بلوچ ڈیھءِ آجوئیءِ روچ

نبشتہ کار۔ البُرز بلوچ

دنیاءِ تہءَ ھرچ ساھدارءِ ابرم اِنت کہ آ آجو بوگ لوٹ ایت، مُرگ ءُ جناوراں بگر داں مردماں کُل پچیں آزمانءِ چیرءَ ساہ کشگ لوٹ اَنت۔ آجوئی یک انچیں سوگاتے کہ مردمءِ ساچشتءَ ودّینیت، مردمءَ جیڑگ ءُ گوں دنیاءِ پچیں سساءَ چارگ پرمائیت۔ دنیاءَ مُدام زورآوراں ایردست وتی بندیگ کُتگ انت۔ تُری ڈارونءِ “سروائیول آف دی فٹسٹ”بہ بیت یا ایدگہ زورآورانی نِزوریں راجاں ایردست کنگ، ھر کُجا نزورءِ ایردست دارگ ءُ آئیءِ سرءَ راج کنگءِ کوشست کنگ بیت۔ کسے ایشاں ابرمی شئے گوْشیت ءُ کسے وت ساچیں عمل کہ زورآور مُدام نِزورءِ سرءَ زوراکی کنت ءُ آئیءِ ھرچ بنیاتی ھکاں چہ آئیءَ پُل ایت۔
چوشکہ دنیاءَ ھرچ مردم آجو بوگ لوٹ ایت، ھمے پیمءَ دنیاءِ تہءَ ھرچ راجے کہ ھست آ ھم لوٹ اَنت کہ آجو بہ بنت بلئے یک راجےءِ واستہ آجوئی زاناں تہنا یک پچیں آزمانےءِ جہلءَ ساہ کشگ اِنت؟ اناں ! پہ یک راجےءِ واستہ آجوئی تہنا آجوئیءَ ساہ کشگ نہ اِنت، بگندئے آئیءِ زند گوازینگءِ بنیاتی ھکاں ھوار آئیءِ پجار اِنت۔ پجارءِ تہءَ دود ءُ ربیدگ، زبان، زمین ءُ گوستانکءَ ھوار ھرچ ھما شئے کائینت کہ آ گوں ھما راجءَ بندوک اَنت۔ اے المی نہ اِنت کہ یک راجے مٹیرئیل بنیاتءَ کُلیں آسراتیانی واھُند بہ بیت ءُ آ راج آجو گُشگ بہ بیت، بگندئے ھما راج کہ آ وتی ھرچ کارےءِ تہءَ وتواک بہ بیت۔ دنیاءِ تہءَ چہ وتی بستارءِ بنیاتءَ زانگ بہ بیت ءُ مستریں چیز کہ آ وتی پیسلہ کاری آنی تہءَ وتواک بہ بیت۔
چہ آجو بوگءَ مراد آ راجءِ ساچشتی دود زندگ بہ بنت، راجءِ مہلوک گوں پچیں سسایےءَ جیڑ اِت بہ کنت، زہنی ھسابءَ آجو بہ بیت ءُ وت وتی چاگردءِ تہءَ مردمی برابری ءُ وشہالیءِ زمہ وار بہ بیت، چےءَ کہ چہ ایشیءَ آ دنیاءِ زانت ءُ زانشتی تک ءُ پہناتانی تہءَ بہر زُرت کنت۔

