بلوچ اسٹوڈنٹس آرگنائیزیشن آزاد نا بیست و چارمیکو راجی بنجائی لس مجلس اڈ تننگانے۔
زرّین بلوچ بنجائی کماش و مہردار بلوچ بنجائی بھلا کارگشاد گچین کننگانو۔

“بلوچ چاگڑد نا ہر تپہ نا بندغ آتے بی ایس او نا فلسفہ ہرفوئی ءِ و راجی آجوئی جہد ئکن تینا زمہ واری تے ایمانداری تون ایسر کروئی ءِ تانکہ نن بلوچ راجی ریاست ئسے نا جوڑشت آ سرسہب مرین۔”
کماش زرّین بلوچ

بلوچ اسٹوڈنٹس آرگنائیزیشن آزاد نا بیست و چارمیکو راجی بنجائی لس مجلس کماش درپشان بلوچ نا کماشی ٹی اڈ تننگانے۔ بنجاہی لس مجلس یات آ نمیران آ کمبر چاکر نا و پن ئٹ “بلوچ جہد ئٹ ساندہ سلوک آ گمنام آ کڑدار آتا” دسمبر نا تُو ئٹ مُسے دے ئنا اُست جمی مجلس آن پد سرسہبی ئٹ ایسر کننگانے۔ زرّین بلوچ بنجائی کماش و مہردار بلوچ بھلا کارگشاد گچین کننگانو۔

مُسے دے ئنا بنجائی لس مجلس نمیران مروکا کاٹم تا یات آ اِرا ساہت نا خاموشی تون مس، مجلس نا اولیکو بشخ ئنا سرحال آتیٹ کماش نا بنائی تران، دستور سازی، اِرا سالی بنجائی حوال نامہ، نغدکاری، گل کاری، ہندی و جہانی سیاسی حالیت و بروکا گامگیج آن پد گچینکاری سرحال اوار مسونو کہ سرسہبی ئٹ ایسر کننگانو۔
بنجائی لس مجلس نا اولیکو دے آ بنجائی کماش نا کونسلر آتیتون تران، دستور سازی، کارگشاد نا اِرا سالی حوال اُست جمی ئٹ مجلس نا مون آ پیش کننگار۔ ارٹمیکو دے نغدکاری آن بناء کننگا۔
نغدکاری نا بشخ ئٹ سنگتاک گپ کریر کہ آجوئی نا ادارہ غاتیٹی نغد ہمو عمل ءِ کہ ہراڑان نن تینا تدوکا و ساڑی آ وخت ءِ مون آ کینہ و نسخان تروکا نزوری تے کشینہ، ولے نغد مدام اجتماعی سواد آتیکن کننگ مرے دنچا کہ اجتماعی و راجی جہد ئنا سواد آتا رکھنگ کن نغد ایمانداری ئٹ بیدس ریا و روہ آن کروئی ءِ انتئے کہ دا نغد ءِ کہ ننے تینا مسخت آن چَھپ ہننگ آن تورک و اسہ وڑا آجوئی نا رہبند آتیتون ہمگام کیک۔ ننے نہ بیرہ تینا اداراہ ئٹ نغد ئنا رواج ہتوئی ءِ بلکہ راجی جہد ئٹ دا رواج منظم کروئی ءِ تانکہ نن ہر تپہ آ تینا ردی تیا نغدی نگاہ ئس توننگ کین و اوفتا جاچ ہلنگ و نزوری تا کشنگ کن عملی گامگیج ئس ہرفنگ آ اُست خلپن بلکہ نیک نیتی ئٹ اوفتا ایسری ءِ کین۔ دا بی ایس او نا رواج مسونے کہ او نغد آن ہچ ہم نَرّیتنے و خوشی ئٹ اوفتا مون آ سلیسہ سنجیدئی ئٹ تینا نزوری و کوتائی تے کشانے انتئے کہ نن سرپند مرینہ بیدس نغد آن ننا ہر آجوئی نا عمل بے رہبندی ئٹ گام خلیک، گڑاس کہ بے رہبند ئٹ گام خلے ہلنگ و توننگ مف گڑا اود تینا مزل و مسخت ءِ دوئی کننگ کروفک۔

