مرگاپءِ نمیراناں سُہریں دروت ندر کن ایں۔

بی ایس او آزاد

بی ایس او آزادءِ بنجاہی جارچینءَ مرگاپءِ نمیران چیئرمین غلام محمد بلوچ ءُ آئی ءِ ھمراہ شیر محمد ءُ لالا منیر بلوچ ءَ سُہریں دروت ندر کنان ءَ گُشت کہ چیئرمین غلام محمد بلوچ ءُ آئی ءِ ھمراہانی رہشونی بلوچ راجی جہدءَ داں آجوئیءِ منزلءَ سر کنگءِ مانزمان بیت۔ بلوچ راجءِ اے بے بہائیں رھشونانی بیگواہی ءُ آھانی تیر سُپتگ ءُ زانگولیں جونانی ماں مرگاپءَ دور دیگءِ گوما زورگریں استان ماں بلوچستانءَ “کشگ ءُ چگل دیگ”ءِ شوربندی ءَ بندات کت کہ داں روچ مرچی جتائیں یکشلا برجاہ اِنت۔

بنجاہی جارچین ءَ وتی درشانءَ دیمترءَ گشت چیئرمین غلام محمد بلوچ نا تہنا آجوئی جہدءِ سرکیلیں پارٹی بی این ایم ءِ بنھشتی راھشوناں چہ یکے بوتگ، بگندئے سرجمیں بلوچستانءَ یک راجی رھشونےءِ بستار ءَ چارگ ءُ منّگ بوتگ۔ 3 اپریل 2009 ءَ چیئرمین غلام محمدءَ را پاکستانی لشکر ماں تربت ءَ آئیءِ وکیل کچکول علی ایڈوکیٹ ءِ چیمبرءَ گوں دو دگہ راجی رھشون لالا منیر ءُ واجہ شیر محمدءِ ھمرائیءَ زورانسری بیگواہ کنت ءُ بیگواہیءِ پنچ روچاں پد آھانی زانگولیں جون چہ مرگاپ ءَ دست کپ اَنت۔ زورگریں استانءَ غلام محمد ءُ آئی ءِ ھمراہانی زانگولیں جونانی چگل دیگ ءِ ھمرائی ءَ بلوچستان ءَ کُشگ ءُ چگل دیگ ءِ درچے بندات کُت کہ داں روچ مروچی یک ھسابءَ برجاہ اِنت۔ اے ھبر تچک اِنت کہ چیئرمین غلام محمد ءِ دابیں رھشونےءِ کنڈ ءِ پُر کنگ ءَ سدانی سال پکار بیت بلے اے ھبر ھم رد کنگ نہ بیت کہ مزنیں آشوبانی ھاتر ءَ مزنیں سراں کربانی دیگ کپ ایت۔ غلام محمد بلوچ ءُ آئی ھمراھانی پہ آشوب ءُ بلوچ جنزءِ ھاترءَ جہد ھما مزن شانیں کربانیانی تہءَ یات دارگ بنت کہ پہ دنیاءِ ھرچ جنزءَ المی بوتگ انت۔ مرگاپ ءِ ویل ءَ لس بلوچانی گور ءَ اے ھبر تچک کُت کہ آھانی دژمن کئے اِنت ءُ آجوئی ءِ جھد پرچہ المی اِنت۔ مرگاپ ءِ نمیرانیں رہشوناں بلوچ آجوئی جھد ءَ را ادارہی بنیات ءَ منظم کنگ ءُ وتی گُڑّی ساہ ءَ داں اے ادارھانی منظم کنگ ءُ پاھازگ ءِ ھاتر ءَ پُرارزشتیں کردے پیلو کُتگ۔

جارچین ءِ گوشگ اَت کہ مرگاپ ءِ وئیل ءَ یک نیمگے بلوچ مھلوک ءِ دیمءَ پاکستانی زورگیریءِ زوراکی گیش پدر کت تہ دومی نیمگءَ استانی آمیدگسءِ نشتگیں ھما پارٹیانی مہلوکءِ راستیں دروشم پدر کت کہ آ یک نیمگے بلوچ ءُ آئیءِ ہکانی گپءَ کن انت تہ دومی نیمگءَ پاکستانی پوجءِ کاس لیس جوڑ انت۔ چیئرمین غلام محمد ءَ لس مہلوکءِ دیم ءَ اے گپ باور کنائینت کہ ابید ءِ بلوچ راجی جُنز ءُ یک آزاد ءُ وتواکیں استانے ءَ بلوچ ءِ راجی پجّار ءُ گراں بہائیں راجی مڑّی پاھازگ نہ بنت۔

جارچین ءَ وتی درشانءِ گُڑسر ءَ گُشت کہ نمیرانیں رہشونانی اے دیہونیءِ فلسفہ آزاد ءُ وتواکیں ڈیھے ءِ وارس بوگءِ مانزمان بیت۔ ما وتی نمیرانانی دیمہونیاں دروت پیش کن ایں ءُ آھانی کار ءُ پروگراماں داں بلوچ ڈیھءِ آجوئیءَ یکشلا برجاہ دار ایں۔