بی ایس او آزات نا بیست و سئے میکو بنجاہی کونسل سیشن سرسہبی ئٹ ایسر، درپشان بلوچ بیدس مونتس آن چیئرمین اندن زروان بلوچ سیکرٹری جنرل گچین مس

بلوچ ورنا تے سائنسی علم و تحریک ءِ ادارتی تلہ غا گیشتر سوگوْ کننگ نا گرج ءِ۔

پوسکن گچین مروک چیئرمین درپشان بلوچ

بلوچ اسٹوڈنٹس آرگنائزیشن آزات نا بنجاہی ترجمان گل ئنا سرسہب کونسل سیشن نا گڈیکو دے ئنا احوال ءِ میڈیا ٹی شینک کریسہ پارے کہ بی ایس او آزات نا بیست و سئے میکو بنجاہی کونسل سیشن بیاد لمہ ءِ وطن بانک کریمہ بلوچ و شہدائے آجوئی و پِن آ بلوچ بندی تا اینو مسٹمیکو دے سرسہبی ئٹ ایسر مس ہرا ٹی درپشان بلوچ بیدس مونتس آن چیئرمین اندن زروان بلوچ بیدس مونتس آن سیکرٹری جنرل گچین مس۔

بیست و سئے میکو بنجاہی کونسل سیشن ئٹ بنجاہی کماش نا تران، آئین سازی، سیکرٹری رپورٹ، نغدکاری نشست، تنظیمی کاریم، جہانی و علاقائی سیاسی حالیت، آئندہ لائحہ عمل و کماش نا گڈیکو تران نا ایجنڈا تیا شرہ مس۔

بنجاہی کونسل سیشن نا اولیکو دے بنجاہی کماش نا تران، آئین سازی، سیکرٹری رپورٹ، نغدکاری نشست نا ایجنڈا تیا شرہ مس۔ اندن ارٹمیکو دے تنظیمی کاریم، جہانی و علاقائی سیاسی حالیت و آئندہ لائحہ عمل نا ایجنڈا نا اسہ بشخ ئسے آ شابیت شرہ مس۔ اینو بنجاہی کونسل سیشن نا ایسری دے آ آئندہ لائحہ عمل نا ایجنڈا ٹی اِرا سالہ تنظیمی پروگرام ءِ سوگوْ دروشم تننگ آن گڈ ساڑی بنجاہی ساخت ءِ ایسر کریسہ الیکشن کمیشن ءِ عمل ئٹ ہتنگا۔ مسکوہی بنجاہی سیکرٹری جنرل مہرزاد بلوچ نا سروکی ٹی مُسہ باسکی الیکشن کمیشن نا گچین کاری مس ہرافک ساف گچین کاری تے اڈ تسر۔

گچین کاری عمل نا ایسر مننگ آن گڈ الیکشن کمیشن نا سروک پوسکن گچین مروک بنجاہی کابینہ و بنجاہی کمیٹی نا باسک آتا پڑو کرے ہرا ٹی درپشان بلوچ بیدس مونتس آن چیئرمین اندن زروان بلوچ بیدس مونتس آن سیکرٹری جنرل گچین مس۔

گچین کاری عمل نا ایسر مننگ آن گڈ بند کوٹی مجلس نا کاروائی ءِ ایسر کریسہ سوغند ارفنگ نا مجلس اڈ تننگا ہرا ٹی پوسکن گچین مروک بنجاہی کابینہ و سینٹرل کمیٹی نا باسک و کونسلر آتیان مسکوہی کماش ابرم بلوچ سوغند ہلک۔

