فوجی آپریشن(افسانہ)
محراب بلوچ
آھڑی آ مُد ئنا بنداوی دیک ئسر ، ڈغار ئنا تہوش شپادا نَت تا پوتڑو تے پین زیات کرسہ ئس ۔ شار ئنا دامان ئٹ تہو نا اُشوکا تہوش اتا چِرک چِکیسہ اُسون آ اُست اتا بوج اتے ٹوہسہ ئس ۔ اسہ اندنو خاخر ئس لگوک ئس کہ ہرا کُل شارے پلویڑ ئٹ السہ درسہ ئس ولے دا خاخر ہچو روشنائی ئس تالان کرسہ الئو ۔ اُست اتا شونم تئے دسوکا مہر ئنا پھل اک ھِس مرسہ ئسر ۔ شار ئنا چاگڑد ئٹ بھلو چُپیس تالان ئس ، اندنو چُپیس کہ بندغ اتون اوار فطرت نا نظام ہم گُم سُم ئس ، نئے تہو تا چِرک اتا توار ئس نئے کہ درخت اتا زِی آ چُک اتا چِڑ چِڑہ ۔ نئے بازار و سڑک اتا نیمہ غان بندغ تا توار توار ئس ۔ اندن لگاکہ کہ جہانٹ سُور لگانے و نن کُل محشر نا میدان آ سلوکُن ، ولے دُن الئو محشر نا میدان آ جہان نا کُل بندغاک مُچ مرسہ بریرہ و اسہ کچ آ سلیرہ ، ولے داڑے کنا داریرہ غا کس الئو بیرہ ای اسوٹ و کنا اُرا والاک ئسر ۔ ہرکس تینا مون ، اِربشی ، کَشوکا اُست اتو دا ندارہ ءِ سیل کرسہ ئس ۔۔ ندارہ ؟؟ آخہ بلکہ دا ندارہ ئس الئو ۔ اسہ اندنو خلیس ئنا چاگڑد ئس جوڑ ئس کہ ہرا خننگ متوکہ بلکہ بیرہ محسوس کننگاکہ ، ولے ہان دا چُپی نا چاگڑد ننے خلیفسہ ئس ۔ سماء اف گُڑا انت ندارہ ئس ئسک کہ ہرادے خننگ ان مُست نن خلیس نا گواچی اسون ، خیر نن دادے داسی تا ندارہ پاننگ کپنہ ، داسکان تو دا ننے ان اندرے ، نن بیرہ چُپی نا تہٹی ہمو بے توار آ کوکار اتے محسوس کننگُن ، ولے گواچن ئٹ ہچس خننگ افن ۔
داسکان نن حیران و ہبکہ تینا اُرا نا چار دیوالی ٹی زُنڈوک اُن ، ننا ملی تیٹی خلیس اندن جہی ءِ کہ ننے جند ئنا اُرا نا تہٹی ہم جارات بننگ اف ۔ ننا داریرہ غا اسہ اندنو چاگڑد ئس جوڑے کہ بندغ دا چاگِڑد ئٹ دَمہ ہم الینگ کپک ، دُن سماء اف کہ دا ساعت ئسے نا خلیس ئسے یا مستقل سلوکو گِڑاسے ، ننا شار تو بھلو وخت ئسے نا ءِ تینا ہمو شوخ آ رنگ اتے گوہانے ، ہمو اسمان نا خیسنی و دِے ئنا اندر مننگ نا ندارہ کہ ہرانا خننگ کن مُر مُر ان مخلوق بسئکہ ولے داسہ دا ندارہ غاتہ خننگ ننکہ بیرہ ارمان ئس جوڑے ، ننا شار ئٹ مخلوق تینا منشہ ئٹ پیشن اننگ کپک اگہ اِنا تُو بھاز کم گنجائش ارے کہ ولدا زندہ برے ، ولے داکہ چاگڑد اینو ننا شار ئٹ جوڑے دُون مستی متنے اینو تو نن بیرہ تینا اُرا تیٹی ہم بے جارات اُن ۔ کنے سماء اف کہ پیشن آ انت مننگے ولے ہان ای داخہ سرپد مننگ اُٹ کہ بنی آدم تا دا چُپی ئٹ بھلو خلیس ئس تالانے ۔ شار ئنا بازار و سڑک اتا نیمہ غان بندغ تا ہچ توار اف بیرہ اندنو چُپی ئس تالانے کہ کس پئے دا ڈغارا ہچ بندغ اتا وجود اف ۔ ولے ہان اندا چُپی ٹی اِرا توار ارے کہ ہرافتے نن محسوس کننگُن ، اسٹ بھلا بُوٹ اتا ترپہ غاک کہ ہرافتہ توار کنا خف تے ئسکان بننگے و ایلو ہمو نیٹو والا سیٹی تا ژونگارہ ءِ کہ ہرا مِلی تیٹی بے جارتی ئس تالان کننگے ۔ داڑان بیدس پین ہچو توار اف ، ہر نیمہ غا بے تواری ءِ ۔
خیر ای اسہ گِڑا ئس خننگ افٹ گُڑا اَٹ و مَٹ تینے دُون خلیس نا گواچی کروٹ ۔ ای داسکان دُون ہم سرپد مننگ افٹ کہ پیشن انت مننگے ، گُڑا انت اکن ای تینا ہوش ءِ پیشن نا جہان اتو کیو ۔ اندا خیالے مِلی ئٹ اتسہ ای تینا حویلی ان اِنسہ تینا کُوٹی ٹی پُترینگاٹ ۔ ای تینتو آوار چناہ تا ہوش ءِ چَپ کننگ کن اوفتے ہم کُوٹی نا تہٹی توار کریٹ و اوفتیکن شہہ مرید و حانی نا داستان ءِ بنا کریٹ ۔ ای شہہ مرید و حانی نا داستان ءِ بنا ان اَلسہ اوفتہ مہر ئنا قصہ غاتے پاریٹ و داڑے سر مسوٹ کہ شہہ مرید مجلس ئسیٹی قول کرے کہ اینو نا دے ہرکس کنے ان انتس خواہس ای اودے ایتیو ، دا کنا بلوچی قول ءِ ۔ گُڑا اندڑے چاکر پِنی و سڑدار ئس شہہ مرید ان اونا اُست ئنا بندغ حانی ءِ خواہنگ نا خواست ءِ کرے ۔ دا ساعت شہہ مرید کن اونا زند ئنا کُل ان خرینہ ساعت ئس ۔ آسہ نیمہ غا اونا اُست ئنا بندغ حانی و ایلو نیمہ غا اونا راجی قول ، چاکر نا دا خواست شہہ مرید کِن بھاز سختو امتحان ئس مس ولے دا امتحان نا ایسری دُن مس کہ شہہ مرید تینا اُست ئنا بندغ حانی ءِ تننگ آ تیار مس ولے تینا راجی قوم ءِ پرغنگ آ تیار متو ۔ چاکر شہہ مرید نا دا قول ان فائدہ ارفیسہ اونا حانی ءِ درے ہرا شہہ مرید نا زند ئنا کُل ان بھلا نسخان ئس ولے ایلو نیمہ غا شہہ مرید دا گِڑائے پاش کرے کہ بلوچ نا خُڑکا اونا راجی مڈی تا رکھ و پاسداری اونا ذاتی خواہش اتیان زیات ءِ ۔ ای دا قصہ ءِ کرسہ اسوٹ چناک قصہ نا نیام ئٹ سوج کرسہ پاریر کہ اینو نا ساڑی آ وخت ئٹ شہہ مرید و حانی دیرو ؟ او اندا سوج کریر کہ نی ننے اندنو مثال ئس ایت کہ نن سرپد مرین کہ او وخت شہہ و حانی نا مہر ئنا کچ دُون مسونے ۔ ولے چناہ تا دا سوج اتیان پد کنتو دا فن الئو کہ ای مریم و رشید ، ریحان جان و سمل ، وسیم و یسمہ نا پِن ءِ الینگ کروسٹ ، کہ ہرافک تینا ذاتی خواہش ، مہر و اُست ئنا دولخی ءِ پَد بِٹیر و تینا راجی مسخت نا رندٹ تینے ساہ تے ندر کریر ۔
