بی ایس او آزادءِ برجمیں بیست ءُ سَیمی بنجاہی لس مجلس سوبمندیءَ گوں آسر بوت۔ دْرپشان بلوچ ابید مکابلہءَ کماش ءُ زروان بلوچ ابید مکابلہءَ مزن کارگشاد گچین کنگ بوت اَنت۔

بلوچ ورناہاں سائنسی بُنیاتءَ جُنزءَ را اداراتی جہتءَ گیشتر مہکم کنگ پکار اِنت۔

بلوچ اسٹوڈنٹس آرگنائزیشن آزادءِ بُنجاہی جارکشءَ وتی شنگ کُتگیں اھوالءَ گشتگ کہ بی ایس او آزادءِ بیست ءُ سیمی بنجاہی لس مجلس بیاد لمہء وتن بانک کریمہ بلوچ ءُ بلوچ نمیران ءُ بنامِ بلوچ اسیران مروچی سیمی روچءَ سوبمندیءَ گوں آسر بوتگ، کہ آئیءِ تہءَ دْرپشان بلوچ ابید مکابلہءَ کماش ءُ زروان بلوچ ابید مکابلہءَ مزن کارگشاد گچین کنگ بوت اَنت۔

بیست ءُ سَیمی بنجاہی لس مجلسءَ بنجاہی کماشءِ تران، آئین سازی، کارگشادی اھوال، نگدی دیوان، گل کاری، میان اُستمانی ءُ ھَندی سیاسی جاورالءَ ھوار آؤکیں گامگیجءِ سرءَ دلجمیءَ گوں تران بوت۔

بنجاہی لس مجلسءِ اولی روچءَ بنجاہی کماشءِ تران، آئین سازی، کارگشادی اھوال، نگدی دیوانءِ سرھالانی سرءَ گپ ءُ تران بوت۔ ءُ دومی روچءَ گل کاری، میان استمانی ءُ ھندی سیاسی جاورال ءُ آؤکیں گامگیجءِ یک بہرےءِ سرھالءِ سرءَ جوانیءَ گوں تران بوتگ۔ مرچی بنجاہی لس مجلسءِ گُڈی روچ اَت کہ آؤکیں گامگیجءِ پَشت کپتگیں بہر دیمءَ جنز اِت کہ آئیءِ تہءَ ھستیں جوڑشت پروشگ بوت ءُ دیوان گچینکاریءِ نیمگءَ شُت۔ گوستگیں بنجاہی مزن کارگشاد مہرزاد بلوچءِ سروکیءَ یک سَہ رکنی کمیٹی یے اڈ دیگ بوت کہ آ گچینکاریءِ نیمگءَ شت۔
گچینکاریانی آسرءَ گچینکاری مجلسءِ سرپانءَ گلءِ اگدہانی سرءَ گچین بوتگیں بنجاہی کابینہ ءُ بنجاہی مجلسءِ باسکانی نام دیمءَ آؤرت انت کہ آھانی تہءَ درپْشان بلوچ ابید مکابلہءَ کماش ءُ زروان بلوچ ابید مکابلہءَ مزن کارگشاد گچین کنگ بوت اَنت۔
گچینکاریءِ ھلاس بوگءَ رند بندیں کوٹیءِ مجلس ھلاس کنگ بوت ءُ دیوان سوگندی نیادءِ نیمگءَ جنز اِت کہ گچین بوتگیں باسک ءُ زمہ واراناں گلءِ گوستگیں کماش ابرم بلوچءَ سوگند دات۔

سوگندی نیادءَ گلءِ گوستگیں کماش ابرم بلوچءَ تران کت ءُ گشت کہ امیت ھمیش اِنت کہ بی ایس او آزادءِ نوک گچین بوتگیں قیادت بلوچ ورناہاں گیشا گیش جُنزءِ بہر جوڑ کن اَنت ءُ آیاں یکمشت ءُ یکراہ کن اَنت۔ راجی جنزءَ نوکیں جُنزانی لوٹانی ھسابءَ بی ایس او آزاد آشوبی کیڈرانی ھیلکاریءِ عملءَ برجم داریت۔ بی ایس او آزادءِ واستہ اے پیمیں نا وش ءُ نگیگیں جاوراں اے آشوبی عملءَ را یکشلءَ برجم دارگ ارزانیں کارے نہ یے بلے وتی پانزدہ سالءِ سیاسی کیرئرءِ کُتہ کاریانی بنیاتءَ گشت کناں کہ بی ایس او آزادءِ تہءَ اے پیمیں نا وش ءُ نگیگیں جاورانی دیم دارگءِ زِکت است اِنت۔ بی ایس او آزادءِ کیڈراں گلءِ باسک ءُ لیڈرشپءِ نمیرانی، آوار جَنی ءُ بے کساس زانگولیں جون وتی کوپگاں کتگ اَنت بلے آیانی ھیال ءُ لیکہ عمل ءُ کارانی تہءَ کدی اوں تضاد پیداک نہ بوتگ۔ بی ایس او آزادءِ کیڈراں نہ ایوکءَ دژمنءِ دیم داشتگ بلکیں تہی پادکَشی اوں اوپار کتگ اَنت بلے راجی جنزءِ مکسد، سینٹرل ڈیموکریسی، گلءِ تہءَ جمہوریتءِ روایت ءُ گلءِ وتواکی کدی اوں سان زورگءَ نہ اشتگ ءُ ھمے گلانی سوبمندیءِ مزنیں سوَب اَنت، ھمے ھسابیں پگر ءُ لیکہ بی ایس او آزادءَ را مہکمیں گلےءِ گوناپءَ دات کت کنت۔

