زورگیریں اِستان ءِ یوتھ انگیجمنٹ پالیسی ءِ سر ءَ کماش زرّین بلوچ ءِ ھیال۔

 

جُست: زوراکیں پاکستانی اِستانءِ نیمگءَ” یوتھ انگیجمنٹ پالیسی “ءَ چوں گیشین ئے؟

 

زرّین بلوچ: یوتھ انگیجمنٹ پالیسیءِ ہلاپءَ سرپدی مہم دژمنءِ پروگرامءَ بائیکاٹءَ ھوار زورگیر ءُ ایردست ءِ میان سیادی ءِ یک درشانی یے ءُ یک کلوہے کہ اے رنگیں پندل پہ بلوچ راجءَ مجگی مرگ ءِ ھساب ءَ کئیت۔ اے شوربندیءِ ردءَ ورناھاں دزگٹ کنگءِ مکسد گلامیءِ مارشت، آجوئی ءِ جوزگ، راجی اوست ءُ امیت ءُ زورگیری ءِ ہلاپ ءَ گھگیری ءِ سِنچ ءِ پروشگ اِنت۔

دژمنءِ جسدی چکچینیءَ چہ گیش مجگی چکچینیءِ شوربندی تُرسناک تِر اِنت پرچاکہ اے بیمناکیں روشتءَ چہ بلوچیت ھلاس کنگ بوگءَ انت۔اے دابیں پروگرام بلوچ ورناھانی مجگءَ کُبل کنگءِ ھسابءَ انت دانکہ بلوچ ورنا یک انچیں وہدےءَ کہ چاریں نیمگءَ ژانگولیں جون تالان انت بلے بلوچ وتی راجی ھیالءَ چہ بے سما بہ بیت۔ اے بے سمائیءَ ما یک سببےءِ پشدرءَ دلءَ تسلہ دات نہ کنیں بلکیں اشیءِ پشدرءَ استانی یوتھ انگیجمنٹ شوربندیءِ پشدر ٹپاسگی انت پرچا کہ اے شوربندیءِ مول ءُ مراد کہ بلوچ یک راجی بستارےءَ گھگیری ءُ گلامیءِ زنگ بستگیں سانکلانی بابتءَ وتی بلوچیتءِ اوگامءَ برز کت مہ کنت۔

آجوئی جہدءَ درستاں چہ پیسر بنی آدمءِ نوکسر جوڈ بوگءِ جستءَ دیمءَ کاریت پرچاکہ اگاں آجوئیءَ پد ہم انسان بہ بیت کہ اشاں زورآورءَ جوڈ کتگ گڑا آجوئی تہنا بیرکءِ مٹیءِ دروشمءَ کیت بلے انسانءِ راستیں آجوئی وتی ماناءَ چہ گسر کپ ایت۔

 

جُست: اے پالیسیءِ سان بلوچ ورناھانی سرءَ چون کپگءَ اَنت؟

زرّین بلوچ: دژمن ھاس نوآبادیاتی زمانگی رھبند یک تُرسناکیں وباہےءِ دابءَ چارگ بیت۔ اے trap-house ءِ مستریں مکسد اش انت کہ بلوچ ورناھاں انچیں ٹریکءَ برگ بہ بیت کہ اودءَ گلامیءِ جتائیں ناماں دیگ دانکہ آ وتی اسل آجوئی گرگءِ لوٹءَ در بہ کپ ایت۔ ٹریپ ہاؤس اسلءَ زورگیری موچکینے کہ ادارکی ورناھانی وشی، گل، نفسی واھگ، عشق ءُ عاشقیءِ سرجمیں آزاتی، کوہنیں روایتانی پروشگ، وتی راج ءَ در سور ءُ سانگ، زالبولانی عملی رنگءَ گیش رومانی رنگءَ پروجیکٹ کنگ، آیانی ذہنءَ دیگ کہ شما چد ءُ پیسر وتی لوگاں بندیگ کنگ بوتگ ات بلے نوں ہما کوہنیں بلوچی روایتاں پروش ات، ہمے دابیں کار ءُ کرداں زورگیر یک سرجمیں ٹریپ ہاؤسے ٹہین ایت دانکہ ورنا ہمیشاں اندرءَ وتی سرجمیں زندءِ آکبت ءُ بانداتءَ شوھاز بہ کن اَنت۔ اے ٹریپ ہاؤسءَ زورگیر یونیورسٹیانی دروشمءَ دیمءَ آرگءِ جہدءَ کنت۔ ھستیں وھدءَ ما بچار ایں تربت یونیورسٹی، گوادر یونیورسٹی، مکران یونیورسٹی، بلوچستان یونیورسٹی ءَ ہوار ایدگہ ہمے ٹریپ ہاؤسءِ بہر اَنت۔ اے وانگجاہاں علمی، مکالماتی، درس ءُ زانت، حکمت ءُ دانائی، تران ءُ باوست، راجمانی گہتریءَ پہ جوڑ نہ بوتگ بلکیں اے ادارہ پمیشکہ جوڑ کنگ بوتگ اَنت دانکہ بلوچ جُنز کاؤنٹر کنگ بہ بیت۔ ہمے ادارہانی وسیلہءَ زورگیرءِ لشکر ہر روچءِ بنیادءَ جتائیں مراگش کنگءَ انت، آئیءِ داشتگیں مردمانی وسیلہءَ فحاشیتءِ کلچرءَ بلوچ راجمانءِ اندرءَ تالان کنگءَ انت دانکہ بلوچ ورنا چہ راجی سنچ ءُ سماءَ چہ در بیا اَنت ءُ آ تہنا وتی نفسی واھگانی گلامیءَ بہ کن اَنت۔ ھمے ٹریپ ہاؤسءِ وسیلہءَ انسان مدام نپری واھشتاں دیمءَ کاریت۔

