بلوچستان پریوینشن آف ڈیٹینشن اینڈ ڈی ریڈیکلائزیشن ایکٹ 2025 بلوچ پُسّگانی گارءُ بیگوائی  ءِ گیش ودینگ ءَ کانود ءِکالونئیل رپکے

بلوچستان ءِ تہا گار ءُ بیگوائی داں دھکّاں یک اندوہناک ءُ دْراجکشیں زوراکی یے کہ زوراک ءِ نیمگءَ چہ ھَمک روچی ئیںداد ءِ پئیمءَ بلوچ راج ءَ را دیگ بوھگءَ انت۔ اِے وھدءَ کِساس چُشیں ھچ ھلک ءُ شھر، دمک ءُ در پَشت نہ کپتگ کہ آوڑے نہ وڑے ءَ چہ اِے اِستانی شوربندی ءَ سانمند مہ بنت۔ اِے کارپدءِ تہا اِستان ءِ ھمُک ادارہءِ بھر وڑے نہوڑے ءَ ھوار انت بَلے آمید گس یا جُتائیں وتگڑیں کمیشناں گار ءُ بیگوائی ءِ اِے مزنیں بنی آدمی گپچل ءِ گاجیل کنگ، نزورکنگ، گار ءُ گُمسار کنگ ءُ پندلانی وسیلہ ءَ چہ ایشی ءِ پادچوپ کنگ ءِ بلائیں جھدے۔ اِے پدْریں راستی یے کہ بلوچچُکچینی ایوکءَ داں لھتے ادارہ ءُ مردُماں مھدود نہ انت بلکیں پہ بلوچ ءَ اے کبزہ گیریں اِستان ءِ پادمالی ءُ دمتوس کنگ ءِھاسیں ساچِتگیں شوربندی یے کہ بلوچ  ھمیشیءِ سانکلاں گوں گُٹگیر کنگ بوھگءَ انت۔

انوگیں وتگڑیں سرکار کہ پہ گارءُ بیگوائی ءَ لانکبند انت، اے اِستان ءِ سماگو بوھگ ءِ گنتِریں درور انت۔ وتگڑیں سرکار گار ءُبیگوائی ءَ را تضادے جوڑ کنگ لوٹیت پمیشکہ بازیں اِستانی جھگیر گار ءُ بیگوائی ءَ را برے درمُلکاں روگ جِندءِ ٹَپّگ، برےزرمبشتءِ دیمداری ءُ برے ناشرکاری ءِ دابیں وت ساچیں گُپتمان ءُ اِسپانکاں گون ہمدپ کنگ ءَ چہ جیڑہ ءِ راستیںدْروشُمءَ اندیم کنگ لوٹ انت۔

5 جون 2025 ءَ بلوچستان ءِ وتگڑیں سرکار بلوچستان پریوینشن آف ڈیٹینشن اینڈ ڈی ریڈیکلائزیشن ایکٹ 2025 ءَ دیمءَ کاریت۔ اے ایکٹ ءِ ردءَ ھمک ھما مردم ءِ سرا کہ شُبین کنگ بیت بیدء دگہ ایف آئی آر ءُ چئیزے ءَ آ مردم ءَسرکاری ادارہ گِپت ءُ بُرت کن انت ءُ داں 3ماہ ءَ بیدء گْواہءَ گون وتے داشت کن انت۔ گِپتگیں مردُم آمیدگِس ءَبَرگءَ ابید ڈی ریڈیکلائزیشن ءِ نامءِ سرا ڈیٹینشن سینٹرز ءَ دارگ بیت۔ اودءَ تیوگی ءَ گْواہ ءِ بوھگ ءِ زلورت ھم نیستانت۔ کانود اے ھبر ءِ درشان ءَ ھم کنت کہ گِپتگینءِ ھاندان ءَ را بیست ءُ چار کَلاک ءِ تہا دزگیری ءِ ھال سر کنگبیت، سرکار ھمے منانک ءَ دیم ءَ آرگ ءَ انت کہ چہ اِے راھبندءَ گارءُ بیگوائی ءِ جئیڑہ ھلاس کنگ بیت بلے راستی ایشیءِ چَپ انت۔ اے کانودی راھبند گار ءُ بیگوائی ءِ نوکتِریں ءُ ھترناکتریں دْرشماں چہ یکے کہ کہ اے روکیں آچءَ را گئیشپیٹرول دْرانزیت ءُ گار بیگوائی ءِ اِے دْرچءَ را گئیش دْراجکش کنت۔ استیں وھد ءَ گار ءُ بیگوائی ءِ تہا آتکگیں اِے تْرندیءِ پژدر ءَ ھمے کانودءِ عملدرآمدی انت (اے راھبندءَ پیسر اوں بازیں بلوچ فرزِندے گارءُ بیگواہ کنگ بوتگ بلے نوں اےدر کانودی کُرتِنءَ کانودے ءِ جوڈ کنگ اے درکانودی کارءَ گئیش وَدّئینگ ءِ نام اِنت) کہ ھُمک روچی ئیں بُنیاتءَبلوچستان ءِ جُتائیں جاہاں بیدء جُست پرسءَ، بید ء گِر دارءَ بلوچ بچّ کہ آھانی تہا ورنا، کماش، تِپل، زالبول ءُ معزور تکاوں ھوار انت، مزنیں کَچّےءَ گِرگ ءُ بندیگ کنگ بوھگ ءَ انت کہ ایشانی تہا بازینے ءِ مردم دزگیری ءِ درگت ءَ ھچگْوشگ نہ بنت ءُ بازینے درآمدگِسی سَلاہاں چہ کُشگ ءُ چگّل دئیگ بیت۔

