بی ایس او آزات نا بیست و سئے میکو بنجاہی کونسل سیشن نا اولیکو دے ئنا احوال
تحریک ءِ اسہ خاص وڑ اسیٹ مونی دننگ نا جاگہ غا اودے جتا جہت آتا تہٹی سوگوْ کننگ نا گرج ءِ
چیئرمین ابرم بلوچ
بلوچ اسٹوڈنٹس آرگنائزیشن آزات نا بیست و سئے میکو بنجاہی کونسل سیشن بیاد لمہ ءِ وطن بانک کریمہ بلوچ و شہدائے آجوئی و پن آ بلوچ بندی تا ہڈ تننگانے۔ اینو 17 اپریل دو شمبے نا دے بلوچ شہید آتا یات ئٹ اِرا منٹ ئنا چُپی و بلوچ راجی ترانہ تون گل ئنا بنجاہی کونسل سیشن نا باقاعدہ بناء کننگا۔
بیست و سئے میکو کونسل سیشن نا اولیکو دے بنجاہی کماش نا تران، آئین سازی، سیکرٹری رپورٹ و نغدکاری نشست آ کونسلر آتا نیام ئٹ شابیت شرہ مس۔
بنجاہی کونسل سیشن نا اولیکو ایجنڈا بنجاہی کماش نا تران ئس ہراٹی کماش ابرم ابلوچ کونسلر آتون تران کریسہ پارے کہ دا خننگ ئٹ بھاز خوشی مننگ ءِ کہ بی ایس او آزات نا کیڈرز آک دا سخت انگا حالیت آتے ٹی ہم تیوہ وڑ ئٹ اومیت آن پر و ہر وڑ ئنا سختی تیان گدرینگسہ دا سخت انگا وخت ئٹ تنظیم نا کنڈان اڈ تروک دیوان کن تینا ہر کاریم ءِ پد تخیسہ داڑے ساڑی ءُ، ای بلوچ نظریہ نا زی آ عمل کروک غٹ سنگت آتے دا دیوان ٹی بخیرٹ پاوہ ہرا بیرہ دشمن نا دا غرور ءِ مش ئٹی اوار کتنو ہرا تدوکا اِرا دہائی آن بی ایس او ءِ نزور و ایسر کننگ نا کوشست آتے ٹی اختہ ءِ بلکن تیوہ ردانقلابی تاغت آتے کن ہم اسہ مثیل اس جوڑ کرینو، ہرا بی ایس او آزات نا عظیم راجی مسخت، نظریہ و اوفتا عمل و طریقہ کار نا زی آ ہور ارفیسہ بی ایس او نا بےسہبی و بروکا وخت ئٹ نزور و ایسر مننگ نا خُلیس نشان تریسہ بسنو۔ اینو بی ایس او نا انقلابی کیڈرز آتا ساڑی مننگ تون اوفتے دا کلہو تننگ خوائوہ کہ بی ایس او ہمر اینو سوگوْ ءِ اونا ہچو مثیل اف، بی ایس او بلوچ چاگڑد و تحریک ئٹ ہرا بدلی تے ہتنگ ءِ اوفک تاریخی و بروکا وخت ئٹ راجی آجوئی اسکان سر مننگ نا سوب جوڑ مرور۔
کماش ابرم بلوچ پارے کہ ننے تینا لٹریچر و خواننگ نا معیار ءِ بدل کروئی تمو، نن تدوکا بیست سال آن اسہ ہندنو لٹریچر اس خواننگ اُن ہرا برجاء وخت ئٹ ہچو معنہ اس تخپک۔ بلوچ ورناک تدوکا کیہی سال آتیان ہندنو تحریک و بندغ آتے خواننگ ءُ ہرافتا راج آک اینو یا تو غلام ءُ یا آجوئی نا ہلنگان پد تینا بروکا وخت ءِ ٹہیفنگ ٹی تیوہ وڑ ئٹ بےسہب مسنو۔ ہندا خاطران برجاء وخت ئٹ بلوچ ورنا تیکن دا بھاز المی ءِ کہ اوفک ہمو راج و بندغ (شخصیات) آتا بارو ئٹ خوانر ہرا پوسکن وخت ئٹی تینا راج آتے شرحالی آن سیر تسنو۔ اسرائیل نا وڑ انگا سرسہب ریاست آک ہرا اسہ کروڑ ئسے نا آباتی مننگ تون اینو جہان ئٹ تاغتور ریاست و عرب ملک آتا ہر وخت ئنا جلہو آتیان پد ہم سوگوْ و متحرک دروشم ئٹ ساڑی ءِ، دا وڑ انگا ریاست آتے دژمن آخہ بلکن آئیڈیل جوڑ کریسہ خواننگ مرے کہ ہرا بھاز کم وخت ئٹ امر بھس مروک یہودی تے دنو تاغت و قوت اس بشخار۔ اندا وڑ انگریز آتا غلام و افیوم ئٹ اسٹ چین ءِ اینو ماؤزے اراکان اراڑے سر کرے کہ اینو اود جہان نا سپر پاور تاغت آتے خن نشان تننگ ءِ بلکن داسا تینٹ تینا کوزہ کروک ءُ علاقہ جوڑ کننگ نا کوشست آتے ٹی اختہ ءِ ۔ ننے ظالم و مظلوم نا شرہ غان پیش تمیسہ بلوچ راجی مفاد آتا حق ئٹی سوچ خلنگ، پام و فکر و عمل نا گرج ءِ۔ یورپ تیوہ جہان ئٹ ہزار آ جنگ آتے کریسہ کروڑ آ بندغ آتے کسفے ولے اینو اود بندغی حق آتا چیمپیئن جوڑ مسنے۔ بلوچ اسہ عظیم ءُ تاغت آس جوڑ مننگ آن پد ہی تینا ہر گڑا ءِ دوئی مننگ کیک۔ تدوکا مسہ سال ئٹی ہنتس کہ نن گوہانن راجی تحریک نا نزوری و شکست نا دروشم ئٹ برجاء حالیت آتیان ہم گندہ مون تس اس مرو۔ ہمو راج کہ دا خطہ ٹی نوری نصیر خان نا راہشونی ٹی کل آن بھلا تاغت ئس اینو ارا سوب و بےسہبی تا سوب دا ہند آ سر مسنے، دانا زی آ بلوچ ورنا تے سوچ خلوئی و پام تروئی تمو۔ اسہ عظیم تاغت اس جوڑ مریسہ نن بندغی حق آتیان ہلیس مڈی تے اسکان تیوہ اختیار آتا زی آ تینا حق تخنگ کینہ۔
او پارے کہ بی ایس او بلوچ راجی تحریک نا اسکول ءِ ہراکان بلوچ ورناک و تحریک تون تفوک ہمت تخوکا سنگتاک تینا خیال، فکر و نظریہ ءِ خوانیسہ تحریک کن تینا تاغت آتے خڑچ کیرہ، بلوچ راجی تحریک نا اسکول مننگ نا رد ئٹ بی ایس او آزات نا تیوہ مجلس آتا بنداو بلوچ راجی تحریک و جہد ءِ سوگوْ کننگ نا زی آ مرے۔ بی ایس او نا وجود نا سیالی بلوچ راجی تحریک تونے، بلوچ راجی تحریک ہخس زیات سوگوْ و متحرک مرو بی ایس او نا کڑدار بلوچ چاگڑد ئٹ ہموخس زیات متحرک مرو۔ بی ایس او اسہ اسکول ئسے نا رد ئٹ بلوچ راجی تحریک نا سوچ ءِ ورنا تا تہٹی سوگوْ و متحرک کننگ کن مجلس اڈ ایتے۔
او پارے کہ بلوچ راجی تحریک ءِ سوگوْ و متحرک کننگ کن بلوچ ورنا تے فرض و زمہ واری نا نیام ئنا فرق ءِ سرپد مننگ المی ءِ۔ بلوچ ورناک فرض ئنا پن ئٹ راجی تحریک نا حوالہ ئٹ بیرہ فارمیلٹی ءِ پوروْ کپس بلکن بلوچ راجی تحریک نا جہد ءِ سوگوْ و متحرک کننگ کن بھلو زمہ واری تینا کوپہ تیا ارفر و سانبیر۔ ہراتم اسہ غلام اس جنگ ئنا حالیت ئٹ مریک و اونا زی آ اسہ کوزہ گیر و جابر ریاست ئسے نا کوزہ مریک گڑا اونا ورناک بیرہ فارمیلٹی نا رد ئٹ تینا فرض ءِ پوروْ کریسہ راجی جہد ءِ منطقی گڈسر اسکان سر کننگ کپسہ بلکن اوفتے راجی آجوئی نا جہد ءِ مسخت اسکان سر کننگ کن بھلو و اہم ءُ زمہ واری تینا کوپہ تیا ارفوئی مریک۔ دا وخت بلوچ راجی تحریک ءِ دژمن نا پارہ غان سخت چیلنجز آتا مون تس ءِ و ایلو پارہ غان چین ئنا وڑ انگا جہانی تاغت بلوچ راجی تحریک نا برخلاف متحرک مسنے و دا جنگ ئٹ پاکستان ءِ ہر وڑ ئٹ کمک کننگ ءِ، اودے بیرہ مالی آخہ بلکن ٹیکنالوجی و پین وڑ تیٹ ہم چین ئنا وڑ انگا ریاست آتا کمک دوئی ءِ۔ دن انگا حالیت آتے ٹی بلوچ ورناک بیرہ فارمیلٹی آخہ بلکن اوفتے تحریک تون تفوک اہم انگا زمہ واری تے مونا دروئی ءِ و تحریک ءِ گیشتر سوگوْ و متحرک کننگ ٹی تینا تاغت آتے خڑچ کروئی ءِ۔
