شہید عمیر جان: مدام اسہ رژنا ءُ استار ئس

شاموز بلوچ

شہید عمیر جان نی امو استار اُس ہرا تہار آ نن تیٹ لگاکہ، نا بشخندہ سمندر نا چول آتا وڑ سمندر نا کنڈا رقص کریکہ و اُست ئنا ریک آتے لگاکہ وا پدا پدی مسکہ۔ ولے او سمندر اینو بےتوار ئے، نا یات آتا چول آک اینو ہم کنا اُست اٹی ہندن لگیرہ، دنکہ اسہ طوفان ئسے کہ ہرا ہچ ایسر مننگ نا پن ئے ہم ہلپک۔ نی چمن ٹی ہمو پھُل ئنا وڑ اسس، ہرا  پھُل ئنا گند مُچ آ چمن ئٹ تالان مرے۔ ولے اسہ زوراکو چِرک اس بس او پھُل ئے کشکا، بارن آ  پن آتا وڑ زمین نا زی آ تما ولے اونا جوان انگا گند وتن نا چرک ئٹ اوار مس۔ اونا گند مدام دا ہیت آ باور ایتک کہ پھُل ئے کشگنگ آن اونا گند ایسر مفک بلکہ اونا گند پین وجد اٹ بریک و گڈی ساہ اسکان امو چمن اٹ مریک۔

شہید عمیر جان اسہ بندغ اس الو بلکہ اسہ لمہ ئسے نا اُمیت، اسہ ایڑ ئسے نا تاغت، اسہ خاہوت ئسے نا کوپہ و بروکا دے تا اسہ تغ اس اسک۔ اونا ہننگ آن پد یکہ اسہ ہرا اس گیاوان متو بلکہ چندی سنگت و راج نا ایلو بندغ آتا اُست ٹی اسہ اندنو ٹپ اس تخا کہ او ہچ رواخ مف۔

اینو نا لمہ ،نا اسہ دید ئسے کن مچ زندے ترازو ٹی تخنگ خوائک، نا ایڑ ئنا  خڑینک آک داسکان ام سلنگ نا جیرت تخپسہ، نا سنگت و سیالاک  داسکان دا گواچن ءِ مننگ کن تیار افس کہ نی دا زوراک آ دترخور و خنکش نا دو آن دن بے دڑدی اٹ شہید کننگاس۔

پیرانگاک پارہ کہ وخت ہر دڑد آنا درمان ئے ولے چندی دڑد اندنو ارے کہ اوفتا وخت ہم درمان مننگ کپک، شہید عمیر جان نا رخصتی نا ٹپ ہمونو ٹپ ئسے کہ ہرا ہچ وڑ رواخ مننگ نا ڈول ئٹ اف۔

دیہاڑ گواہ ئے کہ بنداغ آتا جون آک ایسر  مریرہ، ولے ہمو بنداغ آک ہچ وڑ ایسر مفسہ ہرافتا یات بزگ و بیوس آتا دوی آ و اُلس نا دُعا تیٹی مریک۔ نا قبر مننگ کیک کہ بے توار مرے ولے نیتون دا یزیدی لشکر نا دو آن مروکا تادی ہچ بے توار مفرو۔ نا ہیت ہر ہمو ہندا مرو ہراڑے راست ئنا ہیت مرو  ہر ہمو ہندا مرو ہرڑے دا زوراک آ ریاست آن خار تون اوار انصاف نا ارمان  زندہ ئے۔

اِرا جون اِرا ہزار بیستو شش ہمو بے بخت انگا دے ئے کہ  ہرا دے زہری ٹی اراَ ہندونو کارم مس کہ دا ظالم ریاست پاکستان نا ظلم  آتے جہان نا مونا پاش کرے۔ ہندا دے کہ سڑدار نصیر احمد موسیانی نا مار میر خلیل احمد شہید کننگا۔ اسہ پیرو باوہ ئسے نا مون آ اونا ورناغا مار ءِ سُم کاری ٹی شہید کننگا ایلو باوہ نا مون آ ورناغا مار ئنا بے ساہ آ جون ءِ لغت خلیسہ دریر۔ پدا ہندا  ہیت ءَ شہید نا جون واپس تننگا کہ سردار نصیر احمد نوشتہ کے ایتے کہ اونا مار جنگول اس مسونے و جنگ ئٹی خلنگانے۔

