افسانہ – ہشت جون

نوشتکار: محراب بلوچ

اینو نا نن آسمان آ رژن ئنا چٹ جتاؤ ندارہ اس ئس۔ آسمان اندن رژنا ئس کہ ہرا وڑ ای اودے چانڑدہی آ نن تیٹی طوبے نا بھلا رژن ئٹی ہم خنتویسٹ۔ اِستارک اندن بِلبلارہ دنکہ شیشہ ئسے آ دے ئنا برانز آک تمسا روشنائی ءِ تالان کیر۔ دا اندنو ندارہ اس ئسک کہ ای دنو ندارہ آسمان ئٹ وختی خنتویسٹ۔ اندن لگاکہ کہ اینو آسمان نا زی آ فطرت نا کُل رنگ آک اسہ آٹی ٹی بند ڈغار آ کس ئتو ہمکلام ءُ۔ دا اندنو ندارہ اس ئس کہ ہرا انسانی تصور آتیان پیشن ئس ہرا لوز آتیٹ بیان مننگ کپک۔ ولے انداخہ پاؤ کہ آسمان آ جوڑوک طوبے و استار تا آٹی بندغ تا آٹی نا دروشم ئٹ ئس، کہ ہرا ڈغار آ کس ئتو فطرت نا زبان ئٹ ہیت کرسا بشخندہ ئس۔ داڑان زیات کنا مِلی ہچ ارفنگ الئو۔

ای اندا شش و پنچ ئٹ تمنگ ئسوٹ کہ دا ندارہ راستی ئٹ اف بلکہ دا کنا خیالی آ جہان ءِ کہ ہرانا تہٹی پُترینگ تون کنا ہوش ئنا مہار کنے آن کاہک۔ ولے راست دُن الئو، بلکہ راست اندا ئس کہ آسمان آ فطرت نا رنگ آتا اسہ آٹی ئس جوڑ ءِ ہرا ڈغار ئنا زی آ کس ئتو بشخندہ ءِ۔ دا ندارہ اندن زیبا ئس کہ ہرادے سیل کرسا جہان نا ایلو کل رنگ آک یخ تفیسر، و اندنو چُپی اس تالان ئس کہ کس پئے اشرف المخلوکات نا ہچ وجود اف، اندن گمان ارفیکہ کہ جہان ئٹ بیرہ فطرت نا رنگ آک ءُ پین ہچو دنو گڑاس وجود تخپک کہ ہرانا روتہ غاک بندغی وجود آ سر مریر۔ نہ چُک ئسے نا توار ئس، نئے کہ جُوجک ئسے نا ژونگارہ، نہ اسہ حیوان اس خننگ ئٹ بسکہ نئے کہ بندغ آتا توار توار ئس۔ اسہ اندنو چپی اس ئسک کہ کس پئے ہر بندغ دا ندارہ ءِ سیل کرسا یخ تفینے۔ تہو تیٹی چِرک الئو، درخت آتا ٹول آک ہڑدے نا وڑ حرکت کتورہ۔ دا اندنو رژن اس ئسک کہ ہرا مَست آ سیسو تے گوڑیفیسس، ہمو سیسوک کہ ہرا طوبے نا رژن اکن گوہی کُنیرہ، ولے اینو ہموفک ہم حیران ہبکہ دا ندارہ ءِ سیل کرسا ئسر۔ ہمو پِرک آک کہ ہرافتے ہنوئی ئس شمع ئسے آ فناء مروئی ئس، ولے اوفک ہم اینو نا نن دا ندارہ نا دیدار ءِ کرسا ئسر۔ آسمان آ جوڑوکا ندارہ نا خننگ آن گڈ ڈغار نا زی آ وجود تخوکا ہر گڑا حیران و ہبکہ ئس۔ نن تینا گڈی پاس آتیٹ ئس، گڑاس ساعت آن گڈ ساف ئنا وخت تمنگ ئس۔ ولے داسکان ہچو دنو احساس اس ودی مننگ الئو کہ ای سرپد مروسٹ دا آسمان ڈغار آ دیر تو ہمکلام ءِ۔ ای اندا احساس ءِ تینا تہٹی پٹسا تینا مِلی ءِ چومبیسہ ئسوٹ۔ مدان مدان آ ساف ئنا وخت بننگ ئس۔ آسمان آ جوڑوکا ندارہ ہم روشنائی آن گڈ مدان مدان آ ایسر مرسا ئس۔ ولے انگہ کنا مِلی داسکان دنو خیال اس ودی کننگ الئو کہ ہرا خیال راستی ئٹ کنے دا ندارہ ءِ پہہ مننگ آ کمک کروس۔ داسہ شام ایسر مسوسس، دے ٹِک ترسا مہردار نا زی آن پیشن مننگ ئس۔ آسمان ساف مسوسس، تہو تا چِرک آک چرخ کرسا درخت آتیان پن آتے بٹسا ئسر۔ چلتن نا ککو تا ہم توار توار ئس۔ سیسوک ہم سہب ئنا پدین آ گہوش ئٹ بال خلکرہ۔ پِرک آک رژن ئنا چراغ آتا رند ئٹ پند ءِ بناء کریسر۔ ای ہم تینا سار ئٹ ئسوٹ۔ شار ئنا نیمہ غان بندغ تا توار توار کنا تہٹی بندغی وجود نا احساس ءِ ہم ودی کریسس۔ ولے ای داسکان استو نا نن ٹی آسمان آ جوڑوک ہمو ندارہ نا بابت سرپد مننگ الئوٹ۔

