بی ایس او آزادءِ بیست ءُ سیمی بنجاہی لس مجلسءِ اولی روچءِ اھوال

جنزءَ را یک ھاسیں ترزپکرے ءَ دیمءَ برگءِ بدلءَ جتائیں ترزپکرانی بنیادءَ دیمءَ برگی اِنت۔

کماش ابرم بلوچ

بلوچ اسٹوڈنٹس آرگنائزیشن آزادءِ بیست ءُ سیمی بنجاہی لس مجلس بیاد لمہء وتن بانک کریمہ بلوچ ءُ بلوچ نمیران ءُ بنام بلوچ اسیران برجاہ اِنت۔ مرچی 17 اپریل دوشمبے بلوچ نمیرانانی یاتءَ دو ساھتءِ بے تواری ءُ گوں بلوچ راجی سئوتءَ گلءِ بنجاہی لس مجلسءِ بندات کنگ بوت۔
بیست ءُ سیمی بنجاہی لس مجلسءِ دیوانءِاولی روچءَ بنجاہی کماشءِ تران، آئین سازی، سیکٹری اھوال ءُ تنقیدی نشستءِ سرہالانی سرءَ کونسلرانی میانءَ گوں دلجمیءَ گپ ءُ گال کنگ بوت۔
بنجاہی لس مجلسءِ اولی سرہال بنجاہی کماشءِ تران اَت کہ آئیءِ تہءَ کماش ابرم بلوچءَ گوں دیوانءَ تران کت ءُ گشت کہ باز وشیءِ گپے کہ بی ایس اوءِ باسک چوشیں نگیگیں جاوراں سرجمیں امیتےءِ گوما چہ ھرچونیں جنجالاں گوستگ انت ءُ گلءِ نیمگءَ اڈّ داتگیں دیوانءَ وتی ھرشے یلا داتگ ءُ ادءَ ساڑی اَنت۔ بلوچ ڈیھ دوستیءِ اے مزن شانیں لیکہءِ بنیادءَ سپرکنوکیں اے دیوانءِکلیں سنگتانءَ وش اتک گش آں کہ آھاں نہ تہنا دژمنءِ اے مَڑاہءَ را گوں ھاکاں ھوار کت کہ آ چہ گوستگیں دو دہکاں بی ایس او ءِ نزور ءُ ھلاس کنگءِ کوشستءَ انت بلکیں ھما دراھیں رد آشوبی تاکتانءَ اوں ھمے پیش داشتے کہ آ مدام بی ایس او آزادءِ مزن شانیں پکر ءُ لیکہ ءُ آئیءِ عمل ءُ ترزکارانی سرءَ کِچہ چینی کن انت ءُ بی ایس اوءِ بے سوبی ءُ آؤکیں بانداتءَ آئیءِ ھلاس بوگءِ گپءَ کن اَنت۔ من مرچی بی ایس اوءِآشوبی کیڈرانی ساڑی بوگءِ بستارءَ آھاں ھمے کلوہءَ دیگ لوٹ آں کہ بی ایس او انچوش کہ مرچی مہکم انت آئیءِ درور نیست انت، بی ایس او بلوچ راجمان ءُ جنزءِ تہءَ ھما بدلیاں کہ آرگءَ انت آ آؤکیں بانداتءَ راجی آجوئیءِ مانزمانیءِ سوب جوڑ بنت۔

کماش ابرم بلوچءَ گشت کہ مارا وتی لٹریچر ءُ وانگءِ بستارءِ تہءَ بدلی آرگ لوٹ ایت ، چہ گوستگیں بیست سالاں ما یک انچیں لٹریچرے وانگءَ ایں کہ آ استیں وھدءَ بے مانا انت۔ بلوچ ورنا چہ گوستگیں بازیں سالاں انچیں جنز ءُ شخصیتاں وانگءَ انت کہ آھانی راج مرچی یا وَ گلام انت یا کہ آجوئیءِ گرگءَ پد وتی بانداتےءِ جوڑ کنگءَ سرجم بے سوب بوتگ انت۔ پمیشکہ استیں وھدءِ لوٹانی بنیادءَ بلوچ ورناہانی سرءَ المی انت کہ آ ھما راج ءُ مردماں بہ وان انت کہ آھاں نوکیں زمانگءَ وتی راجانءَ وشہالیں زند بکشاتگ۔
