دو مارچ بلوچ دود ءُ ربیدگی روچ

گراں مہذبیں بلوچ راجی پسگاں۔۔۔

دنیاءِ تہءَ ھر ملک ءُ استانے کہ راجدوستیءِ داواءَ کنت تہ آئیءِ راجدوستیءِ مستریں عنصراں چہ یکے دود ءُ ربیدگ بیت، کہ ھر زندگیں راجانی پجارءِ چیدگ زانگ بیت۔ بیدءِ دود ءُ ربیدگءَ راجی استانءِ جوڑشت بیت کت نہ کنت، پرچہ کہ راجی تعمیرءِ (nation building) ھاترءَ دود ءُ ربیدگ اژدری ئیں شے یے زانگ بیت۔ دود ءُ ربیدگءِ بنداتی کار ھمیش انت کہ راجےءِ چاگردی روشت ءُ چاگردی راستیانی زاہری دروشمءَ پیش بہ دار ایت، کہ آئیءِ زند گوازینگءِ کار راھبند چی انت۔؟ زندءِ ھر تک ءُ پہناتءِ درانگازیءَ را دود ءُ ربیدگ گوش انت، پہ درور یک راجےءِ جیڑگ، اڑ ءُ جنجالانی گیشوار کنگءِ دستور کلیں چیز دود ءُ ربیدگءِ توکءَ کاینت۔ دنیاءَ ھر راجےءِ تبزانشتی تکءَ پوہ بوگءِ ھاترءَ راجےءِ دود ءُ ربیدگی کار ءُ کرد زانگی انت۔راجمانی، چاگردی یا لبزانک ءُ ایدگہ پڑاں دیمروئی دیگءِ مستریں وسیلہ دود ءُ ربیدگ زانگ بیت۔ دنیاءَ ھر زورگریں استاناں کہ دومی استانءِ سرءَ ارش کتگ تہ درستاں چہ پیش آئیءِ دودانی سرءَ الگار بوتگ، پرچہ کہ دود ءُ ربیدگءِ وسیلہءَ زورگر راجءِ سرجمیں تب ءُ مئیلاں سرپد بوتگ انت ءُ پدا زمین اش وتی ایردست کتگ۔ دنیاءِ راجی گوستانک چہ چوشیں راجی دروراں پر انت۔انچوشکہ انگلستان اولی رندءَ وھدے کہ اوگانستان ءُ برصغیرءَ را ایردست کنت ءُ بلوچستانءِ راہ ءُ دگّاں کارمرز کنت، تہ آئیءِ اولی ارش کلات اسٹیٹ نہ بیت بلکیں 1839ءَ پیش وتی بازیں کارندہ دیم دئینت کہ بلوچ دود ءُ ربیدگءَ ھوار سرزبانی لبزانک یا ربیتءَ(Oral literature or tradition) نز بیار انت۔ چوشکہ کیپٹن لیچ، ٹی جے مئیر، لانگ ورتھ ڈیمز ءُ دگہ ھزاراں کارندگ ھاس پہ ھمے کارانی ھاترءَ دیم دیگ بنت۔ اے کارندگ بلوچ دود ءُ ربیدگی لٹریچرءَ بگر داں زندءِ ھر تک ءُ پہناتءِ لٹریچرءَ زور انت ءُ پہ بلوچءَ یک نوک ءُ وتگڈیں ڈسکورسے دیمءَ کار انت۔پہ درور یک ڈسکورسے ھمے بیت کہ بلوچ یک راجے نہ ات، دومی لیکہ ایش بیت کہ اگاں ما(بزانکہ انگریز) اگاں چہ دراں اتکگ ایں گڑا شما(بزانکہ بلوچ) ھم اے زمینءِ ھدابند نہ ات بلکیں درامدیں ٹکے ات۔ چریشیءَ ابید دگہ بازیں ڈسکورسے پہ وتی زورگریءِ مہکم کنگءِ ھاترءَ دیمءَ کاریت۔