خیر ہراتم ای تینا جند آن تینا دا ملاسی ءِ ٹمبہ کننگ کتوٹ، گڑا ای ہمو بُٹ آن بش مرسا تینا خلق ئنا نیمہ غا اناٹ کہ ہرا بُٹ آ ای استو نا سے زنڈوک ئسوٹ۔ ای کسر ئٹ اندا خیال آتا تہٹی ئسوٹ کہ بلکہ کسس کنے دا ندارہ نا بابت راستی ءُ سرپنداری اس ایتے تاکہ ای ہمو ندارہ ءِ ہمو احساس ءِ تینا تہٹی ودی کننگ کیو۔ ولے خلق آ سر مننگ تون کس دنو بندغ اس الئو کہ ہرا کنے گڑاس سرپدی تروس بلکہ خلق ئٹ کس دا ندارہ نا دیدار ءِ کننگ کتوسس۔ ای خلقی تیان نا اُمیت مرسا تینا وتاخ نا نیمہ غا سر الکٹ، ای کسری ئسوٹ کہ کنتو مون پہ مون چنکو ٹولی اس لگا ہرافتا دو تیٹی گڑاس عکس ئسر، دا ٹولی نا مون ٹی نیاڑی و چناک ئسر و رند ئٹ تا منہ ورنا، ٹکر اس مُر گڑاس پیر و کماش ہم اندا ٹولی تون اوار ئسر کہ ہرافک ترند گام خلنگ کتورہ اندا سوب آن او مچے مُر سلیسسر۔ دا کل چنا تا پیشانی آ مون ءُ چِٹ تفوک ئس و دافک تینا باہ تے ہم اندا چِٹ آتیٹ بند کریسر۔ بھاز آ چنا تا دوک خیر نا زِیلہ غا تفوک ئسر۔ اندن نیاڑی تا دو تیٹی ہم اندا عکس آک ئسر و اوفتے مون آتئے اندنو چُپی اس تالان ئس کہ ہرا بھاز بھلو دڑد ئسے نا درشانی ءِ کریکہ۔ پیر انگاک ہم شپاد آ نت تون عکس دوٹی دا کاروان تو ہمرہ ئسر۔ ای دا لمہ غاتہ مون آ تفوک دڑد ئنا دیوال ءِ خنسا دافتون اوار مسوٹ و اندن چُپی ئٹ دا کاروان نا ہمراداری ءِ کرسا کریٹ۔ ای تینتو اوار اسہ ورنا ئسے سوج کریٹ کہ ”دا بندغ آک دن عکس دوٹی چُپ چُپ روان ءُ دا ہرانگ اِنسا ءُ؟“ ورندی ئٹ ورنا پارے ”دا ہمو ورنا تا خاہوت آک ءُ ہرا ورناک کیہی سال آتیان زندان تا گواچی مسونو و اینو ”ہشت جُون“ ئنا دے ءِ کہ ہرادے بلوچ بیگواہ غا مڷ آتا پِن آ کننگانے۔ اندا سوب دا برانز اوفتیکن پیش تمانے نوا اوفتے انصاف دو برے۔“ دا ورندی آن گڈ یکدم ای ولدا سوج کریٹ کہ ”دا برانز ئٹ ہچو دنو نارہ اس لگنگ اف کہ ہرا زوراک آتے اسکان نما توار ءِ سر کے، دا برانز اٹ ساڑی آ بندغ آک کُل چُپی ئٹ روان ءُ۔“ ورنا ورندی ترسا پارے ”دا خاہوت آک دا دہ و پانزدہ سال ئٹ تینا مڷ آتیکن انداخہ کوکار کرینو کہ داسہ دافتو دونو لوز اف کہ ہرافتا اداہی ءِ کرسا اوفک انصاف خواہنگ کیر۔ ہر ہمو لوظ ہرا عدل، انصاف و برابری کن ادا مریک او دا کل لوز آتے تینا کوکار آتیٹ بھاز وختی ایسُر، ولے اوکان بیدس ہم ہچ متو۔ داسہ دا خاہوت آک بے توار ءُ برانز کننگ ءُ، ہرافتا توار ہچس کننگ کتو بلکہ چُپی تا گڑاس کننگ کہ۔“ دا ورندی تیان پد ای ہم چُپ مسوٹ و مستی گام خلسا کریٹ۔ گڑاس ساعت ان پد دا برانز ایسر مس۔ چنا و نیاڑیک اندن بے توار تینا اُرا تا نیمہ غا سر الکُر۔ پیر و کماش آک نا اُمیت مرسا شپاد آ نت تون خڑینک خلسا ننے رخصت کریر۔ ورناک ہم تار تار مرسا ہرکس تینا کسر ءِ ارفسا اِنا۔ ای تینا کسر ءِ ارفسا تینا وتاخ نا نیمہ غا سر الکٹ۔