اسرائیلءِ ڈولیں سوبمندیں استان کہ آئیءِ آباتی یک کروڑےءَ برز اِنت، مرچی دنیاءِ تاکتورتریں استان ءُ عرب ملکانی یکشلیں مزن مزنیں ارشاں ابید مہکمیں شکلےءَ ساڑی اِنت، چوشیں استاناں دژمن سرپد بوگ ءُ وانگءِ بدلءَآئیڈیل جوڑ کنگ ءُ وانگی انت کہ آھاں کسانیں مدتانی نیامءَ چے پیمیں نیزگاریں یہودیانءَ چونیں مزنیں تاکتے بکشاتگ۔ ھمے پیم انگریزءِ دزچیرءِ زلم آماچیں چینءَ را ماؤءَ کجا چہ کجا سر کنت کہ مرچی آ دنیاءِ مزنیں تاکتانءَ چم پیشدارگءَ انت ءُ وت وتی ایردستیں دمگ جوڑ کنگءِ جہدءَ اِنت۔ مارا چہ زورآور ءُ ایردستءِ سرہالءَ دراہگ ءُ بلوچ راجی پائیدگانی ھکءَ جیڑگ ، پکر کنگ ءُ عمل کنگءِ درکار اِنت۔ یورپءَ سرجمیں دنیاءِ تہءَ ہزاراں جنگ کت ءُ کروڑانی ھسابءَ مردم کُشت انت بلے مرچی آ مردمی ھکانی چیمپئن سرءَ پہر بندیت۔ بلوچ یک مزنیں تاکتے ءِ گوما پہ وتءَ چیزے کت کنت ، چہ گوستگیں سے سد سالاں ما ھرچی کہ ببا داتگ راجی جنزءِ نزوری ءُ پروش ورگءِ شکلءَ استیں جاوراں چہ بدتریں جاورانی دیمپان بوگی انت۔ ھما راج کہ اے دمگءَ نوری نصیر خانءِ سروکیءَ چہ درستاں مستریں تاکتےءِ واھند اَت، مرچی کجام شے ءُ بے سوبیانی سوب انت کہ پرے ھالءَ اِنت، ایشیءِ سرءَ بلوچ ورناہاں پکر کنگ ءُ جیڑگ لوٹ ایت۔ یک مزنیں تاکتےءِ گوما ما چہ مردمی اگبالاں بگر تاں ایدگہ سائل ءُ وسائلانی سرءَ وتی واک ءُ دزرسے ایر کت کن اِیں۔
کماشءَ گشت کہ بی ایس او بلوچ راجی جنزءِ اسکول اِنت کہ اودءَ بلوچ ورنا ءُ گوں جنزءَ ھمگرنچیں تمردیں سنگت وتی پکر ، ھیال ءُ لیکہاں وان انت ءُ پہ جنزءِ ھاترءَ وتی تواناں بکشاینت۔ بلوچ راجی جنزءِ وانگجاہءِ بستارءَ بی ایس او اآزادءِ کلیں مراگش ءُ چست ءُ ایرپہ بلوچ راجی جنز ءُ جہدءِ مہکم کنگءِ ھاترءَ بہ بنت۔ بی ایس اوءِ ھستانکیءِ سیادی چہ بلوچ راجی جنزءَ زانگ بیت۔ بلوچ راجی جنز ھرچی گیش کہ مہکم ءُ پراہ شاھگان بیت بلوچ راجمانءَ بی ایس اوءِ کرد ھمینکس گیش شاھیگان بیت۔ بی ایس اوءَ را یک بنکی درسگاہ (اسکولے)ءِ بستارءَ بلوچ راجی جنزءِ پکرءَ ورناہانی تہءَ مہکم ءُ گیش کنگءِ ھاترءَ پروگرام ءُ پالیسی اڈ دیگی انت۔
