پریل نا اندا تو ئٹی تنظیم نا بیست و سئے میکو بنجاہی کونسل سیشن بیاد لمہ ءِ وطن بانک کریمہ بلوچ و شہدائے آجوئی و پن آ بلوچ اسیران آتا اڈ تننگ مرو۔
بی ایس او آزات
بلوچ اسٹوڈنٹس آرگنائزیشن آزات نا بنجاہی ترجمان میڈیا غا شینک کروک تینا اسہ بیان ئسے ٹی پارے کہ بی ایس او آزات نا ششمیکو سینٹرل کمیٹی اجلاس چیئرمین ابرم بلوچ نا کماشی ٹی اڈ تننگا۔ اجلاس ٹی سیکریٹری رپورٹ، تنقیدی نشست، آئین سازی، تنظیمی ویل و بروکا کاریم تا ایجنڈا نا زی آ شرہ مس۔ سینٹرل کمیٹی اجلاس نا بنا ءِ بلوچستان نا شہید آتا یات ئٹ اِرا منٹ نا چپی تون مس۔ اجلاس ئٹ تنظیم نا گچین کروک ایجنڈا غاتا زی آ سینٹرل کمیٹی نا باسک آتا نیام ئٹ شابیتی و سیر ءُ شرہ ئس مس۔
اجلاس آن گپ و تران کریسہ بنجاہی کماش ابرم بلوچ پارے کہ وخت و حالیت آتا خواست آک ساندہ بدل مریسہ کیرہ و ہراتم اسہ راج ئس جنگ ئنا حالیت ئٹی مرے گڑا اوفتے کن ہر اسہ ساہت بھاز ارزشت تخک۔ اینو بلوچ ورنا و خاص کر بی ایس او آزات نا باسک آتا زی آ اَرا زمہ واریک جوڑ مریرہ او بھاز سوبر ءُ زمہ واری ءُ ، ہراڑے اوفتے اسہ پارہ غان کوزہ گیر دشمن نا جبر و زوراکی تیتون مون تس ءِ و ہندن اوفتا کوپہ آتیا راجی آجوئی نا جہد ءِ تالان کننگ و فعال کننگ نا ہم زمہ واریک اریر۔ ہر راج ئٹی ورنا تا تپہ مخ ئنا ہڈ ئنا حیثیت اے تخک و پاکستان تدوکا کہی سال آتیان بلوچ راج ئنا مخ ئنا ہڈ آ جہلوکار ءِ و اودے نزور و ایسر کننگ نا کوشست ٹی ءِ اَرا نا سوب بی ایس او آزات نا باسک آک ساندہ ریاستی جبر نا پلویڑ ئٹ مسنو ولے چائندار و باعلم بلوچ ورناک بی ایس او آزات نا پلیٹ فارم ءِ سوگوْ و ترند کریسہ کوزہ گیر ءِ ساف پارینو کہ بلوچ ورناک غلامی نا زند ءِ اسّل ام منپرور۔
کماش ابرم بلوچ مون مستی ہیت کریسہ پارے کہ بلوچ ورنا تہ غیرسیاسی کننگ و اوفتے بلوچ راج اکن غلامی رد ئٹ بیسمہ کننگ کن کوزہ گیر دا وخت جتا جتاؤ چم کاریم ئٹ ہتنگ ءِ و دا لڑ ئٹی ہندی ایجنٹ آتے زیات فعال کریسہ تیوہ بلوچستان ئٹ تالان کننگانے۔ و ہندا وڑ ارٹمیکو پارہ غان بلوچ ورنا تیٹی راجی چاہنداری و بیداری ءِ خنیسہ دشمن نا لشکر تیوہ بلوچستان ئٹ ورنا تا بیگواہی و اوفتے فیک انکاؤنٹر ٹی خلنگ نا عمل ٹی ترندی ہسونے۔ و بلوچ ورنا تے کوزہ گیر نا پارہ غان سی ٹی ڈی نا وڑ انگا دہشتگرد فورس ئنا جوڑنگ ام بلوچ ورنا تا تہٹی خُلیس ودی کننگ نا اسہ کوشست ئسے۔ بلوچ نیاڑی تا سیاسی و فکری بنیات ئٹ شعوری و انقلابی عمل ٹی بشخ ہلنگ نا خُلیس آن داسا تیوہ بلوچستان ئٹ نیاڑی تے ٹک کننگ ءِ ۔ و اسہ پارہ غان جبر و ایلو پارہ غان جتا جتاؤ چم کریسہ الس و خاص کر ورنا تا تہٹی راجی تحریک نا بابت بدگمانی ودی کننگ نا کوشست مننگ ءِ ہرافتیان سما مریسہ اوفتا مقابلہ ءِ کننگ نا بکار ارے۔ اسہ پارہ غان دشمن تینا تاغت و چم آتیٹ بلوچ راجی جہد نا برخلاف عمل ٹی آختہ ءِ تو ایلو پارہ غان ردِ انقلابی تاغت آک ہم دے پہ دے کاٹم ارفیسہ راجی جہد و تحریک تون تفوک تنظیم و جہدکار آتا برخلاف پروپیگنڈہ نا عمل ٹی بشخ جوڑ مسنو۔ بی ایس او آزات نا انقلابی کیڈرز آتا زمہ واری ءِ کہ اوفک الس و ورنا تا تہٹی کوزہ گیر نا سافٹ حکمت عملی و رد انقلابی بندغ آتے پاش کریسہ جہد آجوئی ءِ سوگوْ کننگ ٹی تینا بنیاتی کڑدار ءِ پین فعالی وڑ ئٹ مونا ہتیر۔
تیوہ ایجنڈا آتا زی آ شرہ آن پد بنجاہی کونسل سیشن نا وخت پوروْ مننگ تون سینٹرل کمیٹی بی ایس او آزات نا بیست و سئے میکو بنجاہی کونسل سیشن بیاد لمہ وطن بانک کریمہ و شہدائے آجوئی و پن آ بلوچ اسیران آتا اندا تو چاسکہ اپریل ئٹ اڈ تننگ نا فیصلہ کننگا۔ کماش ابرم بلوچ کونسل سیشن کن گچین مروکا کونسلر آتے پنت تریسہ پارے کہ اوفک تنظیم نا غٹ آن بھلا اجلاس ٹی اوار مننگ کن بننگ ءُ ہندا خاتران او تنظیمی کاریم تے سوگوْ و ترند کننگ کن بنجاہی کونسل ٹی تیوہ وڑ ئٹ تیاری تون اوار ساڑی مریر۔