گل کاری نا سرحال ئٹ کہ اوٹی بلوچ جہد ئنا ساڑی آ خواست و بکار آتا دروشم ئٹ پوسکنو پالیسی و فیسلہ تا زی آ گپ و تران ئسر، جتا آ سرحال و پالیسی تا زی آ تران کننگ آن پد دا سرحال نا ایسری آن پد دیوان نا ارٹمیکو دے ایسر کننگ آ۔ مسٹمیکو دے آ ہندی و جہانی سیاسی حالیت و بروکا گامگیج نا سرحال آک مون آ دننگار۔ بروکا گامگیج نا سرحال ئٹ اولیکو بشخ ئٹ اِرا سالی آ کاریم تیکن پالیسی جوڈ کننگا و پوسکنو فیسلہ ہرفنگان پد ارٹمیکو بشخ ئٹ ساڑی آ جوڑشت ایسر کننگا، درپشان بلوچ نا کماشی ٹی مُسے رکنی گچین کاری مجلس ئس جوڑ کننگا کہ داڑان پد گچینکاری مجلس مون آ دننگا۔
گچینکاری ئٹ امیتواراک جتا آ زمہ واری تا زی آ تینا کاغذ آتے جم کریر، گچیبکاری عمل نا سرسہبی ئٹ اڈ تننگ آن پد گچینکاری مجلس نا ایسری نا پڑو خلنگ آ و دیوان نا مون آ پوسکن گچین مروکا بنجائی کابینہ و بنجائی کمیٹی نا سنگت آتا پن آک تخنگار۔ پوسکن گچین مروکا زمہ وار آتیٹی زرّین بلوچ کماش، مہردار بلوچ بھلا کارگشاد، و شُولان بلوچ ترجمان گچین کننگار۔
مجلس نا اولیکو بشخ ئنا سرحال آتا ایسری آن پد پوسکن گچین مروکا بنجائی زمہ وار آتے مسکوہی کماش درپشان بلوچ سوغند تس و دیوان نا ارٹمیکو بشخ بناء کننگا کہ ہراٹی بنجائی مسکوہی کماش و پوسکن گچین مروکا کماش مجلس نا مون آ گپ کریر۔
مسکوہی کماش درپشان بلوچ دیوان ئٹ گپ کریسہ پارے ای پوسکن گچین مروکا بنجائی زمہ وار آتے موارکی ہیتوہ و اندا اُمیت ءِ تخیوہ کہ پوسکن گچین مروکا سنگت دا راجی اداراہ ءِ تدوکا وخت آن گیشتر مہکم، لائخ و منظم کننگ آ تینا ہڑ گڑا ءِ ندر کننگا چَک و پد مروفس، و بلوچستان نا دوبر آجوئی کن تینا دتر و خید آتا پرواہ ءِ توپرور۔ اینو بی ایس او آن کنا سفر ایسر مننگ ءِ، دا کنکہ اسہ غم و ازیت ئسے آن کم اف، دا کنکہ اسہ بھاز کبینو ساہت ئسے انتئے کہ ای کاٹم بُرز کرینٹ گڑا بی ایس او ءِ ننے انسانی و سیاسی حوالہ ئٹ ردیفینے و بھلن کرینے، ننا درسگارہ، ننا خاہوت و ننا زند کل بی ایس او مسونے۔ بی ایس او ننا خیال و گمان آن ہم گیشتر اڑزشت تخک انتئے کہ دا اندا اداراہ نا برکت ءِ کہ بلوچ راجی جہد ئنا سیاسی روانی نہ پنّانے و ناکہ نزور مسونے بلکہ ہر حالیت و وخت آ آجوئی جہد ئکن سلوک مسونے و مخلوک نا نہ بیرہ سیاسی تربیت ءِ کرینے بلکہ اوفتا رہشونی ءِ کریسہ جہد ئکن سائنسی وڑ ئٹ کوشست کرینے۔ دا مرغن آ سفر ہر وڑ ئنا رکاوٹ آن پُر مسونے، بی ایس او نا جوڈ مننگ آن ہلیس اینو ئسکان بی ایس او ریاستی کریکڈاؤن، بدخواہ آتا بد ئنگا عمل و سواد دوست آ بندغ آتا رکاوٹ آتیتون اوار ہر وڑ ئنا ویل و درآشوبی رویہ سگاّنے ولے دا بی ایس او نا رہشون و کیڈر آتا لیکہی منظمی ءِ کہ اوفک ہر نگیگ آ حالیت آتیٹی بی ایس او نا انقلابی و راجی بستار ءِ رکھانو و آجوئی نا مسخت تون اوار کرینو۔
