زورانسری گار ءُ بیگواہیں بلوچانی روچ ءُ بلوچ مہلوک ءِ زمہ واری

گُلیں راج

اے زمین ءِ سرءَ ہمُک بنی آدم ءَ زِند گوازینگءِ سرجمیں ھک ءُ مُز ہست اَنت، انچوکہ انسان آ جو پیداگ بیتگ ءُ اے زمین  وتی پناہگاہ کتگ ءُ زند گوازینگ اِنت۔ ہمک  انسان یک زمین ئے ءِ سر ءَ ودی بیت ءُ آ زمین آئی ءِ ماتیں وتن  یا سرڈگار بیت، ہمے زمین بیت کہ آئی ءَ رودین ایت ءُ مزن کنت ءُ   گڈسرءَ مِریت ءُ روت وتی باتن ءَ  ہم جاہ  دنت۔  انسان ءِ ودی بیگ ءِ رو چ ءَ چہ آئی ءَ زمین نام ءَ بیت ءُ پدا  داں زِند ءِ آسر ءَ آئی ءِ پجار جوڈ بیت ۔دنیا ءِ تہ ءَ لہتیں انچیں ڈیھ ءُ ڈگار بنت کہ وتی تہ ءَ وت بیش نہاد ءُ چو بھشت ءَ بنت کہ ہمُک دریں راج ءُ مُلکانی چم آئی ءَ سک بنت۔۔   انسان ءِ دپتر ءَ کہ  چمے جن اِت گڈا گند  اِت کہ انسان  مدام نزور ءِ سر ءَ زوراور بیتگ ءُ آئیءِ سر ءَ زُلم ءُ زوراکی کنان ءَ آئی ءِ بھشت گونگیں زمین ءِ پچ گرگ ءِ جہد کتگ ،دومی مہلوک ءِ مال ءُ دولت ءُ مادنانی لُٹ ءُ   پُل  کتگ ، اے لُٹ ءُ پُل ءِ ہواری ءَ زوراور ءَ نزورءِ زمین سر ءَکبزہ کتگ ءُ آئی  ءِ زمین پچ گِپتگ۔ بلے ہرہما  جاہ ءَ کہ زواکی بیتگ اودءَ گھگیری ہم بیتگ  ءُ آسر ءِ سوب ہم ہماایردستیں  راج ءِ بیتگ کہ یکشلیں جہد ءَ گوں بندوک بیتگ۔ ہمے پیم بلوچستان ہما سرڈگار اِنت کہ کرناں چہ بدیں نگاہانی  چم چیرءَ اِنت ءُ مرچ زورانسری پاکستان ءِ ڈولیں بے ابرمی( غیر فطری) استان یے ءِ ایردست اِنت، بلے بلوچ آئی ءِ ہلا پ ءَ مہکمی ءُ ترندی ءَ گوں گھگیری کنگ اِنت۔