او پارے کہ برجاء حالیت آتیٹ لائخ و صلاحیت تخوک ورناک ہی تحریک ءِ سوگوْ جوڑ کننگ کیرہ و دژمن نا مون ٹی متبادل تاغت جوڑ کننگ کیرہ، ہندا خاطران بلوچ ورناک و خاص وڑ ئٹ بی ایس او آزات تون تفوک ورناک راجی چاہنداری و فکر ئتون اوار تینا صلاحیت آتا زی آ ہم کاریم کیر و ہرا ورناک ہرا فیلڈ ئٹی گیشتر صلاحیت تخنگ کیرہ اوڑا پام ایتر و بلوچ راجی تحریک ئٹ مستی ہنیسہ او فیلڈ ئٹی سوگوْی ئٹ کاریم کیر۔ دا لائخ و صلاحیت تخوک ورنا تا کرن ءِ ہرا ورناک بلوچ راجی تحریک کن تینا ساہ اسکان ندر کننگ کن تیار مننگ کیرہ گڑا اوفتے کن تینا صلاحیت آتا زی آ کاریم کننگ ہم کبین تمپک، ہندا خاطران دا ہیت ئنا خیال تخنگ گیشتر المی ءِ کہ بلوچ ورناک جوزہ و تحریک تون اُست ئٹ سیالی تخنگ تون اوار تحریک نا جتا انگا بشخ آتے سوگوْ و متحرک کننگ کن تینا صلاحیت آتیا بھاز کاریم کیر و اوفتے برجاء وخت ئنا خواست آتا رد ئٹ مونا ہتیر تانکہ اسہ سوگوْ ءُ تحریک اس جوڑ مننگ کے۔
او پارے کہ وخت ئتون اوار بلوچ چاگڑد ئٹ بیدس انقلابی تاغت آک دے پہ دے آن سوگوْ مریسہ ءُ و چاگڑد نا تہٹی اوفتا رویہ غاک منفی زیم ودی کننگ ءُ اندا خاطران بلوچ ورنا خاص وڑ ئٹ بی ایس او آزات اسہ اندنو ریڈیکل ادب اس درستی راستی کرفے ہرانا برجاء تحریک خواست تخک۔ دا بیدس انقلابی و رد انقلابی تاغت آتا منفی رویہ تے ایسر کننگ کن بی ایس او آزات ءِ اسہ سوگوْ و ریڈیکل ادب ئسے ودی کننگ نا گرج ءِ ہرا دا منفی رویہ تے ایسر کننگ کے۔ کس دادے ننا بے بختی پائے یا بے علمی ولے داڑے دن انگا بندغ آک ہر وخت ساڑی مسنو ہرا تینا مطلب نا وے رسینگ و اُست خواہی تا پوروْ مفننگ نا سوب ساندہ تحریک و گل آتا برخلاف کاریم کرینو۔ دن انگا بندغ آک تحریک کن زار ءُ ہرا بیرہ تینا اُست خواہی تا پوروْ مفننگ و تینا وڑنگ و وڑپننگ نا بنداو آ تحریک و گل ئنا برخلاف مریسہ اندنو کاریم بناء کیرہ ہرافتا منفی زیمک سیدھا تیوہ غا تحریک آ تمیرہ اندا خاطران دن انگا رویہ و بندغ تا منفی کاریم تے ایسر کننگ کن بی ایس او آزات نا کنڈ آن بلوچ ورنا تے اسہ سوگوْ و ریڈیکل ادب اس تننگے ہرا بلوچ ورنا تا گواچن وڑ ئٹ ذہن سازی ءِ کننگ کے۔