دیمترءَ کماشءَ گشت کہ بلوچ راجی جنزءَ گیش مہکم ءُ برجاہ دارگءِ ھاترءَ بلوچ ورناہاں پرزءُ زمہ واریءِ میانءَ تپاوت سرپد بوگی انت۔ بلوچ ورنا پرزءِ پیلو کنگءِ نامءَ راجی جنزءِ ھاترءَ تہنا ربیتی کرد پیلو مہ کن انت بلکیں بلوچ راجی آجوئیءِ جہدءَ مہکم ءُ برجاہ دارگءِ ھاترءَ مزنءَ چہ مستریں زمہ واریءِ بار وتی کوپگاں بہ کن انت۔ وھدے کہ یک ایردستے جنگی جاورانی آماچ بیت ، آئیءِ سرءَ زورآور ءُ زالمیں استانےءِ کبزہ بیت گڑا آ راجءِ ورنا تہنا ربیتءِ بنیادءَ وتی پرزانی پیلو کنگءِ بنیادءَ راجی جہدءَ را آسرے دات نہ کن انت، بگندئے آھاں راجی جہدءَ را تاں منزلےءَ رسینگءِ ھاترءَ مزنیں زمہ واری وتی کوپگاں کنگ لوٹ ایت۔ اے وھداں بلوچ راجی جنز چہ دژمنءِ نیمگءَ مزنیں چیلنجزانی دیپمان انت ءُ دومی نیمگءَ چینءِ ڈولیں میان استمانی تاکت بلوچ راجی جنزءِ ھلاپءَ دیمءَ اتکگ انت ءُ اے جنگءَ آ سرجم پاکستانءِ ھمکوپگ انت، آ نہ تہنا زر ءُ مالی بنیادءَ بگندئے ٹیکنالوجی ءُ دگہ وسیلہاں چہ چینءِ ڈولیں زورگیریں استانانی کمک گون انت۔ چوشیں جاوراں بلوچ ورنا تہنا ربیتانی پیلو کنگءِ بنیادءَ راجی جہدءَ ھچ دات کت نہ کن انت، بلکیں آھاں گوں جنزءَ ھمگرنچیں ھاسیں زمہ واری زورگ ءُ دیمءَ روگی انت ءُ راجی جنزءَ را گیش مہکم کنگ ءُ برجاہ دارگءِ ھاترءَ وتی تواناں ھرچ بہ کن انت۔
کماش ابرم بلوچ گیش تران کنانءَ گشت کہ استیں جاوراں لائک ءُ بودشتی ئیں ورنا راجی جنزءَ مہکمیں دابےءَ دیمءَ برت کن انت ءُ دژمنءِ دیمءَ آئیءِ مکابلہءِ تاکت جوڑ کت کن انت، پمیشکہ بلوچ ورنا ءُ ھاسکار گوں بی ایس او آزادءَ بندوکیں ورناہاں لوٹ ایت کہ آ راجی سما ءُ پکرءِ ھمبرائیءَ وتی بودشتانی سرءَ اوں کار بہ کن انت ، ءُ ورنا کجام اوں پیلڈےءَ زان انت کہ ما گیش دزرس دار یں گڑا ھما پیلڈءِ نیمگءَ برو انت ءُ آوکیں وھدءَ ھما پیلڈءِ بنیادءَ راجی جنزءَ وتی کردءَ پیلو بہ کن انت۔اے لائک ءُ بودناکیں مردمانی کرن انت، ھما ورنا کہ پہ بلوچ راجی جنزءِ ھاترءَ وتی ساہ ءُ جانانی دیگءَ جاڑیگ بوت کن انت گڑا پرایانی ھاترءَ وتی بودشتانی سرءَ کار کنگ اوں گرانیں کارے نہ بیت، پمیشکہ اے ھیالءِ سرءَ گیش دلگوش دیگ بہ بیت کہ بلوچ ورنا جزبات ءُ گوں جنزءِ دلی ھمگرنچیءِ ھمبرائیءَ جنزءِ جتائیں تک ءُ پہناتاں گیش مہکم کنگ ءُ جنزءِ برجاہ دارگءِ ھمبرائیءَ وتی بودشتانی سرءَ دلجمیءَ کار بہ کن انت۔ ءُ آھاں استیں دورءِ لوٹانی بنیادءَ اڈ بہ دینت ، تاکہ یک مہکمیں جنزے دیمءَ بئیت انت۔