گچینکاریءِ ھلاس بوگءَ رند گلءِ زمہ داری نوکیں بنجاہی کمیٹیءِ کوپگاں دیگ بوت انت کہ چرائیءَ رند کماش دْرپشان بلوچءَ بنجاہی لس مجلسءِ دیوانءَ گوں تران کت ءُ گشت کہ چہ درستاں پیسر بنجاہی لس مجلسءِ سوبمندیءِ گوما من بی ایس او آزادءِ کونسلر ءُ ھاسکار گلءِ گوستگیں رھشونانی ستاءَ کن آں کہ آھاں اے نا وشیں جاورانی میانءَ بنجاہی لس مجلس گوں سوبمندیءَ اڈ دات۔ راستے کہ آشوبی ادارہانی واستہ جاور کدی اوں ایمن ءُ آسودگ نہ بنت ءُ بی ایس او آزاد چہ وتی جوڑشتءِ سری روچاں ھمے جاورانی دیمپان انت، پمیشکہ گلءِ ٹارگٹ مدام مزن ءُ پروگرام بندپتری بوتگ انت۔

بی ایس او آزادءِ آشوبی سنگتاں! چہ وتی جہد، ھمت ءُ کربانیاں گلءِ رھشونیءِ جاہءَ سر بوگ یک نیمگے پمّا یک مزنیں شرپے تاں دومی نیمگءَ یک باز مزنیں ڈُبّہ ءُ زمہ واری یے کہ سنگتاں وتی کوپگاں زرتگ۔ زاکر مجید کہ مرچی چہ چاردہ سالاں دژمنءِ بندیگجاہءَ بند اِنت، کمبر چاکرءِ ڈولیں بلندشانیں ورنا کہ آ دژمنءِ آزارجاھاں اے باور کنائین ایت کہ من مرگءَ امبازاں زرت کن آں بلے تئی گلامیءَ نہ من آں، زاہد بلوچءِ پیمیں مزن شانیں رھشون مرچی دژمنءِ آزارجاہانی تہءَ بند انت۔ اے کلیں سنگتاں چوشیں مزنیں کربانی پمیشکہ اوپار کتگ انت/کنگءَ انت تاکہ بی ایس او آزاد ھرچ ڈولءَ مہکم بہ بیت۔ پمیشکہ نوک گچین بوتگیں باسک سرپد بہ بنت کہ اے کسانیں بارے نہ یے کہ ما کوپگاں کتگ۔ ءُ امیت انت کہ گلءِ دیمءِ دو سالی مراگشانی مہکم دارگ ءُ گیش شاھگان کنگءِ ھاترءَ گلءِ سنگت چہ ھچ پیمیں کربانیءِ دیگءَ چک ءُ پد نہ بنت۔
نوک گچین بوتگیں کماش درپشان بلوچءَ گشت کہ بلوچ راجی جنزءَ گیش مہکم کنگ ءُ آئیءِ برجاہ دارگءِ ھاترءَ ادارتی بنیادءَ گیش کار کنگ ءُ جہدءِ گیش مہکم کنگءِ درکار انت۔ مئے جنگ یک نپر یاکہ یک راجےءِ گوما بوگءَ نہ انت بگندئے استانی بنیادءَ اڈ داتگیں مہکمیں ادارہانی گوما بوگءَ انت کہ آھانی سرءَ ھمک سالءِ بنیادءَ کربانی زر ھرچ کنگ بنت۔ مئے جنگ گوں ھما ہزاراں ادارہان اِنت کہ آھاں اے استانءِ جوڑشت پہ وتی پائدگانی ھاترءَ زندگ داشتگ۔ اے کبزہءِ ھلاس کَنگءِ واستہ اداراتی سیاست ءُ جہد گیش مہکم کنگ ءُ نپری سوچ چہ ھُنڈالاں ولگوج کنگی اِنت۔ بلوچ ورناہاں نا تہنا گوں جزباتاں بلکیں گوں ھوش ءُ گوش ءُ وتی بودشتانی گوما اے جنزءَ بہر زورگی انت ءُ دیمءَ روگی انت۔ مہکمیں ادارہ، نوکتریں سائنسی بودشت ءُ ھنراں چہ بلوچ راجی جنز آکبتےءَ سر بوت کنت۔ بلوچ راجی جنز اے وھداں ادارہانی بستارءَ ساڑی انت ءُ پہ ھر چونیں استانےءَ آجوئیءِ جنگ ءُ آئیءِ سوبمندیءِ ھاترءَ راجی جنزءَ را ھما استانءِ مکابلہءِ ادارہ لوٹ ایت۔ بلوچ ورنا وتی بودشتانی سرءَ گیشءَ گیش کار کنانءَ راجی جنزءَ را بنجاہی ادارہےءِ بستارءَ دیمءَ بیار انت۔ یک آزات ءُ وتواکیں بلوچستانےءَ بلوچءِ راجی پجّار، زبان، دود ءُ ربیدگ ءُ مال ءُ مڈی پہریزگ بوت کن انت ءُ ڈیھ وشہالیءِ مانزمان بوت کنت۔
کماشءَ دیمترءَ تران کنانءَ گشت کہ بلوچ ورناہانءَ لہتیں تہلیں راستیاں چہ آشنا بوگی اِنت کہ آ بیست ءُ یکمی کرنءَ یک انچیں استانےءِ ھلاپءَ جنگ کَنگءَ اَنت کہ آ استان یک نیمگے امریکہءِ وڑیں زورآورےءِ ھمبراہ انت تاں دومی نیمگءَ چینءِ وڑیں نام نہادیں کمیونسٹ ملکےءِ گوما ھمکوپگ انت، ما چہ سردجنگءِ بائی پولر آرڈرءَ دراتکگ ءُ یک انچیں اھدےءَ ایر کپتگیں کہ اودءَ یونی پولر کیپیٹیلسٹ رھبندءِ تہءَ وتءَ مہکم کنگی اِنت۔ بلکیں مرچی ئیں زمانگءَ مہکم، تمرد، ھنرمَند ءُ بلندیں تاکتاں گوں ھمگرنچیں راج اے جہانءَ منگ بنت ءُ آھانی پلہ مرزی کنگ بیت۔ نزوریں راج آجوئیءِ بیرک دار بوت نہ کن اَنت بلکیں تاکت، زورمند ءُ ھنرمَندیءَ چہ راج آزات ءُ مہکم بنت۔ مارا چہ وتی زہناں ایردستیءِ رٹا کشگی اِنت ءُ یک مزنیں تاکتےءِ جوڑ بوگءِ سوچءِ گوما جہد کنگءِ درکار انت۔ بلوچ راجی جنزءَ اے وھداں نوکتریں بودشتانی درکار انت کہ چرائیءَ آ اے استانءِ ادارتی جوڑشتءَ ھلاس بہ کن اَنت ءُ آئی جاہءَ بلوچءِ استانی جوڑشتے اڈ بہ دینت کہ پہ ایشیءِ ھاترءَ تہنا راجی جزبات کار نہ دنت بگندئے پہ ایشیءِ ھاترءَ مزنیں ھنر ءُ بودشتءِ درکار انت کہ آ اے استانی جوڑشتءَ دیمتر بہ بنت۔ مارا چہ سطحی سوچ ءُ پگر ءُ جزباتی اوگاماں درآہگی اِنت ءُ راستیں بنیاداں یک استانےءِ اڈ دیگءِ کارانی باروءَ وانگءِ نیمءَ روگی اِنت۔ اے نوکیں زمانگءَ مزنیں بودشت ءُ ھنراں ابید کبزہ گیرءِ ھلاپءَ جنگ بوت کت نہ کنت کہ آ چہ نوکیں جنگی سلاہ ءُ ساماناں کتار بند انت ءُ سدانی کچءَ جتائیں ادارہانی واھند انت۔
بلوچ جنزءَ را گیش بنجاہی ادارہ سازیءِ نیمگءَ برگءِ درکار انت، چےءَ کہ مئے دژمن یک مردمے نہ اِت، نئیکہ یک ادارہے۔ بلوچ یک سرجمیں استانےءَ گوں دیم پہ دیم اِنت کہ آئی تہءَ ھر وڑیں ادارہ است، پمیشکہ پہ بلوچاں الّمی اِنت کہ وتی راجی جھدءَ بنجاھی ادارہ سازیءِ بنیاتءَ دیمءَ بہ بارت۔ ایوکءَ نوکیں وھدءِ لوٹ ءُ گزراں پیلو کنوکیں ادارہ اے استانءِ دیمءَ اوشتات کن اَنت ءُ بلوچ راجءِ آجوئیءِ مانزمان بنت۔ بلوچ ورناھاں لوٹیت کہ آ چہ کوھن ءُ پدمنتگیں کار رھبنداں بُرز نوکیں دورءِ سائنسی، وانگی ءُ آشوبی کار رھبنداں کارمرز کنانءَ بلوچ راجی آجوئی جُنزءِ تہءَ بہر بُزور اَنت۔
