بیست ءُ سیمی بنجاہی لس مجلسءِ دومی روچءِ اھوال
یونی پولر ورلڑآرڈر پولی سینٹرک ورلڈ تہءَ مٹ بوگءَ انت، بلوچ راجی جنزءَ چہ ھاسیں ملک ءُ دمگانی بدلءَ سفارتکاریءِ عملءَ را سرجمیں جہانءَ شاھگان کنگی انت۔
بلوچ اسٹوڈنس آرگنائزیشن آزادءِ بنجاہی جارکشءَ بنجاہی لس مجلسءِ دومی روچءِ اھوال رسانکدرءَ شنگ کتگ ءُ گشتگ کہ بلوچ اسٹوڈنس آرگنائزیشن آزادءِ بنجاہی لس مجلس بیاد لمہء وتن بانک کریمہ بلوچ ءُ بلوچ نمیران ءُ بنام بلوچ اسیران دومی روچءَ اوں برجاہ اِنت۔
بی ایس او آزادءِ بیست ءُ سیمی بنجاہی لس مجلسءَ ھشت بنگپانی(ایجنڈا) سرا تران بیت اِنت کہ ایشانی تہءَ بنجاہی کماشءِ تران، آئین سازی، کارگشاد اھوال، نگدی نشست، گَل کاری ، دمگی ءُ میان استمانی سیاسی جاورھال آؤکیں گامگیج، گچینکاری ءُ کماشءِ گُڑی تران ھوار اَنت۔ چوشکہ 17 اپریل دو شمبہءِ روچءَ دیوانءِ اولی روچءَ کماشءِ تران، آئین سازی، کارگشاد اھوال ءُ نگدی نشستءِ بنگپانی سرءَ پیسری روچءِ شنگ بوتگیں گپ ءُ گالانی گوں دیوان آسر بوتگ ات، ءُ مرچی 18 اپریل سہ شمبہءَ بنجاہی لس مجلسءِ دومی روچءَ گل کاری، دمگی ءُ میان استمانی سیاسی جاورال ءُ آوکیں گامگیجءِ بنگپانی سرءَ گوں دلجمیءَ گپ ءُ گال کنگ بوت کہ اودءَ (ڈسکیشنءَ) دیوانءِ کلیں کونسلراں بہر زرت ءُ پہ گلءِ کار ءُ پروگرامانی درگت ءَ وتی شور ءُ سَلاہ دات انت۔
چو مدامی ئیں ڈولءَ مرچی ئیں دیوانءِ بندات اوں چہ بلوچ نمیرانانی یاتءَ دو ساھتءِ بے تواری ءَ بندات کنگ بوت۔ دیوانءِ پنچمی بنگپ تنظیمی امور ات کہ آ دو بہراں بہر اَت۔ بنگپءِ اولی بہرءَ کونسلراں وتی تاک ونت انت کہ اے تاک (پیپر) آھاں بنجاہی کارگشادءِ گشگءِ پدءَ چہ پیسرءَ نبشتہ کتگ ات انت ءُ اے بنگپءِ دومی بہرءَ اولی بہرءِ پیش کتگیں گپ ءُ تران ءُ سِلاہ ءُ شورانی سرءَ گیش گپ ءُ گال کنگ بوت۔
بنجاہی لس مجلسءِ ششمی سرہال دمگی ءُ میاں استمانی سیاسی جاورہال ات کہ آئیءِ تہءَ کونسلراں ھمے بنگپءِ سرءَ وتی نبشتگیں تاک ونت انت۔ دیوانءِ سنگتاں تران کت ءُ گشت کہ میاں استمانی سیاست ھمک روچءِ بنیادءَ چہ بدلیءِ عملءَ سپر کنان انت ءُ اے درچءَ انچو گمان بوان انت کہ روس ءُ یوکرینءِ جنگءَ رند میان استمانی سیاستءِ ندارگ آوکیں چندے مدتانی نیامءَ بدل بوت کنت۔ گوستگیں یک کرنےءِ ویل پمّے واستہ سرپد یا چار ءُ بیچارءِ ھاترءَ بس انت کہ میان استمانی سیاستءِ تہءَ ھچ پیمیں رھبند، لیکہ ءُ پائیدگ ابدی نہ بنت بگندئے گوں وھدءِ ھمبرائیءَ آھانی تہءَ مٹی ءُ بدلی کیت انت۔ ھما امریکہ کہ آئیءَ تالبان ھوار سرجمیں جہانءَ ھاسکار میانی ایشیاءَ سویت یونینءِ ھلاپءَ اسلامی گلاناں مہکم کتگ ات، آھاناں نوک نوکیں سِلاہ دات ءُ سیاسی ءَ مالی بستارءَ آھانی سک باز کمک کت ءُ رندءَ وتی بندپتری مستریں جنگ اوں ھمیشانی ھلاپءَ کت ءُ در کپت۔ھمے ڈولءَ یک منّگ نامہ یے مارا ھما وھدءِ سویت یونین ءُ نیٹو بزانکہ امریکہءِ میانءَ دیمءَ کیت وھدے کہ آھاں جرمنیءِ یکجاہیءِ سرءَ پیسلہ کت کہ اودءَ امریکہءِ سَرپانءَ سویت یونین بزانکہ روسی فیڈریشنءَ را دلجمیں بیسہ دات کہ امریکہ نیٹوءَ را چہ جرمنیءَ دیم نہ بارت انت بلے سویت یونینءِ پرشگءَ رند امریکہءَ نیٹوءَ را سرجمیں یورپءَ سر کت، آئیءَ بالٹک نیشنزاں ھوار یوکرین کہ آئیءِ مزنیں سیمسری بہرے گوں روسءَ انت، آئیءَ را ھم باسکی زورگءِ پلہ مرزی کت کہ ایشیءِ سوبءَ روس ءُ یوکرینءِ میانءَ جنگ پاد اتک کہ اے جنگ جہانی دنیاءَ مدام بدلیانی سوب جوڑ بوان انت۔ ھمے ڈولیں درور مارا چہ سعودی عربءِ نیمگءَ گندگءَ پیداک انت، وھدے کہ عراقءَ کویتءِ سرءَ ارش کت ءُ تاں دو روچاں آئیءِ سرءَ وتی ارش جَم داشت گڑا سعودیءَ چہ وتی ترسءَ سعودی عربءِ تہءَ “سیکورٹی گارنٹی”ءِ پالیسیانی بستارءَ جتائیں پوجی اڈا دات، بلے استیں جاورالانی چار ءُ بیچارءَ گوما آئیءَ وتی گواتانی دیم تاب داتگ انت ءُ چین، روس ءُ ایرانءِ ڈولیں امریکی دژمنیں ملکءِ ھمبرائیءَ وتی سیادیاں گہتر کنان انت، کہ اے جاور اے گپءِ منانکءَ دینت کہ میاں استمانی سیاستءِ میانءَ ھچ پیمیں لیکہ اولی ءُ آسری بوت نہ کنت۔
ھمے تران ءَ را دیمءَ برانءَ دیوانءِ سنگتاں گشت کہ اے جاورال تہنا میانی ایشیاءِ نہ انت کہ اودءَ امریکہ ءُ یورپءِ ھلاپ ھیال دیمءَ پیداک انت بگندئے ساوتھ ایشیاءَ ھوار ایشیا ءُ اپریکہءِ ڈولیں دمگ دمگاں اوں روایرکپت سینٹرک ورلڑ آرڈرءِ ھلاپءَ توار چست بوان انت، یوکرین ءُ روسءِ جیڑہاں پد یورپی ملکاں ابید گیشتر ملکاں روایرکپتءِ ھمسنتیءَ چہ انکار کت۔ ہندوستانی دری کارانی وزیرءَ وتی یک گلگدارےءِ تہءَ گشتگ ات کہ یورپءَ نوں چرے پکرءَ دراہگی انت کہ “دنیاءِ جیڑہ مئے جیڑہ نہ انت ءُ مئے جیڑہ دنیاءِ جیڑہ انت۔” مرچی ھمے جاورال میانی ایشیا ءُ خلیجی ملکانی نیمگءَ ھم گندگ پیداک انت کہ اودءَ امریکہءِ پوجی اڈہ ھست انت، ءُ دومی نیمگءَ چہ عرب ملکانی نیمگءَ ھمے زوتاں عراق ءُ ایران ءُ روس نواز سرکارءِ گوما شریں سیادی ءُ اپریکہءِ ملکانی چینءِ نیمگءَ آہگ میان استمانی سیاستءِ دروشم مٹ کتگ۔ عرب ملک ءُ میانی ایشیاءَ سعودی عربءِ ڈولیں مسلمانیں ملکانی نیمگءَ انچوش کہ انفراسٹرکچر، سیل ءُ سواد، گوازی ءُ مردمی ھکاناں ارزشت دیگ بوگءَ انت، اے چیز آؤکیں وھداں پورپءَ جتائیءِ سوب جوڑ بنت، کہ ایشیءِ درور قطر وڈیں مسلمانی ملکےءَ فیفا ورلڈکپءِ اڈّ دیگ انت۔
