دیمونیءِ جزبہ ءُ مرگاپءِ نمیران

!بلوچ پُسگاں

گلامیءِ زندمانءِ ھمک دور ءُ باریگ، ھمک جنز ءُ ھمک ویل ءُ واکیہ راجی دپتر، چاگرد،تب ایندگے پہلواں اثرمند کنت بلکیں تبءُمیل کارایت۔ ھمے پیم مرگاپ ءُ آئیءِ دلبندءِ سرءَ کپتگیں بلوچ پسگانی جون نہ تہنا بلوچ دپتر،چاگرد،ءُ بلوچ سیاستءِ تبءُمیل بدل کن انتءُدژمنءِ دیما سر جہل نہ کنگءِ فلسفہءَ برجاہ دار انت پاکستان ءُ آئیءِ ٹارچرسیلاں پروش دینت بگندئے بلوچ مہلوکءِ نیامءَ دیمھونیءِ جزبہ ءُ پکر ءُ پلسپہءَ گیش ھاٹیگ بکشا انت۔ چوشکہ2009 ھما سال انت کہ یک دیمےءَ سرجمیں بلوچ زرمبشت بلوچستانءِ کنڈ کنڈءَ سر بوان اِنت ءُ مردمانی اندرءَ راجی گلامیءِ سنچ ءُ سما ودی بوان اِنت؛ وانندگیں نودربراں بگر داں زندمانءِ ایدگہ پڑاں گوں بندوکیں مردم ھم جہدءَ عقلی بنیاتءَ ھوار بوان بنت، چوشکہ ڈاکٹر، وکیل، استاد ءُ ھر بلوچ کماش ءُ ورنا وتی شناسی بیگواہیءَ(identity crisis) را مار انت، اے درستیں جہدانی برورد بلوچ لیڈرشپءِ مہکمیں جوڑشتےءِ دیمءَ آھگ ءُ نگیگیں جاورانی دیمءَ اوشتگ ءُ کربان بوگءِ سبب بیت۔ اے سیاسی موبلائزیشنءَ چیئرمین غلام محمد بلوچ ءُ آئیءِ لیڈرشپءِ جوانیں پالیسیانی سببءَ جہد بلوچءِ لوگ لوگءَ سر بوان بیت۔ بلے دومی دیمءَ زورگریں دژمن چرے عملءَ ترسءِ آماچ بیت۔2006ءِ گڈی ماہءَگلام محمدءُشیرمحمد بلوچ چہ کراچیءَ آوارجنگ بنت بلے کمیں وھدءَ پد یلہ کنگ بنت ءُ بلوچ لیڈرشپءِ دارگءِ ھاترءَ ریاست آہانی سرءَ بازیں کیس جنت،آمیدگسءُایندگے ریاستی دفتری سازءُبازانی زریعہ جہدءَ چہ دور دارگ لوٹیت بلے ریاستی اے پندلاں گلام محمدءُ آئیءِ ھمراہاں داشت نہ کت انت گڑاں بازیں رندءَ غلام محمد بلوچ ءُ ایدگہ بلوچ لیڈرشپءَ را مرگءِ ترس ءُ بیھار دیگ بنت بلے چیئرمین غلام محمد ءُ آئیءِ ھمپکریں ایدگہ بلوچ لیڈرشپ ھچ وڑءَ پدکنز نہ بنت، پمیشکہ گڈسرءَ 3 اپریل 2009ءَ چیئرمین غلام محمد بلوچ، شیر محمد بلوچ ءُ لالا منیر بلوچءَ را ایڈوکیٹ کچکولءِ چیمبرءَ چہ زورانسری پاکستانی چیریں ادارگ آوار جن انت ءُ پدا 9 اپریل 2009ءَ ماں مرگاپءَ بلوچ رھشون غلام محمد ءُ آئیءِ ھمبراہانی ژانگولیں جون دور دیگ بنت ءُ آھانی نمیرانی بلوچ بندپترءَ را نگرہیں تاجے بکشا انت۔ 9 اپریل 2009ءَ رھشون غلام محمد بلوچ ءُ آئیءِ ھمبراہانی نیمرانی ماں مرگاپءِ دلبندءَ بلوچ راجی جنزءِ (پنچمی گہگیریءِ) اولی ویل بیت کہ پاکستانءِ چیریں ادارگ ءُ آئیءِ لشکر وتی نوکیں پالیسی ‘جنگ ءُ دور دیگ’ءِ شکلءَ دیمءَ کار انت ءُ بلوچ چکچینیءِ یک نوکیں درچے بندات کن انت۔ مرگاپ بلوچستانءِ ھما جاہ ءُ مکام انت کہ اودءَ گیشتر بلوچ رھشون، وانندگیں سیاسی سروک ءُ ایدگہ لس گہگیریءَ گوں بندوکیں جہدکار ھم زوانسری آوارجنیءَ پد جنگ ءُ دور دیگ بوتگ انت۔

