یومِ آسروخ

:بلوچ راج

اینو آن بیست و پنچ سال مست 28 مئی نا دے ئکن بلوچستان نا راسکو نا مش تے ٹی کوزہ گیر ریاست ایٹمی تراک کرے و بلوچستان ءِ خاخر ٹی ہُشا و پدان دا دے ءِ گل آسروخ نا پن تس۔ اینو بلوچستان نا کوچہ کوچہ ٹی ریاست خاکر ئس لگفینے، اُرا اُرا کوزہ گیر نا ظلم و زوراکی تیان آگاہ ءُ و اوفتے سگنگ ءُ ولے دانا بناء ہمو وخت آن مس کہ ہراتم بلوچستان ئٹ ریاست ایٹمی تراک آتے کرے ۔ ایٹمی تراک آک بھاز حساس و بیم بش کروک مریرہ ۔ ہندا سوب آن پاکستان پنجاپ یا پاکستان نا ایلو علاقہ آتیان بیدس بلوچستان ءِ گیچین کرے، بلوچ راج ئنا ڈغار ءِ گچین کرے تاکہ اگہ دا تراک آک ہرا وڑ ئنا ہم نسخان ہتیر اوفتیان پاکستاب نا ایلو علاقہ غاک زیم تُمپس بلکن داکان ہم بلوچ زیم تمے۔ انتئے کہ غلام نا زند و مرگ کوزہ گیر کن ہچو معنی ئس تخپسہ ۔ اینو بھلو وخت ئسے آن پد ہم بلوچ دا تراک آتیان زیم تمنگ ءِ ولے پنجاب ءِ دانا اسہ زرس ہم چکار اف۔ داڑے سکان کہ دا علاقہ ٹی اسہ اسپتال ئس ہم جوڑ کننگ نا کوشست متنے۔

:بے وس آ بلوچ راج

ہراتم بلوچستان ئٹ نیوکلیر جلہو آک مسر گڑا بنائی دے تیٹی دافتا باروٹ کس ءِ ہم معلومداری الو ۔ ہرا وخت بندغ آتے سما تماکہ جہان نا #مہلک انگا ازباب آک بلوچستان ئٹ کارمرز مسنو و او ہم آبادی آن دوانزدہ (12km) کلو میٹر مر یعنی دافتے کن حفاطتی تدابیر ارفسا بندغ آتے دا جلہو آتا بابت چاہنداری تننگ ہم المی الوکہ، و بلوچ ئنا کہینگ اوفتے کن ہچ معنہ تخپک۔ امریکہ تون اوار گیشتر ملک آک دا ایٹمی تراک آتا بابت تینا خلیس نا درشانی ءِ کرینو انتئے کہ جہان سرپند مسکہ کہ پاکستان نا دُو ٹی ایٹمی ازباب آتا بننگ نا متلب جہان نا امن ءِ خطرہ ٹی شاغنگ ۔ دا ایٹمی تراک آتیان ہرا #تابکاری نا اثر آک زیم تمرہ و مدام بیم بش کروک و مہلوک مریرہ و ہندا سوب آن مچا جہان ئٹی ہرا وڑ ہم ایٹمی تراک آتا آزموندہ آک مسنو یا تون آبادی تے آن ہزار آ کلو میٹر مر یا سمندر آتا تہٹی مسنو ، یا گڑا کوزہ گیر پاکستان کن بلوچ نا نسخان ہچو معنہ ئس تخپک ہندا سوب آن آبادی آن دوانزدہ کلو میٹر مر دا تراک آتے کریرہ و ہزار آ بندغ آک زیم تمنگ ءُ ۔ ایٹمی تراک آتا تابکاری آن اینو ہم بندغ آک معذور ودی مننگو ۔

:باشعور بلوچ الس

پاکستان کن بلوچستان مدام اسہ آزموندہ نا جاہ ئس مسنے و بلوچستان پاکستان کن مدام لٹ و پل نا اسہ کسر ئسے ۔ کوزہ گیر کن بلوچستان نا بندغ آک مدام اسہ مصیبعت ئسے نا وڑ مسنو ۔ و ہرا وخت ہم دافتے وار رسینگانے دا بلوچ نا لس مخلوق ءِ نسخان تسنو ۔ ایٹمی تراک آتا کمک ئٹ رخشان ڈویژن نا آبادی ءِ مدام نسخان تننگ نا کوشست مسنے ۔ گوزہ گیر نا دا خلیس آتیان رکھنگ کن بلوچ راج ءِ کوزہ گیر نا برخلاف جہد کروئی ءِ ۔ اسہ آزات و خودمختیار بلوچستان و بلوچ آتے کوزہ گیر پاکستان و ایلو ریاست آتا خطرہ تیان رکھنگ کیک۔