گوں  چاگے ءِ جاہ منندیں بلوچ نودربرتوکل بلوچ ءَ 28 مئی ویل

ءِ درگت ءَ جُست

شولان بلوچ: اے ایٹمی تراک ءَ پد مردمانی سر ءَ نفسیاستی سان چون اَنت؟

توکل بلوچ:بنی آدم ءِ دودمان ءِ دیمروی ءِ گوستانک چہ زوراکی ، جنگ ءُ جدل ءُ بُنکی انسانی ھکانی لگت مالی ءَ زبھر نہ اِنت۔بنی آدم کہ مرچگیں اے تیزگام ءُ دیمروی کتگیں اھد ءَ اتکگ ءُ سَر بوتگ اے سپر ءِ تہ ءَ نزور ءُ زیردستیں راجانی سرا بوتگیں زلم ءُ زوراکیانی ٹپ پِر اَنت۔بنی آدم ءِ تاریخ ءِ یک سیاہیں اھد ءِ نوآبادیات ءُ نوک نوآبادیات اِنت کہ ہمے اَھد ءَ روکپت ءِ مزنیں تاگتاں وتی سیاسی ، روزیگی ءُ لشکری قوتاں گیش توانا ءُ مھکم کنگ ءِ ھاتر ءَ جہان ءِ نزور ءُ کسانیں راج زیردست کنگ بندات کُت اَنت ءُ مرچیگیں اَھد ءِ روکپتی تاگتانی مھکمی ءُ دیمروی ءِ تہ ءَ نوآبادیات ءُ نوک نوآبادیات آنی ھید ءُ ھون ھوار اَنت۔بیستمی کرن ءِ دومی جہانی جنگ ءِ تہ امریکہ ءِ جاپان ءِ سرءَایٹمی بمبانی کارمرزگ ءَ جھانی جھت ءَ استان آنی تاگت ءِ روایتی پیمانہ مَٹ کُت، ءُ جاپان ءِ سرا ایٹمی تراک ءَ جھانی جھت ءَ ایٹمی تاگت جوڑ بوگ ءِ نوکیں ریس ءِ بِنا کُت ، ءُ ہمے استان آنی ایٹمی تاگت جوڑ ءِ سان تچک ءَ نوآبادیات آنی سرا کپت اَنت، ءُ ہمے اَھد ءَ روکپت ءِ استاناں ایٹمی تاگت جوڑ بوگ ءِ ھاتر ءَ زورآنسری نزور ءُ ایردستیں راجانی مادن ءُ زمین کارمرزگ بنا کُت۔استانانی ہمے عمل پوسٹ کالونیل ٹیکسٹ ءُ ھستیں اکیڈمیا ءِ تہ ءَ نوکلئیر کالونیلزم ءِ نام ءَ پجارگ بیت۔فرانس ءِ الجیریا ءِ تہ ءَ ۱۹۶۰ ءِ دیک ءِ ایٹمی تراک ءُ برطانیہ ءِ ۱۹۶۰ ءِ دیک ءَ آسٹریلیا ءِ زمین ءَ ایٹمی بمب ءِ تراک نیولیئر کالونیلزم ءِ مستریں درور اَنت۔۱۹۷۴ ءَ اردیں انڈیا راجستان ءِ تہ ءَ وتی ایٹمی تراک ءَ کنت گڑا پاکستان ایشی ءَ پہ وتی ھستانک ءَ شریں پالے سرپد نہ بیت کہ زرباری ایشیا ءِ تہ ءَ پاکستان ءُ انڈیا یکے دومی ءِ ھستانک ءَ مننگ ءَ تیار نہ انت ہمے درگت ءَ پاکستان ءِ سر زریر انڈیا ءِ ایٹمی تاگت ءِ جوڑ بوگ ءِ ترس ءَ ایٹمی بمب ءِ جوڑ کنگ ءِ چن ءُ لانچ ءَ بندات کنت ءُ ۲۸ مئی ۱۹۹۸ ءَ چاغی ءِ دلبند ءَ راسکوہ ءِ سرمگیں کوہانی دل ءَ پنچ تراک کنت کہ چریشی ءِ سوب ءَ چاغی ءِ زیردستیں بلوچ آبادی ہزاراں سال ءَ چہ وتی جند ءِ پِت ءُ پیروکی ھلک ءُ میتگاں در آھگ ءَ بے وس ءُ لاچار کنگ بیت ءُ ایٹمی تراک ءِ نفسیاتی سان ءَ ھوار تابکاری آنی سوب ءَ چاغی ءَ ھوار کَش ءُ گورے زیردستیں بلوچ آبادی جُتائیں نادُرائی آنی آماچ کنگ بیت کہ داں روچے مرچی ھم کینسر ءُ ھون ءِ نادُرائی(تھیلسیمیا)ءِ دروشم ءَ زیردستیں بلوچ راج ءِ چکچینی ءَ گیش کنگ ءَ اَنت۔