سوغند ارفنگ نا مجلس آن تران کریسہ مسکوہی کماش ابرم بلوچ پارے کہ اومیت کیوہ بی ایس او آزات نا پوسکنا قیادت راجی تحریک ئٹ بلوچ ورنا تا اواری ءِ پین سوگوْ کرو و راجی تحریک نا پوسکن خواست آتا رد ئٹ بی ایس او آزات نا انقلابی کیڈر تا تربیتی عمل نا ذمہ واری تے سر ایتو۔ بی ایس او آزات کن دا سخت حالیت آتیٹ دا انقلابی عمل ءِ برجاء تخنگ و سوگوْ کننگ یخین ئٹ بھاز مرو ولے تینا پانزدہ سالہ سیاسی زند ئنا آزموندہ آن پاننگ کیوہ کہ بی ایس او آزات نا انقلابی کیڈر تیٹ ہر وڑ ئنا سخت و گندہ غا حالیت آتے مون تننگ نا جیرت ارے۔ بی ایس او آزات نا قیادت و کیڈرز آک تنظیمی باسک و لیڈرشپ تا شہادت، زندان، داڑے اسکان کہ درزن آ جشوک جوْن تے ہم ارفینو ولے اوفتا سوچ و فکر و عمل ئٹ تضاد اسُل خننگتنے۔ بی ایس او آزات نا کیڈرز آک نہ بیرہ دژمن نا بے دادی و زوراکی تون مون تسنو بلکن تہہ ئنا جیڑہ تے ہم سگانو ولے راجی مسخت، سینٹرل ڈیموکریسی نا تنظیمی وڑ جمہوریت، تنظیمی خود مختاری و آزات ہند آ اسُل دک بننگ الیتنو و اندا تنظیمی سرسہبی تا اہم سوب آکو و اندا وڑ ئنا فکر ئتون اوار ہی بی ایس او آزات اسہ سوگوْ ادارہ ئسے نا دروشم ئٹ فعال مننگ کیک۔

الیکشن کمیشن ءِ ایسر کننگ آن گڈ گل ئنا ذمہ واری تے پوسکنا بنجاہی کمیٹی نا دوٹی تننگا۔ ہراڑان گڈ پوسکن گچین مروک چیئرمین درپشان بلوچ بنجاہی کونسل سیشن ئٹ تران کریسہ پارے کہ تیوی غاتیان مالو ای کونسل سیشن نا سرسہب اڈ تننگ آ بی ایس او آزات نا کونسلر و خاص وڑ ئٹ مسکوہی قیادت ءِ داد ایتوہ کہ اوفک دا سخت انگا وخت ئٹ ہم کونسل سیشن نا اڈ تننگ ءِ یخینی جوڑ کرینو۔ انقلابی ادارہ تیکن حالیت آک اُسل جوان مفسہ و بی ایس او آزات کن دا حالیت آک اونا بنائی دے تیان ساڑی ءُ اندا خاطران گل ئنا مسخت ساندہ عظیم و کاریمک تاریخی مسنو۔

بی ایس او آزات نا انقلابی سنگت آک! جہد، ہمت و قربانی تیان تنظیمی قیادت اسکان سر مننگ نا عمل ہراڑے اسہ عظیم ءُ شرف ئسے ہموڑے دا اسہ بھاز بھلو ذمہ واری اس ہم ارے ہرادے سنگت آک تینا کوپہ تیا ارفینو۔ ذاکر مجید ہرا تدوکا 14 سال آن زندان ئٹ بند ءِ، کمبر چاکر کون آ عظیم ورنا ہرا ٹارچر سیل آتیٹ ہم دژمن ءِ دا باور کرفنگ ئٹ سرسہب مس کہ نن شہادت ءِ قبول کننگ کینہ ولے غلامی ءِ آخہ، زاہد بلوچ کون آ عظیم راہشون اینو زندان ئٹ بند ءِ، دا کل عظیم قربانی تے اندا خاطران سگار تانکہ بی ایس او آزات ہر حالیت ئٹ سوگوْ مرے۔ اندا سوب پوسکن گچین مروک سنگت آتے پاننگ خواہوہ کہ دا چنکو ذمہ واری اس اف ہرا ننا کوپہ غاتیا ٹے۔ اومیت کیوہ کہ گل ئنا بروک اِرا سالہ کاریم تے سوگوْ و متحرک دروشم ئٹ سر تننگ کن تنظیمی سنگت آک ہچو قربانی ئسے آن پدی مفرور۔

