ھشت جون “بلوچ بیگواہ تا دے”  بلوچستان ئٹی برجاء بندغی حق آتا سخت بر خلافی تا کسہ ءِ ۔

بی ایس او آزات

بلوچ اسٹوڈنس آرگنائزیشن آزات نا بنجاہی ترجمان تینا شینک کروک ءُ بیان اسیٹی ہشت 8 جون “بلوچ بیگواہ تا دے” ءِ بلوچستان ئٹی برجاء بندغی حق آتا سخت بر خلافی تا کسہ پن تریسہ پارے کہ دہائی تیان برجاء زورانسری بیگواہی تا مرغن ءَ لڑ بلوچستان ئٹی بندغی نیستی نا حالیت اختیار کرینے۔ بندغی حق آتا ترند بر خلافی تیان بیدس بندغی حق آتا جہانی ادارہ غاک چپ تماشائی تا کڑدار نا درشانی ءِ کننگ ءُ ۔

او پارے کہ اینو آن تقریباً سینزدہ (13)سال مُست 8 جون 2009 ئنا دے اکن بی ایس او آزات نا مسکوہی وائس چیئرمین زاکر مجید بلوچ ءِ زورانسری ئٹ بیگواہ کننگا۔ زاکر مجید نا زورانسری بیگواہی ءِ بھلو وخت ئس گدرینگ آن گڈ ہم داسکان اودے مونا ہتنگ متنے۔ ہندا وڑ تنظیم نا مسکوہی چیئرمین زاہد بلوچ، مسکوہی انفارمیشن سیکریٹری شبیر بلوچ تون اوار چندی کاریم کروک آک سال آتیان زورانسری بیگواہی نا گواچی ءُ ۔ ہندن کہ تنظیم نا مسکوہی جوائنٹ سیکریٹری شفیع بلوچ، بنجاہی کمیٹی نا باسک کمبر چاکر بلوچ ، کامریڈ قیوم بلوچ تون اوار درزن ءَ کاریم کروک آتے زورانسری ئٹ بیگواہ کننگ آن گڈ اوفتا جشوک جونک جنگل و بیابان آتیٹی خسّنگ مسُرہ ۔ داڑان بیدس ریاستی ادارہ غاک بلوچستان آن کیہی سیاسی کاریم کروک آتے جتا جتا انگا وخت ئٹی زورانسری بیگواہی نا گواچی کریر۔ اوفتان بھاز آتا جشوک جونک خسّنگ مسُر ہندا وڑ کیہیک داسکان ہم بیگواہ ءُ ۔ ریاست نا کنڈان زورانسری ئٹ بیگواہ کننگ و خلّنگ خسّنگ (مارو پھینکو) چھم چرجوئی ئٹ برجاء ءِ و وخت اتون اوار اوٹی پین ودکی کریسہ ءُ ۔

او گیشتر پارے کہ بلوچستان ئٹی بیست سال آن برجاء زورانسری بیگواہی تا عمل آن داسا اسہ ہم دُنو اُرا ئس اف ہرا داڑان رَکھ ئٹی مرے، نودربر آتیان ہلیس ماستر، صحافی، وکیل، ڈاکسر، مُزور ، بزغر، نیاڑی و چُھنا ہزار آتا کچ ئٹی زورانسری بیگواہی نا گواچی مسونو و دا عمل ئٹی کمبوتی نا جاگہ غا ہڑدے ترندی بریسہ ءِ ۔ ہندن پاکستان نا کنڈان ہخس در بلوچستان ئٹی بندغی حق آتا بر خلافی تیٹی ترندی ہتنگ مننگ ءِ ہموڑے جہانی تاغت آک و بندغی حق آتا جہانی ادارہ غاک چپ تماشائی نا کڑدار جوڑ مسونو۔ بین الاقوامی تاغتور ریاست و جہانی بندغی حق آتا ادارہ آتا چُپی پاکستان نا زوراکی تیٹی ودکی نا سوب جوڑ مننگ ءِ ۔ دا وخت بلوچستان ئٹی بلوچ نسل کشی ترندی نا ہند ءَ سر مسونے دا حالیت ئٹی جہانی ادارہ آتیکن دا المی مریک کہ پاکستان ءِ بندغ حق آتا بر خلافی تا بنیات ءَ ورندی خواست کیر۔

تینا بیان نا گڈ سرئٹ او پارے کہ 8 جون بلوچ بیگواہ تا دے ئنا رد ئٹ تنظیم نا کنڈان جتا ءُ مجلس و چائنداری مہم ہڈ تننگ مرو ہندا وڑ تیوہ ہنکین آک ریفرنس ہڈ ترور۔