سوراب نا تدینی انت ئسے؟

   نودَل بلوچ

ناجائز ریاست پاکستان نا کنڈان سوراب ئٹ بمباری کننگ و لس مخلوق ءِ شہید کننگ دا ناجائز ریاست بلوچ قوم و بلوچستان ءِ سِدھا پاننگ ء کہ نم ہچ اس افیرے، بلکہ کوزہ گیر راست ءِ۔ او دا وڑ کننگ کیک۔ انتکن؟ دانا ورندی بلوچ قوم تون ءِ۔ امر مطلب؟ نن غلام اُن۔ ننا زی آ کوزہ مسنے۔ او کوزہ گیر آک غلام قوم اتون مدامی اندن کرینو، او مونا ہم اندن کرسا کیرہ۔ اندن بلوچستان ئٹ دا وڑ ئنا ویل آک ہڑدے اسہ پوسکنو دروشم اسیٹی بریرہ۔

سوراب نا دا تدینی بلوچستان کن اسہ پوسکنو تدینی اس اف بلکہ مالو ہم داکان زیات کرینے۔ ہڑدے نا ردئٹ خلیک، کسفک، بیگواہ کیک، جشوک جون بِٹک۔ شہید آتا مون آ تیزاب شاغک ہُشک۔ کسس نا تا لخ تے کشکک، کسس ءِ تا ڈرل کیک شہید سنگت ثناء نا وڑ، کسس  ءِ تا تینا ہیلی تیان خسک بٹک۔ انتئے کہ کوزہ گیر آک جنگی اصول آتے منیپسہ اوفک بیرہ ظلم و تادی و طاغت ءِ چارہ۔ او تینا طاغت ءِ منفنگ نا ہر وڑئٹ کوشست ءِ کیرہ۔ اینو ہم ناجائز ریاست پاکستان اندا تینا کوشست ءِ کننگ ءِ کہ مقبوضہ بلوچستان ئٹ تینا طاغت ءِ امر برجا تخو۔ ولے ہیت آک اوڑان ہنانو انتئے کہ کوزہ گیر آک ہرا وخت جنگ ئٹ بے سہب مسر یا جنگ کننگ کتور گڑا اوڑتون گڈیکو اندا بمباری،شیلنگ و ایلو کیمیائی/ زاری آ ہٹکل آک رہینگرہ۔ گڑا تینا خار ءِ لس مخلوق نا زی آ کشیرہ۔ دانا مثیل ننا مونا ٹے ہرا وخت امریکہ تینا کل طاغت تون ویت نام نا زی آ جلہو کیک گڑا ویت نام نا گوریلا جنگجوک اودے مات ایترہ، خلیرہ تہ، اندن امریکہ آخر تینا ہیلی و ایلو کیمیائی زاری آ ہٹکل تے ہتیک، وس کیک ولے امریکہ غان ہچ مفک، گوریلا ویت نامی تا مونا بے وس مریک آخر امریکہ نرک ویت نام ء اِلک۔ اینو اگہ نن بلوچستان ئٹ دن انگا تدینی تے ہُرن گڑا ننا مونا بریک کہ ناجائز ریاست پاکستان بلوچ سرمچار گوریلا جنگجو تا مونا بے وس مسنے، نفسیاتی حوالہ ئٹ تہہ آن چٹ چُٹانے۔ گڑا اندا سوب آن  ناجائز ریاست پاکستان دُن کننگ ءِ تینا گڈی زور ءِ خلنگ ءِ و ہمو ہٹکل و کاریم تے کننگ ءِ ہرا وڑ امریکہ ویت نام تون کرے۔

