بیست ءُ ھپت مارچ سیاھیں روچ

ایردستیں بلوچ راج ۔۔۔
گراں مذہبیں دنیا ھما راجاں یات کنت کہ آیاں پہ وتی سربلندیءَ زورگرءِ ھلاپءَ گہگیر کنانءَ وتی راجی پجار رکینتگ انت ءُ ایردست ءُ زورگرءِ میانءَ بنیادی تپاوت گیشینتگ انت یا آئیءِ لگتمالی ءُ گلامیءِ طوق ءُ زمزیل پروشتگ انت گڑا دنیا لاچار بوتگ کہ آئیءَ را یک راجےءِ بستارءَ آجوئیں استانے باور بہ کنت۔ چوشکہ ھمے زورگری ءُ ایردستیءِ ھلاپءَ بلوچ راجءَ اولی گہگیری جنگ ھما وھدءَ بندات کت وھدے کہ انگلستانءَ بلوچ سرڈگارءِ سرءَ بیڑ برت تہ آئیءِ زوراکی ءُ ٹوپانی دیمءَ شہید محراب خان چو بولان ءُ سائیجیءِ تلارانی پیمءَ پمیشکہ اوشتات کہ باندا روچ منی پشتپد بہ زان انت کہ گلامی یک بدیں ھوپے، آئیءَ مار اتگ ات کہ انگلستانءِ گلامیءِ ھلاپءَ اگاں آ اوشت ایت تہ بلوچءِ راجی پجار پشت نہ کپ ایت، ھمیشیءِ ھمبرائیءَ زمین، دودمان، ربیدگ، راجی مڈی ءُ زبان ءُ ایدگہ ھچ چیز نہ مان ایت پمیشکہ آئیءَ ھمے لیکہءِ ھاترءَ 1839ءَ شہیدی نوش کت۔ چریشیءَ بلوچءِ جہد داں ھما وھدءَ برجاہ منت وھدے کہ آئیءَ شکست نہ وارت۔ انچوشکہ آ بلوچ سرڈگارءَ در کپت تہ بلوچستانءَ را آجوئیں بستارے ماں دنیاءَ رست۔
11اگست 1947ءَ بلوچستان یک آجوئیں راجےءِ واھند بوت، وش ءُ وشھالیں زندے گوازینگءَ ات، آئیءِ پاد پچ بوتگ ات انت بلئے چوناھا انگلستان وش نہ ات کہ بلوچستان داں دیراں آجو بہ بیت پرچہ کہ آئیءَ زانتگ ات اگاں بلوچستان آزاتیں استانے بہ بیت تہ منی مال ءُ متاھاں کس پہریز ات کت نہ کنت تہ پمیشکہ آئیءَ ھُندوستان دو ٹکرانی توکءَ بہر ءُ تہر کت۔ چوناھا ھما زمانگءَ وھدے کہ پاکستان ھندوستانءِ بہرے ات ءُ بلوچستان کہ آجو بوت آ وھدءَ محمد علی جناح خان قلاتءِ دوستیگیں مردماں چہ یکے ات، بلوچ جیڑہءِ کانودی چست ءُ ایراں ھم کنگءَ ات بلئے اردیں کہ پاکستان چہ ھندوستانءَ انگریزانی منشاءَ سست تہ انگریزاں محمد علی جناحءَ زور دات کہ بلوچستانءَ را وتی ایردست بہ کنت، تہ بازیں گوش ءُ دہاں پاکستانءَ بلوچ سرڈگارءِ سرءَ دومی رندءَ ماں 27 مارچ 1948ءَ بیڑ برت ءُ بلوچستان ایردست کت ءُ پاکستانءَ نوکیں بلوچستانے ٹہینت ءُ وتی ایردستی ءُ زوراکیءِ بیرک مک کت۔ پمے ھاترءَ اے روچ پہ بلوچ ءُ بلوچستانءِ گوستانکی تاک ءُ دپتراں “سیاھیں روچ” نہ تہنا نبشتہ انت بلکیں ھمے روچءِ سرءَ بلوچ وتی ایردستیءَ گیش سما کنت۔