اگستءِ ماہ اَنچو پہ بلوچءَ بدیں روچے، ھمے ڈولءَ شریں روچے ھم۔۔ بہ گُپت بابا خیر بخش مری” بلوچ وش بہتیں راجے یا بد بہتیں ایشیءِ پسوءَ نہ زان آں چون بہ دیاں، بلئے ھئو راجانی زندءِ تہءَ وش بہتی ھم کئیت ءُ بد بہتی ھم۔” شریں ماھے اے واستہ کہ اے ماہءِ یازدہءَ مئے سرڈگار بلوچستان آجو کنگ بیتگ بلئے بدیں گپ ایش انت کہ پدا دوبر پہ زور گُلام کنگ بیتگ۔
11 اگست 1947ءَ اولی رندءَ ریڈیو ہندوستانءَ انگریزءِ ایردستیں بلوچستانءِ آجوئیءِ جار شنگ کنگ بیت کہ آ وھدءَ پاکستانی نامی ئیں استانءِ بنیات ھم نہ بیتگ۔ بلئے مستریں وشی ایش انت کہ بلوچ ڈیھءِ دوبر گلامیءَ بگر داں مرچی اے راج وتی آجوئیءِ واستہ جُہدءَ اِنت کہ اے راہءَ ھزارانی کچءَ ورنا، جنین، کماش ءُ چُکانی سرانی کُربانیءِ یک دراجیں لڑے ھست۔ بلوچ راجءِ سرءَ استانی زُلم ءُ زوراکیءِ یک ھلاس نہ بوؤکیں کسہ یے ھست۔ استانی زوراکی، بلوچ پُسگانی زورانسریں بیگواہیءَ بِگر داں نمیرانیءَ ابید ھم مرچی بلوچ راج وتی آجوئیءِ روچءَ بیھال نہ اِنت بگندئے گیشتر بلوچ راجی جہد گیش بوان اِنت چیا کہ بلوچ سرپد اِنت کہ آ یک انچیں استانےءِ ایردست اِنت کہ آئیءِ اُمرءَ چہ مئے یک پیرمردےءِ امُر مستر اِنت۔
بلوچ راجءِ مزن دلی ءُ اوپار چہ ادءَ زانگ بیت کہ ایردستیں راجے بلئے انگت وتی آجوئیءِ روچءَ گوں وژدلیءَ داریت ءُ دنیاءَ ھوار دژمنءَ اے باور کنائین ایت کہ شمئے وت ساچیں دروگ ءُ پندلاں ابید بلوچ وتی ھکی ئیں راہءَ زانت ءُ زوآورءِ زوراکیاں ابید ھم بلوچ پہ وتی آجوئیءِ منزلءَ جنزگءَ اِنت۔ مرچی بلوچ راجءَ دنیاءِ سیاست ءُ زانشتی پڈءَ مزنیں بہرے نیست انت ءُ دنیاءِ سیاست ءُ سائنسی پڑاں بہر بوگ ءُ دنیاءِ تہءَ آ دگہ راجانی پیمءَ وتی کردءِ ادءَ کنگءِ مانزمان مئے ڈیھءِ سرجمیں آجوئی اِنت۔
مرچی ئیں روچ مارا یات گیج ایت کہ ما یک مزن ءُ شاھگانیں زمین، زبان ءُ ربیدگےءِ واھند اِنت۔ ھما نیلیں زرءِ واھند ایں کہ ھمل جیئندءَ پَرنگانی گوما جنگ دیانءَ پرائیءَ وتی ساہ داتگ بلئے بلوچستان نہ داتگ ءُ مرچی ئیں اھدءِ دوبر ودی بیتگیں زِر پہازاں (کہ آ گوادرءَ پی سی ہوٹلءِ سرءَ پدائی اُرش کن انت کہ پاکستان ءُ چینءِ روزیگی بئیپاریءِ بہرے) زرءِ پاھازگءِ واستہ دژمنءَ جنگ دیانءَ کلوہ داتگ کہ اے نیلیں زر بلوچ ءُ بلوچستان ءِ میراس اِنت ءُ بلوچ پہ ایشیءِ پہریزگءَ تاں وتی زندءِ گُڈی ساہءَ گوں دژمنءَ جنگ کنت۔
گوں اے روچءِ دارگءَ بلوچ اے پہم ایت کہ آ یک آجوئیں راجے کہ مرچی ئیں اھدءِ دنزءُ مجُاں گپتگ ءُ ایردست کنگ بیتگ کہ چرائیءِ آسرءَ آئیءِ سیاسی، چاگردی، وانگی ءُ معاشی راہ ءُ راھبند تباہ کنگ بیتگ اَنت بلئے بہ گُپت نمیران لمہء وتن “بلوچ چو سیمُرگءِ زاتءَ اِنت کہ مرگءَ پد اوں زِندگ بیت۔” بلوچءَ وتی آجوئی جُہدءِ تہءَ ھزارانی کچءَ مردمانی کُربانیءَ اے پْدر کُتگ کہ ھچ راج پہ کُشگ گار کنگ نہ بیت، بگندئے گیش زِندگ بیت۔ مرچی بلوچءِ ھرچ دمک ءُ کوچگاں اے ھال رستگ کہ آ یک جتا ءُ آجوئیں راجے ءُ بلوچستان آئیءِ سرڈگار اِنت کہ زورانسری کبزہ کنگ بیتگ ءُ بلوچ پہ وتی آجوئیءِ دوبر گِرگءَ گوں استانءَ جنگ دیگءَ اِنت۔ من سدکاں کہ بلوچ جہدکار ءُ نمیرانانی جہد ءُ کربانی ءِ مُز آزاد بلوچستان اِنت ءُ زیت یا دیر آ وتی سرڈگارءِ واھند وت بیت ءُ دنیاءِ ملبتءِ تہءَ دوبر وتی آجوئیں استانءِ بیرکءَ مِک کنت۔