زیردستی ءِ ساھگ ءَ زند گوازینگ چہ مرگ ءَ گیش بیمناک انت۔

پنتاک

شرپداریں بلوچ راج!

زیردستی ءِ ساھگ ءَ زند گوازینگ چہ مرگءَ گیش بیمناک اِنت، زیردست وتی جند ءِ زمین سر ءَ ہمروچی بے شرپی، درتگ پچی، بزگی ءُ مچانکی ازیت ءِ دیمپان بیت۔ زورگیر ءُ زیردست ءِ میان ءَ سیادی گوں زوراکی ءَ بندوک انت۔ بن اسل ءَ اے سیادی ءِ بنھشت چہ زوراکی ءَ بندات بیت ءُ اشی ءِ مھکم کنگ ءِ ھاتر ءَ اھد ءِ زورگیر وتی توامیں تاکت ءَ کارمرز کنت دانکہ ہمے زوراکی ءِ جند ءَ گیش ءُ مھکم کُت بہ کنت۔ زیردستیں راجانی راجدپتر اے شون ءَ دنت کہ اھد ءِ زورگیراں پہ وتی نپ ءُ سیتانی سرجم کنگ ءُ زیردستیں راجانی سر ءَ وتی زوراکی ءَ مھکم کنگ ءِ ھاتر ءَ ترس ءُ بیم ءَ سلاہے پیم ءَ کارمرز کتگ۔بنی آدم ءِ دراجیں گوستانک اے راستی ءِ شون ءَ دنت کہ ہمک اھد ءَ بنی آدم پہ وتی آجوئی، شرپ، ننگ ءُ مڑاہ ءِ رک ءَ گہگیری ءِ راہ در چتگ ءُ داں گڈی ساہ ءَ بے شرپی، زیردستی ءُ راجی لتگمالی ءِ بگیری ءَ گہگیری اِش کتگ۔

گلیں بلوچ راج!

زورگیر ءِ بگیری ءَ پاد اتکگیں توارانی ولگوج کنگ ءِ ھاتر ءَ زورگیر وتی توامیں تاکت ءَ کامرز کنت دانکہ زیردستیں راج ءِ میان ءَ دائمی ایں ترس ءُ بیمے ودی کت بہ کنت۔ اے منتگیں راستی یے کہ ھمک اھد ءَ زورگیراں پہ وتی نوآبادیاتانی رک ءَ تاکت ءِ جسدی دروشم بزاں کہ “فورس ءُ تشدد” ءَ کارمرز کتگ۔ راجی آجوئی جنزانی نزور ترینگ ءُ ھلاس کنگ ءِ ھاتر ءَ زورگیراں ہزارانی کساس ءَ زیردستیں مھلوک گار ءُ بیگواہ کتگ انت ءُ لکانی کساس ءَ ھندی مھلوک دروگیں میڑانی نام ءَ جنگ ءُ دور دیگ بوتگ۔ گار ءُ بیگوائی کہ یو این او ءَ ھوار انسانی ھکانی ادارگانی رِد ءَ سنگین ایں جرمے، ہمے گار ءُ بیگوائی ءِ شوربندی اھد ءِ زورگیرانی راجی جنزاں ولگوج ءُ لس مھلوک ءَ ترس ءُ بیم ءِ وسیلہ ءَ چہ راجی آجوئی جنز ءَ دور دارگ ءِ مستریں سلاہ زانگ بیت۔ بن اسل ءَ گار ءُ بیگوائی ءِ شوربندی چہ جسدی ازیت ءَ گیش نپسیاتی ازیت ءِ سوب جوڑ بیت۔ زیردستیں چاگرد ءِ تہ ءَ گار بیگوائی ءِ کسہ تیوگیں چاگرد ءَ چہ گہگیری ءَ سندگ ءِ سوب جوڑ بیت۔ گار ءُ بیگوائی ءِ شوربندی ءِ بنکی لوٹ چاگرد ءِ تہ ءَ گہگیراں ابرت ءِ چیدگ جوڑ کنگ انت دانکہ زیردستیں راجمان ءِ تہ ءَ گہگیری ءِ ھال ءُ ھیال میزان میزان ءَ ھلاس بہ بنت۔

باسمائیں بلوچ راج!

