بیست ءُ ھَپت مولمان یومِ گُلامی

بلوچ راج ۔۔۔

بلوچ‎ یک انچیں پُرگَنج ،پر ارزشت ءُ پر نِھادیں سرڈگارے واھند اِنت کہ اے ارزشت داریں سرڈگار مُدام دنیاءِ زور آور ءُ زوراکانی چمّانی چِیر ءَ بوتگ ءُ انگت ھست اِنت۔ دگنیا ءِ تاکتانی جھد ءُ کوشست مدام ھمیش بوتگ کہ ما اے ارزشت داریں سرڈگار ءَ وتی دَز چیرءَ بکن اِیں ءُ وتی ملکی پائیدگانی ھاترا اے زمینءَ کارمرز بکن اِیں بلئے راجدپتر شاھد انت کہ بلوچءَ ھر زمانگءَ وتی گُڑی وس ءُ واکءَ داں وتی زمین پھازگءِ جد ءُ جھد کتگ ءُ اے زمین پھازیءِ کُرتن انگت برجاہ اِنت۔

وھدے کہ انگریز ھاکماں بلوچستانءِ سرا زور کبزہ کت گڑا انگریز زور آورانی ھلاپءَ جنگ کنوکیں اولی بامرد میر مھراب ھان اَت کہ آئی گوں وتی تمردیں ھمبراھاں انگریزءِ ھلاپءَ جنگ کت ءُ ماں راجدپترءَ نمیرانیءِ تاج سرا کت۔ انگریزانی ھلاپءَ بلوچانی اے جد ءُ جھد چہ بازیں جھلی ءُ برزی آں گوزانءَ داں ۱۱ اگست 1948 ءَ یک آسرےءَ سر بوت کہ انگریزاں بلوچستان یلءَ دات ءُ بلوچستان یک آزات ءُ وتواکیں ملکےءِ بستارءَ زانگ ءُ منّگ بوت۔

ھمے وھداں ہندوستان ھم دو بھرءِ تہءَ بھر کنگ بوت کہ یک بھرے ھستیں وھدءِ انڈیا ءُ دومی بھر پاکستان کہ یک ملکےءِ نام ءِ سرا دیمءَ آرگ بوت، پاکستانءِ واھگ ءُ لوٹ ھمیش اِت انت کہ بلوچءِ سرڈگارءَ من وتی دزچِیر ءَ بیار آں ، اے درگتءَ پاکستانءَ بنداتءَ اسلام ءِ نام دیمءَ آؤرت کہ مسلمانیءِ لحاظءَ بلوچ گوں وتی زمینءَ ھوار گوں ما ھوار بہ بنت۔ ‎بلئے بلوچءِ گورءَ آمیدگسءِ دو ایوان ھست اتنت یکے دار العوام ءُ دومی دار الامرا ، اے ھر دو اِیں ملکی واکداراں پاکستانءِ اے وت سریں شوراں چہ نہ تِپاکی درشان کُت ، بلوچستانءِ آمیدگسءِ واکدار اے تجویز ءِ منگ ءَ جاڑی نہ بوت انت، گڑا پاکستانءَ “بیست ءُ ھپت مولمان 1948 ” ءَ پہ زور گوں وتی لشکرءَ بلوچستانءِ سرا کبزہ کت کہ آئیءِ کبزہ تاں روچءِ مروچیءَ برجاہ انت۔ پاکستانءِ زور آوریءِ ھلاپءَ آغا عبدالکریم پاد کئیت ءُ گوں بلوچ پسگانی ھمبرائی ءَ جد ءُ جھدے بنا کنت بلئے چار ماہ نہ گوز ایت کہ آغا عبدالکریم دَزگیر کنگ بیت ءُ پاکستانءِ ھلاپءَ بلوچءِ اولی انسرجنسی ھلاس کنگ بیت۔

بلوچ ورنا آں دلگوش ۔۔۔

بلوچ سرڈگارءِ سرا کبزہ کنگ ءُ اے کبزہءِ ھلاپءَ چو ارزانیءَ بلوچءِ اولی انسرجنسیءِ ھلاس بوئگءَ پہ لھتیں جُست چست بنت کہ آ کجام سوب اتنت کہ بلوچ ڈیھ پاکستانءَ کبزہ کت ؟ آ کجام نزوری اِتنت کہ آغا عبدالکریم ھانءَ پاکستانءِ گپ باور کت ءُ گوں آئیءَ گپ ءُ تران کنگءَ رازیگ بوت ؟ آ کجام سوَب اتنت کہ سوویت یونینءَ بلوچ جنگءِ آجوئیءِ ھمایت نہ کت ؟