کماش درپشان مونی ہیت کریسہ پارے کہ دا مرغن آ سفر ئٹ، اسٹ ہمو بلوچ نمیران مروکا کاٹم تا قربانیک ءُ کہ ننے ہمت تسونو لیکہ تون نہ بیرہ گنڈوک کرینو بلکہ آجوئی نا مسخت کن گیشتر کاریم کننگ کن جوزہ و حوصلہ تسونو و ارٹمی ہمو گمنام آ کڑدار آتا جہد و ہمت کہ بیدس پن، پجار، عہدہ و ایہن ئنگا تعریف آن تینا راجی زمہ واری تیتون اندن تفوک ءُ کہ ہر گڑا ءِ قربان کننگ آن پد ہم اوفتا زبان آن دم دننگ نا لوز ئس پیش تمپک۔ بلوچ راجی جہد ئٹ اندنو جہدکار و کیڈر بکار ءِ کہ اوفک ہزار سختی و کُبینی آن پد ہم تینا زند ئنا زاہری کل آ ہستی ءِ قربان کننگ آن ہچ چَک و پد مفس و نن تان دے گمنامی ئٹ آجوئی جہد ئنا زمہ واری تے ایسر کیر۔ ننتون ساہ آتا قربان کننگ آن ہچو چَک و پدی ئس اف، ہرکس تینا ساہ آتے بلوچ ڈیہہ ئکن ندر کننگ آ بیدار ءِ ولے دافتیان بیدس الّمی آ گپ دادے کہ ہموتم ئسکان نن زندہ اُن، راجی آجوئی نا جہد ئکن انت کینہ و اخس پوکسنو و گیشترو کاریم کینہ کہ اوفک ننا آجوئی جہد ئٹ سواد و فائدہ مریر۔ اندا خیال و سوچ ئتون ننے تینا آشوبی عمل گیشتر منظم و ترند کروئی ءِ تانکہ نن بے عملی نا ناجوڑی آن مُر بیرہ علم و عمل ئتون دا راجی جہد ءِ تینا بشخ ءِ ہیتن۔
کماش درپشان بلوچ مونی پارے کہ ننا ورناک و بندغاک بھاز ہنرمند و لائخ ءُ ولے بھاز وخت آ نن تینا لائخی تے در انقلابی رویہ تیتون نسخان ہیتینہ، ننے کہ تینا ہُنر آتیتون راجی جہد ئکن کوشست کروئی ءِ و فائدہ تروئی ءِ، ننا ورناک جتا وخت آ تینا مون آ عمل و کنفیوژن آتا گواچی مریرہ و راجی زمہ واری تیان مُر و جتا مریرہ۔ بلوچ ورناس کہ بلوچ ڈغار نا زی آ ودی مریک اودے جہان نا ایلو ورناتیان تینے جتا سرپند مروئی ءِ، اوفتا ہر عمل و کڑدار نا اسہ بستار ئس ارے انداخاطرآ اوفتے تینے بلوچ راج ئنا اجتماعی سواد آتیتون گنڈوک کروئی ءِ و ہر تپہ آ کہ اوفتا لائخی اریرک ہموڑے کوشست کیر و راجی جہد ئتون تینے اوار کیر۔ بی ایس او نا لیکہ ئتون گنڈوک آ ورنا تینے فکری، ٹیکنیکی و علمی بنیات آ منظم کیر و چاہندار و دورچاری تون انقلاب نا عمل ءِ مون آ دیر۔ بی ایس او تون ایمانداری اندادے کہ اونا تروکا فلسفہ و لیکہ نا زی آ کسس اخس سنجیدئی تون عمل کیک، بی ایس او تون ایماندار مننگ بلوچ راجی جہد ءِ گیشتر منظم و بلوچ چاگڑد آن دشمن نا زیم آتے کشنگ نا کسر مننگ کیک انداخاطرآ بلوچ ورناتے تینے ہر تپہ آ لائخ کروئی ءِ و بلوچ راج ئنا ہستی ءِ رکھنگ کن تینا زمہ واریک ایسر کروئی ءُ۔
مسکوہی کماش نا تران آن پد پوسکن گچین مروکا کماش زرّین بلوچ مجلس نا مون آ تران کرے۔