چاغی ءِ مھلوک ءِ سرا ایٹمی تراک ءِ نفسیاتی سان:

تبزانتی ءِ تہ ءَ ھمُک ھماعمل کہ آ انسانی روشتانی تہ ءَ بدلی ءِ مانزمان بنت آہانی الم ءَ سان انسان ءِ نفسیات ءِ سرا کپنت، ءُ ٹراما دیدانک ءِ رِد ءَ ھَمک ھما واقعہ کہ انسانی تب ءِ ھلاپ ءَ بہ بیت آئی ءِ سان انسان ءِ نفسیات ءِ سرا کپنت کہ چریشی ءِ سوب ءَ انسان چہ نامل ایں کنڈیشن ءَ در کیت ءُ نفسیاتی نادُرائی آنی آماچ بیت۔ ۱۹۴۵ ءَ اردیں جاپان ءِ سرا ایٹمی تراک کنگ بنت گڑا ہمے تراکانی ءِ سوب ءَ کساس سئے لک مردم مرگ ءِ آماچ بیت ہمے تراک ءِ وھد ءَ بچتگیں مردم کہ جاپان ءِ تہ ءَ آہاں ہباکوشا گشنت ہمے بچتگیں یا کہ ایٹمی تراک ءَ چم ءِ وت دیستگیں مردم دائمی بزان کہ داں مرگ ءَ ہمے ٹراما ءِ تہ بوتگ انت ءُ مدامی ایں انزائٹی ءِ آماچ بوتگ انت۔ چاغی ءِ دلبند ءَ ناروائیں پاکستان ءِ ایٹمی تراک کہ وتی ابرم ءِ تہ ءَ سرجم ءَ انسانی تب ءِ ھلاپیں عمل ءِ بوتگ ءُ ایشی ءَ ابید زیردستیں بلوچ راج ءِ زمین ءِ سرا زورانسری ایٹمی تراک چاغی ءِ مھلوک ءُ بلوچ راج ءِ سرا دائمی ایں نفسیاتی سان دور دیگ ءِ سوب جوڑ بوتگ۔

ایٹمی تراک ءِ سان تہنا تابکاری ءُ جتائیں جسدی نادُرائی آنی دوشم ءَ نہ بنت بلکہ تراک ءِ جند وتی تہ ءَ سک ءَ بیمناک ءُ ھترناکیں ندارگ ءِ بیت ءُ ھمے بیمناکیں ندارگ ءِ سان تراک ءَ چم ءِ وت دیستگیں یا کہ تراک ءِ وھد ءَ ساڑیں مھلوک ءِ سرا دائمی ایں ترس ءُ بیم ءِ وسیلگ ءِ جوڑ بیت۔چاغی ءِ مھلوک ءُ ھاس چھتر(راسکو ءِ کشے میتگ)ءُ رائیو(راسکو ءَ چہ کساس ۵ کلومیٹر دور ایں میتگ ءِ) ءِ جاہمنند کہ ایشاں ایٹمی تراک ءِ سوب ءَ درجہ حرارت ءِ تہ گیشی ءَ ھوار راسکو ءَ چہ دنز ءِ چست بوگ ءَ دیستگ ہمے مھلوک ءِ مجگ ءَ نقش بوتگ ءُ ایشانی ھاتر ءَ راسکو مدامی ایں ترس ءِ جوڑ بوتگ۔زیردستی بن اسل ءَ وتی تہ ءَ سرجم ءَ ھندی مھلوک ءُ زیردست ءِ سرا نفسیاتی اُرش ءِ بلے اے دابیں عمل ءُ زوراکی کہ چاغی ءِ مھلوک ءَ چم ءِ وت دیستگ کہ چوں پاکستان ءِ پوجی لشکر چھتر ءُ رائیو ءِ جاہمننداں چہ آہانی میتگاں در آھگ ءَ بے وس ءُ لاچار کنت ءُ پدا ھمے مھلوک وتی ہزاراں سالی پِت ءُ پیروکی میتگاں چہ تابکاریاں رکگ ءِ ھاتر ءَ دوبر شُت نہ کنت اے دابیں زوراکی ءُ ایٹمی تراک ءِ ندارگ چاغی ءِ مھلوک ءِ واستہ دائمی ایں بیم ءِ جوڑ بوتگ۔

