14 اگست ءَ وشی ءُ شاتکامی ءِ روچے سرپدبوگ گوں بلوچ راج ءَ دگا ءُ بلوچ راج ءِ سرا زوراکیءِ تہ ءَ پاکستان ءِ ہمکار بوگ ءِ منانک انت

پنتا ک

شرپداریں بلوچ راج،

بیستمی کرن  آشوبی کرن ءِ نام ءَ زانگ ءُ پجارگ بیت، اے ھما کرن بیت کہ جہان ءِ زیردستیں راج چہ زورگیراں وتی ڈیھ ءُ راجاں آجو کن انت۔ اپریکہ ءُ لاطینی امریکہ ءِ زیردستیں راجاں بگر داں ایشیا ءَ بیا، زیردستیں راج ہزاراں سرانی کُربان کنگ ءَ رند وتی ڈیھ ءِ آجوئی ءَ پچ گرگ ءَ سوبین بنت۔ زیردستیں راجانی راجدپتر ءُ آجوئی ءِ سپر اے شون ءَ دنت کہ ہچ راج ابیدء کُربانی ءُ مھکمیں گہگیری ءَ دری زورگیراں چہ وتی ڈیھ ءَ کشگ ءَ سوبمند نہ بوتگ۔ ویتنام ءِ آجوئی جھد ءِ تہ ءَ لکانی کساس ءَ کُربانی دیگ ءَ رند ویتنام ءِ مھلوک وتی ڈیھ ءِ وتواجہ بنت۔ ہمے پیم ءَ برطانیہ ءِ زوراکی ءِ بگیری ءَ ھندستان ءِ مھلوک ءَ جتائیں وھد ءُ باریگاں پہ وتی ڈیھ ءِ پہازگ ءَ سیاسی جہد کتگ۔ ھندستان ءِ جھد ء آجوئی ءِ مزن نامیں کارست گاندھی ءُ بہ بیت یا بگھت سنگھ ءِ کربانی ءُ سبھاش چندر بوس ءِ انڈین نیشنل آرمی ءِ جوڑشت تچک ءَ اے ھبر ءِ شون ءَ دیے اَنت کہ ابید ء گہگیری ءُ کُربانی ءَ ہچ راج آجو بوت نہ کنت۔

گلیں بلوچ راج،

14 اگست1947 ہما سیائیں روچ انت کہ برطانیہ دین ءُ شدت پسندی ءِ نامءَ پہ وتی نپ ءُ سیتانی رک ءَ ھندستان ءَ بھر ءُ بانگ کنت ءُپاکستان ءِ ڈولیں ناشریں استانے جوڑین ایت۔ بن اسل ءَ اولی ءُ دومی جھانی جنگانی میان ءَ برطانیہ ءَ ھوار بازیں زورگیر چہ جنگ ءِ نُکس ءُ تاواناں نزور تر انت ءُ وتی نوآبادیاتاں گیش زیردست کنگ ءِ تاگت ءَنہ دارانت ۔ برطانیہ ءِ اولی ءُ دومی جھانی جنگانی میان ءَ نزور ترگ ءُ انڈیا ءِ تہ ءَ سیاسی ءُ پر ایمنیں گہگیری ءَ ھوار سلاہبندیں جُھد ھندستان ءِ آجوئی ءِ راہ ءُ دراں گیشین انت۔ 1945 ءَ دومی جھانی جنگ ءِ ھلاس بوگ ءَ رند ،برطانیہ چہ ھندستان ءَ در آھگ ءِ چن ءُ لانچاں بندات کنت بلے برطانیہ اے دمگ ءِ تہ ءَ یک انچیں استانے جوڑینگ لوٹیت کہ آ سرجم ءَ برطانیہ ءِ جھگیری ءَ کُت بہ کنت۔ ھندستان ءِ سر ءَ 190 سالءِ زوراکی ءِ میان ءَ برطانیہ ءَ جتائیں راجانی نپسیات پہمتگ اِتگ اَت ءُ پنجاپی ہما راج اَت کہ برطانیہ ءِ گلامی ءَ منگ ءَ تیار اَت۔ پہ وتی نپ ءُ سیتانی رکینگ ءِ ھاتر ءَ برطانیہ چہ ھندستان ءَ در آھگ ءَ پیسر دین ءُ شدت پسندی ءِ نام ءَ پنجاپی راج ءَ استانے جوڑین ایت۔ پاکستان ءِ گوستانک ءُ پنجاپی راج ءِ دپتر شاھد انت کہ پہ پاکستان ءِ جوڑشت ءَ آہاں ترمپے ھون وتی جاہ ءَ مردمے ہم زِندانیگ نہ بوتگ۔