!بلوچ راج

اے یک تچکیں راستی یے کہ راجی جنز ابید لس مہلوکءِ کمکءَ گِہیں منزلےءَ سر بوت نہ کن انت۔ چیئرمین غلام محمد ءُ آئیءِ سنگتانی مستریں بیسہ ھمیش بیت کہ آ بلوچ لس مہلوکءَ بلوچ جنزءِ بہر جوڑ بہ کن انت۔ چیئرمین غلام محمد بلوچ سیاستءِ تبءِ مٹ کنگءَ ھاسیں کردے پیلو کنت۔ سیاستءِ تہءَ نوکیں روایت کارایت ادارہانی بنیاد سیاست کنگ،جتا جتائیں تب آں گوں سیادی داروکیں سیاسی مھلوکءِ گوش دارگ ، ھمراہ کنگءُ ادارہی بنیادی دیما برگ ھاسکار آ گوں وتی ایدگہ سنگتاں اے روایتءَ مٹ کنت کہ نگیگیں جاوراں مارا وتی ڈیھ یلہ دیگ ءُ درانڈیھ بوگی اِنت، یا کہ ڈیھءَ چیرزمین بوگی اِنت، بگندئے آئیءِ سرجمیں کار ءُ کرد ءُ کربانی آئیءِ سیاسی سنچ ءُ زانتانی شونءَ دینت۔ پہ مہلوکی سیاستءِ ھاترءَ مہلوکءِ نیامءَ گوں آئیءِ ھمگامیءَ جنز دیمءَ برگی اِنت۔” اے آئیءِ ایمان بیت کہ تاں گڈی ساہءَ آئیءِ سرءَ اوشت ایت۔ آھاں بلوچ راجی آجوئی جنز مہلوکی جنزےءِ تہءَ گوناپ دات۔ ءُ وتی مہلوکءَ را اے باور کنائینت کہ اے جنگ شمئے جنگ اِنت، ایشیءِ واستہ درانڈیھی تاکت ءُ ملکانی چمدار بوگی نہ اِنت۔ ایشی ھرچ سکی ءُ سوری، کار ءُ کربانی کل شمارا دیمپان کنگی اَنت۔ چیئرمین گوں وتی سنگتاں اے گپءِ زانگءَ ابید کہ ما نوں جنگ بئیں بلے نہ بلوچ چاگردءَ یلہ کنت ءُ نئیکہ چہ وتی لیکہءَ دزبردار بیت آئیءِ مستریں ھیالے ھمے بیت کہ راجی راھشونیءِ بستارءَ بنداتی دیمھونیءِ سرپءَ رھشون وت اوشت انت۔ چئیرمین غلام محمد پہ راجی سماءِ آرگءَ بلوچءِ کلیں دمگ کوہ سلیمانءَ بہ گر داں جلگہیں کراچی، مکرانءَ بہ گر داں سراوانءَ بیا ھرکجا بلوچ جنگءِ کلوہءَ سر کنت ءُ لس مہلوکءَ گوں جنزءَ بہر کنگءِ ھاترءَ مزنیں کردے پیلو کنت۔ بلوچ راجمانءَ دژمنءِ آؤرتگیں ڈسکورس ءُ ایدگہ تمنی، جاگیرداری، مذہبی پرک ءُ پیرءِ پیداک کتگیں جیڑہ ءُ جنجالاں ھوار زورآورانی لٹ ءُ پلءَ پدر کنت ءُ مہلوکءَ آئیءِ زمینی راستیءَ آشنا کنگءِ ھاترءَ جہد کنت۔

!منگہیں وانوک

مرچی مرگاپءِ رتکگیں ھزاراں بلوچ رھشون ءُ ایدگہ بلوچ نمیرانانی واب مارا شمارا داں منزلےءَ سر کنگی انت۔ مرچی چہ ھر پڑءَ سیادی داروکیں بلوچ پسگانی سرءَ المی اِنت کہ آ وتی کِشکءَ بہ گیشین انت ءُ بلوچ راجی جنزءِ بہر جوڑ بہ بنت۔ بلوچ مہلوکءَ وتی مہلوکی تاکت سرپد بوگی انت ءُ وتی ڈیھ ءُ راجی وشھالیں بانداتءَ جنزءِ بہر بوگی اِنت۔ گلامی ھدائی ازابے نہ ات ءُ نئیکہ آجوئی پہ ھلو ھالو کیت۔ مرچی ئیں بلوچ راجمانءِ لوٹ ھمیش اَنت کہ استیں بلوچ پدریچ وتی بود ءُ لائکیاں پہ وشھالیں بانداتےءَ ندر بہ کن انت۔