ورنا وانندگیں بلوچاں۔۔۔
چوشکہ شما سرپد ات کہ ابیدء گہگیری ءُ راجی پجار پاھازیءَ ھچ کوم ءُ ٹکے پشت نہ کپتگ، ھما راجاں کہ وتی گلامیءِ مارشت نہ بوتگ، زورگرءِ ھلاپءَ لیکہی جنگءِ بنیاتءَ نہ یتکگ انت تہ آ راجانی ھستانکی مروچی نہ منتگ۔شما سائنسی ءُ منانکاں بندوکیں وانوک ات تہ شما آشنا ات بازیں راج مروچی پمیشکہ گار انت کہ آیاں وتی راجی پجارءِ دیم داشت کت نہ کتگ۔ گوستانک ہ چوشیں دروراں پُر انت، دور مہ رو بلوچ سرڈگارءِ نزیک گوراں چوشیں راج گندگ بہ بنت، انچوشکہ اومان(مسکت)ءِ تہءَ ظفاری انت کہ آیاں یک زمانگےءَ سلطان کابوس ھکومتءِ گوما پمیشکہ جنگ کت کہ اے زمین مئیگ انت ءُ ادءِ ھاکم ما ایں بلے آیاں وتی گہگیری داشت کت نہ کت۔ مروچی آیاں کس پجہ نیاریت۔بلّے کہ ظفاری عربانی یک ٹکے بلئے مسکت چہ درکدیماں ھمیشانی بوتگ، ایش ھم انچوش ایردست بوت انت کہ ایدگہ عربانی دیمءَ ھجالتی چماں چست کت نہ کن انت۔ بلئے گندئے اردیں بلوچءَ وتی ھر زوآوریں مہلوکءِ ارش ءُ الگارانی دیمءَ سر چو ظفاریانی پیمءَ جہل بہ کتیں تہ مروچی نہ منتگ ات۔ ایردستیں راجانی گورءَ گہگیری یکیں وسیلہ انت کہ راجاں آسودگیں زند بکشائیت۔ پمیشکہ وھدے کہ بلوچستانءِ سرءَ پاکستان بیڑ بارت، بلوچ راجءِ چکچینیءَ کنانءَ میستاں ھم شہید کنت۔ وھدے کہ پاکستان وتءَ را یک مذہبی ئیں ملکے سرپد بیت بلئے آئیءِ توکءَ مذہب وَ مذہب انت مردمی ھچ وڑیں سپت نیست انت۔ ایش تہنا ھمے ھاترءَ انگریزاں جوڑ کتگ کہ آیانی مفاد پیلو بہ بنت۔ چوشکہ شما وت سرپد ات کہ پاکستان وت انگت برطانیہءِ ایردستیں ملکے ءُ پدا ھمیشیءِ دست چیریءَ بلوچ سرڈگار، بلوچءِ دودمان، ربیدگ ءُ زبان لگتمالیں زندےءِ میانءَ گوزگءَ انت ۔ اگاں باسمائیں ورناہ لیکہی رنگءَ پاکستانءِ زلم ءُ زورکیانی ھلاپءَ نہ اوشت انت تہ بلوچ آجوئی بگندئے کرنانی سپرءَ گوں دیمءَ بہ جنز ایت۔ پمیشکہ بائد انت وانندگیں ورناھانی سرءَ زور گیشتر انت کہ آ اے روچءِ بابتءَ سمائی رنگءَ سرپد بہ بنت ءُ دانائی ءُ منطقی بنیاتءَ گوں بلوچ آجوئی جنزءَ ھوار بہ کپ انت ءُ سیاھیں روچءَ چہ وتی راجی پجار ءُ زمینءَ را بہ رکین انت۔

سیاسی باسمائیں پُسگاں۔۔۔
اے روچ بلوچءَ را دوبر آزات ءُ وتواکیں راجےءِ بستارءَ دنیاءِ دیما آھگءِ ھاترءَ جہد کنگءِ سما ءُ مارشتءَ بکشائیت۔ بلوچ راج ءُ ھاس راجی جہدکاراں وتی گوستءِ ھما باریگ شر چار ءُ ٹپاسگی انت کہ دری تاکتاں چراہاں آھانی راجی تاکت ءُ آجوئیءَ را چے رنگءَ پل اتگ؟ ھما سوب، نزوری، کمی ءُ گیشی کجام اتنت کہ یک آزاتیں استانےءَ وتی آزاتی داشت کت نہ کت؟ دیمترءَ بلوچءَ را پہ وتی راجی بقا ءُ دوبر آجوئیءِ گرگءَ چے پیمیں سوڑگ پکار بیت؟ بلوچءَ را شر سرپد بوگ لوٹ ایت کہ اے وھد پرائیءَ باز ترسناکیں جاورے۔ نوں دنیا ءُ ھاس اے دمگءَ کہ بلوچ ڈیھ انت سرجمیں دمگءِ سیاسی جاورالانی تب سرجمیءَ مٹ بوتگ، اے نوبتءَ بلوچ مہلوکءَ را لوٹ ایت کہ آ گیشا گیش وتی راجی جنز ءُ راجی جنز ءِ اداراہانی ہمکار ءُ ھم کمکیءِ جاہءَ بہ اوشت ایت۔ چیءَ کہ بلوچءِ راجی آجوئی، راجی بقا کل گوں بلوچ راجی جنزءَ بندوک انت ءُ راجی جنزءِ سرجمیں گر ءُ دار گوں آئیءِ جتائیں ادارہاں بندوک انت۔ راجی جنزءِ اداراہانی مھکمی راجی آجوئیءِ مانزمان بیت۔ چوشکہ دنیاءِ تہءَ چہ راجی بقا ءِ بیگواہی ءُ بے ڈیھیءَ مستریں راجی بدہالی ءُ گمنامیءِ چیدگ نیست۔ اے وھدءَ بلوچ ابد زندگ بوگ ءُ ابد بیگواہیءِ میانی لکیرءَ اوشتوک انت، سیاھیں روچ بائد انت ھر سیاسی ءُ باسمائیں بلوچ پسگانءَ ھمے مارشتءَ بہ دنت دانکہ ھمے مارشت لیکھی رنگءَ ردوم بہ زور ایت ءُ بلوچءِ رژنائیں آکبتءَ را بہ سمبھ ئینیت۔

بلوچ اسٹوڈنس آرگنائزیشن آذاد