بلوچستان پریوینشن اف ڈیٹینشن ائینڈ ڈی ریڑیکلائیزیشن ایکٹ بلوچ چُکچینی ءِ در ءِ تہا  گئیشی آرگ ءِ نوکیں کانودیچالے۔ اے گوں چینءِ ڈی ریڈیکلیزیشن ایکٹXinjiang Uyghur Autonomous Region Regulation on De-extremification 2017 ءَ سیادی داریت کہ چین مُسلماناں چہ اسلامی طرزِ زندگی چُشکہ نام ءِ ایرکنگ،ریش ءِ دارگ، برقعہ ءَ بوھگ، گْوشتانک دئیگ ءِ دابیں شئیاں دور داریت ءُ مجگی ردءَ سانمند کنگ  ءِ ھاترا کارمرد کنگبیت۔ اِے کانود ءِ ھلاپ روگءَ شہ آ مردُم گِرگ ءُ بندیگ کنگ بیت ءُ اود ءَ آ ھیلکاری کاریچے ءَ شہ گْوازئینگ بیت۔ھمے وڑ ءَ بلوچستان پریونشن اف ڈیٹنشن ائیند ڈی ریڈکلائیزشن ایکٹ ءِ مول بندیگی ءِ سے ئیں ماہانی تہا بندیگءِ ڈیریڈیکلز کنگ ءِ ھاترا آ ھیلکاری سینٹرزءَ رَوان دئیگ بیت دانکہ اُود ءَ آئی ءِ مجگءُ پگرءَ مَٹ کُت بہ کن انت۔ پہ اےکارءَ  ڈیٹینشن سینٹرز اوں جوڈ کنگ بوتگ کہ اُود ءَ بندیگ بلائیں مجگی ءُ جسدی تشدد ءِ چکاسے ءَ چہ گْوازئینگ بنت۔ آ پہراجکاری چست ءُ ایراں دزکَش بوھگ، بنی آدمی اُگبالانی پامالی ءِ رِدءَ بےتْوار بوھگ، بلوچ ءِ پجار ءِ رکئینگ ءُ رژنِکندیل ءِ تالان کنگءِ چست ءُ ایراں شہ دور بوھگ ءُ دْرستان چہ گئیش اِستان ءِ نارئیٹو ءِ دیم ءَ سرءِ جہل کنگ ءُ منّگ ءَپہ زور دئیگ بنت۔ ھمے کانودءِ ردءَ نہ ایوکءَ بندیگ کنگ ءِ اَمل ھوار انت بلکیں بندیگاں اِستانی ڈانچہ ءِ رِدءَ کاربندگ،بندیگانی ھانداناں پہ پریس کانفرنس ءِ وسیلہ لاتعلقی ءَ بے وس کنگ، بندیگاں اوں وتگَڑیں اِسکرپٹ ءِ ردءَ پریس کانفرنسءِ پرماھگ ءُ پدا بندیگانی جنّگ ءُ چگل دئیگ ءُ وتی کار ءِ منارئینگءَ پہ ترس ءِ فارمولہ ءَ کامرزگ،  ھم ایشی ءِ مکسداںھوار اِنت۔

اِے کُلّانی مول یک ءُ تچک انت: بلوچ ءِ آجوئی زرمبشتءَ را نزور کنگ ءُ ھلاس کنگ ءُ بلوچ راج ءِ تہا استان ءِ وتیمجگ ءِ نندارئینگ انت۔ مارا اِستانی ھک دابیں رِپک ءُ ہنراں چہ ساجو بوھگ ءُ آھانی دیمداری ءِ ھاترا وتی بھرشتھوار گیجگ انت۔ مارا پہ اِے سما بوھگ الم انت کہ اِستان بلوچ ءِ اَستانک ءَ مَٹ کنگ ءُ بلوچءَ مجگی رِدءَ پنجاپی جوڈکنگ ءَ چہ دھکّاں جھدءَ انت بلے اِے بلوچ نمیران بوتگیں ءُ زندان ءَ بندیگیں سرانی گہگیری ءِ برورد انت کہ مروچی بلوچوت ءَ چہ نہ سِسّتگ ءُ نہ سِدّیت ھم بلے پہ اےِ ھاترا مارا بلوچ دژمن ءِ ھم کاؤنٹرانسرجنسی ءِ شوربندیانی سرا ھئیال گْورکنگی ءُ پہ جھد ءَ کِشک شوھازگی اِنت۔