شہدائے مرگاپ و جہد آجوئی نا اہمیت

!بلوچ راج

جہاں ئٹ ہخس ہم کوزہ گیر رہینگانو اوفک ترند زوراکی و تینا تاغت ئٹ کوزہ مروکا خطہ آتے ٹی تینا کوزہ ءِ برجا تخانو۔ کوزہ گیر آک تینا کوزہ ءِ برجا تخنگ کن و غلام راج اتا حق آتے شیف خلنگ کن ہر وڑ ئنا زوراکی تے کاریم ئٹ ہیسنو ۔ تنیا بلوچ راج آخہ بلکن جہاں ئٹ ہراڑے ہم راج ئس غلام مسنے اوفک کوزہ گیر و زوراک ریاست نا پارہ غان ترند زوراکی تتون مون تس ئٹ مسنو ، بلکن دا زوراکیک کوزہ مروکا علاقہ آتے ٹی اینو اسکان کن برجا ءُ ۔ کوزہ گیر ہمو وخت اسکان ساڑی مریک ہرا وخت اسکان کہ غلام راج تینا جائز حق و آزاتی نا خواست آتیان دو ارفینے، ناجائز کوزہ گیری نا برخلاف چپ رہینگانے، ولے چاہندار و زندہ غہ راج آک جہاں ٹی اسہ ہم کوزہ ئسے منیتنو ، بلکن دافتا برخلاف مزاحمت نا کسر ءِ اہمیت تسنو ، بلوچ راج ہم جہاں نا ہمو زندہ و چاہندار آ راج آتے ٹی اوار ءِ ہراکہ بلوچ ڈغار نا زی آ پاکستان نا ناجائز کوزہ گیری ءِ منیتنو، بلکن دا کوزہ گیری نا برخلاف بنائی آن مذاحمت و جہد نا کسر ءِ ارفینو ۔ ہندا شعور و فکری بالیدگی نا سوب پاکستانی ریاست اولی دے آن چاہندار آ سیاسی و راجی جہدکار آتے ٹک کننگ ءِ و دافتے ٹی غلام محمد ، لالا منیر ، شیر محمد بلوچ نا وڑ انگا عظیم سیاسی رہنما تیان ہلیس لس بلوچ ورنا اوار ءِ ۔

!چاہندار آ بلوچ راج

خواجہ غلام محمد، خواجہ شیر محمد ، و لالا منیر ہمو عظیم آ کڑدار آتیان ءُ ہرافک بلوچ ڈغار نا زی آ پاکستانی کوزہ گیری نا علم تخنگ تون اوار غلامی نا زمزیر آتے پرغنگ کن دافتا برخلاف جہد نا بناء ءِ کریر و تینا گڈیکو ساہ اسکان دشمن نا برخلاف تیوہ بلوچستان ئٹ الس ءِ اسہ جاگہ غا کرسا کریر۔ اوفک پاکستانی فریم ورک نا تہٹی بیرہ پن ئنا آ جمہوری سیاست کننگ آن بیدس راجی آجوئی نا تحریک کن کسر جوڑ کریر و بلوچ راجی لشکر آتے پاکستانی آرمی نا اشارہ آتیٹ چلنگوک آ بیرہ پن ئنا پارلیمنٹ آن کشا و بی این ایم نا دروشم ئٹ یکجا کریر ، ہرا بلوچ راجی تحریک ءِ ادارتی بنیات ئٹ اسہ جاگہ غا کننگ کن اہم ءُ کڑد ئس مونا ہیسر ، داڑتون اوار بلوچ الس ءِ اسہ جوانو دروشم ئسے ئٹ موبلائز کریر و بلوچ راج ءِ تحریک نا کنڈا ہیسر ، اوڑتون اوار دافتا شہادت ہم بلوچ راجی تحریک ٹی ترند و توانائی نا سوب جوڑ مس۔