تابکاریانی چاغی ءِ مھلوک ءِ سرا نفسیاتی سان:

مرچیگیں اھد ءِ درستیں سلاہاں چہ بیمناک ءُ ھترناکتریں سلاہ ایٹم بمب اِنت کہ اے سلاہ نہ تہنا ھاسیں جاہے ءَ ھاسیں مدتے ءِ واستہ تباہی کنت بگندے ایٹمی تراک ءِ سان داں کرناں ہما مھلوک ءِ سرا کپنت ءُ ہمے ایٹمی تراک ءِ تابکاریانی سان نسل در نسل ھما ھندی مھلوک ءِ جُتائیں جسدی ءُ نفسیاتی نادُرائی آنی سوب جوڑ بنت۔جسدی نادُرائی آنی تہ ءَ کینسر ءُ تھلیسیمیا ہما گچینی نادُرائی انت کہ ہمے تراک جاہ ءُ کش ءُ گورے میتگانی مھلوک ءِ تہ ءَ گندگ ءَ اتکگ انت ایشی ءَ ابید نفسیاتی سان کہ سرجم ءَ ھندی مھلوک ءَ ابنورملٹی ءِ نیمگہ برگ ءِ سوب جوڑ بنت، ہمے نفسیاتی سانانی تہ ءَ یکے تابکاریانی سوب ءَ مرگ ءِ تُرس اِنت کہ مدامی تراک جاہ ءُ کش ءُ گورے میتگانی مردماں گون بیت ہمے پیم ءَ چاغی ءِ مھلوک ءِ تہ ءَ ھم ہمے تابکاریانی سوب ءَ جُتائیں نادُرائی ءُ مرگ ءِ بیم داں روچے مرچی ھست اِنت کہ تبزانتی ءِ تہ ءَ ایشی ءَ ٹرانس جنریشنل ٹراما ءِ نام دیگ بوتگ۔ٹرانسجنریشنل ٹراما ہما ٹراما ءَ گشنت کہ نسل در نسل بزان کہ یک پدریچے ءَ چہ دومی پدریچ ءَ سر بیت ءُ ترس ءُ بیم ءِ سوب جوڑ بیت۔

ٹرانس جنریشنل ٹراما ءَ ابید چاغی ءِ مھلوک ءِ تہ ایٹمی تراک ءِ تابکاریانی سوب ءَ لڈ ءُ بار ، جنگل ءُ درچکانی ھشک بوگ ، آپ ءِ یکیں وسیلگ بزان کہ چمگ ءُ چاہ آنی لُرد ءُ تہل بوگ ءَ ھوار دلوتانی مرگ آماچ بوگ ءِ ھم نفسیاتی سان مھلوک ءِ سرا کپتگ اَنت کہ ایشی ءِ تہ ءَ سٹریس ءُ ڈپریشن ھوار انت۔اے ھما نفسیاتی نادُرائی انت کہ نوآبادیات ءِ تہ ءَ زیردست ءَ چہ زوراک ءِ زوراکی ءُ کرتانانی سوب ءَ چہ اولی روچ ءَ گون بنت بلے ایٹمی تراک ءَ پدا تابکاریانی سوب ءَ پیسرا چہ چاغی ءِ بزگیں مھلوک ءِ بزگی دو گیشتر بوتگ کہ ایشی ءِ سان تچک ءَ مھلوک ءِ نفسیات ءِ سرا کپتگ۔

چاغی ءِ دلبند ءَ ایٹمی تراک ءُ پاکستان ءِ نفسیاتی اپروچ:

