سنگت سنا آشوب ءِ ہما رُژن اَت کوہء سلیمان ءِ مہکمیں کوہاں بہ گِر داں مکُران ءِ مرگاپ ءِ سِکاں تالان اَت۔
شولان بلوچ- ترجمان، بلوچ اسٹوڈنٹس آرگنائزیشن آزاد

نمیرانیں سنگت سناء بلوچ آجوئی جہد ءِ ہما آشوبی رہشون اَت کہ دژمن ءِ تیرئِے سینگ ءَ وارت اَنت بلے چہ راجی مکسد ءَ پُشت کِنز نہ بوت۔ راجی جہد ءَ سنگت سنا ءِ پیمیں دلیریں سیاسی جہدکارانی یکشلیں جہد ءُ کُربانیانی برورد اِنت کہ اے آجوئی ءِ سپر نزور نہ تر ایت ءُ ناکہ جہدکار دمانے چہ وتی مکسد ءَ پُشت کِنز بنت۔ آئی ءِ دلیری ءُ پہ بلوچ ڈیھ ءِ دوبر آجوئی ءَ دِستگیں واب مرچی ہمک بلوچ پُسگ ءِ دلاں رُستگ ءُ آئی ءِ ترندیں آشوبی کلوہ ہمک کوچگ ءُ شہراں تالان اِنت۔

پاکستانی زالمیں اِستان ءَ چوشیں ہزارانی کچ ءَ بلوچ سیاسی جہدکار ءُ رہشون تیر باران کُتگ کہ مروچی بلوچ راجی دپتر ءَ نمیران اَنت۔ اے ہما سر بوتگ اَنت کہ آہاں وتی زِند ءِ ہمک شئے پہ وتی راج ءُ ڈیھ ءِ باندات ءَ ببا داتگ ءُ داں گُڈی ساہ ءَ راجی مکسد ءَ گوں ہمگرنچ بوتگ اَنت۔ اے سرانی روگ پہ راجی جہد ءَ یک مزنیں تاوانے ءَ ابید پہ جہدکاراں یک مہکمیں فلسفہ یے ءِ درس اِنت کہ اے راجی جہد پہ سرانی گُڈگ ءَ نزور نہ بیت بلکیں مروچی

بلوچ راج ءَ وتی جہد ءَ گوں پدر کُتگ کہ آ ھونانی شہجواں چہ ساہ زور ایت ءُ دژمن ءَ پہ کہرے جوڑ بیت۔
سنگت سنا بلوچ آشوب ءِ ہما رُژن اَت کوہء سلیمان ءِ مہکمیں کوہاں بہ گِر داں مکُران ءِ مرگاپ ءِ سِکاں تالان اَت۔ آئی ءَ وتی دورچاری ءَ گوں بلوچ سیاسی چاگرد مہکم کنگ ءِ سر ءَ جہد کُت۔ ہما وہد ءَ کہ بلوچ راجی سیاست ءِ تہ ءَ جنگ ءُ کُشگ، ژانگولیں لاشانی چگل دیگ، بلوچ پُسگانی زورانسری گار ءُ بیگواہی ءَ ہوار ہمک ڈولیں اِستانی زوراکی وتی زور ءَ بیت بلے سنگت اے جاوراں چہ تچگ ءِ جاہ ءَ مہکم ءُ دلیری ءَ گوں اوشت ایت ءُ بلوچ ورنایانی سیاسی ہیلکاری ءَ کنگ ءَ بیت ءُ بلوچ سرڈگار ءِ سر ءَ نِشتگیں بلوچ مہلوک ءَ آشوب ءِ رُژن ءَ تالان کنگ ءَ بیت۔

اے ہما روچ اِنت کہ پاکستانی زالمیں اِستان آئی ءِ تیر سُپتگیں جون ءَ ماں مُرگاپ ءِ سکاں چگل دنت بلے آئی ءِ رِتکگیں ھوناں چہ پُل رُد ایت کہ مرچی مہکمیں جہدکارانی دروشم ءَ بلوچ ڈیھ ءِ دوبر آجوئی ءَ پہ جہد ءَ اَنت۔ بلوچ ءِ ہمک ورنا ءُ جہدکاراں آئی ءِ دلیری وتی تہ ءَ جاہ دیگی اِنت ءُ آئی ءِ دِستگیں واب ءَ بزانت دیگ ءَ بلوچ راجی آجوئی جہد پِگری ءُ جوڈشتی بنیاد ءَ گیش مہکم ءُ منظم کنگی اِنت۔