کماش زرّین بلوچ تران کریسہ پارے کہ پوسکن گچین مروکا زمہ وار آتے موارکی تننگ تون اوار اوفیتون اندا پنت ءِ کہ اوفک زمہ واری تے بیرہ عہدہ سرپند مفس بلکہ دافتے راجی زمہ واری پوہ مریسہ بلوچ راجی آجوئی جہد ئٹ تینا کُبین آ کڑدار ءِ ایسر کیر، اوفک دا بروکا سال آتیٹی تینا تیوہ غا ہمت و محنت ءِ بی ایس او ءِ فکری، جوڑشتی و سائنسی بنیات آ گیشتر منظم کننگ آ کوشست کیر۔ بی ایس او ءِ تینا سیاسی سفر ئٹ ہر وڑ ئنا سختی و جنجالی خنانے و دلیری تون اوفتا مون آ سلیسنے، دا دیہاڑ نا تاک آتیٹی نکش (نوشتہ) ءِ کہ ہر وڑ ئنا پیشن و تہی جنجالاتا گواچی مننگ آن پد ہم بی ایس او تینا راجی آجوئی جہد ئٹ انقلابی فکر و عمل آن ساہت ئس ہم پد سلتنے۔ فرداک بی ایس او ءِ منظم کرینو ولے جاغہ ئس نہ جاغہ ئس اندا فرداک بی ایس او ءِ نسخان تننگ آ ہم بے سرسہب ءُ کوشست کرینو ولے اداراہ نا انقلابی لیکہ نا منظمی دا تیوہ غا جنجالاتے نہ بیرہ تورینے بلکہ دیمروی ہم کرینے، دنچا کہ بی ایس او تینا سیاسی سفر ئٹ دا منّاریفنے کہ فرد اداراہ و راجی جہد آن بھلن و بُڑز اف۔
انقلابی ادارہ آتیکن سیاسی مسخت کل آن بھلا چیدہ ءِ، انداخاطرآ بی ایس او نا جہدکار آک دا سیاسی مسخت ءِ نہ بیرہ رکھانو بلکہ اونا مون آ دننگ کن و لیکہی بنیات آ منظم کننگ کن ہم کاریم کرینو۔ دا اداراہ ننتون راجی امانت ئسے، دانا رکھنگ و منظم کننگ نہ بیرہ اونا باسک آتا زمہ واری مریک بلکہ بلوچ مخلوک و لس ورناتا بھلو زمہ واری ئس مریک کہ اوفک اداراہ نا تروکا لیکہ و پنت آتے ہرفِر و اونا پدگیری ءِ کیر۔ کسس اگہ باسک اف اودے ہم بی ایس او نا تروکا فلسفہ و لیکہ نا زی آ عمل کننگ ءِ راجی زمہ واری ئس سرپند مروئی ءِ تانکہ او دشمن نا ہتوکا ہر وڑ ئنا چم و پالیسی تیان تینے رکھینگ کے۔ بلوچ ورناس ڈیہہ ئنا ہرا ہم کنڈ ئسے آ مس، او بی ایس او نا لیکہ و مسخت نا زی آ عمل کننگ و بلوچ راجی جہد ئٹ تینا کبین آ بشخ ءِ تننگ کیک و دانا سواد اجتماعی دروشم ئٹ بلوچ راج ءِ رسینگرہ۔ بلوچ راج ئنا ہرا ہم تپہ مرے، ورناتے بی ایس او نا لیکہ ہرفوئی و ہمو تپہ آ راجی جہد ئٹ کوشست کروئی ءِ۔
کماش گپ کریسہ پارے کہ اینو نا بلوچ راجی جہد ورنا و مخلوک آن بھاز خواست کیک، و دا خواست آتا ایسر کننگ وخت ئنا کل آن بھلا زرورت ءِ، ہر دور ئٹ بی ایس او لیکہی بنیات آ گیشتر منظم مریسہ ءِ انداخاطرآ اونا جہدکار و لس ورناتے تینے راجی آجوئی جہد ئکن بیرہ ساڑی کروئی اف بلکہ پوسکنا پالیسی و ہنر آتیتون راجی آجوئی جہد ئٹ تینا زمہ واری تے ایسر کروئی ءِ۔ نن کہ راجی ریاست ئسے نا جوڑشت ئکن کوشست کننگن گڑا ننے ہمو تب ئتون مُر ہننگ ئٹ کوشست کروئی ءِ، ننے ریاستی جوڑشت نا تب ئنا ہتنگ کن تدوکا وخت ئٹ ہر نزوری و کوتاہی مسونو اوفتیان پنت ہرفوئی ءِ و مون آ گام خلوئی ءِ۔ بلوچ ورناک قربانی تننگ آ ہچ چَک و پد مفسہ و اینو نمیران مروکا کاٹم تا اندا قربانی تا برکت ءِ کہ ننا کاٹم فخر ئٹ بڑز ءِ و ننے مون آ گام خلنگ نا ہمت رسینگانے، ولے دا قربانی بیرہ ننکن گڑاس کڑدار مفس بلکہ اوفتا تروکا فلسفہ نا زی آ تینا زند ئٹ اندنو کُبین ءُ کاریم کروئی ءِ کہ دافتان نن نمیران مروکا کاٹم تا کروکا کاریم تے مون آ دننگ کینہ، داڑکن بلوچ ورنا تیتون اوار ہر تپہ نا بندغ آتے تینا ایمانداری تون راجی جہد ئٹ گنڈوک کروئی ءِ و ہرا ہم زمہ واری ئسے نا زی آٹ ءُ اوفتے ایمانداری و سنجیدئی تون ایسر کیر تانکہ اندا چنک چنکا کاریم و زمہ واری تیان نن تینا اجتماعی مسخت نا ہلنگ آ سرسہب مننگ کرون۔ و بی ایس او نا ہر جہدکار ئسے فردی بنیات آ راجی آجوئی جہد و اداراہ ءِ اسہ جتا و مُر ہروک ءُ پالیسی ئس تُد مرے تانکہ او راجی جہد ئنا ہمو پد سلوک آ و خورک آ جاغہ تے پُر کننگ تینا بشخ ءِ پوسکنو ایسر تروکو رنگ ئسے ئٹ تننگ کیر۔
اینو بلوچ راج نا زی آ ہر وڑ ئنا تادی و زوراکی کننگ مننگ ءِ، دا راجی جہد ئکن بلوچ مخلوک نا سلنگ نا منانک ءُ کہ داخس تادی و زوراکی سگنگ و قربانی تننگ آن پد ہم ننا مخلوک دلیری تون دشمن نا مون آ سلوک و کوشست کننگ ءُ، ہرکس تینا راجی زمہ واری تے ایسر کننگ ءِ۔ دا جہان نا دیہاڑ نا تاک آتیٹی نوشتہ ءِ ہر مون و تہار آ شام ئنا اسہ پوشکن و خیسُنو سُہب ئس الم ارے و دا امیت نہ بیرہ ننا راج ئنا اُست ئٹ پیوند ءِ بلکہ دا فکری حوالہ ئٹ اندن مہکم و تُرند ءِ کہ اوفک تینا ساہ آتا قربانی تننگ آ ہم چَک و پد مننگ افس۔ ولے ساڑی آ وخت و راجی جہد اینو بھاز خواست کیک، بلوچ راج ئنا ورناتیتون اوار ہر تپہ نا بندغ تیان تینا راجی جہد ئٹ گام تے تیز و چائنداری ئٹ تخوئی ءُ، انتئے کہ تدوکا وخت ئٹ نن انتس کہ کرینو اوفک راجی جہد ئٹ انگت آ کم ءُ انداخاطرآ داسا ننے گیشتر کاریم، گیشتر زمہ واری تینا کوپہ غاتیا ہرفوئی ءِ و راجی جہد ءِ سرسہب کروئی ءِ تانکہ نن زوت آجو ءُ بلوچستان ئسے نا مسخت آ سر مرین و بلوچ راج ئنا راجی ریاست نا جوڑشت نا سفر ئٹ سرسہب مرین۔

بنجائی لس مجلس ئٹ کل آ سرحال آتا زی آ گپ کننگان پد پوسکن گچین مروکا بھلا کارگشاد مہردار بلوچ کماش نا موکل ئٹ بی ایس او آزاد نا بیست و چارمیکو بنجائی لس مجلس یات آ “نمیران آ کمبر چاکر نا” و پن ئٹ “بلوچ جہد ئنا ساندہ سلوک آ گمنام آ کڑدار آتا” ایسر کرے۔

شولان بلوچ: ترجمان بلوچ اسٹوڈنٹس آرگنائیزیشن آزاد