مرگاپ نا شہید آتے خیسن سلام پیش کینہ۔

بی ایس او آزات

بلوچ اسٹوڈنٹس آرگنائزیشن آزات نا بنجائی ترجمان مرگاپ نا شہید واجہ غلام محمد، شیر محمد و لالا منیر ءِ اوفتا چانڑدہمیکو برسی آ دروت ندر پیش کریسہ پارے کہ شہید غلام محمد و سنگت آتا شہید مننگ بلوچ راجی تحریک آزاتی کن اسہ رژنا ءُ کسر ئنا ہند تخیک ہراتم کوزہ گیر عظیم سیاسی راہشون آتے زوراکی ئٹ بیگواہی نا گواچی کریسہ اوفتا جشوک جون تے مرگاپ نا ہند آ خسیسہ تیوہ بلوچستان ٹی ” خلنگ و بٹنگ ” پالیسی نا بناء کننگا ہرا دائسکان اسہ دہائی ئسے نا گدرینگ آن گڈ ہم برجاء ءِ۔

ترجمان نا پاننگ ئس کہ غلام محمد بلوچ راجی آزاتی نا جہد ئٹ تحریک ٹی متحرک سیاسی ٹولی بلوچ نیشنل موومنٹ نا سروک و راہشون نہ بلکن تیوہ بلوچستان ٹی اسہ اہم سیاسی راہشون ئسے نا حیثیت تخاکہ ہرادے کوزہ گیر فورسز 3 اپریل 2009 آ تُربت آن اونا وکیل کچکول ایڈوکیٹ نا چیمبر آن زوراکی ئٹ بیگواہی نا گواچی کرے و 5 دے آن گڈ اونا جشوک جون ءِ ایلو ہڑتوما بیگواہ سنگت و بلوچ راہشون شیر محمد و لالا منیر تون اوار مرگاپ ئٹ دوئی کننگا۔ پاکستانی فورسز کارندہ آک غلام محمد و سنگت آتا جشوک جون تے خسنگ تون اوار بلوچستان ئٹ خلنگ و بٹنگ نا اِرا پالیسی تا بناء کریر ہرا اینو اسکان برجاء ءِ۔ واجہ غلام محمد نا شہادت آن ہرا خالی آ جاگہ ودی مسونے اودے پر مننگ ئٹ بلکن صدیک لگیر ولے اسہ عظیم انقلاب ئسے کن عظیم قربانی اولیکو شڑط مریک۔ غلام محمد نا شہادت بلوچ انقلاب و آزاتی نا جہد اکن ہمو عظیم قربانی تیٹ اوار ءِ ہرا ہر اسہ تحریک کن الّمی مریرہ۔ مرگاپ نا شہید آک بلوچ الس آ دا پاش کریر کہ اوفتا گواچن آ دژمن دیر ءِ و راجی آزاتی نا جہد انتئے المی ءِ۔ سنگت آک راجی آزاتی نا جہد ءِ ادارتی بنداو آ سوگوْ و متحرک کننگ ئٹ بنجاہی کڑد سر تسر و ایسری ساہ اسکان ادارہ تے سوگوْ کننگ ئٹ اختہ ئسر۔

ترجمان پارے کہ مرگاپ نا شہید آک ہراڑے اسہ کنڈان بلوچ الس ءِ پاکستانی کوزہ نا گواچن آن خبڑدار کریر تو ارٹمیکو پارہ غان الس نا تہہ ئٹ بیرہ پن ئنا سیاسی ٹولی تا گواچن ءِ ہم پاش کریر ہرا جمہوری سیاست نا دعویدار و پاکستانی ملٹری نا اشارہ آتیا چلوک آ پارلیمنٹ ئٹ تولیسہ ہراڑے اسہ کنڈان دژمن نا کمکار جوڑ مسونو ہموڑے ارٹمیکو پارہ غا بلوچ آتا حق آتے جمہوری وڑ ئٹ دوئی کننگ نا چم کننگ ءُ۔ واجہ غلام محمد بلوچ الس آ پاش کرے کہ بلوچ راجی تحریک و اسہ آزات و خودمختیار بلوچستان آن بیدس بلوچ راجی پجار و مال و مڈیک ہچو وڑ اسیٹ رکھوک مروفس۔

ترجمان تینا بیان نا ایسر ئٹ پارے کہ شہید آتا فلسفہِ قربانی اسہ آزات و خودمختیار ڈغار نا خواجہ مننگ ءِ۔ نن شہید آتا عظیم قربانی تیا اوفتے دروت ندر پیش کینہ و اندا دے ئنا رد ئٹ دا سوگوْ ارادہ کینہ کہ بلوچ ڈغار نا آزاتی کن جہد برجاء تخنگو و دا عمل ئٹ اسہ ہم قربانی ئسے آن پدی مننگپرو۔