خیر ای ساعت ئس چُپ کرسہ تینے سُجیفنگ ئسوٹ ، چناک ہم چُپ کنا باہ غا اُرینگ ئسر ، چاگڑد ئٹ ہم بھلو چُپی ئس تالان ئس ۔ کنا چُپی ءِ ساعت ئس متوسس کہ بھلو کوکار ئسے نا توارس ارفے تینے ، اندن ترندی ئٹ کہ دا کُل چاگڑد ئنا چُپی ءِ پرغا ۔ دا چُپی کہ ہرانہ پرغنگ کن نن دعاگو ئسون او تو پِنا ، ولے اودے پرغوکا توار او چُپی ان زیات ننے خلیس ئنا گواچی کرے ۔ دا کوکار اندن ترند ئس کہ ننے کُل ءِ پین حیران و ہبکہ کرے ۔ سما الئو کہ دا کوکار ئنا سوب انت ءِ ولے اندخہ سرپد مننگ اسوٹ کہ دا اسہ ہیڑ ئسے نا کوکار ئسے ہرا ننے ان خُڑکے ۔ دا کوکار برجاہ ئس ، کنے داسکان سماء الئو کہ ننا داریرہ غا انت مننگے ، ای پیشن ہم اننگ کتوٹہ ۔ داسہ بیرہ اندخہ محسوس کننگ ئسوٹ کہ ننا ہمسایہ تا اُرا غان چیہانٹ ئنا توارے ، دا چیہانٹ اتو اوار ولدا نن اندن خلیس ئنا گواچی مسون ۔ ای زوتس کوٹی ان پیشن مرسہ حویلی آ اناٹ و کنا کوشست ہم اندا ئس کہ ای پیشن گَلی آ کاوہ ءُ دا ندارہ ءِ سیل کیو و سرپد مریو کہ ننا داریرہ ٹی انت مننگے و دا کہ خلیس ئنا چاگڑد جوڑے دانا سوب انت ءِ ؟ ای حویلی ٹی اسوٹ ، چیہانٹ اتا توار ترند ئس ، داسہ توار اک اِراٹ ان زیات مسوسُر ، دا چیہانٹ اتا ترندی تون اوار سیٹی تا ہم توار ترند مرسہ ئس و بھلا بُوٹ اتا تراپہ ہم داسہ کنا خف تے ئسکان ترندی ئٹ برسہ ئس ۔ اندن لگاکہ کہ داسہ دا توار اک ننے ان خُڑک برسہ ءُ ۔ بوٹ اتا ہر تراپہ ایلو ان ترند ئس ۔ ہر قدم نا توار ایلو سلوکا قدم ان زیات ئس ۔ ای تینا حویلی ٹی سلوک ئسوٹ ، کنا لُمہ و ایلو چناک کُل اُرا نا تہٹی ہبکہ زُنڈوک ئسر کہ انداڑتو اوار ننا حویلی نا دیوال اتئے گِڑاس بندغ لگارو تینے ننا حویلی نا تہٹی خسار ۔ خسنگ تون اوار او درگہ غاتے ملار و سد اتا کچ ئٹ فوجی و ڈیتھ اسکواڈ نا بندغاک ننا اُرا نا تہٹی پُترینگار ۔ ای زوتس رُم کرسہ تینا کُوٹی ٹی پُترینگاٹ ، ولے او ہم کنا کوٹی اسکان سر مننگ آ زیات وخت خلتور ۔ ڈیتھ اسکواڈ والا ہرانا مون چادر ئسے ٹی مُول ئس ، او کنا نیمہ غا تینا حُور اتے بُڑزا کرے و فوجیک کنے گِر کرسہ کوٹی ان کشار ، کنے حویلی ئٹ سلیفسہ کنا خن تے آ مون و پُچ ئس تفیر و کنے گِریسہ تینتو دننگے بناء کریر ۔ داسہ چیہانٹ اتا توار پین ترند مس و دا چیہانٹ اتیٹ کنا ہیڑ و لمہ نا ہم توار اک اوار مسور ۔ مُستی کنا خنک ملوک ئسر ای سرپد مننگ الوٹ کہ پیشن انت مننگے و پیشن نا ندارہ انت ءِ ۔ ولے داسہ کنا خنک تفوکو ای چاہنگ اُٹ کہ ننا داریرہ غا فوجی اپریشن مننگے ، او ننے بلوچ مننگ نا خطا ئٹ بیگواہ کننگو ۔ ای داسہ تفوکا خن تیٹ دا کُل ندارہ ءِ خننگُٹ کہ ہرادے وختی ملوکا خن تیٹ خننگ الوٹ ۔۔