تاں زند بیت روک اِنت منی ھونانی لیِک

بلوچ وانندگاں

کوزہ گیری ءِ اَبرم ءَ ایردست ءِ واستہ بچّگ ءِ ہچ وڈیں گُنجائش نیست۔ ہمک لس مردم کہ ایردست اِنت ءُ آئی ءِ سیادی چہ ایردستیں زمین ءَ اِنت، زوراک ءِ چماں کُل گناہ گار ءُ سزا وار اَنت۔ ایردستیں مہلوک ءِ ماں زوراکءَ کالونی ءِ برجم دارگ ءَ وجودی گپچلے ءَ پرّین ایت کہ آئی ءِ تُرس ہمیش بیت، اے زُلم ءُ زورانسری ءِ میان ءَ ایردستیں مردمانی دل ءُ دماگاں رُدوکیں زھرانکی ءُ دنتان دْروشی اگاں منی گورننس ءُ رُول ءِ ھلاپ ءَ ڈائریکشنل بوت گُڑا منی بادشائی ءِ بادگیر ءِ در ءُ دیوار میزان میزان ءَ ڈیران کن اَنت۔ پمیشکہ جھان ءَ کُجام ہم کُنڈے ءَ کہ زوراکی ءِ پدکرد ءَ گہگیری ءِ جوزگ، سِتک ءُ باور مُھکم  بوتگ اَنت اود ءَ کوزہ گیر ءِ کوزہ گیری بُندپتر ءِ دْرچ ءَ گار ءُ گور بوان بوتگ۔ زوراک ءَ بیھ ایردست ءِ سر ءَ ماتی دست نہ سمار اِتگ بلکیں ماتوی کینگ ءَ گیشتر  گُلامیں مہلوک ءِ زند وتی نوآبادیاتی پائدگانی ھاتر ءَ چُنڈے نان ءَ چمدار ءُ چم جہل جوڑ کُتگ اَنت۔ گُلامی ءِ اھد ءُ نوبتاں زوراک ءِ نیمگ ءَ گُلام کچّ ء بُوچے ءِ بستار دیگ نہ بیت، ہمے بے بستاری کالونیئل ٹرمینالوجی ءَ برے نامے دیگ بوتگ۔ انچوشکہ افریکہ ءَ نیگرو ءُ سیاہ پوست بہ بنت یاکہ بلوچستان ءَ دہ شت گرد، جاہل، وکشی ءُ کوھی ءِ نام ءُ  گالبند بہ بنت۔ زوراک گُلامیں مہلوک ءَ جناوری چہر ءُ شُبیناں بیان  کنت کہ اے کُل زوراک  ءِ  racial nature    ءَ پدّر کن اَنت، اے  ہاسیں زہنیت ءِ درشان  کہ چُکچینی ءُ گلام ءِ  ہلاسی ءِ عملاں گِندگ بیت گُڑا اِشی ءِ اندر ءَ رُدوم گِروکیں ہمک  کالونیئل پالیسی ایردست ءَ سرجمی ءَ نیست ءُ نابود کنگ ءِ دروشُم ءَ گِندگ لوٹ ایت۔

بلوچ نودربراں !