واجہ غلام محمد و اونا سنگت آتا شہادت اسہ تدینی سے آن کم الوکہ ولے جہاں نا تہٹی اسہ ہم کوزہ گیر ئس تینا کوزہ نا برخلاف جہد ءِ سگتنے ،و ہندا خُلیس ءِ محسوس کرسا پاکستانی فوج واجہ غلام محمد و اونا سنگت آتے ۵ اپریل ۲۰۰۹ ئنا دے اکن شہید کرے و تیوہ بلوچستان ئٹ خڷ و بٹ نا پالیسی ءِ بناہ کرے ، ہرادان پد ہزار آ سیاسی جہدکار آتے تینا زوراکی تا گواچی کرے ۔ داڑے اسکان کہ چنا تا جشوک جون آتے چغل تس تاکہ مخلوق نا تہٹی خلیس ئس بش کے۔ ولے شہدائے مرگاپ نا ۱۴ سال گدرینگ آن پد ہم بلوچ راجی تحریک سوگوْ وڑ ئسے ئٹ بندغ اتا تہٹی جہی ءِ و سرسہبی نا کنڈا روان ءِ ۔

!چاہندار آ بلوچ باتیک

جہاں نا راجی تحریک آک دا ہیت ئنا شاہد مسنو کہ اسہ ہم گواچن انقلابی تحریک ئس جہد و بھلا قربانی تیان بیدس پوروْ متنے۔ بلوچ راجی تحریک ٹی شہدائے مرگاپ ہندا وڑ قربانی تا تس ئٹی اوار ءِ ، ہراکہ بلوچ راجی تحریک ءِ السی بنیات آ سوگوْ کرے، بلوچ راج ءِ دا باور کرفے کہ پاکستانی کوزہ ٹی مننگ آن بلوچ راج اکن بیرہ تباہی تخوک ءِ ۔ و بلوچ راج ءِ پاکستانی کوزہ نا برخلاف راجی آجوئی نا جہد ٹی اوار مرسا قربانی ترسا آجوئی نا مزل ءِ خڑک ہتوئی ءِ ۔ شہدائے مرگاپ دا ہم بلوچ راج آ ساف کریسس کہ کوزہ گیر غلام راج آتا حقِ آجوئی نا جہد ءِ ہچ وڑ ئٹ سگنگ کپک اندا سوب او زلم و زوراکی ئٹ راجی تحریک ءِ شیڑتیفنگ کن کوشست کیک ، ولے راجی آجوئی و گواچن تحریک آک زلم و زوراکی تیان ایسر کننگ مفسہ بلکن پین ترند مریرہ و چاگڑد نا تہٹی ردیرہ ۔ اندن شہدائے مرگاپ آن پد بلوچ راجی آجوئی تحریک نزور متنے بلکن پین سوگوْ مسنے و مونی بسنے ۔ بلوچ راجی تحریک دشمن نا سوچ ئنا برخلاف پین جوانو وڑ ئسے ئٹ مخلوق نا تہٹی گیشتر مسنے و دے پہ دے دشمن ءِ روتہ غاتیان چھکنگ کشنگ ءِ ۔

!بلوچ راج

شہدائے مرگاپ نا تغ اسہ آزات بلوچستان ئس و دا مسخت کن ہزار آ بلوچ راہشون و ورناک تینا زند ءِ ندر کرینو و دا لڑ آجوئی اسکان روان مرو ۔ بلوچ راج داسا دا عظیم انگا جہد ٹی اوار مرسا جہدکار اتا ہمراداری ءِ کے۔ اینو بلوچستان ہرا حالیت آتا مون ٹی ءِ و ریاستی زوراکی تا گواچی ءِ ، اینو ہرا وڑ بلوچ لس مخلوق آن اونا رزق پُلنگ مننگ ءِ و ہرا وڑ دافتے ریاستی ڈیتھ اسکواڈ اتا دو تیان خلنگ مننگ ءِ دا کل ئنا حل بیرہ اسہ آزات بلوچستان نا درشم ٹی ءِ ۔