زورگیر ءِ ابرم ءُ تب ءِ تہ ھندی مھلوک ءِ ھاتر ءَ زہر ءُ کینگ مان ءُ زورگیر ءِ ہمے سپریمیسی ءِ ھیال آئی ءَ زیردست ءِ سرا تشدد ءَ پرمایت دانکہ آ چہ تشدد ءِ وسیلہ ءَ ھندی مھلوک ءِ تہ ءَ وتی تُرس ءَ جاہ بدنت ءُ گہگیری ءِ راہ ءُ دراں بند بہ کنت۔زروگیر ءِ ہمے تشدد ءِ قالب ءَ اگاں ناروائیں پاکستان ءِ بلوچستان ءِ دمگ چاغی ءَ ایٹمی تراک ءَ بیاریں ءُ جاہ بدیں تاں ہمے سما بیت کہ پاکستان ءَ پہ وتی ایٹمی تراک ءِ ھاتر ءَ بلوچ ءِ زمین ءِ گچین کنگ ءِ مستریں سوباں چہ یکے بلوچ راج ءِ تہ ءَ دائمی ایں نادُرائی پیداک کنگ اِنت کہ مروچی چاغی ءِ مھلوک جُتایں جسدی ءُ مجگی نادُرائیانی آماچ اِنت ایشی ءَ ھوار بلوچ زمین ءِ سرا ایٹمی تراک ءِ پاکستان ءِ نفسیاتی اپروچ وتی سپرریمیسی ءُ تاگت ءِ پیش دارگ اِنت۔ایشی ءِ درور ءَ ما ای پیم ءَ زرت کنیں کہ بلوچ راج ءِ لہتیں ٹولیانی میان ءَ اے باوست سک ءَ ارزشت دیگ بیت ءُ ہر جاہ ایشی ءِ تبلیغ کنگ بیت کہ باروائیں پاکستان ایٹمی تاکت ءِ ءُ گوں ایٹمی تاگتاں جنگ کنگ نہ بیت۔ اے ناروائیں پاکستان ءِ ھما گیشتگیں اپروچ بوتگ کہ بلوچ مھلوک ءِ تہ ءَ جاہ بہ کنت ءُ بلوچ راج چہ گہگیری ءِ راہ ءَ تُرس آماچ بہ بیت، فرارے زیردست ءِ ہمے اپروچ ءَ فیئر آف فریڈم ءِ نام ءَ دنت ءُ گوشیت کہ چہ زورگیر ءِ تششد ءِ تُرس ءُ آئی ءِ جوڑ کرتگیں ھیالاں زیردست چہ آجوئی ءَ تُرسیت بزان کہ چہ گہگیری ءَ ترس آماچ بیت۔

شولان بلوچ:ہستیں وہد ءَ ہمے جاہ چون اِنت؟ اود ءَ روگء ِ اجازت ہست؟

توکل بلوچ: راسکو ءُ ھاس ھما جاہ کہ ناروائیں پاکستان ءَ وتی ایٹمی تراک کُتگ اَنت آ جاہ ءَ تراک ءِ روچ ءَ داں روچء مرچی لس مھلوک ءَ رگ ءِ رزا نیست۔اگاں دری مردمےراسکو ءَ روگ بہ لوٹیت گڑا الم اِنت کہ چاگے ءِ جاہمنند ءِ آئی ءِ ھمراہ بہ بیت بلے دیمترءَ ناروائیں پاکستان ءِ پوجی لشکر روگ ءَ رزا نہ دنت، ءُ ھستیں وھد ءَ ہمے تراک جاہ ءِ کش ءُ گوراں پاکستان ءَ وتی ناروائیں پوجی داشتگ انت، ایشی ءِ مستریں سوب ڈنی میڈیا پرسن ءُ پولکارنی ترس اِنت کہ اگاں ڈنی پولکار یا کہ دگہ اھوالکار ےتراک جاہ ءَ ڈاکومینٹ کُت ءُ جھان ءِ دیم ءَ آورت پاکستان ءِ بلوچ چکچینی ءِ پالیسی دگنیا ءِ دیمءَ پدؔر بنت ہمے سوب اَنت کہ ھندی مھلوک ءَ ھوار ڈنی مردماں راسکو ءِ تراک جاہ ءَ ھچ وڑا روگ ءِ رزا نیست۔