راجی آجوئی جنزاں ھوار پوجی آمریتانی ھلاپ ءَ پاد اتکگیں جنزاں ولگوج کنگ ءِ ھاتر ءَ گار ءُ بیگوائی ءِ شوربندی زورگیرانی منتگیں سلاہ ءُ پندل انت۔ 1976 ءَ ارجنٹینا ءِ پوجی حکومت مونٹیروس ءُ ای آر پی ءِ دزجنگی ءَ ولگوج ءُ ارجنٹینا ءِ لس مھلوک ءَ چہ مونٹیروس ءُ ای آر پی ءَ دور دارگ ءِ ھاتر ءَ Dirty War ءِ نام ءَ فوجی آمریت ءِ ھلاپ ءَ پاد اتکگیں وانندہ، پولکار، دانشورنی گار ءُ بیگوائی ءِ نوکیں درچے بندات کنت ءُ داں 1983 ءَ کساس 30000 ءَ گیش مردم گار ءُ بیگواہ ءَ ھوار جنگ ءُ دور دیگ بنت۔ ارجنٹینا ءَ ھوار چلی، یوراگوئے، پیراگوئے ءُ بولیویا 1975 ءَ آپریشن کونڈور ءِ نام ءَ لاطینی امریکہ ءِ تہ ءَ پوجی حکومتانی بگیری ءَ پاد اتکگیں مھلوک ءِ ھلاپ ءَ پوجی مہمے بندات کن انت دانکہ تیوگیں لاتینی امریکہ ءِ تہ ءَ پوجی حکومتانی بگیری ءَ پاد اتکگیں جنز ھلاس ءُ ولگوج کنگ بہ بنت۔ لاتینی امریکہ ءِ پوجی حکومتانی زورانسری گاہ ءُ بیگواہ کتگیں مردمانی کہول FEDEFAM ءِ تلو ءَ زہرشانی کن انت۔ لاتینی امریکہ ءِ زورانسری گار ءُ بیگوائی ءِ ویلاں ھوار جہان ءِ ایندگہ راجانی زورانسری گار ءُ بیگوائیانی ھلاپ ءَ یوناٹڈ نیشن جنرل اسمبلی سال 2010 ءَ 30 اگست ءَ زورانسری گار ءُ بیگوائی ءِ روچ نامینیت۔

گلیں راج!

جہان ءِ ایندگہ زیردستیں راجانی پیم ءَ زیردستیں بلوچ راج ہم وتی آجوئی ءِ جھد ءَ انت ءُ نا روائیں پاکستان بلوچ راجی آجوئی جنز ءَ ولگوج ءُ ھلاس کنگ ءِ ھاتر ءَ بلوچ ورناہاں زورانسری گار ءُ بیگوائی ءَ ھوار دروگیں میڑانی نامءَ کشگ ءُ دور دیگ ءَ اِنت۔ نا روائیں پاکستان ءِ زورانسری گار ءُ بیگوائی ءِ شوربندی بن اسل ءَ وانندہ ءُ باسمائیں بلوچ ورناہاں چہ جھد ء آجوئی ءَ دور دارگ ءِ شوربندی یے دانکہ بلوچ راج وتی جھد ء آجوئی ءَ ھوار بوت مہ کنت۔ دگنیا ءِ بندپتر اے شون ءَ دنت کہ ھمک ہما راج کہ پہ چندیں ادارکی آسراتیاں چہ جھد ء آجوئی ءَ دزکش بیت گڑا دائمی گلامی ءِ سانکلاں چہ در اتک کُت نہ کنت۔ بلوچ راج ءِ ہزاراں ورنا ناروائیں پاکستان ءِ تہاریں ازیت جاہاں بند انت ءُ نہ کتگیں گناہانی سزا وار انت۔ اے روچ ہما بامردانی ہمت ءُ کربانیاں یات کنگ ءِ روچ انت کہ پہ بلوچ راج ءِ وشھالیں بندات ءِ واستہ مروچی ناروائیں پاکستان ءِ ازیت جاہاں ازیت سگگ ءَ انت بلے پروش ورگ ءَ نہ انت ءُ وتی جھد ءُ مکسد ءَ پُشت کِنز بیگ ءَ نہ اَنت۔ اے روچ نہ تہنا زورانسری گار ءُ بیگوائیں بلوچ پسگانی پگر ءُ فلسفہ ءَ یات کنگ ءِ روچ انت بگندے گوں جفاکشی، ایمانداری ءُ مخلصی ءَ جھ ءِ دیم ءَ برگ ءِ واستہ اھد ءُ پیمان ءِ روچ اِنت۔