زوراکی نا بیگواہی تا جہانی دے و بلوچ
پمفلیٹ
کوزہ گیریت نا گواچی مروکا بلوچ راج!
بلوچ قوم نا زنک ایسری ءِ امر کہ کوزہ گیر ناجائز ریاست پاکستان کننگ ءِ پین ہچ وڑ ءُ کوزہ گیر اس دا وڑ کننگ اف۔ داڑے خلنگ و کسفنگ نا دروشم ٹی آخہ بلکہ پین تینا جتا جتا انگا دروشم ٹی بلوچستان ئٹ بلوچ قوم نا زنک ایسری ءِ کننگ ءِ۔ دنو دے اس اف کہ بلوچ لاش ہرفنگ اف۔ دنو دے اس اف کہ ننا بلوچ ورنا اس زوراکی ئٹ بیگواہ مننگ اف۔ دنو دے اس اف کہ بلوچستان اٹ لشکرکشی مننگ اف۔ دنو دے اس اف کہ پُتک و جوژ ہلوک ءُ جون اس خننگ ٹی اف بلکہ ہڑدے دنو تدینی ننا مونا بریک۔ او کوزہ گیر بلوچ زنک نا ایسری کن ہڑدے تینا شیطانی آ دروشم ٹی بریک۔
بیگواہ کننگوک آتا جہانی دے و بلوچ!
جہان اٹ اگہ زوراکی نا بیگواہی تیکن دے اس تخانو گڑا اوفک ہرا نظر اٹ ہُننگ ءُ کہ آیا تیوہ جہان اٹ کُل قوم آتیکن توار ہرفنگو یا آخہ؟ دا دے آ زوراکی ئٹ بیگواہ مروکا راج آتا راستی نا اسٹ ایلو تون خُڑکی ارے؟ ہمو راج آک ہرافتا زنک ایسری مننگ ءِ اوفک اینو انت کننگ ءُ؟ وختس اندن سما تمک کہ ہرکس تینا وڑ ئٹ تینا جہد ءِ کرسا ءِ۔ اگہ اینو جہانی دے ارے بیگواہ تا، گڑا تیوہ جہان نا ہرا کہ تینے بندغ دوست پارہ اوفک کمک کننگ نا کوشست ءِ کننگ ءُ؟ اگہ کننگ ءُ گڑا ہرادو۔ اگہ کمک کننگ افس ہم گڑا ہرادو؟ اگہ دنو دے اس بیگواہ تیکن بیرہ تخانو گڑا اینو اسکان بلوچستان و بلوچ قوم نا انتکن باتیک زوراکی ئٹ بیگواہ مننگ ءُ۔ گڑا اندا خاطران بلوچ ءِ تینا تینٹ زنک ایسری کروک آتا برخلاف بش مروئی ءِ، کوزہ گیر نا مون ءِ توروئی ءِ۔ جہاں اٹ امر ءُ کہ جاگہ ئسے آ کوزہ مسنے ہمو جاگہ نا مخلوق تینٹ تینا طاغت ءِ جوڑ کرینو و کوزہ گیر آن برخلاف جنگ کرینو۔
زوراکی نا بیگواہی تا گواچی بلوچ!
زوراکی نا بیگواہی بیرہ اِرا لوز افس بلکہ بروکا زنک ئنا مون ءِ توننگ نا عمل ئسے۔ اینو بلوچ قوم نا ہڑدے کیہی ورناک، پیر و کماش آک، چُنا و نیاڑیک زوراکی ئٹ بیگواہ کننگرہ۔ تانکہ بلوچ نا بروکا زنک ایسری نا کُنڈا کائے۔ ہمو وخت اسکان کوزہ گیر بلوچ نا زنک ایسری ءِ کرو ہرا وخت اسکان بلوچ تینٹ تینے پہہ متنے۔ اینو ہرا سیم و دنگ آ بلوچ سلوک ءِ مونا بلوچ ورناک تینے پہہ مریر تانکہ دا زنک ایسری نا مونا سَلر و بروکا زنک ئنا رکھ ءِ کیر۔
زوراکی ئٹ بیگواہ اینو دیر مننگ ءِ؟
زوراکی ئٹ بیگواہ اینو دیر کننگ ءِ؟
بیگواہ انتکن مننگ اُن؟
داڑے کوزہ گیر انت خوائک؟
ننے و ننا بلوچ راج ءِ تینا سوچ ءِ خلوئی ءِ کہ بروکا وخت ءِ امر تینا دوٹی کین و بیگواہ تا امر رکھ ءِ کین۔
بلوچ ورناک!
اینو اسکان سنگت آتا جشوک جون آک خننگنگ ءُ، اینو اسکان بھاز آ سنگت آک زوراکی ئٹ بیگواہی نا گواچی کننگانو، اینو اسکان دا عمل برجا ءِ۔ اینو بلوچ ورنا تے ماروئی ءِ کہ دا ورناک اینو بیگواہ کننگ مننگ ءُ دافتا پگہ ننا دوٹی ءِ۔ دافتا خواری و اذیت سگنگ نا بدلہ ننا دوٹی ءِ۔ سنگت ثنا بلوچ نا سینہ نا بیست و ہشت آ سُمک کوزہ گیر نا ظلم ئنا انتہا نا شاہدیک ءُ۔ چیئرمین زاہد و سنگت زاکر مجید، اسد و شبیر نا زندان نا بندی تا کسہ غاک توار ءُ۔ ہزارا ٹُکر و کپ مروک آتا دترک توار ءُ۔ اینو ورنا تے تینا نظریاتی و آجوئی نا تحریک نا بشخ مروئی ءِ تانکہ بروکا وخت ئٹ کسس زوراکی ئٹ بیگواہ مف۔ جہان نا کنڈ آ ہُننگ آن مُست ننے تینا کنڈ آ چَک خلوئی ءِ کہ نن اینو ہراڑے سلوک اُن؟