”اے روچ پہ بلوچ راج  ءِ دوبر آجوئی ءَ اہد ءُ پیمان ءِ روچ اِنت “

شرپداریں بلوچ راج،

جھان ءِ بندپتر اے شو ن ءَ دنت کہ کسان ءُ نزریں راجانی  سرءَمدام دری زورگیرانی چم سک بوتگ اَنت ءُ جھان ءِ مزنیں راج ءُ استاناں مدام پہ وتی راجی نپ ءُ سیتانی سرجم کنگ ءَ نزور ءُ کسانیں راج ایردست کتگ اَنت ۔اے  راستی یے کہ بنی آدم ءِ دپتر چہ نزور ءُ زیردستیں راجانی ٹپاں پُر اِنت بلے بنی آدم ءِ گوستانک ،چہ دری زورگیرانی  بگیری ءَ گہگیری ءِکسہاں چہ ہم زبہر نہ ات ۔زیردستیں راجانی راجدپتر شاھد اِنت کہ بدواہ ءُ دری زورگیرانی بگیری ءَ پاد اتکگیں راجاں وتی راجی شرپ ءُ پجار رکینتگ ءُ ہزاراں سرانی کُربان کنگ ءَ پد زیردستیں راج چہ دری زورگیرانی سانکلاں درآھگ ءُ جھا ن ءِ تہ ءَ وتی پجارءُ بستارے رکینگ ءَ سوبین بوتگ اَنت۔

بلوچ گلزمین ءِ وارساں،

بلوچ راجدپتر ہم چہ دری  زورگیری ءِ ویلاں زبہر نہ اِنت۔بلوچءِ مال ءَ مادناں ھوار بلوچ ءِ زِر مدام دری زورگیرانی نشانگ ءَ بوتگ کہ  شانزدہمی کرن ءَ زورگیریں پرتگیزی بلو چ ءِ زر ءَ زیردست کنگ ءِ نیت ءَ کاینت بلے بلوچ  ءِ نرمزاریں پسگ  پہ وتی ماتیں گلزمین ءِ رکینگ ءَ چہ وتی ساہ ءُ سرانی کُربان کنگ ءَ چک ءُ پد نہ بنت ءُ زورگیراں چہ وتی ڈیھ ءَ در کشگء َ سوبین بنت ۔ہمے پیم ءَ اردیں زورگیریں انگریز برصغیرھند ءَ زیردست کنگءِچن ءُ لانچ ءَ بندات کنت گڑا بلوچ  گلزمین ہم زورگیریں انگریز ءِ نشانگ ءَ بیت۔1839 ءَ انگریز سرکار گوں وتی پوجی لشکرءَ قلات ءِ سرءَا ُرش بندیت بلے خان ء قلات میر مھراب خان پہ بلوچ  راجی شرپ ءُ پجارءِ رکینگ ءَ مرگ ءَ شرپے لیک ایت بلے دری زورگیر ءِ دیمءَ چم جہلی ءَ پہ وت بے شرپیءُ گوں بلوچ گلزمین ءَ دگائے سر پد بیتءُ جنگجاہ ءَ وتی ساہ ءَ پہ بلوچ گلزمین ءَ ندر کنت۔

شھیدانی زگریں ھون ءِ رندگیراں،

1839 ءَ زورگیریں انگریز ءِ  بگیریءَ میر  مھراب خا ن ءِ گہگیری بلوچ راجدپتر ءِ تہ ءَ نوکیں درےپچ کنت۔بلوچ راج جتائیں پڑاں انگریز ءِ زوراکی ءِھلاپ ءَ گہگیری کن انت ءُ کساس 108 ءِ زیردستی ءَ پد بلوچ گلزمین چہ انگریز ءِ سانکلاں آجوبیت ءُ 11 اگست 1947 ءَ آزاتیں استانے بستار ءَ زانگ دیم ءَ کئیت۔ ریاست ءقلات ءِ نواب میر احمد یار خان 11 اگست 1947ءَ گوں بلوچ راج ءَ  ہم کلام بیت ءُ درائینیت کہ من گوں شما مروچی بلوچی ءَ ھبر کناں ءُ دیمتر ءَ ہم گوں بلوچ راج ءَ وتی ماتی زبان ءَہم کلام باں ۔11اگست ءِ بلوچ استان ءِآجوئی ءَ رند بلوچ راج وتی استان ءِ مھکم کنگ  ءُ بلوچ استان ءِ انتظامی کارانی منظم کنگ ءِ چن ءُ لانچاں بندات کنت۔بلے دین ءُ شدت پسندی ءِ نام ءَ نگریز ءِ جوڑکتگیں نوکیں استان ، پاکستان ءِ بدیں چم بلوچ گلزمین ءَ سرءَ سک بنت ۔