آئیءَ گشت کہ وھدءِ ھمبرائیءَ بلوچ راجمانءَ رد آشوبی تاکت ھمک روچءِ بنیادءَ سرکشان ءُ مہکم بوان انت ءُ راجمانءِ تہءَ آھانی روشت ردیں سان پیداک کنگءَ انت، پمیشکہ بلوچ ورنا ھاسکار بی ایس او آزادءَ لوٹ ایت کہ آ انچیں ریڈیکل لٹریچر انی پجارءَ بہ کنت کہ آ استیں جنزءِ لوٹ انت۔ اے رد آشوبی تاکتانی ردیں روشتانی ایرجیگ کنگءِ ھاترءَ بی ایس او آزادءَ را یک مہکمیں ریڈیکل لٹریچرے ودیگ کنگی انت تاکہ آ ھمے ردیں روشتاں ایرجیگ کت بہ کنت۔ ما ایشیءَ را وتی بدکسمتی بہ گشیں یا کہ نازانتی بلے مئے میانءَ چوشیں مردم مدام ھست بوتگ انت کہ وتی زاتی لوٹانی نہ رسگ ءُ وتی واھشتانی ناسرجمیءِ سوبءَ مدام گل ءُ جنزءِ ھلاپ پاد اتکگ انت۔ چوشیں نپر پہ جنزانی واستہ مزنیں تاوانانی مانزمان بنت کہ آ تہنا پہ وتی دلی واھشتانی پیلو نہ بوگ ءُ وتی دوستی ءُ نادوستیءِ بنیادءَ جنز ءُ گلءِ ھلاپ بنت ءُ انچیں چست ءُ ایراں دیمءَ کاینت کہ آھانی ردیں سان جنزءِ سرءَ کپ انت پمیشکہ چوشیں روشت ءُ ردیں چست ءُ ایرانی کاؤنٹر کنگءِ ھاترءَ بی ایس او آزادءِ نیمگءَبلوچ ورناہاں یک مہکم ءُ ریڈیکل لٹریچرے سرکنگی انت کہ آ راستیں بنیادءَ بلوچ ورناہانی پکری ھیلکاریءَ بہ کنت۔
کماش ابرم بلوچءَ گشت کہ پہ بی ایس اوآزادءِ ھاترءَ کلیں گل ءُ پارٹیانی مزنیں ارزشت ءُ اھترامےکہ آ گوں راجی آجوئی جنزءَ ھمگرنچ انت۔ بی ایس او آزادءِ آوکیں راھشوناں لوٹ ایت کہ آ بلوچ جنزءِ تہءَ یک انچیں روشتے پیداک بہ کن انت کہ آئیءِ سیادی چہ ھچ پیمیں ھاسیں نپر یا کہ ٹولیءَ مہ بیت بلکیں آ روشت مچانکی بستارءَ کلیں جنزءِ ھاترءَ بہ بیت۔ بی ایس او آزاد بلوچ راجی جنزءَ اسکولءِ بستارے دار ایت، پمیشکہ یک اسکولےءِ بستارءَ بی ایس او ءَ را وتی کلیں توان تہنا راجی جنزءِ مہکم کنگ ءُ برجاہ دارگءِ ھاترءَ دیگ لوٹ انت۔ بی ایس او یک گلے ءِ بستارءَ ھچ پیمیں مخصوصیں گل ءُ پارٹیءِ جہگیر نہ انت بلکیں بلوچ ورناہانی نیامءَ راجی جنزءَ گوں ھمگرنچیں کلیں پارٹی ءُ مچانکی بستارءَ جنزءِ جہگیریں گلے۔ ھمے سوچءِ گوما بی ایس او گیش مہکمیں رنگےءَ کار کت کنت ءُ وتی دلگوشءَ گہتریں ترزکارےءَ پہ جنزءَ دات کنت۔
