیانی زدءَ بوتگ ءُ است انت، بلے باسما ءُ زانشتی بلوچ ورناہاں بی ایس او آزادءِ پلیٹ پارم مہکم داشتگ ءُ زورآورءَ را تچکءَ اے کلوہ داتگ کہ بلوچ ورنا کدی اوں آئیءِ سرجہلی ءُ گلامیءِ زندمانءَ نہ من انت۔
کماش ابرم بلوچءَ دیمترءَ گشت کہ بلوچ ورناہاں چہ سیاستءَ دور دارگ ءُ آھاں چہ بلوچ راج ءُ گلامیءِ بستارءَ ناآشنا کنگءِ ھاترءَ اے وھداں زورآور جتائیں پندل سازگءَ اِنت ءُ اے ردءَ آئیءَ بلوچستانءِ ھند ءُ دمگاں ھندی کاس لیس گیش دیمءَ آورتگ انت۔ ءُ دومی نیمگءَ بلوچ ورناہانی میانءَ راجی سما ءُ آگہی ءُ باھندءِ گندگءِ گوما دژمنءِ پوج ءُ آئیءِ چیریں ادارہاں بلوچ ورناہانی زورانسری گار ءُ بیگواہی ءُ آھاں وتگڑیں میڑانی نامءَ کشگ ءُ چگل دیگءَ گیشی آورتگ۔ چہ زورآورءِ نیمگءَ سی ٹی ڈیءِ ڈولیں ناشرکاریں لشکریانی دیمءَ آرگءِ مول اوں بلوچ ورناہانی میانءَ ترس ءُ بیمےءِ پاد کنگءِ یک بے سوبیں کوشستے۔ بلوچ زالبولانی سیاسی ءُ پکری بنیاتاں سمائی ءُ آشوبی عملانی بہر بوگءِ ترسءَ نوں دژمن سرجمیں بلوچستانءَ بلوچ زالبولاں اوں نشانگ جوڑ کنگءَ انت۔
چوشکہ یک نیمگے زلم ءُ زوراکی گڑا دومی نیمگءَ جتائیں پندلانی وسیلہءَ لس مہلوک ءُ ھاسکار بلوچ ورناہاں راجی جنزءِ باروءَ رد ھیالی پیداک کنگءِ ھاترءَ جہد کنگ بوگءَ انت کہ وھدءِ لوٹانی ردءَ چرایاں آشنا بوگ ءُ آھانی مکابلہ کنگی انت۔ ادءَ کہ یک نیمگے دژمن وتی تاکت ءُ جتائیں پندلانی وسیلہءَ بلوچ راجی جہدءِ ھلاپءَ لانکبند اِنت گڑا ھمدءَ دومی نیمگءَ رد آشوبی تاکت ھمک روچءِ ردءَ راجی جہد ءُ جنزءَ گوں ھمگرنچیں گَل ءُ جہدکارانی ھلاپءَ پروپیگنڈاہانی بہر بوان انت، بی ایس او آزادءِ آشوبی باسکانی زمہ واری انت کہ آ مہلوک ءُ ھاسکار ورناہانی میانءَ زورآورءِ سافٹ شوربندی ءُ رد آشوبی روشتاں دیمءَ بیار انت ءُ آجوئی جہدءِ مہکم کنگءِ ھاترءَ گوں تمردیءَ وتی کردءَ پیلو بہ کن انت۔
بنجاہی مجلسءِ دیوانءَ درائیں ایجنڈاہانی سرءَ دلجم ءُ الکاپیں گپ ءُ تراناں پد بنجاہی لس مجلسءِ مدتءِ سرجم بوگءِ گوما بنجاہی مجلسءَ بی ایس او آزادءِ بیست ءُ سیمی بنجاہی لس مجلس بیادءِ لمہ وتن کریمہ بلوچ ءُ آجوئیءِ نمیران ءُ بنامءِ بیگوائیں بلوچانی نامءَ برجائیں اپریلءِ ماہءَ اڈ دیگءِ پیسلہ زرت۔ کماش ابرم بلوچءَ بنجاہی لس مجلسءَ آوکیں گچینیں کونسلرانءَ ڈاہ دات ءُ گشت کہ آ گلءِ چہ درستاں مستریں دیوانءِ بہر زورگءَ پیداک انت پمیشکہ آ گلءِ چست ءُ ایر ءُ پروگراماں مہکم ءُ فعال کنگءِ ھاترءَ بنجاہی لس مجلسءَ گوں دلجمیں تیاریءَ گوں بیا انت۔