وتاخ ئٹ جوڑوک شِنزی آ شَنکی ئٹ تولوک ای استو نا ندارہ نا خاکہ اس تینا مِلی ئٹ جوڑنگ ئسوٹ۔ ولے َنکی نا تہٹی ہفت رنگی ءُ تتلی ئسے نا بال آک کنا خیال آتے پدا پرغسا ئسر۔ ای ساعت اس پدا تینا خیال آتیان پیشن مرسا دا تتلی ءِ سیل کننگ ءِ بناء کریٹ۔ تتلی کنا داریرہ غان بال کریکہ وا زنڈاکہ۔ ای ہرا اضطراب ئٹ تمسا اندا گمان نا گواچی مسوٹ کہ بلکہ دا تتلی تون طوبے نا بشخندہ نا راز ءِ۔ او او راست ہم اندن ئس۔ فطرت نا ندارہ ءِ فطری آ زبان ئٹ دا تتلی کنے پو کننگ کن بسوسس۔ دا تتلی تینا زبان ئٹ بلکہ اندا پاننگ ئس کہ استو طوبے ہمو تہار آ کوٹی تا روشندان آتیان ہمو پروانہ غاتون بشخندہ ئس کہ ہرافک کیہی سال آتیان ہمو تہار آ کوٹی تا گواچی مسونو۔ ہمو پروانہ غاک ہرا طوبے نا رژن آ سر مننگ آن مُست تہار آتا گواچی مسونو، اینو ہموفتا دے ءِ و طوبے تینٹ اوفتو بشخندہ ءِ۔ او تتلی دن ہم پاننگ ئس کہ دا پانزدہ پانزدہ سال ءِ تہار آتیٹ ڈَک کننگانو ولے دا پروانہ تا تہٹی داسکان رژن آ فدا مننگ نا جنون زندہ ءِ۔ ہان! تتلی راست پارے۔ او پروانہ تا تہٹی رژن ئنا جنون زندہ ءِ کہ او طوبے تون ہمکلام ءُ۔ تتلی نا دسکان چرخ آک ئسر، ای استو طوبے ءِ بشخندہ خننگ نا راز ءِ دوئی کریسٹ۔ ای پو مننگ ئسوٹ کہ استو طوبے زاکر جان تون ہمکلام ئس۔ او استو طوبے ہمو کل بے پِن آ بامڑد آتو بشخندہ ئس کہ ہرافک اندا پِنی آ کسر نا مسافر مسونو۔ او استارک ہموفتون دیوان کریرہ ہرافک مزل نا کسر ءِ شون ترسا کاروان ءِ گدریفیر و جند آک تا ہموڑا سلیسر۔ تتلی نا گڈیکو بال ئس۔ ہراڑتون گڈی حوال ہم اندا ئس کہ دا لمہ غاتا چُپی تینا چنا تا پدا بننگ کن اف بلکہ دا چُپی مزاحمت نا گڈیکو ہمو کوکار ءِ کہ ہرا دا ڈغار نا آجوئی نا درشانی ءِ کننگ ءِ۔ داڑتون اوار تتلی تینا ہفت رنگی آ پرہ تے ملسا آسمان کن مون کرے۔ ای پدا ہمو شَنکی ئٹ تینتو مون پہ مون مسوٹ۔