مروچی ھمک بلوچ ورنا آنءَ الم اے زانگ لوٹ ایت کہ آ کجام نزوری اتنت کہ آھانی سوَبءَ مئے راجی رھشوناں وتی راجی اِستان برجاہ داشت نہ کت ءُ مئے سرڈگار کبزہ کنگ بوت۔

مروچی ھم بلوچ ورنا آنءَ اے جیڑگی انت کہ ھَستیں آجوئیءِ جنز ءِ تہءَ کجام نزوری ھست اَنت کہ آ نزوری دیمترا پہ مئے تحریکءَ تاوان بار بنت۔ اگاں نہ ما اے نزوریانی سوب نہ زانت اَنت گڑا چے زور آوریں پاکستانءَ چہ آجوئیءَ پد ما وتی آجوئیءِ ھیثیتءَ برجاہ داشت کن اِیں ؟ مروچی اے دراھیں جُست پما بے کچ ارزشست دار اَنت ؟

ھر ‎وھداں راجانی اوست ءُ امیت گوں راجءِ ورنا آں بندوک بنت، ورنا راجاں زندگ داشت کنت، ورنا راجانی دپتراں ابدمان کت کنت، بلے شرت ھمیش اِنت کہ ورنا آنی تہا راجی سِنچ ءُ زانت بہ بیت، گلامیءِ ھلاپ ءَ کِینگ ءُ آجوئیءِ واستہ مھر بہ بیت۔

مرچی پاکستانءِ ‎کبزہءِ ھلاپءَ بلوچ راجءِ جد ءُ جھد یکشلءَ برجاہ اِنت، بلوچستانءِ ھر ھنکین ءُ دمگ ءُ گِسانی نمیران (شھید) ءُ گار ءُ بیگواھیں ورنا اے شاھدیءَ دینت کہ پاکستان بلوچ راجی آجوئی جُنز ءِ ھلاپ ءَ وتی دُراھیں زلم ،ناروائی ءُ پندلاں کارمرز بہ کنت بلئے ما وتی سرڈگار ءَ کدی ھم دری آنی دستءَ نہ دَ ایں۔ ھمے پیم بلوچ راجی آجوئیءِ جنزءَ پاکستانءِ دراھیں پندل بے سوب کُتگ اَنت ءُ وتی جد جھد برجاہ داشتگ۔

اے جاوارنی تہءَ‎ بلوچ راجءَ پہ اے الم انت کہ وتی میانءَ تپاکی ءُ یکجائیءِ جھدءَ گیش مھکم بہ کن انت، پاکستانءِ دراھیں پندل ءُ رپکاں سرپد بہ بنت ءُ آھانی بے سوب کنگءِ جھدءَ بکن انت دانکہ وتی زمینءِ واھند وت بِہ بَہ اِیں ءُ یک زندگیں راجے ءِ ھیسیتءَ زندگی بکن اِیں۔

بلوچ مھلوک ۔۔۔

پاکستانءَ پہ‎ وتی کبزہءِ مھکم کنگءِ ھاترا وڑ وڑیں پندل ساز اِتگ ءُ سازگءَ اِنت، آ پندل بلوچءِ زمینءِ سرا وتی مردمانی آرگ ءُ نادینگءِ بہ بیت یا کہ بلوچءِ  کُشت ءُ کوش (نسل کُشی) بہ بیت۔ یا کہ بلوچ مال ءُ مڑّیانی، ھمک روچی ایں کشّگ ءُ برگ بہ بیت، اے دراھیں نہ اوشتیں عمل گوں تیزیءَ برجاہ انت۔

اے نہ گیگیں جاوارانی تہا کہ بلوچءِ زندمان تھاریانی تہءَ گوزگءَ انت اے وھداں بلوچ مھلوکءِ زمہ واری بیت کہ آ آجوئیءَ پہ جد ءُ جھد کنوکیں بلوچ جھدکارانی ھمکوپگیءَ بہ کن انت ، چیءَ کہ بلوچءَ وتی سرڈگار ءِ سرا آجوئیءَ ابید آسودگ ءُ آسراتی ایں زندمان نسیبءَ نہ بیت، پمیشکہ آجوئیءِ جھدکارانی ھمکوپگ ءُ ھم کمک بوئگی اِنت۔ بیست ءُ ھپت مارچ پہ بلوچ راجءَ یک سیاھیں روچےءِ بِستارءَ انت ،سیاھیں روچ پمیشکہ کہ اے روچءَ یک آزات ءُ رژناھیں زمینےءَ چہ آئیءِ آجوئی ءُ رژناھی پلگ بوتگ ءُ گلامی ءُ تھاری ءِ تہءَ دور دیگ بوتگ۔ بلوچ اے روچءَ داں ھما روچءَ بیھال نہ کنت کہ آئیءِ زمین پدا آجو ءُ آزات نہ بیت۔

شنگ ءُ تالان۔ بلوچ وانندہ گَل آزات