زُلم جتیں بلوچ راج

ہر ہما جاہ ءَ کہ زوراکی بیت آئی ءِ ہلاپ ءَ جوریں جواب دیگ ءَ پہ راج پہ گھگیری ءَ جاڑیگ بیت، گھگیر کہ بیت، زوراور ءِ زوراکی گیش بیان بنت۔ ہمنچو زیادہ گھگیری بیت زوراوریں استان زُلم ءُ زوراکیاں گیش ءُ تُرندتِر کنت ءُ یک انچیں وھدے کئیت کہ زوراک وت نہ زانت کہ آ ہمے زُلم ءُ زوراکی ءِ تہ ءَ چنچو ببا دیگ اِنت پرچاکہ وھدے گھگیری گیش بیت ءُ نزوریں راج ءِ مہلوک ءِ تہ ءَ گیشتر سِنچ ءُ سرپدی کئیت گڈا ہما زوراکیں اِستان دست ءُ پاد جنان ءَ زوراکی ءِ سجیں سیمسراں گوازین ایت۔ ہمے درور مرچی قبضہ گیریں پاکستان ئیگ اِنت کہ مرچی بلوچ راجی جُنز ہمنچو گیش ءُ تُرند بیتگ کہ  پاکستانی لشکر دست ءُ پاد جنان ءَ انچیں زوراکی کنان اِنت کہ اے اشی ءَ چہ بلوچ راجی آجوئی جُنز پُشت ءَ روگ ءِ جاہ ءَ مہکم تِر بیان اِنت۔ہمے زوراکیاں یک مزنیں زوراکی زورانسری گار ءُ بیگواہی اِنت کہ پاکستانی استا ن ءَ اے پالیسی زُرتگ ءُ بلوچ آجوئی جُہدکاراں زورانسری برگ ءُ تھاریں کوٹیاں زندانیگ کنگ اِنت۔ پاکستان ءَ بلوچ راجی جُنز ءِ پروش دیگءِ ہاتر ءَ اے پالیسی زُرتگ ءُ ترندی ءَ گوں بلوچ جہدکاراں نشانگ کنان اِنت ءُ پیداگ اِنت۔ مرچی لکانی کچ ءَ بلوچ نودربر ءُ ورنا، پیر ءُ کماش، استاد ءُ نبشتہ کار ءَ ہوار ایدگہ پِڑ ءِ مردم زورانسری گار ءُ بیگواہی ءِ آماچ کنگ بیتگ اَنت کہ اشانی تہ ءَ ہزارانی تہ ءَ مردمانی ژانگولیں جون ماں ویراناں دور دیگ بیتگ ءُ ہزاراں کچ ءَ جہدکار روچ ءِ مرچی ہم تھاریں کوٹیاں بندیگ اِنت ءُ ناجائزیں ازیت سگگ اِنت۔

شرپ مندین بلوچ مہلوک

ہشت جون کہ بلوچ  گار ءُبیگواہیں پُسگانی نام ءَ اِنت ءُ اے روچ ءَ سرجمیں بلوچ راج  زورانسری گار ءُ بیگواہیں جہدکاراں یات کنت ءُ آیانی کِردار ءَ ستا کنت۔  اے روچ بلوچ   اسٹوڈنٹس آرگنائزیشن آزاد ءَ ایر کُتگ کہ اے روچ ءَ گل ءِ بنجاہی کمک کماش( وائس چئیرمین) زاکر مجید زورانسری بیگواہ کنگ بیتگ ۔ زاکر جان ءَ ہوار گل ءِ بنجاہی کماش زاہد بلوچ، بنجاہی ہالرسانی کارگشاد شبیر بلوچ ءَ ہوار ایدگہ ہزارانی کچ ءَ بلوچ جہدکار مرچی پاکستان ءِ تھار ءُ بیمناکیں زندان ءَ   ازیت سگگ ءَ اَنت۔ اے ہما رُژناہیں بامساریں مکسد اِنت کہ اشی ءِ واستہ مئے پُسگاں وتی جان ندر کتگ ءُ بازیں زِندان ءِ ازیت ءَ ہمروچ سگگ ءَ اَنت، ہما مکسد کہ آئی ءَ چہ پُشت کِنزگ ءِ جاہ ءَ کمبر جان وتی بالاد ءَ ڈریل کنائین ایت بلے اے رُژنائیں واب ءَ وتی چماں اندیم نہ کنت ءُ پہ دروہاپیں وشی ءُ نپے ءَ رد نہ کپ ایت۔ ہما پانزدہ سالی ایں جہدکارانی زِندانی اے گپ ءَ پدر کنت کہ مئے راجی جُہدکار گوں مہکمیں توکل ءَ وتی پگر ءِ سر ءَ اوشتاتگ اَنت۔