کماش ابرم بلوچءَ گلءِ بیست ءُ سیمی بنجاہی لس مجلسءَ گوں بی ایس اوءِ کیڈرزاں گیش تران کنانءَ گشت کہ بلوچ ورنا دژمنءَ را یک ھاسیں اینگل ءُ ترزکارےءَ وانگءِ بدلءَ آئیءَ جتائیں ڈسکورس ءُ اینگلانی بنیادءَ وانگءِ کوشستءَ بہ کن انت ءُ ھمے درچءَ راجی جنزءَ اوں ھمے دروشمءَ گیش مہکم کنگ ءُ برجاہ دارگءِ جہدءَ بہ کن انت۔ یک ھاسیں اینگل ءُ ترزکارےءَ دژمنءِ وانگ ءُ آئیءِ چار ءُ بیچار کنگ پہ ورناہانی بانداتءَ ترسناک انت چیا کہ استان اے وھداں یک ھاسیں ترزکارےءَ بلوچ جنزءِ ھلاپءَ سرگرم نہ انت بگندئے آ مرچی سدانی ھسابءِ ترزکارانی بنیادءَ راجی جنزءَ را ایرجیگ کنگءِ ھاترءَ جہدءَ انت۔ءُ ھمک روچ ءِ بنیادءَ گیشیں ترزکاراں گوں گندگءَ پیداک انت، پمیشکہ بلوچ ورناہاں لوٹ ایت کہ دژمنءِ جتائیں شکل ءُ ترزکاراں بہ وان انت ءُ پدا جنزءَ را ھما ترزکارانی بنیادءَ جتائیں شوربندیانی بنیادءَ مہکم بہ کن انت۔ گوں جنزءَ بندوکیں نپرانی گوما اے چیز باز ارزشت دار ایت کہ آ نوکیں جاورہال ءُ سائنسی دورءِ لوٹاں سرپد بہ بنت ، ءُ ھمے سوچ ءُ پکرءِ جہدءِ مہکم کنگءِ ھاترءَ دلگوش بہ دینت کہ آئیءِ گہتریں آسر دیمءَ بیا انت۔
کماشءَ وتی ترانءِ گڑسرءَ گشت کہ من گلءِ آؤکیں راھشوناں ھمے سلاہءَ دیگ لوٹ آں کہ آ ھمک دو سالءِ بنجاہی لس مجلسءَ بی ایس اوءَ دو گام گیش دیمءَ برگءِ ھاترءَ کار بہ کن انت۔ پہ بی ایس او ءَ آشوبی پالیسی اڈ بہ دینت ءُ ھما یانی بنیادءَ کار بہ کن انت۔ بی ایس اوءَ را آشوبی عمل ءُ راھبندانی بنیادءَ ورنا عملءِ بہر کنگی انت کہ آھانی عمل گہیں آسرے بہ دنت ، ھما آسر کہ آئیءِ امیدءَ بی ایس او ءُ گوں بلوچ راجی جنزءَ بندوکیں مہلوک کنگءَ انت۔
دیوانءِ دومی ایجنڈا “راھبند” (بزانکہ آئین سازی) اَت۔ گوستگیں بنجاہی مزن کارگشاد مہرزاد بلوچءَ راھبندی کمیٹیءِ اھوال پیش کت انت۔ ءُ چہ کونسلرانی نیمگءَ جتائیں سلاہ ءُ شورانی دیگءَ پد راھبندءِ شقانی تہءَ آؤرتگیں مٹّی ءُ بدلی ءُ کمی ءُ گیشی چہ بنجاہی لس مجلسءِ کونسلرانی اکثریتءِ منگءَ پد راھبندءِ بہر کنگ بوت انت۔دیوانءِ سیمی ایجنڈا “کارگشادءِ دو سالی اھوال” اَت۔ کہ بنجاہی مزن کارگشاد مہرزاد بلوچءَ گوستگیں دو سالی کلیں اھوال بنجاہی لس مجلسءِ دیمءَ پیش کت اَنت ءُ آھانی سرءَ گپ ءُگال کنگ بوت۔ ءُ دیوانءِ مرچی ئیں روچءِ گڑی ءُ چارمی ایجنڈا تنقیدی نشست اَت کہ آئیءِ سرءَ کلیں کونسلراں گوستگیں گلءِ کار ءُ کرد ءُ پرگرامانی سرءَ وتی وتی نگدی ھیال درشان کت انت۔ بنجاہی لس مجلسءِ ایدگہ پشت کپتگیں سرہالانی سرءَ دیمی روچاں گپ ءُ گال کنگ بیت۔