بلوچستان ئٹ ریاست بھاز آ لشکرکشی تے مالو آن  کرینے ہرا وخت بلوچستان آ ناجائز ریاست پاکستان نا کوزہ مریک ہموتم ہم قلات آ تینا فوج تون تُد بریک قلات آ کوزہ کیک ہمو وخت آ ہم سُم کاری و زوراکی ٹی بریک۔ سوراب نا تدینی تو داسہ مس داکان مالو کیہی جاغہ تیا بمباری، سم کاری، و شیلنگ کرینے، ہندن پیر و ورنا چُنا نیاڑیک شہید مسنو۔ اندا لشکرکشی تا سوب آن بلوچ لس مخلوق نا بھاز آ اُراک ہُشنگانو ناجائز ریاست پاکستان نا دُو تیان، بھاز آک بے اُرا مسنو، بھاز آک تینا جاغہ تے اِلیسا پیشن ہنانو۔ دنکہ دسمبر 2005 ئٹ کوہلو و ڈیرہ بگٹی ٹی بھلو بمباری اس کرے ۔ 2005 نا تُو مارچ ئٹ ڈیرہ بگٹی ٹی پین بھلو بمباری اس لَس مخلوق نا زی آ کرے ہراڑے سد آن گیشتر بلوچ  شہید مسر ہرافتیٹی چُنا، نیاڑی، پیر و ورنا اوار ئسر۔  2012 ٹی  مشکے ٹی اندنو تدینی اس مس لس مخلوق نا زی آ بمباری کرے۔  یا مشکے ٹی 2015 نا لشکرکشی مرے یا بولان ئٹ شیلنگ نا بھاز آ لشکرکشیک مریر  یا ستمبر 2025 ئٹ زہری علاقہ نا تدینیک مریر۔ داکان بیدس بلوچ نا نسل کشی ٹی ہڑدے ناجائز ریاست پاکستان لگوک ءِ او ہڑدے اسہ پوسکنو دروشم اسیٹی بلوچ نا نسل کشی ءِ کننگ ءِ۔

بیرہ بمباری کننگ نسل کشی اف بلکہ کسفنگ آن زیات نسل کشی ءِ بلوچ نا پین بھاز آ جاغہ تیا کرینے۔ ناجائز ریاست پاکستان بلوچ نا اخس کہ کنے لگک کل آن بھلا نسل کشی ءِ کہ او کرینے او زہنی یا نفسیاتی حوالہ ئٹ کرینے۔ زہنی غلام جوڑ کرینے تا سافٹ پالیسی تا دروشم ٹی۔ ہرا وخت ناجائز ریاست پاکستان ءِ دا درک لگا کہ کنا سافٹ پالیسیک بے سہب مننگ ءُ گڑا او ہارڈ پالیسی تے مونا ہتنگ نا کوشست ءِ کرسا ءِ۔ خُلیس ودی کننگ، ہرفنگ، خلنگ، پین تینا چندی ہٹکل آتے ہیسنے۔ نفسیاتی چم تے تینا ناجائز ریاست پاکستان اِرا وڑ ئٹ بلوچ نا تہٹی ہیسنے۔ اولیکو سافٹ پالیسی و نسل کشی نا دروشم ٹی ہراٹی بلوچ ءِ بھلو نسخان رسینگا و اینو ہم بھاز بلوچ نسخان کننگ ءِ، ارٹمیکو ہارڈ پالیسی نا دروشم ٹی نسل کشی  داسہ کننگ ءِ۔ دا ہمو وخت کننگک ہرا وخت اونا مونا سلوکا گوریلا سرمچار آک اوڑان گیشتر طاغت ور و منظم مریرہ۔

بلوچستان نا آجوئی نا جنگ اینو اسہ پوسکنو دروشم اسیٹی مونا بننگ ءِ ہرانا مونا ناجائز ریاست پاکستان بےوس مننگ ءِ، نفسیاتی حوالہ ئٹ مات و بے سہب مننگ ءِ۔ انتئے کہ اسہ کنڈان کوزہ گیر مریک ایلو کنڈا گوریلا سرمچار آک و اونا اُلس مریک دا نیام ئٹ نفسیاتی حوالہ ئٹ ہرکس سوگو مس جنگ ئٹ ہمو سرسہب مریک۔ اینو بلوچستان نا راجی آجوئی نا جنگ نفسیاتی و نظریاتی حوالہ ئٹ سوگو ءِ ایلو کنڈا ناجائز ریاست پاکستان نا کرایہ دار آ  فوج تون بیرہ زَر و اوفتا اُرا چنا تیان بیدس ہچ اف، اگہ کوزہ گیر تون طاغت ارے ولے طاغت اسہ وڑ سلپک۔ جہان نا ایلو اخس کہ طاغت آک مسنو اوفتیتون سلطنت و تیوہ براعظم مسنے ولے اینو ہرادو؟ افس، تو ہر کوزہ گیر دا سوچ ءِ تینا خلیک کہ ای مونا کوزہ کننگ کپرہ گڑا اُلس ٹی دو شاغک ہرا وڑ اینو بلوچستان نا اُلس تون مننگ ءِ۔