باسمائیں بلوچ راج

14 اگست 1947 ہما روچ انت کہ زورگیریں برطانیہ ءِ دست چیری ءَ یک انچیں استانے جوڑینگ بیت کہ ناں تہنا زورگیریں تاگتانی نپ ءُ سیتانی سرجم کنگ ءِ یک سلاہے بلکیں اے تیوگیں دمگ ءِ راجانی واستہ ھترہ یے زانگ ءُ پہمگ بیت۔ پاکستان چہ وتی جوڑشت ءِ بندری روچاں بگر داں روچ ء مروچی پہ وتی دروگیں ھستمانک ءِ رکینگ ءَ ناں تہنا زیردستیں راجانی لُٹ ءُ پل ءَ کنگ ءَ انت بلکہ ہمے لُٹ پل ءِ بگیری ءَ پاد اتکگیں راجانی چکچینی ءَ ھم کنگ ءَ انت۔ بلوچستان چہ وتی گران بہائیں مادن ءُ مڈیانی سوب ءَ زورگیریں پاکستان ءَ ھوار تیوگیں جھان ءِ مزن تاگتانی نشانگ ءَ بوتگ ءُ ہست انت ءُ زورگیریں پاکستان بلوچ گلزمین ءِ سر ءَ جھان ءِ مزن تاگتانی نپ ءُ سیتاں سرجم کنگ ءِ ھاتر ءَ بلوچ راج ءِ ھید ءُ ھون ءِ نھاد ءَ گرگ ءَ اِنت۔

گلیں راج،

بابا ھیر بگش مری پاکستان ءِ جوڑشت ءِ درگت ءَ درائینیت “ پاکستان ڈنی سامراجی تاگتانی کچھڑی یے بزاں کہ ایندگہ راجانی پیم ءَ پاکستان راجی گہگیری ءِ وسیلہ ءَ آجو نہ بیتگ بلکیں چہ بندر ءَ پاکستان ءِ جوڑشت ءِ تہ ءَ ڈنی سامراجی تاگتانی دست مان بوتگ۔” پاکستان ءِ 79 سال ءِ بندپتر  بلوچ راج ءَ ھوار ایندگہ زیردستیں راجانی سر ءَ زلم ءُ زوراکی ءِ گوستانک انت۔ 14 اگست 2013 ءَ بی ایس او آزاد ءِ بنجاہی کارگشاد شہید رضا جہانگیر ءُ بی این ایم ءِ دمگی راھشون شہید امداد بجیر ءِ سر ءَ ماں کیچ ءَ پوجی اُرش ءُ شہادت اے ھبر ءِ شون ءَ دنت کہ پاکستان ءِ دروگیں ہستانک ناں تہنا پہ بلوچ راج ءَ ھترہ یے بلکیں اے دمگ ءِ تیوگیں استانانی واستہ کھرے۔ بلوچ راج ءِ واستہ 14 اگست سیاہیں روچ ءِ بستارے داریت ءُ بلوچ راج اے روچ ءَ پاکستان ءِ زوراکی ءِ ویلاں یات بہ کنت ءُ وتی مچانکی یاداشتانی بھراِش بہ کن انت۔ 14 اگست ءَ وشی ءُ شاتکامی ءِ روچے سرپدبوگ گوں بلوچ راج ءَ دگا ءُ بلوچ راج ءِ سر ءَ زوراکیءِ تہ ءَ پاکستان ءِ ہمکار بوگ ءِ منانک انت۔