بی ایس او ءِ پنجاه ءُ یکُّمی یومِ تاسیس
26 November 2018
بی ایس او بلوچ آشوبی تحریک ءُ بلوچ راج ، راجی زبان آئیءِ دودءُ ربیدگءُ سرڈگارءِ سرپد بوھگ ، سرپد کنگ ءُ آهانی رکّینگءِ بُن ھشتے ۔مرچی بی ایس او پہ بلوچ مہلوکءَ یک علم ءُ آگہی ، شعور ءُ تربیت ءُ یک سائنسی درسگاهےءِ ھیثیتءَ دارایت کہ آئیءِ شاه بلوچستانءَ ھوار دگنیاءِ ھمک ھندءُ دمگانی جہہ مہ نندیں بلوچ پدریچاں پہ سر بوتگ انت ۔ پمیشکہ مرچی ھمک آتراپاں آئیءِ توار ءُ رژنائی اشکنگءُ گندگ بنت ۔
مڑاه داریں وانوکاں۔۔۔۔
بیستءُ شش نومبر 1967 اے ھما زمانگ اِنت کہ اے وهداں بلوچ ورنا ءُ لس مہلوک کبزہ گیریں استان پاکستانءِ گلامیءِ مکر ،ہیلہ ءُ پندلانی تہاری ءِ تہا بے راہیءَ پہ سرجنان انت ۔ماں اے جاوراں بلوچءِ واننده ءُ سرپدی ایں ورنا دگنیائے سیاسی پیچءُ تابانی سرپد بوھگءَ گوں پہ وتی راجءِ ورناهاں یک آشوبی پیسلہے مارانت ءُ آئی ءَ ماں عملی بستارءَ بنگیج کن انت کہ آ پیسلہ ماں دو رنگءَ زورگ بیت۔یکے اِش بیت کہ بلوچ مہلوکءُ ھاس ورنا وانگءُ زانگءِ نیمگءَ آرگ بہ بنت ، دانکہ آھانی تہءِ اندری بود (تخلیقی صلاحیت) ردوم بہ زورانت ءُ آ ماں وتی اندرءَ سرجم جوڑ بہ بنت ۔چیا کہ ھمک انسان وڑ وڑیں بود(صلاحیت) آنی واہند بیت ۔ بلے ابید وانگءُ زانگءَ نئیکہ آئیءِ چیریں بود درا بنت ءُ نئیکہ ردوم زور انت ،علم ءُ زانت انسانءِ چیریں بوداں ردوم دنتءُ آهانی درشانیءِ کمکءَ کنت ۔ ءُ دومی ورناھانءَ وانگءُ زانگءَ گوں ھوار سیاستءِ نیمگءَ آرگ ءُ سیاستءِ پیچءُ تابانی سرپد کنگ ۔همے مارگ بوت کہ همینکس کہ ورناهانی واستہ علمءُ زانت المی انت پہ آهاں سیاست هم همینکس اژدری انت چیا کہ ورنا وتی زمین (ملک)ءُ آئیءِ چاگردانی باندات انت ،ھردے کہ یک زمینےءِ واھند وتی زمین ءُ آئیءِ ھدءُ سیمسر ، مال ءُ مڑیاں ھوار سیاستءِ پیچءُ تاباں سرپد مہ بیت گڑا آ وتی راجءُ مہلوکءَ پہ زندمانءِ راستی ایں کشکاں در گیپت نہ کنت، پمیشکہ بلوچ ورناھاں بی ایس او ءِ بُن ھِشت گوں وانگءُ زانگءَ ھوار سیاستءِ شنگءُ تالانیءَ گوں ایر کت دانکہ بلوچ ورنا وانینگ بہ بنت ءُ آھانءَ سیاستءِ تکءُ پہنات سرپد کنگ بہ بنت ۔تاں آ ملکی درملکیءُ کشءُ گوری استان (ریاست) آنی تبءُ مئیلاں سرپد بہ بنت ءُ وتی راجءَ چہ دگنیائے چیردستی آں بہ رکین انت ءُ وتی زمینءِ سرا وت واجہیءُ مہزب ایں استانے واهند بہ بنت ۔
شرپ مندیں مہلوک۔۔۔۔