زانندگیں بلوچ راج۔۔۔
یک راجےءِ دود ءُ ربیدگی ردومءِ دیمروئیءِ بنزہ چرائیءِ دودمانءَ بیت، دنیاءِ تہءَ ھما راجاں دیمروئی کتگ کہ آ راجاں وتی دود ءُ ربیدگءِ فریم ورکءَ چہ دودانءَ دیمروئیءِ راہاں گیتکگ، ھما راجاں کہ وتی دود ءُ ربیدگ چہ زورگریں استانانی سان ءُ اسراں رکینت نہ کتگ آ راج زوتاں زوت بیگواہیءِ دنزانی توکءَ گار بوتگ انت۔ انچوشکہ ریڈانڈین انت کہ آیاں نہ وتی دود ءُ ربیدگ پاہاز ات ءُ نئیکہ زبان ءُ لبزانکءِ وڑیں ازگاریں مڈی، پمیشکہ مروچی کس نہ زانت کہ زمانگےءَ چوشیں راجے بوتگ۔ چوشیں راج مدام تژن ءُ پیگورانی دیمپان انت۔ پمیشکہ دنیاءِ توکءَ یک راجےءِ آزاتیءِ مستریں مانزمان آئیءِ ربیدگی آجوئی(Cultural Freedom)ءَ گوں بندوک انت۔ چریشیءَ پد معاشی آزاتی انت۔ بلئے وہدے کہ یک راجے ایردست کنگ بہ بیت تہ آئیءِ ربیدگ گڑا پدا آئیءِ نہ بیت پرچہ کہ اے دود ءُ ربیدگ ھم استانءِ متاہ ءُ منشاءِ چمدار بنت۔ ھمے رنگءَ بلوچ ھم ھنوں انچیں نازرکیں وہدےءَ چہ گوزگءَ انت کہ پاکستانءِ وڑیں استانےءَ جتا جتائیں وہداں بلوچ دودانی سرءَ بیڑ برتگ۔ چوشکہ دو مارچ بلوچ دود ءُ ربیدگءِ روچ بنیادءَ چہ بی ایس اوءِ نیمگءَ نامینگ بیت، کہ جتائیں وہداں اے روچءِ درگتاں جتائیں مراگش اڈ دیگ بیت، انچو کہ سال 2010ءَ وھدے کہ چہ بی ایس او آذادءِ نیمگءَ خضدارءَ دود ءُ ربیدگءِ روچ دارگ بیت، تہ سرکاری کارندہ بی ایس اوءِ ورنا ءُ لس مہلوکءِ سرءَ دستی بمباں گوں ارش کن انت، کہ اودءَ گلءِ باسک سکندر ءُ جنید بلوچ نمیران بنت ءُ چندے کس ٹپیگ بیت، اے تبءِ اولی جانی وئیل ھمیش انت کہ پاکستانءَ بلوچ ربیدگءِ سرءَ بیڑ برت۔ چوناھا اگاں چارگ بہ بیت پاکستانءَ ھما وھدءَ بلوچ ربیدگءِ سرءَ ارش کت وہدے کہ بلوچ سرزمین دستگیر کت، ھما روچاں داں بلوچ ربیدگءِ سرءَ عملہ آور انت۔
سال 2010 ءَ چہ پد بلوچ ڈیھءِ جاور کہ باز مٹ بوان بنت گڑا بی ایس او آذادءَ ھوار ایدگہ آجوئی دوستیں گلانی پچیں دیوان ءُ لس مراگش ھم کم تران بنت۔ چہ ایشیءَ استان وتی ایدگہ پالیسیاں ھوار اے پالیسیءَ دیمءَ کاریت کہ یک نیمگے بلوچءِ راجی لیکہ راجدوستی ءِ بنیادءَ پارلیمانی مہلوکءَ جتائیں ٹاسک دنت ءُ دومی نیمگءَ بلوچ آجوئی دوستیں گلانی مراگشاں وتی رنگ ءُ دابےءَ گوں دیما کار ایت، چوشکہ ھمک سال بلوچ دود ءُ ربیدگءِ روچ چہ استانی لشکر ءُ آئیءِ کاس لیساں نیمگءَ برجاہ دارگ بیت کہ سال 2010 ءَ ایشیءِ سرءَ ارش کنگ بوت۔ چہ دژمنءِ اے پیمیں ترسناکیں رپکاں بلوچ مہلوکءَ شیوار بوگی انت، نا آئیءِ اے مراگشاں بہر زورگی انت ءُ نئیکہ آھانی کمکے کنگی انت۔

تنگویں وانوک۔۔۔
اے وھد ءُ جاوراں بلوچ وتی راجی زند ءُ مرگءِ میانءَ اوشتوک انت، پیسلہ راجءِ وتی دستءَ انت کہ دنیاءِ زورآورانی دیمءَ وتءَ گوں یک سیاسی تاکتےءَ منارینت کت کنت یا نہ کنت۔ اے گلامانہ زندءِ تہءَ دژمنءِ رپک ءُ ھنراں سرپد بوت کنت یا نہ کنت، وتی راجی بقا ءِ شے آں رکینت کنت یا نہ کنت۔؟ زبان بہ بیت یا کہ ربیدگ ءُ دودمان اے کلیں شے ھمک روچی ئیں زندءِ بہر کنگ لوٹ انت، ایشانی سرا مدام پریکٹس کنگ لوٹ ایت، وانگ، نبشتہ کنگ ءُ گپ ءُ گال کنگ لوٹ ایت، ھمے شے انت کہ مارا مئے راجی جتائیءَ شون دینت۔
پمیشکہ بلوچ مہلوکءِ زمہ واری انت کہ دو مارچءَ بلوچءِ راستیں ربیدگانی بنیادءَ مراگش ءُ دیوانانی شکلءَ یات بہ دار ایت۔ مئے گورءَ یک ردیں سوچے اے جوڑ بوتگ کہ دود ءُ ربیدگءِ روچ دارگ مہ بیت چیءَ کہ آئیءِ تہءَ بلوچ شاتکامی کنت کہ پہ گلامءَ شاتکامی بوت نہ کنت۔! بلئے چوش نہ انت، مئے ربیدگ مارا دلپروشی ءُ موتکءِ مارشتءَ نہ دنت، بگندئے اے روچءَ پہ شاتکامی شہدائے دستار ءَ وتی جان داتگ، آھانی کربانی پہ دنیاءِ راجاں پیگامے کہ بلوچ یک زندگیں راجے۔ بلوچ تاں وتی آجوئیءَ پہ سربرز ءُ بلندی، گوں شات ءُ شاتکامی وتی راجی گہگیریءَ برجاہ دار ایت، کہ بلوچءِ ابدی وشھالیءِ مانزمان انت۔

بی ایس او آذاد