دومی اِستان وتی پروگرامانی وسیلہءَ ھمے بیانیہءَ دیمءَ آرگءَ انت کہ ماڈرن اِستان پروشگ نہ بیت یاکہ استانءِ جند تاکتور انت بلے اے بیانیہ عدم تشدد، زاتی نپ ءُ پائدگ، کمار نہ کنگ، مچانکی درداں چہ دست کشیءَ ھوار ایدگہ چندے پوائنٹ انت کہ trap-house ءِ جالءَ مردماں اسل گواچن ءُ راستیءَ چہ دور کن اَنت۔ چریشیءَ ورناھانی اندرءَ مجگی کرپشن ءِ یک انچیں چاگردے جوڈینگ دانکہ ورنا دراتک مہ کن انت یا اشیءَ چہ درآہگ یک جیڑہ یے بہ بیت۔

پمیشکہ بہ تُرس ھما روچاں کہ دژمن دوزواہیءِ چادرءَ مان پوشگءَ ھوار یک بیانیہ یے دیمءَ بیاریت کہ آ بلوچ جنگ ءُ گہگیریءِ ھیالءَ گیش ھراب بہ کنت ءُ پگری چکچینیءَ انچش دور بہ دنت کہ ادءَ دردءِ مارگءَ چہ انسان بے کمار بہ بیت۔ انسان تہنا جسدی جوڈشتے بہ بیت بلے آئیءِ اندرءَ درد، مارشت، نگدی سِنچ، ساچشت، زمینءَ گوں مہرءِ ھلاس کنگءِ مستریں وسیلہ اش انت کہ استان ھندی مردماں وتی نیمگءَ کاریت ءُ ھمدءَ چہ بلوچ ورناھاں پد جنت۔ تچکیں راستی اش انت کہ اِستان بلوچاں وانگی گرینڈ بیانیہءَ ابید ھم کدی یک بلوچ ورناہ یےءَ وانگی یا زری ہچ کمک نہ کنت بلے ہمے trap-house ءِ وسیلہءَ وتگڑیں ٹاپاراں گوں بلوچ ورناھاں لب ءُ لالچاں چہ آیانی جندءِ زمینءِ جاوراں چہ گسر کپگءِ سرءَ زور دنت۔

اے پالیسی اسلءَ بلوچ ورناھاں مظلومیت، ویلفئیر انسانےءِ جوڈینگ، ویلفئیر ترزکارےءَ گوں تربیت کنگءَ وتگڑیں ایجوکیٹڈ جوڈینگ بنت دانکہ بلوچ گہگیریءِ یادداشت ءُ علمی فلسفہءَ چہ دُور کنگ بہ بیت۔

کردار بن پِیرکی نہ بنت بلے انسانءِ ھمے کسانی ءُ مزنیں پیسلہ چہ مچانکی وبا ھم جوڑ بوت کن اَنت۔راجءِ دودمانی رسم ءُ رواجءِ مرگ چہ راج وتی پشدرءَ بیھال کن انت۔ اشیءَ ابید راجءَ انچیں جاورےءِ نیمگءَ برگ کہ اودءَ راج وتی گوستءِ روتگاں سِندیت۔مچانکی زانت ءُ زانشت ءُ راجی روتگءَ چہ وتی سیادیءَ ھلاس کنگ ءُ وتی زندمانءَ بے مانا سرپد بوگ اسلءَ ھندی زانت(Indigenous knowledge)ءِ سرءَ اُرش اَنت کہ اودءَ زندءِ مانا ھم بیھال کنائینگ بیت۔