پوسکن گچین مروک کماش درپشان بلوچ پارے کہ بلوچ راجی تحریک ءِ گیشتر سوگوْ کننگ و فعال کننگ کن ادارتی تلہ غا پین کاریم کریسہ جہد ءِ ترند کننگ نا گرج ءِ۔ ننا جنگ اسہ بندغ یا راج ئسے تون اف بلکن ریاستی تلہ غا جوڑ کروک سوگوْ ادارہ آتون ءِ ہرافتا زی آ ہر سال کھرب آ پیسہ غاک کھپفنگ مریرہ و ننا جنگ اندن آ ہزار آ ادارہ آتتون ءِ ہرا دا ریاستی ڈھانچہ ءِ تینا سواد آتے کن زندہ تخانو۔ دا کوزہ ءِ ایسر کننگ کن ادارتی سیاست و جہد ءِ پین ترند کریسہ انفرادی سوچ ءِ تحریک آن کشنگ نا گرج ءِ۔ بلوچ ورنا تے بیرہ جوزہ آتون آخہ بلکن عقل و لائخی تون دا تحریک ءِ تینا کننگ نا پارہ غا ہنوئی ءِ و داٹی اوار تموئی ءِ۔ سوگوْ ادارہ غاک، پوسکنا سائنسی صلاحیت و لائخی تیٹ ہی بلوچ راجی تحریک ءِ منطقی وڑ ئٹ ایسری ئسے آ سر کننگ مریک۔ بلوچ راجی تحریک دا وخت ادارہ تا دروشم ئٹ ساڑی ءِ اندن اسہ ریاست ئسے نا برخلاف آجوئی نا جنگ و اونا سرسہبی کن راجی تحریک ءِ ریاست نا متبادل ادارہ نا گرج مریک۔ بلوچ ورناک تینا لائخی تا زی آ بےمٹ کاریم کریسہ راجی تحریک ٹی بنجاہی ادارہ نا بنماس ءِ تخنگ نا زی آ پام ایتر، اسہ آزات، خودمختار بلوچستان ہی بلوچ راجی پجار، بولی، دود و ربیدگ، سائل و وسائل نا رکھ و اسہ شرحال ءُ وخت ئسے نا ضامن مننگ کیک۔

کماش تینا تران ئٹ ودیک پارے کہ بلوچ ورنا تے 21 میکو کرن نا گڑاس سخت گواچنی تیان چاہندار مروئی تمو کہ اوفک اسہ ہندنو ریاست ئسے نا برخلاف جنگ کننگ ءُ ہرا اسہ پارہ غان امریکہ کون آ سامراج نا سنگت تو ایلو پارہ غان چین کون آ بیرہ پن ئنا کمیونسٹ ملک ئنا سیوتی ریاست نا برخلاف راجی آجوئی نا جنگ ءِ کننگ ءُ، نن سرد جنگ ئنا بائی پولر آرڈر آن پیش تمیسہ اسہ اندنو وخت ئسے ٹی پیہانن ہراڑے یونی پولر کیپیٹلسٹ سسٹم نا تہٹی تینے سوگوْ کننگ نا ءِ، بلکن اینو نا وخت ئٹ سوگوْ، ترند، باصلاحیت و عظیم تاغت آن پر راج آک ہی دا جہان ٹی ہمدڑدی و مُخ تفی نا لائخ جوڑ مسنو۔ نزور انگا راج آک راجی آجوئی نا دعویدار مننگ کپسہ بلکن تاغت و صلاحیت آتیٹ ہی راج آک آزات و سوگوْ مننگ کیرہ۔ ننے تینا ذہن آتیان محکومیت نا خیال ءِ کشیسہ اسہ عظیم تاغت اس جوڑ مننگ نا سوچ ئتون اوار جہد کننگ نا گرج ءِ۔ بلوچ راجی تحریک ءِ دا وخت پوسکنا صلاحیت آتا گرج ءِ ہرافتیٹ او ریاست نا ادارتی جوڑشت ءِ پرغیسہ اونا متبادل بلوچ ریاستی ڈھانچہ اس جوڑ کے ہراڑکن بیرہ راجی جوزہ بس اف بلکن داڑکن صلاحیت و لائخی نا بکار ءِ ہرا دا ریاستی ڈھانچہ نا گچین ءُ متبادل اس مننگ کے۔ ننے بڑز بڑز ئنا سوچ و فکر و جوزئی نعرہ آتیان پیش تمیسہ گواچنی بنداو آ اسہ ریاست ئسے نا جوڑ مننگ نا عمل ءِ خواننگ نا کنڈا ہنوئی تمو۔ دا پوسکنا وخت ئٹی بے مٹ آ صلاحیت و ہنر آتیان بیدس کوزہ گیر نا برخلاف جنگ مننگ کپک ہرا پوسکنا ازباب آتیان پر و کیہی ادارہ تا زی آ جوڑ مروک ءِ۔ بلوچ تحریک ءِ گیشتر بنجاہی ادارہ سازی (Central institutionalization) نا کنڈا دننگ نا گرج ءِ، انتئے کہ ننتون مون پہ مون اسہ بندغ یا بندغ تا لشکر اس اف بلکن کیہی ادارہ آتیٹ جوڑ مروک اسہ ریاستی ڈھانچہ ئسے۔ پوسکنا خواست آتون ہمگام ادارہ غاک ہی اوفتا مونٹی سلنگ کیرہ و اوفتا توڑ ءِ کشنگ کیرہ۔ ورنا تے روایتی وڑ تیان پیش تمیسہ پوسکن سائنسی، علمی، انقلابی لائچی و صلاحیت آتیٹ تحریک ٹی اوار مننگ نا گرج ءِ۔

