ھشت جون “گار ءُ بیگواھیں بلوچانی روچ” بلوچستانءَ برجاھیں مردمی اُکبالانی ھلاپءِ سنگینیں داستانے۔
بی ایس او آزات
بلوچ نودربر گل آزات ءَ وتی شنگ کرتگیں درشانءَ 8 جون”گار ءُ بیگواھیں بلوچانی روچ”ءَ را بلوچستانءَ برجاھیں مردمی اُکبالانی ھلاپءِ سنگینیں داستانے پیش کت ءُ گشت کہ چہ سالاں برجاھیں گار ءُ بیگواھیءِ دراجیں دْرچءَ بلوچستانءِ تہءَ مردمی نیستیءِ جاورالے ودیگ کتگ۔ چرے مردمی اُکبالانی سنگینیں پادمالیءَ ابید مردمی اُکبالانی میاں اُستمانی ادارہ گوں بے تواریءَ نشتگ ءُ ندارگ چارگءَ اَنت۔
بنجاھی جارکشءَ گُشت کہ چہ مرچیءَ کساس سینزدہ سال پیسر 8 جون 2009ءَ بی ایس او آزاتءِ بنجاھی گوستگیں کمک کماش ذاکر مجید بلوچ پہ زور آوار جنگ ءُ گار ءُ بیگواہ کنگ بوت، ءُ آئیءِزورانسریں بیگواھیءِ سینزدہ سالانی سرجم بوگءَ پد ھم آئیءَ را تاں مرچیءَ دیمءَ آرگ نہ بوتگ۔ ھمے ڈولءَ گلءِ گوستگیں بنجاھی کماش زاہد بلوچ، گوستگیں بنجاھی ھالرسانی کارگشاد شبیر بلوچءَ ھوار دگہ بازیں باسکے گار ءُ بیگواھیءِ آماچ انت۔ ءُ گلءِ گوستگیں بنجاھی جوائنٹ سیکریٹری شفیع بلوچ، بنجاھی کمیٹیءِ باسک کمبر چاکر بلوچ، کامریڈ قیوم بلوچ ءَ ھوار بازیں باسک ءُ سنگتانی آوار جنگ ءُ گار ءُ بیگواہ کنگءَ پد آھانی تیرسُپتگیں جون چگل دیگ بوتگ انت۔چہ ایشاں ابید چہ بلوچستان ءَ سدانی کچءَ سیاسی کارکن جتائیں وھداں گار ءُ بیگواہ کنگ بوتگ انت کہ چریشاں گیشتر کارکن نمیران کنگ ءُ آھانی جون چگل دیگ بوت انت ءُ ہزارانی کساسءَ انگت گار ءُ بیگواہ انت۔ چہ زورآورءِ نیمگءَ زورانسری آوار جنگ ءُ کشگ ءُ دور دیگءِ پالیسی یڈّولءَ برجاہ انت ءُ وھدءِ ھمبرائیءَ آئیءِ تہءَ گیشی آرگ بوگءَ اِنت۔
بنجاھی جارکشءَ دیمترءَ گشت کہ بلوچستانءَ چہ مدتاں برجاھیں گار ءُ بیگواھیءِ عملءَ نوں چوشیں گِسے پشت نہ کپتگ کہ چہ اودءَ کسے گار ءُ بیگواہ کنگ نہ بوتگ۔ چہ نودربراں بگر تاں استاد، اھوالکار، ڈاکٹر، وکیل، پوریاگر ءُ زہگ ءُ زالبول ہزارانی کچءَ گار ءُ بیگواہ اَنت۔ ءُ اے عملءِ تہءَ کمیءِ بدلءَ ھمک روچ ترندی ءُ گیشی پیداک۔ یک نیمگے پاکستان بلوچستانءَ مردمی اُکبالانی برھلاپیءِ تہءَ گیشی آرگءَ اِنت تاں دومی نیمگءَ میاں استمانی تاکت ءُ مردمی اکبالانی میاں استمانی ادارہ بے تواریں سئیلی ءِ کردارءَ پیلو کنگءَ اَنت۔ میاں استمانی تاکتوریں ریاست ءُ میاں استمانی مردمی اکبالانی ادارہانی بے تواری پاکستانی زورانسریءِ تہءَ گیشی آرگءِ سوب جوڑ بوگءَ اِنت۔ اے وھدءَ بلوچستانءَ بلوچ چکچینی یڈّولءَ برجاہ اِنت۔ اے جاورالءَ پہ میاں استمانی ادارہاں اے الم بیت کہ آ پاکستانءَ مردمی اکبالانی سنگینیں برھلاپیءِ ھاتر جوابدہ بہ کن اَنت۔
بنجاھی جارکشءَ وتی درشانءِ گُڑسرءَ گشت کہ 8 جون ” گار ءُ بیگواھیں بلوچانی روچ”ءِ درگتءَچہ گلءِ نیمگءَ جتائیں دیوان ءُ مراگش اڈّ دیگ بیت، رسانکدرءَ آگہیءِ کیمپئن جنزینگ بیت، ءُ گلءِ دراھیں ھنکین ریفرنس( دیوان)ءِ بند ءُ بستءَ بہ کن اَنت۔