 

جُست: اشانی دارگءَ ادارہءِ ھیال ءُ پالیسی چی اَنت؟

زرّین بلوچ: ما بلوچ ورناھاں کردار سازیءِ اندرءَ راستیں دیانتدار، گواچنیں پگر ءُ زانت، اصولءِ نشاندہیءَ ھوار وتی جندءِ شرپ ءُ مکامءَ دور مہ دئیں ءُ راستیں پیسلہءِ نیمگءَ راہی بہ کنیں دانکہ ما کردار سازیءِ نیمگءَ شُت بہ کنیں۔ بی ایس او مدام دژمنءِ ھمک پندل ءُ شوربندیءَ اساس ءُ وانشتی نگاہےءِ ھسابءَ چارگءِ جہدءَ بوتگ، دژمنءِ تیاریءَ ھوار دژمن کجام شوربندیءَ جوڈینگءَ انت یا دژمنءِ پروگرامءِ تب ءُ روشتءِ پھمگ بی ایس اوءِ پروگرامانی ارزشتداریں بہر بوتگ انت۔

ریاستءِ ملٹی ڈائیمشنل شوربندیءِ تہءَ یک پندلے ہمیش بوتگ کہ بلوچ ورناھاں لب ءُ لالچءِ تہءَ گلائیش بہ کنت بلے بی ایس او مدام دژمنءِ چماں کنٹگءِ ھسابءَ آئیءِ پروگرامانی دیمءَ اڑاند بوتگ۔ آ چہ “آغاز حقوق پیکج ” بہ بیت یا آل پاکستان ٹورازم بہ بیت بلے وانگی ادارہءِ تہءَ بی ایس اوءَ وتءَ تچک کتگ مرچی یوتھ انگیجمنٹ پالیسی انت کہ اے پہ اناگتءَ یک کیمپئنےءَ مھدود نہ انت بلکیں گوستگیں سالاں چہ بی ایس او دژمنءِ کلیں پروگرامانی ڈیٹایانی پریسگ ءُ شہمیں تیاریءَ پد پٹ ءُ لوٹی لبزانک ودی کنگ ءُ ورناھاں اے ناجوڑیءِ چیریں سانءَ چہ آشنا کنگءَ انت۔ بی ایس او وتی آشوبی کیڈراں گوں اے بیسہ داریت کہ آ دژمنءِ پالیسیانی دارگءَ ہمک ترزءَ جہد کن انت۔ بی ایس اوءِ لبزانک، علمی مہم ءُ دژمنءِ وائریسءَ چہ وتی مردماں کشگءِ عمل ڈی کالونائیشنءِ بنبھرے۔ استان کہ مرچی بلوچ ورناھاں docile body ءِ ہسابءَ جوڈینگءِ جہدءَ کنگءَ انت دانکہ آھانی siege of mentalityءَ ممکن بہ کنت بلے بی ایس او کلچرل فورسےءِ بستارءَ دژمنءِ ھمک پندلاں بے سوب کنگءَ انت۔

بی ایس او ھما گل انت کہ آجوئیءَ چہ پیسر ورناھاں ڈی کالونائزیشنءِ نیمگءَ برگءِ زمہ واری زرتگ ءُ مرچی ھم اے زمہ واریءَ پیلو کنگءَ انت۔ مرچی اے مہم ءِ وسیلہءَ ھما ورناھاں کلوہ دنت کہ مروچی ریاست بلوچ ورناھاں کسانیں لب ءُ لالچ دیگءَ انت گڑا اے مچانکی چکچینیءِ چیدگ انت کہ استان ھم زانت کہ بلوچ ورنا تاکتءِ بنجل انت ءُدژمن لوٹ ایت کہ تاکتءِ پروشگ یا شنگ ءُ شانگ کنگ، آئیءِ اندرءَ جتائیں بیانیہ، تاکتءِ بیانیہءَ ٹریک کنگ بہ بیت بلے بی ایس او گراؤنڈءِ تہءَ بلوچ ورناھانی جھگیریں گل انت ءُ جنزءِ جہگیریں ادارہاں چہ یکے پمیشکہ گل پہ راجی نپ ءُ سیتاں ھمک ھدءَ داں روت انت پرچا کہ اے تہنا ورناھانی جیڑہ نہ انت بلکیں آوکیں راجی جنز ءُ بلوچ اِستان ءِ جوڈشتءِ تہءَ اشانی گر ءُ دار کنگ اژدری انت۔