بوت کنت اے راستیءِ رد کنگ ھشکیں ھیالے کہ چہ سرجمیں دنیاءَ امریکہ ءُ یورپءِ دزرسءِ اینکس زوتاں ھلاسی کسانیں مدتےءِ تہءَ چون بوت کنت ، بلے اے گُمان رد کنگ نہ بیت کہ اے وھداں ھرچ بدلی یے کہ آھان انت چرایاں اے گمان بوت کنت کہ جتائیں دمگاں ساڑی ئیں تاکت چہ امریکہ ءُ یورپءِ ساہگءَ در بیا انت ءُ وتی جیڑہانی تہءَ وت آزاد ءُ وتواکیں تاکتے بہ دار انت۔ روس ءُ ہندوستانی (انڈیا) دری کارانی وزیرءِ میانءَ بووکیں یک گند ءُ نندےءَ گشت دنیا چہ یونی پولر ورلڈ آرڈرءِ بدلءَ پولی سینٹرک ورلڈ آرڈرءِ نیمگءَ بہ روت انت، کہ ایشیءِ بزانت ھمیش انت کہ ھرچ دمگےءِ وتی یک جتائیں تاکت ءُ بنجاھے بیت کہ چریشیءَ سرجمیں جہانءَ تاکتءِ مہار تہنا یک استانےءِ دستءَ نہ بیت بگندئے ھمک دمگءَ یک جتائیں بنجاہی تاکت ءُ پیسلہ سازیءِ بنجاھے جوڑ بیت۔ بزانکہ چہ امریکہ ءُ یورپءِ ساہگءِ چیر ءِ بدلءَ اپریکہ، ساؤتھ ایشیا، میانی ایشیا ءُ ھوار کلیں دمگ وتی یک بنجاہی تاکتے دیمءَ آرگ لوٹ انت کہ چہ اودءَ آ وتی دمگی جیڑہ ءُ جنجالاں گیش ءُ گیوار بہ کن انت چیا کہ روایرکپت سینٹرک ورلڈ آرڈر سرجمیں دنیاءَ ودی بووکیں جیڑہانی توجیل سازیءَ سرجم بے سوب بوتگ ءُ بازیں دمگاں وت جنگ ءُ مزنیں جیڑہانی آرگءِ مانزمان بوتگ۔ کونسلراں میان استمانی سیاستءِ بدل بوگءِ بنیادءَ بلوچ درکاری (سفارتکاری)ءِ سرءَ گپ ءُ تران کت ءُ گشت کہ ھرچونیں راجی آجوئیءِ جہدےءِ ھاترءَ دری کاریءِ عمل باز ارزشت دار انت، ھپتادءَ بلوچ گہگیریءِ وھداں بلوچءِ درکاری (سفارتکاری)ءِ بنجاہ یورپ نہ انت بگندئے میانی ایشیا ات ءُ عراق ءِ وڈیں ملکاں بلوچ سیاسی جہدکار نشت انت ءُ وتی روتاک ءُ ایدگہ سیاسی چست ءُ ایر برجاہ داشت انت، ءُ آ وھدءِ میان استمانی سیاسی لوٹانی بنیادءَ بلوچانی میانءَ امریکہ ءُ یورپءِ ھلاپ پکر ءُ ھیالے ھست ات، بلے 2000 ءَ رند سر چست کنوکیں بلوچ راجی جنزءِ وھد ءَ دنیاءِ جاور مٹ ات انت، یورپءَ مردم گری ءُ مردمی ھکانی تاج سرءَ ات کہ آئیءِ سوبءَ بلوچ سیاسی جہدکار یورپءَ شت انت ءُ جنزءِ چست ءُ ایر بنا کت انت ءُ مرچی ما گند ایں کہ میان استمانی چست ءُ ایر پدا مٹ بوان انت، پمیشکہ چوشیں جاوراں بلوچ راھشوناں لوٹ ایت کہ آ دری کاریءَ را یورپی بنجاہءَ دارگءِ بدلءَ آئیءَ را سرجمیں جہانءَ سرکنگءِ جہدءَ بہ کن انت تاکہ آؤکیں وھداں ھرچونیں مزنیں مٹ بووکیں بدلیاں چہ بلوچ راجی جنز تاوان بار بوگءِ بدلءَ چہ ہما جاوراں پائیدگ چست بہ کنت کہ آ پائیدگ جنزءِ مہکمی ءُ سوبمندیءِ مانزمان بہ بنت۔