آئیءِ گُشگ اَت کہ جنگ آماچیں راجانی تہءَ چاگردی ءُ آشوبی بدلی آرگءَ ورناھانی کرد سک باز ارزشت داریت۔ بلوچ ورنا اے آشوبی دورءِ تہءَ وتی زاتی نپ ءُ سیتّانی ھاترءَ آمیدگسءَ نشتگیں پارٹی ءُ سرکاری زر ھرید ءُ میر ءُ سردارانی دستءَ وتا کارمرز بوگءَ بہ رکّین اَنت، وتی نپری زندءَ در بیا اَنت ءُ وھد ءُ جاورانی رِدءَ راجی ءُ مُچانکی لوٹ ءُ گزراں پیلو کنگءِ ھاترءَ جھد بہ کن اَنت۔ ما چہ اے راستیءَ وتا اندیم کُت نہ کنیں کہ بلوچ گلامی زندےءِ گوازینگءَ اِنت۔ بلوچءِ جنگ آماچیں راجےءَ سیادی دارگ ءُ پدا روبرکتی راجانی وڑءَ آزات ءُ وشہالیں زندے گوازینگءِ گُمان کنگ بس یک وھد زوالی یے۔ بلوچ ورنا راجی جھدءَ دیمءَ ایر کنانءَ وتی بانداتءِ پیسلہءَ بہ کن اَنت۔
زورگریں استان گوستگیں ھپت دھکاں چہ بلوچ ورناھاں پروش دیگءِ جہدءَ اِنت۔ جاھے پہ تُرس ءُ بیم، تہ جاھے پہ لب ءُ لالچ، استان یکشلءَ جھد ءَ اِنت کہ بلوچ ورنا وڑے ناں وڑےءَ پدکنز بہ بنت۔ اے پندلءِ تہءَ نا تھنا دژمنءِ جند اِنت بگندئے ھما بلوچ ھم ھوار اَنت کہ آھاں چہ بنداتی روچءَ بلوچ راجی جھدءِ سودا جتگ۔ اے راستی وتی جاہءَ کہ راجدپتر آھاں کدی نہ بکشائیت بلئے اے وھد اے لوٹ ھمیش اِنت کہ بلوچ ورنا ھاسکر بی ایس او آزادءِ آشوبی باسک وتی شپ ءُ روچاں یک بہ کن اَنت ءُ بلوچ راج ءُ بلوچ ورناھاں اے راجی زرمبشتءِ ارزشتءَ پوہ بہ کن اَنت۔
من نمیرانیں بلوچانی وارساں گوشگ لوٹاں کہ سرسوبی ءُ آجوئیءِ منزلءَ سر بوگءَ ابید مارا ھچ وڑیں باندات نیست۔ پہ بلوچءِ راجی آجوئیءَ ھزارانی کساسءَ بلوچ ورناھاں وتی بےبہائیں سر ندر کُتگ اَنت ءُ لس بلوچءَ ھر وڑیں سگّی اوپار کُتگ، بلئے راجدپتر گواہی دنت کہ راجانی جوڑ بوگءَ اے رنگیں نگیگیں ءُ گرانیں سپر الّمی اَنت۔ چُشیں ھچ راجے نیست کہ آھاں وتی راجی آجوئیءِ ھاترءَ کُربانی نہ داتگ۔ مرچی ھزارانی کساسءَ بے لوگ ءُ بزّگیں بلوچانی اوست گوں ما بندوک اَنت، پمیشکہ الّمی اِنت کہ ما وتی توانءَ گوں سنگینی ءُ دل ءُ ستک پہ آجوئیءِ منزلءَ سر بوگءِ ھاترءَ ھرچ بہ کن ایں۔

نوک گچین بوتگیں مزن کارگشاد زروان بلوچءَ وتی زمہ واریاناں زورانءَ بی ایس او آزادءِ بیست ءُ سیمی بنجاہی لس مجلس بیادءِ لمہء وتن کریمہ بلوچ ءُ آجوئیءِ نمیران ءُ بنام بلوچ اسیرانءِ رسمی ھلاسیءِ جار جت۔