او پارے کہ جنگ ئنا حالیت آتا گواچی مروک راج آتا تہٹی چاگڑدی و انقلابی بدلی تیٹی ورنا تا کڑد بنماسی مریک۔ بلوچ ورناک دا انقلابی وخت ئٹ بیرہ منہ زاتی مفاد آتے کن تینا لائخی تے پارلیمانی پارٹی، بیرہ پن ئنا میر و معتبر و سرکاری زرخرید آتون بہا کپس و تینا انفرادی زند ئٹی اختہ مفس بلکن راجی و زمینی راستکی تا خواست آتے ہریسہ تینا لائخی تے کاریم ئٹ ہتیر۔ دا گواچنی آن نمن مننگ کپک کہ بلوچ دا وخت غلامی نا زند اس گدریفنگ ءِ۔ بلوچ کون آ جنگ ئنا حالیت ئٹ مروک و غلام راج ئتون سیالی تخنگ آن پد مغربی کون آ آزات زند ئنا تغ خننگ آمخ آتا بہشت ئٹ رہینگ نا بریبر ءِ۔ بلوچ راجی تحریک نا خواست آتے مونا تخیسہ بلوچ ورناک تینا بروکا وخت ئنا فیصلہ ءِ کیر۔

او پارے کہ کوزہ گیر ریاست تدوکا ہفتاد سال آن بلوچ ورنا تے پد توننگ ٹی اختہ ءِ۔ وختس ظلم، بے دادی و زوراکی ئٹ تو وختس جوفہ نا کمک ئٹ بلوچ ورنا تے گمراہ کننگ نا ہر وڑ ئٹ جہد کریسہ ءِ۔ دا کوشست آتے ٹی بیرہ دژمن آخہ بلکن ہمو بلوچ آک ہم اوار ءُ ہرا اولیکو دے آن بلوچ راجی نظریہ نا سودا ءِ کرینو۔ ولے دا اسہ سلوک گواچنی ئسے کہ تاریخ اوفتا ڈوہ دار کڑدار کن اوفتے اسل بشخپرو ولے دا وخت اسہ گڑا ئسے نا بھاز گرج ارے کہ بلوچ ورناک خاص وڑ ئٹ بی ایس او آزات نا انقلابی کیڈرز آک تینا نن و دے ءِ اسٹ کریسہ بلوچ الس و ورنا تے تحریک نا خواست اہمیت آن سرپند کیر۔

بلوچ شہید آتا عظیم وارث آتے پامدار کریسہ پاننگ اُٹ کہ راجی آجوئی نا مزل و سرسہبی آن بیدس بلوچ آتا ہچو بروک وخت اس اف، دا ڈغار نا آجوئی کن ہزار تا کچ ئٹ ورناک تینا ساہ ءِ ندر کرینو و لس الس عظیم ءُ  نسخان سگانے ولے جہان نا تاریخ اندا شاہدی ایتک کہ راج آتا جوڑ مننگ نا عمل اندا وڑ سخت و تکلیف تروک مریک۔ دنو ہچو شرحال ءُ راج اس اف ہرا سختی تیان بیدس راجی ریاست اس ٹہیفنگ کے۔ اینو ہزار آ بے اُرا و سختی تیان بُور بُور مروک بلوچ الس نا اومیت آک ننتون تفوک ءُ، اندا خاطران ننے ایمانداری ، خلوص نیت و انقلابی جوزہ آتون اوار دا کاروان نا سرسہبی کن تینا تیوہ تاغت آتے خرچ کروئی تمو۔

و پوسکن گچین مروک سیکرٹری جنرل زروان بلوچ پوسکنا تنظیمی زمہ واری تے دوئی مریسہ بی ایس او آزات نا بیست و سئے میکو بنجاہی کونسل سیشن بیاد لمہ ءِ وطن بانک کریمہ بلوچ و شہدائے آجوئی و پِن آ بلوچ بندی تا مجلس ءِ رسمی وڑ ئٹ ایسر کرے۔