13 نومبر : نمیرانیں بلوچ پُسگانی روچ

پنتاک

شرپداریں بلوچ راج!

زیردستی ءِ اھد ءَ راجی وتواکی، پجار ءُ شرپ ءِ لگتمالی ءِ بگیری ءَ گہگیری زیردستیں راج ءِ گڈی راہ ءُ آجوئی ،راجی منزل جوڑ بیت۔راجی آجوئی تہنا مننگ نامگ آنی نام نہ انت بگندے اشی بنھشت ءَ ہزاراں پسگانی ھون ھوار بنت۔دگنیا ءِ گوستگیں راجی آجوئی جنز اے شون ءَ دینت کہ تہنا ہما راج وتی آجوئی ءِ گرگ ءَ سوبین بوتگ انت کہ آہاں اھد ءِ زورگیرانی بگیری ءَ گہگیری ءِ راہ در چتگ ءُ وتی ہزاراں ساہ ءُ سرانی کُربان کنگ ءَ جاڑیگ بوتگ انت۔ہما راج کہ اھد ءِ زورگیر آنی دیما وتی شرپ ءُ پجار ءِ رکینگ ءَ پہ ساہ ءُ سرانی ندر کنگ ءَ چہ پد کنز بوتگ اَنت تاں آ راج گار ءُ گور بوتگ انت ءُ مروچی آہانی ھچ بستار پش نہ کپتگ۔راجی آجوئی ءُ مچانکی راجی پجار ءُ شرپ ءِ رکینگ ءِ واستہ گہگیری ءُ کُربانی بندری شئے انت کہ راجے ءِ ھستمان ءِ مانزمان بنت ہمے درگت ءَ نمیرانیں سنگت ثنا درائنیت کہ”آجوئی ھون لوٹیت”۔

باسمائیں بلوچ راج!

بلوچ راج انچیں ڈیھ ءِ وارث انت کہ چہ کرناں دری زورگیرانی نشانگ ءَ بوتگ ءُ ہمک اھد ءُ باریگاں ءَ جہان ءِ مزن تاکتاں بلوچ ڈیھ ءُ گلزمین ءَ زیردست کنگ ءِ کوشست کُتگ، بلے بلوچ راج ھمک اھد ءَ پہ وتی مادریں ڈیھ ءِ رکینگ ءَ زورگیرانی دیما چو کوہ ءَ مِک بوتگ ءُ زورگیرانی دیما چم جہلی ءِ جاہ ءَ گہگیری ءِ راہ در چتگ ءُ وتی ماتیں گلزمین ءِ واستہ ندر بوگ ءَ جاڑیگ بوتگ ءُ بلوچ راج ءِ گوں وتی ماتیں گلزمین ءَ مھر ءُ وپا بلوچ راج ءِ مچانکی نپسیات ءِ بھر بوتگ۔13 نومبر 1839 ءَ اردیں زورگیریں برتانیہ بلوچ ڈیھ ءَ زیردست کنگ ءِ نیت ءَ اُرش کنت تاں نواب میر مھراب ھان بلوچ ڈیھ ءِ پہازگ ءَ زورگیریں برتانیہ ءِ دیما چَم جہلی ءِ جاہ ءَ سلاہ بند بیت ءُ گہگیری ءِ راہ ءَ پہ ماتیں گلزمین ءِ پہازگ ءَ در چنت ءُ گوں وتی ہمراہاں جنگجاہ ءَ پہ مادریں ڈیھ ءِ پہازگ ءَ ساہ دیگ ءَ پہ وت شرپے ءُ راجی نپ ءِ سرپد بیت۔مھراب ھان ءِ زورگیریں لشکر ءِ بگیری ءَ گہگیری ءُ نمیران بوگ ءِ من ءُ متا ءِ پشدر ءَ ہما پگر ءُ ھیال انت کہ حمل جئیند ءَ پرتگیزی زورگیرانی بگیری ءَ گہگیری ءَ پرمان کن انت۔

نمیرانیں بلوچ پسگانی وارثاں!

نمیران بوتگیں راجی پسگ ڈیھ ءِ ہما پرزند انت کہ آ مچانکی راجی نپ ءُ سیتانی دیما ءَ وتی زاتی نپ ءُ واھشتاں کُربان کن انت ءُ ڈیھ ءُ راج ءِ پہازگ ءَ وتی ساہ ءَ ندر کن انت ءُ ابدمان بنت۔نمیران بوتگیں پسگ تہنا بندپتری کردار نہ انت بگندے راج ءِ مچانکی یاداشت،اخلاقی سرمایہ ءُ راجی شرپ ءِ بھر جوڑ بنت ءُ ہمے راجی پرزندانی کُربانی راجدپتر،دود ءُ گہگیری ءَ داں آیوکیں پدریچ ءَ سر کنت ءُ مچانکی میراس ءِ تہ ءَ مٹ کنت کہ چرائی ءَ راج در بارت ءُ وتی باندات ءِ دیمروی ءِ سوب جوڑ کنت۔نمیرانیں پسگانی یات کنگ ءُ آہانی پگر ءُ پلسپہ ءَ زندگ دارگ ربیتی ءُ جزباتی عمل ءِ نہ انت بگندے گوں راج ءِ گوستانکی سنچ ءُ سما ءُ بانداتی ھستمان ءَ بندوک انت۔ہما راج کہ وتی نمیرانیں راجی پسگاں چہ شمشکار بنت بندپتر شاھد انت آ راجانی اخلاقی روتگ نزور بنت ءُ راج ءِ میان ءَ بے مارشتی جاہ گران کنت۔

گُلیں بلوچ راج!

13 نومبر بلوچ راجدپتر ءِ تاکانی تہ ءَ ہما روچ انت کہ بلوچ گلزمین ءِ پرزند زورگیریں انگریز لشکر ءِ دیما پہ بلوچ گلزمین ءِ آجوئی، پجار ءُ شرپ ءِ پہازگ ءَ چہ وتی ساہ ءُ سرانی ندر کنگ ءَ ھچ ڈول ءَ چک ءُ پد نہ بنت ءُ راجی چم جہلی ءِ جاہ ءَ جنگجاہ ءَ داں گڈی ساہ ءَ مڑان ءَ نمیران بنت ءُ بلوچ ءِ گوستانکی گہگیری ءِ تاکانی تہ ءَ نوکیں درچے بنگیج کن انت۔13 نومبر ءَ نمیرانیں بلوچ پسگانی روچ نامینگ ءِ بندری ھیال ءُ لیکہ ہما پگر ءُ پلسپہ ءَ دیما برگ انت کہ چہ مروچی 187 سال پیسر مھراب ھان ءُ آئی ءِ ھمراہاں سر جہلی ءُ چم جہلی ءِ جاہ ءَ پہ بلوچ ڈیھ ءُ گلزمین ءَ ندر بوگ ءَ پرمان کنت۔نمیرانیں بلوچ راجی پسگانی روچ ءَ ربیتی ڈول ءَ نمیرانیں بلوچ پسگاں یات کنگ ءِ نام نہ انت بگندے پہ بلوچ راجی آجوئی جنز ءَ نمیران بوتگیں تیوگیں راجی پسگانی پگر، عمل ءُ پلسپہ ءَ وتی اندر ءَ جاہ دیگ انت۔

ھما کہ آھاں ھچ متاہ ءِ گرز نہ بوتگ چہ زند ءُ مرگ ءَ

ھما کہ کسی ملام آھاں سرا نہ کرتگ ھما شھید انت