او گیشتر پارے کہ بی ایس او آزات کن غٹ ٹولیک شرف مند ءُ ہرا دا وخت بلوچ راجی تحریک تون تفوک ءُ۔ بی ایس او آزات نا بروک قیادت بلوچ تحریک نا تہٹی اسہ اندنو رویہ اس ودی کے ہرانا تعلقداری ہچو خاص بندغ یا تپہ ئسے تون مف بلکن او اشتماعی وڑ ئٹ تیوہ غا تحریک کن مرے۔ بی ایس او آزات بلوچ راجی تحریک کن اسکول نا وڑ ءِ اندا خاطران اسہ اسکول ئسے نا ڈول بی ایس او ءِ تینا تیوہ تاغت ءِ بیرہ راجی تحریک ءِ سوگوْ کننگ کن خڑچ کروئی تمو۔ بی ایس او اسہ گل ئسے نا وڑ ہچو خاص ٹولی یا پارٹی ئسے نا نمائندہ اف بلکن بلوچ ورنا تا زی آ راجی تحریک تون تفوک غٹ ٹولی و اشتماعی وڑ ئٹ تیوہ تحریک نا نمائندہ گل ءِ۔ اندا سوچ و فکر ئتون اوار بی ایس او سوگوْ وڑ ئٹ ورنا تا زی آ کاریم کننگ کیک و جُوان وڑ ئٹ تحریک آ تینا پام ءِ تننگ کیک۔
کماش ابرم بلوچ گل ئنا بیست و سئے میکو کونسل سیشن ئٹ بی ایس او نا کیڈر آتون تران ئٹ ودیک پارے کہ بلوچ ورناک دژمن ءِ اسہ خاص پارہ و وڑ اسیٹ خواننگ نا جاگہ غا اودے جتاء ڈسکورس و پارہ غاتیان خواننگ نا کوشست کیر و دانا جاچ ءِ ہلیر و دا لڑ ئٹ راجی تحریک ءِ ہم اندا دروشم ئٹ سوگوْ و تالان کننگ نا جہد کیر۔ اسہ خاص زاویہ و وڑ اسیٹ دژمن ءِ خواننگ ورنا تیکن بھیم ئسے انتئے کہ ریاست دا وخت اسہ خاص وڑ اسیٹ بلوچ تحریک نا برخلاف کاریم کننگ اف بلکن او کیہی وڑ تیٹ بلوچ راجی تحریک ءِ ایسر کننگ کن کاریم کننگ ءِ و دے پہ دے آن گیشتر وڑ تیا روان نظر بریک اندا خاطران بلوچ ورناک دژمن ءِ جتاء وڑ ئٹ خوانیر و پدا تحریک ءِ ہمو وڑ ئٹ جتاء حکمت عملی تا رد ئٹ سوگوْ کیر۔ تحریک تون تفوک بندغ تیکن دا بھاز اہم ءِ کہ او پوسکن حالیت و سائنسی وخت ئنا خواست آتے سرپد مریسہ اندا سوچ و فکر ئنا رد ئٹ جہد ءِ سوگوْ کننگ کن تینا تاغت ءِ خڑچ کیر ہرانا گچین نتیجہ غاک پیش تمنگ کیرہ۔
کماش ابرم بلوچ تینا تران نا ایسر ئٹ پارے کہ پوسکنا قیادت ءِ اندا کلہو ءِ ایتوہ کہ او ہر اِرا سال ئنا کونسل سیشن ئٹ بی ایس او ءِ اِرا گام مونی دننگ کن کاریم کیر، بی ایس او آزات نا پالیسیک ارتقائی نہ بلکن انقلابی مریر و انقلابی حکمت عملی و پالیسی تا رد ئٹ کاریم کننگ مرے۔ بی ایس او ءِ انقلابی عمل و اصول تا رد ئٹ ورنا تے بش کروئی ءِ ہرا دا نتیجہ تے تننگ کیر ہرانا اومیت آتے بی ایس او تون راجی تحریک تون تفوک بندغ آک و الس تخک۔
کونسل سیشن نا ارٹمیکو ایجنڈا آئین سازی ئس ہرا ٹی سیکرٹری جنرل نا کنڈ آن آئینی کمیٹی نا سَلاہ تے مونا ہتنگا اندن کونسلر تا کنڈ آن جتاء سلاہ تے مونا ہتنگ آن گڈ امنائی وڑ ئٹ آئینی اصلاح ہتنگا۔ دیوان مسٹمیکو ایجنڈا سیکرٹری رپورٹ ئس ہرا ٹی بنجاہی سیکرٹری جنرل مہرزاد بلوچ مسکوہی اِرا سال ئنا بنجاہی رپورٹ ءِ مونا ہیس و اوڑا کونسلر تا نیام ئٹ شابیتی شرہ مس۔ اندن اینو نا دیوان گڈیکو ایجنڈا نغدکاری نشست ئس ہرا ٹی کل کونسلر آک بشخ ہلکر و کمبتی و ردی تے پٹنگ مس۔ اندن بنجاہی کونسل سیشن نا ایلو ایجنڈا تیا بروک دے تیٹ شرہ مرو۔