باسمائیں بلوچ راج،

اے دمگ ءِ تہ ءَ انگریز ءِ جوڑ کتگیں بد تہذیبیں پاکستانبلوچ راج ءِ مادن ءُ مڈیاں زیردست کنگ ءِ نیت ءَ بلوچ استانءَ گوں پاکستان ءَ ھوار کنگ ءِ چن لانچ ءَ بندات کنت ، جناح کہ آجوئی ءَ پیسر استان ء قلات ءِ وکیل بیت ہمے درگت ءَ لہتیں نام نہادیں ءُ زرواریں بلوچ سرداراں کراچی ءَ لوٹائین ایتءُ بلوچ گلزمین ءَ گوں پاکستان ءَ ھوار کنگ ءِ پندل سازیت۔استانء قلات ءِ قانون ساز اسمبلی بزاں کہ  ایوان ء بالا ءُ ایوان ء زیریں  زورگیریں پاکستان ءِ اے شوربندی ءَ پہ بلوچ گلزمین ءُ بلوچ راجءِ ھستانک ءَ ھترہ ءِ لیک اَنت ءُ پاکستان ءِ گوما بلوچ گلزمین ءَ ھوار کنگ ءِ ھلاپ ءَ مھمےبندات کن اَنت ۔قلات اسٹیٹ نیشنل پارٹی  ءِ راھشون ءُ میر احمد یار خان ءِ برات آغا عبدلکریم خان وتواکیں بلوچ استان ءِ ھک ءَ بنت بلے 27 مارچ 1948ءَ  پاکستان ءِ پوجی لشکر بلوچ گلزمین ءَ تپنگ ءِ زور ءَ زیردست کنت  ءُ ہمے زیردستی ءِ بگیری ءَ بلوچ راج داں روچء مروچی پہ بلوچ گلزمین ءِ دوبر آجوئیءِ راجی جنز ءَ یکشلہ جھد ءَ اِنت ۔

راجءِ گلیں بانداتاں ،

11اگست بلوچ راجدپتر ءِ ہما رژنائیں روچ اِنت  کہ بلوچ راج چہ 108 سال ءِ گلامی ء ِسانکلاں آجو بیت۔اے روچ پہ بلوچ راج ءِ دوبر آجوئی ءَ اہد ءُ پیمان ءِ روچ اِنت ، کہ بلوچ راج ناروائیں پاکستان ءِ زیردستیءَ ہچ وڑءَ  نہ منیت ءُ ،پہ بلوچ راجی آجوئی ءَ نمیران بوتگیں پسگانی ھون  دوبر رنگ کار انت ءُ مئےمہکمیں سِتک ءُ ایمان اِنت کہ گوں یکشلیں جھد ءَ ما دوبر وتی ڈیھ ءَ چہ زورگیریں پاکستانءَ آجو کنیں۔مئے ھستیں راجی آجوئی جنز مئے باندات ءِراہ ءَ گشین ایت۔بلوچ  راجی آجوئی جنز ءِ ھستیں مھکمی بانداتیں بلوچ استان ءِ توانائی ءِ مانزمان بیت کنت۔باسمائیں بلوچ ورنا بلوچ راجدپتر ءِ ویلاں گوں ہورتی ءَ وانگ ءِ جھد ءَ بہ کن اَنت ءُ  بانداتیں استان ءِ  جوڑشت ءُ مھکمی ءِ  ھاتر ءَ   ھستیں راجی آجوئی جنز ءَ گیش تاگتور ءُ مھکم بہ اَنت ۔