ہندا دے کہ شہید عمیر جان تینا خاہوت تون اوار گاڑی سیٹی ہننگ اس کہ ریاست نا بے لغام و تاغت نا نشئہ ٹی مستو لشکر اس گاڑی آ سُم کاری کرے۔ شہید عمیر جان نا ایڑ گاڑی آن پیشتما کہ نن کسری اُن و  ننتون چنکو چنا او، نن بےگناہ اُن ولے ریاست نا لشکر کن کُل بلوچ راج کہ ہراڑے پیر و ورنا مرے، چنا و نیاڑی مریر کُل اسٹ او، دا ریاست نا دشمن او۔ پاکستانی لشکر عمیر جان نا ایڑ  نا گُد ئنا شرف ءِ کتو سم کاری ئے برجاتخا و ہندا سمُ کاری ٹی عمیر جان ٹپی مس۔ پاکستانی لشکر گاڑی نا خُڑک آ بس عمیر جان ٹپی تموک اس، ایڑ تا یکہ تینا چنکا چنا تون اوار عمیر جان نا خڑکا تولوک اونا باٹی پُڑی پُڑی دیر شاغنگ اس، عمیر جان نا جون آن دتر ہننگ اس، بندغی خواست تو دادے کہ پاکستانی لشکر بے گناہ عمیر جان ئے اسپتال ءَ دریکہ ولے اود اسپتال آ دننگ نا جاغہ  گاڑی نا ٹہیر تیا سُم کاری کریر و گاڑی ءِ بے کار کریر تانکہ ٹپی آ عمیر جان ءِ زوت اسپتال آ سر کننگ کپس۔ مُچ زہری ٹی (curfew) اس روڑ آک بند اسُر ہندن لگاکہ کہ خلق اٹی اسہ بندغ اس ہم اف، پیشیم آن داسا شام تمنگ اس ولے کمک کن کس الو، عمیر جان ٹپی آ جون ئتون تموک، ساہ ہناکہ بسَکہ و دوی آ کلمہ  نا ورد اس، ایڑ یکہ گُد اٹ عمیر جان نا ٹپ آتے تفیکہ تانکہ دتر ہننگ بند مرے۔ خلق ئٹ ہندنو خُلیس اس تماسک کہ کس کمک کن بتوکہ، نہ کہ گاڑی ئس رسینگاکہ کہ او عمیر جان ئے اسپتال آ سرکیر نہ کہ پاکستانی لشکر روڑ ئے ملا کہ کس اس برے و کمک کے۔

سوب آن ہلیس کہ داسا تہارمننگ اس عمیر جان ٹپی آ جون اتون روڈ آ تموک دڑد سہنگ اس، دڑد ئتون دوی آ کلمہ اس، عمیر جان دا جہان ئے رخصت کریسہ ہنا۔ ولے دا ریاست نا تادی  داڑے ایسر متو مچا نن عمیر جان نا بے ساہ آ جون ئے ڈغار نا باھوٹ کننگ کن الیتوس، دا ہندنو زوراکی  ئسے کہ بندغ دیہاڑ نا پن آتے پٹہ خننگ ئٹی بفک۔ شہید عمیر جان نا برام نا تیاری مننگ ئس، اُراٹی گل و بالیک اسُر، ولے ہمو خوشیک ہنار اندنو دڑد جوڑ مسُر کہ مچا زند ایسر مفس۔

دیہاڑ گواہ ئے کہ تاغت نا زور آ بندغاک  بے توار تو مننگ کیرہ ولے بزگ و بیوس آ راج آتا زی آ زوراکی  نا قصہ غاک ہچ وڑ بے توار مفَسہ۔ شہید عمیر جان نا پن ہم ہمو قصہ غاتیٹی نوشتہ ئے ہرا زوراک نا بر خلاف گوائی ایترہ۔ بلوچستان ئٹی بیوسی نا دا اولیکو وار و اولیکو قصہ اف بلکہ دونو ہزار آتا کچ اٹ واقعہ ارے کہ ہراڑے بلوچ ورناتے ناحق ئٹ شہید کننگانے۔دننگا تادیک بلوچ زنک ایسری نا بشخ ءُ، ہراڑے ورناک بیگواہ  کننگیرہ، اوفتا جوناک ویرانہ تیٹی بٹِنگیرہ یا تو (Fake encounter) تیٹی شہید کننگیرہ۔ بیگواہ مروکا بلوچ ورنا تے فیک انکاؤنٹر تیٹی  شہید کننگ پاکستان نا  بلوچ راج نا زنک ایسری کننگ و بلوچ راج ئے خوف و خولیس نا گواچی کننگ نا کوشست ئسے  کہ بلوچ تینا راجی آجوئی نا کسر آن پدی مرے، ولے بلوچ دے پہ دے تینا راجی جُنز آن خڑک مننگ ءِ، و ریاست نا بلوچ ڈیہہ آ زوراکی ئٹ کوزہ ئے ہچ وڑ مننگ اف۔فکر و نظریہ بندغ نا کسفنگ آن نہ تو سلیک نہ کہ ایسر مریک۔