زاھد لیکہ یےءِ نام انت ءُ لیکہ گٹگیر نہ بیت

حمل بلوچ

لیکہءَ کنت زندانءَ پکرءَ پاھوءَ درنج ایت
آ کجام ھیال انت کہ مُہریں سانکلءَ داشتگ؟

دنیاءِ توکءَ راجی لیکہ ساز ھما مردم بیت کت کن انت کہ آیانی پکر ءُ فلسفہ پہ راجءِ دیمروئی ءُ راجی ھستانکی ءُ جوڑشتءِ پاھازگءِ ھاترءَ سازگ بہ بنت۔ آیانی لیکہ ءُ منّ ءُ مراد زورگرءِ ھلاپءَ وتی مہلوکاں چہ واھشتی زندءَ چہ در بہ کن انت بزانکہ آیاں اے مارشتءَ بہ دئینت کہ راجی سنچ ھما وھدءَ پیداک بیت کت کنت کہ ما وتی بنکی راجدپترءَ چہ آشنا بہ بئیں، راجی لیکہءَ را سرپد بوگءِ جہدءَ بہ کنیںءُ آیانءَ اے سما ءُ مارشتءَ ھم بہ دنت کہ راجی پجارءِ رکینگءِ یکیں توجیل ھمیش انت کہ یک راجےءِ بستارءَ مارا وتی گلامیءِ بدیں ھوپ مارگی انت ءُ ھمے گلامیءِ ھاترءَ زورگرءِ دیمءَ عملی رنگءَ اوشتاتگی انت دانکہ وتی راجی پجارءَ ھوار آئیءَ گوں بندوکیں دودمان، سیاسی ءُ راجمانی جوڑشت زورگرءِ دستءَ لیگار بوگءَ چہ رکینگی انت۔ وھدے کہ اے لیکہ ءُ فلسفہ لس مردماں بگر دانکہ وانندگیں مہلوکءِ سرءَ سانے پشت بہ گیج ایت گڑا آئیءَ را لیکہ سازے گوشگ بیت کت کنت۔ گالبندی ھسابءَ لیکہ ساز ھمائیءَ را گوش انت کہ آ وتی پکر ءُ فلسفہءَ زانشتی ءُ سائنسی علم ءُ معیارءِ ھسابءَ گوناپ بہ دنت۔ آشوبی لیکہ ساز ھما مردم بیت کت کن انت کہ آ وتی جیڑہءَ را مینی فیسٹوےءِ رنگءَ دیمءَ بیار انت ءُ ھمے مینی فیسٹوءِ منّءُ مرادءَ یک سیاسی مکتبہ پکرے آئیءَ بہ منّ ایت ءُ عملی رنگءَ گامگیج بہ زور انت۔
سرجمیں دنیاءَ آشوبی لیکہ ساز کہ بوتگ انت تہ آ چندے مردم بوتگ انت کہ آیانی لیکہءَ دراھیں دنیاءَ سانے دور داتگ، انچوشکہ کیمونزمءِ لیکہ ساز اینگلز ءُ کارل مارکس بوتگ انت کہ آیانی لیکہءَ بازیں ملکےءِ سرءَ سان دور داتگ ءُ بازیں مردماں مارکسی فلسفہ زرتگ ءُ آشوبی جنز چست کرتگ۔ انچوشکہ چین، کیبو ءُ ویتنام ءُ الجزائر ءُ ایدگہ ملکاں ھمے بنیاتءَ وتواجھی گپتگ۔
دومی نیمگءَ بازیں لیکہ سازاں راجدوستیءِ بنیاتءَ وتی آشوبی جنز چست کرتگ انت، انچوشکہ ھندوستان ءُ اپریکی ملکاں یا کہ پدا روداتکی پاکستانءَ بنگلیاں وتی وتواجھی ءُ آجوئی راجدوستیءِ بنیاتءَ گپتگ انت۔
ھمے رنگءَ بلوچ راجی آجوئی جنزءِ لیکہ ساز واجہ خیربخش مری لیکگ بیت کہ آئیءَ بلوچ راجی آجوئیءِ منّ ءُ مراد گیشوار کرتگ انت کہ ھمائیءِ فکر ءُ فلسفہءِ منوگراں ھمے راہ گیشوار کرتگ کہ بلوچ راجی آجوئی گہگیری بنیاتءَ گرگ بوت کت کنت، بلئے دومی نیمگءَ آئیءَ 1960ءِ دھکءَ چیریں رنگےءَ بلوچ وانندگیں مردم گلےءِ دروشمءَ یکجاہیءِ سکین داتگ۔ بنداتیںزمانگءَ گلامیءِ بیانیہ بلوچ وانندگ گلءِ گورءَ بوتگ بلئے رندءَ پرشت ءُ پروشیءِ سببءَ اے بیانیہ مٹ بوان بوتگ۔

