راجی شہیدانی روچ

زہیر بلوچ

ملپداں شہیدانی پَشت کپیت دنیا یے
آجوئی چراگانی بالواں سَپر گون اِنت

چونائیءَ چرے گپءَ ما کل سرپد ءُ آشنا ایں کہ اے کازماس ءَ ھمک مردمے کہ وتی چماں پَچ کنت ءُ گڑا یک روچے الم آئیءَ مرگءِ امبازاں کپگ ءُ وتی زندءِ سپر آسر کنگ کپ ایت۔
همے ڈولءَ مرگءِ هم بازیں دروشم بنت۔ کسے دگےءِ وئیلے ءَ بیران بیت، کسے چہ نادراہیءَ ءُ کسے پیر ءُ آجز بیت ءُ روت۔

بلے اے کازماسءَ لہتیں انچیں مردم ودی بنت کہ آ چہ مَرگءَ پَد هم زندگ بنت۔ مَرگءَ پَد هم سرجمیں راج ءُ راجدپتر آهاں گیر کار ایت۔ اے هما مردم بنت کہ پہ وتءَ زند نہ گوازین انت، پہ وتی زاتءَ زندگی نہ کن اَنت بگندئے پہ وتی ڈیھ ءُ راج ءَ زندگی کن انت ءُ پہ آھانی هاترءَ وتی سرجمیں زندءَ ببا دینت۔

اے هما زمین زادگیں بَچ اَنت کہ وتی گُلزمینءِ سرءَ زورگر ءُ زوراکانی بگیر ءَ چو باتیل ءَ مِک بنت۔ وتی تنگوئیں سراں کولیگ کن انت بلئے زوراکءِ دیمءَ پَد نہ کِنز انت ءُ وتی سرءَ جہل نہ کن انت. اے هما بَچ انت کہ داں بلوچ ءُ بلوچستان ھست اِنت بلوچ راجدپتر اے بچانی سرءَ پہر بند ایت۔

سینزده گوبشان (نومبر) بلوچ راجی شہیدانی روچ انت، اے روچ مارا گیشتر سکین دنت کہ ما وتی راجی آجوئی ءِ هاترءَ جہد بہ کن ایں ءُ زورگریں اِستان ءِ بگیر ءَ گہگیری بہ کن ایں۔ اے روچ مئے توکلاں گیش مھکم کنت۔
سینزده گوبشان (نومبر) پہ بلوچ راج ءَ بس یک روچے نہ اِنت بگندئے اے روچ پہ بلوچ راجءَ مُسام ءُ پیمانے ءِ روچ اِنت۔
اے روچ مارا باور کنائینیت کہ بلوچ راج پہ وتی دودمان ءُ وتی گلزمینءِ رکینگ ءَ هچبر چَک ءُ پَد نہ بیت۔

مرچی اگاں دنیا بلوچ راجی زْرمبشت ءِ بارو ءَ جیڑ ایت ءُ سرپد اِنت گُڑا اے همے راجی شہیدانی داتگیں دیمہونی ءُ رتکگیں هونانی بروَرد اِنت۔
سینزده گوبشان هژده سَد سی ءُ نھ ءَ نواب محراب خان زورگریں بدواہانی بگیر ءَ گہگیری کنت ءُ بلوچ ڈیھ ءِ رکینگ ءِ هاترءَ گوں وتی همبراهاں بلوچ راجدپتر ءَ نمیران بیت تاں روچءِ مرچیءَ بلوچ راج نواب محراب خان ءِ سرءَ پہر بند ایت ءُ نواب محراب خانءِ داتگیں پنت ءُ سوجانی کِشکءَ رہادگ اِنت۔
مرچی همک بلوچ پَرزند چو نواب مخراب خانءِ ڈولءَ وتی راجی پجار ءُ پہ وتی ڈیھءِ پہازگءَ زورگرانی دیم ءَ اوشتاتگ انت۔

بلوچ راجدپتر مارا اے درسءَ دنت کہ بلوچاں هجبر دگہ دری آنی زیردستی نہ مَن اِتگ۔ گوستگیں هپتاد ءُ چار سال اِنت زورگریں اِستان پاکستان بلوچ ڈیھ ءِ سرءَ زورگیر اِنت۔ بلوچ ڈیھءِ مال ءُ مڈیاں پُلگءَ اِنت. بلوچ ءِ راجی پجار ءَ هلاس کنگءَ اِنت بلوچ ورناهاں بیگواه کنگ ءُ تہاریں زنداناں بندیگ کنگءَ اِنت. هزارانی کساسءَ بلوچ ورناہانی ٹپ ءُ ٹوریگیں لاشاں جنگل ءُ گیاباناں دور دیگءَ اِنت۔
اے درسیں زوراکیانی باپُشت ءَ زورگریں پاکستان ءِ مول ءُ مراد بس بلوچ ڈیھ ءِ سرءَ زورگیر بوگ اِنت پمیشکہ بلوچ ءِ چُکچینیءَ کنگءَ اِنت. مرچی سرجمیں بلوچستانءَ زورگرءِ زوراکی یکشلہ برجاه انت۔
بلئے انچو زوراکیءَ پَد هم بلوچ راج ءَ زورگریں اِستان ءِ دیم ءَ وتی سر جہل نہ کتگ بگندئے گوں تمردیں توکلءَ زورگرئے زوراکیانی دیم ءَ گہگیری کنگ ءَ اِنت. همک روچ بلوچ ورنا وتی تنگوئیں سراں ندر کنگءَ اَنت همک روچ سالونکیں بَچ پہ وتی ماتیں گُلزمین ءَ شہید بوگ ءَ اَنت۔
مرچی بلوچ راجءِ شیرزالیں ماتاں هم بلوچ راجدپتر نوک کُتگ. چو میر کمبر ءِ ماتءِ ڈول ءَ پہ لیلو ءُ نازینک وتی تاسپیں بچاں گلزمینءِ امبازاں واپین اَنت ءُ تمردیں تَران کن اَنت کہ مارا اگاں دگہ بَچ بیت گُڑا آ بچءَ هم پہ گُلزمین ءِ آجوئیءِ هاترءَ کُربان کن ایں۔ چوشیں ماتانی توکل بلوچ راجی جُنز ءَ مہکم کن انت۔

چوشکہ نمیران ڈاکٹر خالد ءِ ماتءِ دلیری بہ بیت یا کہ لُمہ یاسمینءِ جوزگ، اے ماتانی داتگیں پنت پہ بلوچ ڈیھءَ آجوئیءِ مانزمان بَنت. من سدّک آں کہ دنیاءِ هچ زورگر ءُ زوراک بلوچ شیرزالیں ماتانی توکلءَ پروش دات نہ کنت ءُ بلوچ ڈیھءِ آجوئیءِ جہدءَ داشت کت نہ کنت۔

بیا اِت اے روچءَ وتی راجی شہیداں یات کن ایں ءُ شہیدانی داتگیں دیمہونی ءُ رتکگیں هونانی مُسام ءَ ور ایں کہ ما هم همے کِشکءَ جُنز ایں کہ مئے راجی شہیداں گچین کُتگ ءُ هما واب کہ مئے راجی شہیداں دیستگ انت، ما هم هما واب ءَ پیلو کن ایں ءُ پہ سِتکءِ دِل وتی شہیدانی ملپداں جُنز ایں دانکہ وتی مُرادانی منزل ءَ سر بہ بئیں۔