سوراب نا مخلوق تون اوار اوار کل بلوچ قوم و بلوچستان نا اُلس ءِ سرپند مروئی تمک کہ اینو نن ہراڑے سلوک اُن؟ ننے مونا انت کروئی ءِ؟ کوزہ گیر نا مونا ننے امر سلوئی ءِ؟

یخین ئٹ بیرہ جنگ سلوک ءِ انتئے کہ تشدد نا بدلہ تشدد ءِ بقول فرانز فینن و شہید جنرل استاد اسلم بلوچ۔ اندن استاد اسلم بلوچ تینا انٹرویو اسیٹی پائک کہ او بس ( ناجائز ریاست پاکستان) اونا دوٹی توفک ئس اودے ای پھل تننگ کپرہ۔ گڑا استاد اسلم بلوچ نا ردئٹ اندادے او زوراکی ٹی بسنے کوزہ کرینے گڑا نن ہم اودے توفک نا زور آ کشنہ۔ انتئے کہ کوزہ گیر آتے طاغت نا ردئٹ کشنگک۔  گڑا بلوچ نا بھلا طاغت اونا سلہہ بند ادارہ و اونا اُلس ءِ ہراتم کہ اُلس اسہ جاغہ آ اسٹ مسک، گڑا  کوزہ گیر ءِ داخس مونا جیرت مفرو کہ او بلوچستان ئٹ سلے۔ اگہ اینو سوراب ئٹ دا تدینی مسنے مونا پین مننگ کیک انتکن؟ دانا ورندی ننا بلوچ قوم تون ءِ آیا او اسٹ مرے جنگ کے یا غلامی ءِ مونا تینکن تخے۔

اینو بھاز آ جاغہ آ ننا اُلس دا تکنگ ءِ کہ اسہ جاغہ آ زیات جنگ مننگ ءِ گڑا نن مونا ہنپِن پین جاغہ ئسے آ کان۔ دا اوفتا بھلا ردی ءِ انتئے کہ اینو جنگ ہراڑے سر ءِ مونا اندن برسا کیک۔ اسہ جاغہ آن ایلو جاغہ اسکان ہموتم ننا اُلس ہِننگ کیک ہراتم سلہہ بند تنظیم اس اوفتے پائے، انتئے کہ کھڈکوچہ مستونگ ئٹ اندن بمباری، ڈرون خلنگ ارے دنکہ سوراب ٹی مسک یا زہری ٹی مسک، یا تیوہ بلوچستان ئٹ مننگ ءِ ۔ دا تو جنگ زدہ علاقہ تیٹی ہڑدے نا کاریم ءِ۔ ننے و ننا اُلس ءِ دا گڑا ءِ سرپند مروئی ءِ کہ حالیت آتے امر تینا حق ئٹی ہتین، حالیت آتے امر تینا دوٹی کین۔ ہرا وخت نن دافتے پہہ مسن گڑا وخت و حالیت آک اخس کہ سخت مریر ولے اوفتیتون مون تننگ ءِ پہہ مننگ کیک۔

سوراب نا تدینی ءِ گیشتر جنگ تون دا سوب آن تشبیہ تسٹ انتئے کہ بھاز آ زہنی یا نفسیاتی ویل آک اریر، جنگ نا تیوہ بلوچستان ئٹ سر مننگ نا سوب آک اریر، مخلوق نا گیشتر بلوچ سرمچار آ تیتون مہر و خُڑکی نا سوب آک اریر، اندن سوراب نا تدینی پاریٹ انت اسے؟ گڑا سوراب نا تدینی اندا گڑا تیتون تفوک ءُ تدینی ئسے۔ گڑا ننے مونا دا ہروئی ءِ کہ نن کن پین کس بفک۔ ننے تینٹ تینا ٹپ آتا درمان مروئی ءِ۔ بقول استاد اسلم بلوچ کہ ننے تینے منظم کروئی ءِ، ننے دا ہروئی اف کہ پیشن آن کسس برو یا ننا کمک ءِ کرو۔ تینٹ تینے سوگو کروئی ءِ، ننے دا ہروئی اف دنیا ننا باروئٹ انت سوچ خلنگ ءِ۔