مرچی بی ایس او ءَ پنجاه ءُ یک سال سرجم بوتگ اے مدتانی تہا بی ایس اوءَ بلوچ راجی آجوئی جہدءِ تہا وتی یک ابدمانیں کربانیانی دپترے نکش اِتگ ۔بی ایس اوءِ هکیکیءُ پکری جد وَ جہد مدام پہ یک زندگ ءُ زانتکارءُ سرپدی ایں نسلےءِ جوڑ کنگءَ پہ بوتگ ۔چوشکہ پاکستان کہ بلوچ سرڈگارءِ سرا قابض انت آئی بی ایس اوءِ هکیکی ایں پرزندءُ آهانی بہ شعوریں سیاسی عمل هچبر برداشت کت نہ کتگ انت ۔آئی مدام بی ایس او ءِ هلاس ءُ کنڑم کنگءَ پہ وڑ وڑیں پندلانی بے کساس بے سوبیں جہد کتگ انت ۔بلے بی ایس اوءَ هم وتی اے کسانیں سپرءِ تہا هزاراں سرانی دیمہونی داتگءُ وتی سپر انگت مہکم ءُ برجاه داشتگ ۔بی ایس اوءِ هکیکی ایں ورکراں بی ایس اوءِ پکر مدام ماں وتی سینگانی تہا داشتگ ءُ یک نسلےءَ پہ دومی نسلءَ داں سر کتگ ۔ ءُ مروچی هم بی ایس اوءِ باسک وتی حمیدءِ پکرءِ سرا برجاه انت ءُ آئیءِ پاهوءِ چُکّگءِ جزبگءَ دار انت ۔بی ایس او ءَ ماں وتی اے گونڑیں سپرءِ تہا بلوچ راجءَرا عظیمیں رہبر ءُ رہشون بکشاتگ کہ هماهانی رهبریءُ رهشونیءَ مرچی بلوچءَ وتی هکیکی ایں راه درچتگ انت ءُ سپر کنگءَ انت ۔بگندے مرچی چہ همے رهشوناں بازینے جسمانی دروشمءَ گوں ما هوار نہ انت بلے آهانی سوچ ءُ پکر گوں ما مدام بندوک انت ۔شہید فدا ،شہید کمبر چاکر ، شہید شفیع ،شہید رضا جہانگیر، شہید کامریڑ قیوم ءُ بیگواهیں زاکر مجید ،زاهد بلوچ، ثناءاللہ ، حسام ، نصیر ءُ شبیربلوچءَ هوار هزاراں سنگتانی شہیدی ءُ بیگواهی مرچی بی ایس او ءِ سنگتانی مہکمی ءُ دیمءَ جنزگءِ مستریں کمک ءُ تاوان انت ۔مرچی زورگریں استان ءَ بلوچءَ پہ وانگءُ زانگی ،سیاسی ، لبزانکی دراهیں دیمروئی ءِ راهءُ در وتی وسءَ بند کتگ انت ۔ماں وانگجاهانی تہا وتی پوجءِ مانریچگ۔۔۔ سیاست سرا بندش جنگ۔۔۔لبزانکی تاک مہتاک ءُ بلوچی کتابانی چہاپءُ بہا کنگءِ سرا بندش ۔۔۔بی ایس او ءِ بے کساس نودربرانی آوار جنگءُ شہید کنگ۔اے دراہیں چیزاں چہ ابید هم مرچی بی ایس او مہکمیں دروشمےءَ وتی وانگءُ زانگ ،لبزانکءُ سیاسی کاراں گوں جنزان انت ۔
تنگویں بلوچ پسگاں۔۔۔۔
مرچی بی ایس او بلوچ مہلوک ءُ هاس ورناهاں علمءُ زانتءَ هوار آهانءَ سیاسی سرپدی دیگءَ انت ،هما سرپدی کہ مزن وانگجاهانی تہا وانینگ بنت مرچی بی ایس اوءِ باسک آئیءَ وتی شہر ،میتگ، کوهءُ کوچگاں ماں مراگش، سرکلءُ تربیتی تاکءُ مہتاکانی وسیلہءَ سر کنگءَ انت ۔ مرچی بی ایس او ءِ اے یک بلاهیں سوبمندی یے کہ هما هلکءُ هنکیناں کہ علمءُ زانت ءِ چیدگے نہ گواهیت ایں بلے آ اودا بی ایس او ءِ همک هپتگ سرکل ءُ دیوان گوں تربیتی سنچءُ زانتءَ برجاه دارگ بنت انت ۔بلوچ سرڈگارءِ مرچی ایں جاور بلوچ ورناهانی گوما اے لوٹءَ کنت کہ آ ماں تیزگامیں دگنیاءَ چہ پشت کپگءُ گار بوهگءَ پہ رکگءِ هاترا یک یکجاهیءِ تلوے گچین بکن انت ءُ وتی راجی هستیءِ زندگ دارگءَ پہ یک مشت بہ بنت ۔بلوچ زهگءُ زالبول ءُ ورناهانی سرا اے الم انت کہ وتی نصابی وانگی آں گوں هوار سیاسی ،تاریخی ، ءُ دگنیائی کتاب هم بہ وان انت دانکہ وتی راستیں کشکاں دیست کت بکن انت ءُ پہ وتی بانداتءَ توجیلے بہ شوهاز انت ۔
بلوچ ، بلوچی ءُ بلوچستان سبزءُ میزران بات انتٓ۔