دانائیں بلو چ ورنایاں

اے مئے راجی سماءُ شعور ءِ توانائی ءُ مہکی اِنت کہ جہدکار زان اَنت ہم کہ روچے بگندے  دُژمن  آہاں زورانسری بیگواہ کنت ءُ آہاں گوں ناروائیں ءُ در انسانی کارپد کنت بلے اشانی زانگ ءَ پد ہم مرچی بلو چ ءِ جہدکارانی تہ ءَ کمی آیگ ءِ جا ہءَ روچ پہ روچ گیشی آیگ اِنت۔ اے ہما سِنچ اِنت کہ اشی ءِ پروش نیست ءُ اے گپ ءَ دُژمن ہم دل ءَ سہی اِنت پمیشکا آ ہمُک بلوچ ورنا ءَ انچو پہ دیم ہم چِست کنت بارت ءُ زندانیگ کنت۔ پمیشکا مرچی پاکستانی استان بلوچ کنگ ءُ زورانسری گار ءُ بیگواہ کنگ اِنت، گڈا مارا ھھہ زان ایں کہ مئے ہم باریگ کئیت کہ روچے زندان ءَ بندیگ بہ ایں ءُ نہ سگیں اندوہ سگگءَ بہ ایں۔ نی اشی ءَ توجیل اِنت کہ یا بلوچ وتی باریگ ءِ ودار ءَ بہ کنت یا پیش بہ کپ ایت ءُ اشی ءَ ہلاپ ءَ گہگیری بہ کنت۔ اشی ءِ توجیل تہنا پاکستانی استانءِ ماں بلوچ سرڈگار ءَ ولگوج اِنت، پمیشکا ہرچی کہ زیت کنگ بیتءُ گیشتر کنگ بیت  اے وبا ہلاس کنگ بیت۔

مڑاہ داریں بلوچ راج

اے روچ ہما گُمنامیں جہدکارانی واستہ اِنت کہ آہاں پہ مئے راجی باندات ءِ ہاترءَ وتی زِند ءِ سودا کُتگ بلے گُلزمین ءَ چہ دزکش نہ بیتگ اَنت۔ ہما جہدکار کہ روچے سد رند ءَ دُژمن ءِ چماں چم پیش دار  اَنت ءُ آجوئی ءِ گپ ءَ کن اَنت، ہما جہدکار کہ دُژمن ءِ بدیں نیت ءَ پہ  جور جواب اَنت ۔ بیا ِ اِت وتی راجی  پُسگاں یات کنگ ءَ ہوار آیانی برجاہیں جُہد ءُ کاروان ءَ کمو دیم ءَ بر ایں ءُ آیانی کوپگاں کمو سُبک تِر کن ایں ۔زندانیگ ایں بلوچ  پُسگانی یک سہتے ءِ ازیت مئے لس زِند ءِ سد سہتءِ برابر ءَ ہم  نہ بیت ءُ ناکہ چوشیں لس سد زِند آیانی یک نمیرانی (شہادت)ءِ برابر ءَ کئیت۔پمیشکا مارا وتی جہدکارانی  ھاٹیگ ءَ سلام کنگی اِنت کہ  گوں  وتی پِگر ءُ فلسفہ ءَ چنچو مخلص اَنت ءُ ہمت ءُ جزبگ ءَ ہمروچ تھاریں کوٹیاں دُژمن ءَ گوں جنگ دیگ ءَ اَنت۔آ دل ءَ سدک اَنت کہ آ بندیگ اَنت بلے بلوچ ورنا ءُ مہلوک ءَ آیانی پشت کپتگیں کار وتی کوپگاں زُرتگ ءُ جہد ءَ گامے دیم ءَ برگ ءَ اَنت پمیشکا  مارا  وتی زِندانیگ ایں پُسگانی   زُرتگیں جہد وتی گرانیں کوپگاں کنگ کپ ایت ءُ بلوچ راجی آجوئی جُہد مہکم ءُ اے سپر داں مِنزلءَ سر کنگ کپ ایت۔ اے روچ بلوچ گار ءُ بیگواہیں پُسگانی کُربانیانی یات کنگ ءِ روچ ءَ ہوار  پہ ما را آیانی جہد ءَ عملی دروشم ءَ دیم ءَ برگ ءِ پیمان کنگ  ءِ روچ اِنت۔

زورانسری گار ءُ بیگواہیں بلوچ پُسگانی   کُربانیانی مُز بلوچستان ءِ آجوئی اِنت۔

چاپ ءُ شِنگ: سگار پبلی کیشنز: بی ایس او آزاد