بلئے دو ھزارءَ پد آشوبی سنگتاں ھمے سوڑگ کت کہ راجی پجارءِ رکینگءِ ھاترءَ وتی راہ تچک کنگی انت ءُ ھر کس وتی وتی دائرہ کارےءِ تہءَ آجوئیءِ ھاترءَ عملی رنگءَ پاد بئیت تہ بی ایس اوءَ وتی راہ ءُ لیکہ تچک کت انت ءُ 2002ءِ کونسل سیشنءَ بی ایس اوءِ نامءِ توکءَ گیشی آرگ بوت ءُ بی ایس او (آزاد) ایر کنگ بوت۔ چوشکہ ایش ھم ھما فلسفہ ات کہ خیربخش مریءِ بروردءَ دیمءَ اتکگ ات۔ ھر آجوئیں گلےءَ وتی کار رھبندےءِ ردءَ مردمانی توکءَ راجی سنچ پیداک کنگ بندات کت تہ دومی نیمگءَ بی ایس او(آزاد)ءَ نودربریں مہلوکےءِ تہءَ گلامی ءُ راجی سنچ ءُ زانت ودی کنان کت۔ بلئے ریاستءِ دلءَ ترسے چیر کپت پمیشکہ بی ایس او (آزاد)ءَ را بندش جت ءُ آزادءِ بساکاں بگر بنجاہی رھشونانی سرءَ جسمانی ءُ نفیساتی ارش بندات کرت ءُ بازیں کیڈرز ئِے جت ءُ دور دات انت کہ آیانی ژاگولیں لاش ماں ویراندانیں گیاباناں جوانواریں مُرگانی باھوٹ بوت انت۔چوشکہ یک نیمگے پاکستان وتءَ اسلامی ملکے لیک ایت بلئے دومی دیمءَ آئیءِ کار ءُ کرتن گیر انسانی انت۔
چریشیءَ ابید پاکستان لشکرءِ ھیال ھمیش ات کہ چرے عملءَ چہ نودربریں تبکہ بلکنا پدکنز بیت بلئے آئیءَ نہ زانت کہ پشتءَ بی ایس او آزادءَ انچیں سروک پیداک کرتگ کہ ریاستءِ جنگ ءُ دور دیگءِ پالیسانی سرءَ اوشتگءِ جرت ءُ اوپارءَ دار انت۔
ھمیشانی توکءَ یکے چیئرمین زاھد بلوچ ات کہ زاکر جان ءُ ایدگہ بنجاہی ءُ ھنکینی باسکانی گرگ ءُ شہید کنگءَ پد زاھد جان چو کنٹگءَ ریاستءِ چمانی توکءَ رُست، بلئے آئیءَ روچے نہ روزگارے وتی کارانی توکءَ کمی نہ آورت پرچہ کہ زاھد بلوچ یک علمی ءُ لیکہ سازیں ءُ جرتمندیں سروکےءِ پیمءَ گل ءُ گلءِ کارانی توکءَ سائنسی ءُ منطقی رنگءَ چیزانءَ چارگ ءُ تپاسگءِ جہدءَ ات۔ آ وتی ھر باسکءَ را ھمے سکین دات کہ ابیدء وانگ ءُ زانگءَ گل ءُ ادارہ جاتی کار، یا کہ نودربرانءَ پالیسی دیگ گواتءِ تہءَ تیر جنگءِ مسال انت۔ ہمیشکہ آئیءِ مستریں لیکہ ھمیش ات کہ منی ھر باسکے وانگ ءُ عملی کارانی بھر بہ بیت پرچہ کہ آئیءَ زانتگ ات اگاں منی باسک وانگ ءُ عملی فلسفہءَ چہ دور بہ بنت تہ باندا روچ مزنیں کیڈرز بوت کت نہ کن انت۔ وتی راجءَ را گلامیءِ طوق ءُ زمزیلاں چہ کش ات کت نہ کن انت یا کہ وت ھم وتی بیانیہ ءُ لیکہءَ را داشت کت نہ کن انت۔
بلئے ریاستءَ زانتگ ات کہ زاھد بلوچ اگاں یک روچےءِ تہءَ ڈنءَ بہ بیت ءُ کار بہ کنت تہ آئیءِ یکیں روچءِ کار منی ایردستیءِ کلاتءَ پروش ایت ءُ آئیءِ یکیں روچءِ جھد سالانی سال نودربرانی موبلائز کنگ ءُ آیانءَ راجی آجوئی جنزءِ راہءَ گیجگءَ پہ جوانیں کمکے بوت کت کنت۔ پمیشکہ پاکستان اینجسیءَ را ھمے وسوس چیر کپت ءُ 18مارچ 2014ءَ سٹلائیٹ ٹاؤنءَ چہ شہید بانک کریمہءِ چمانی دیمءَ آوار جت۔ بلئے ریاستءَ چوش نہ زانت کہ لیکہ سازیں مردمانی بیگواہ کنگ آئیءَ را گیشتر تاوانبار کن انت، پرچہ کہ چریشیءَ چہ راجی جنزءِ آس گیشتر جمبور بوان بیت۔
دومی گپ ھمیش انت دنیاءِ توکءَ چوشیں تاگتے انگت ودی نہ بوتگ کہ آئیءَ راجی لیکہءَ را چکپروش داتگ یا کہ سانکلانی زورءَ آ لیکہءَ بست کت کتگ ءُ نئیکہ جوھری اسلاھانی سرءَ راجی لیکہ اش نیست ءُ نابود کتگ۔لیڈرانی لیکھانءَ زندانءِ دیوال کدی ھم داشت کت نہ کن انت بلکیں آیانی لیکہ راجی آجوئیءِ جوزگ ءُ ارادگاں روچ پہ روچ گیشتر مھکم کنت۔