گُلامی ءِ زند زندے نہ اِنت۔ نوآبادیاتی نظام ءَ ھُشکءُ ھُورکیں زندگی تہنا گُلامی ءِ روچاں گیش کنگ ءِ یک نمونگ ءُ زورانسری ءِ بُن جنگ ءَ یک دلبڈی یے۔ گُلام ءِ گْورا یکیں کِشک گہگیری اِنت کہ گلامی ءِ اُمر ءَ گونڈ کُت کنت۔ گہگیری تہناکُوکار، جاک ءُ تشدد نہ اِنت،گہگیری گُلامیں پدریچ ءِ آشوبی لوگوتھراپی اِنت کہ زندگی، نپر، واھشت، مُچانکی، راج ءُ زمین ءِ ماناھاں گیشوارکنت۔ بلوچ راجی جُنز ءَ بلوچ آشوب ءِ لوگوتھراپسٹ ہمک اھد ءُ باریگ ءَ ودی کنان کُتگ اَنت کہ آھاں بلوچ ءِزانت، سیاست، جنگ، زُبان ءُ لبزانک ءِ دیمروی ءُ گامے دیم ءَ کنزگ ءِ فلسفہ ءَ گوں وتی ھون ءُ ھید رِتکگ اَنت۔ کندیلیں سباء دشتیاری، پروفیسر رزاک، اللہ داد، زاہد آسکانی ءُ غمخوار ھیات ءِ رنگ ءُ دروشُماں زوراکیں پاکستان ءِ دْرچنگ ءُ  ٹارگٹ کنگ ءِ  دْرچ ءَ بلوچ ءِ دانا، سوھو ءُ رھبریں سر ڈلان کُتگ اَنت۔ اے استان ءِ ہما کالونئیل پالیسی اِنت کہ اِشی ءِ کارمرزی ءَ پاکستان بلوچ ءَ دانشوری جہت ءَ پُرسودگیں راجے ءِ تہ ءَ مٹّ کنگ ءَ دلمانگ اِنت۔ بلوچ ءِ زُبان براہوئی ءِ 30 کتاب  ءِ واھُند، رجانکار،شائرءُ ردانک نویس غمخوار ھیات ءِ کوش پاکستان ءِ زوراکی ءِ اَبرم ءَ  بلوچ راج ءِاُستاد ءُ دانائیں مردمانی کوش ءِ دروشُم ءَ بلوچ جُنز ءَ اٹلیکچول کرائسس یے     آرگ ءِ ساز اِتگیں پندلے۔ بلوچ دانا ءُ زانتکارانی  گچینی کوش کازہ ءُ collateral damage یے نہ اِنت بلکیں اِستان ءِ نیمگ ءَ بلوچ چُکچینی  پیٹرن ءِ ہما ھترناکیں پھنات اِنت کہ بلوچ ءِ زانت کُشی ءَ   تشدد،کوشت ءُ کوش ءِ بُنیاد ءَ چہ بُن ءُ بیھہ ءَ ہلاس کنگ لوٹ ایت بلے بلوچ وتواجھی ءِ جُنز ءَ دلیر ءُ تمردی ءِ گوناپ ءَ مکسدءِ پگر ءَ گوں بندوکیں ہمک پِڑ ءِ جہدکار ءِ رِتکگیں ھون ءَ اے سنچ گیشاں گیش مُھکم کُتگ، سباء دشتیاری ءَ بگر داں نمیرانیں غمخوار ھیات ءِ داب ءَ     علمی ءُ شعوری سپر اوشت آماچی ءِ منّانک ءَ گوں ہچبررازیگ نہ بوتگ۔       

بلوچ  زانتکاراں !

دژمنیں تاکت ءِ مُدام جہد ہمیش بیت کہ لگتمالیں راج ءِ زانتکار ءُ سوھوئیں کرداراں ایردستی ءِ ھلاپ ءَ عمل کنگ ءَ بہ دار ایت۔ ایردستیں زانتکار آجوئی ءِ جُنزاں بلائیں کردے پیلو کنگ ءِ ھاٹیگے دار اَنت۔ آھانی زانت، اگل ءُ دُورچاری راجی جُنز ءَ ھترھاں چہ رکّینگ ءِ ھمرائی ءَ جہد ءَ علمی ءُ شعوری اھدءُ سیمسراں  تاکتوری ءِنیمگ ءَ بُرت کن اَنت۔ ہمے رنگ ءَ زوراکیں تاکت جُنز ءُ ایردست ءِ راج ءِ  دانشوری ءِمُھکمی ءَ ہچبر اوپار کُت نہ کنت۔ جتا جتائیں زانت کُشی ءِ ویلاں چہ زاھر بیت کہ دانائیں سر ءُ دانائیں کرد ایردستی ءِ زمانگ ءَ چنکدر پُر ارزشتدار اَنت۔ پاکستان ءِ بلوچ زانت کُشی ءِ شوربندی بلوچ جُنز ءِ بُن دپتری نوبت ءَ علمی درگت ءَ نزور ءُ زانتکارانی زانت ءَ بلوچ جہد ءِگہتری ءَ کاربندگ ءَ دارگ ءَ اِنت ،ٹارگٹ کلنگ ءِ رنگ ءَ لس تُرسے ودی کنگ ءِ ھمرائی ءَ اَنچیں پندل سازگ بوگ ءَ اِنت دانکہ زانتکار ہم چہ کوزہ گیر ءِ روشت ءُ زہنیت ءَ انفرادیت پسندی ءِ   واہشت ءَ چہ سانمند  بہ بیت ءُ پاکستان ءِ وتگڑیں دانشورانی وڑ ءَ استان ءِ توسیپ ءُ ستا بہ کنت ءُ کوزہ گیر ی ءِ سائیکولوجی ءَ ہمے دربہ بارت کہ ہمک فرد ءَ را نپری ہساب ءَ یک بستارے تہنا انفرادیت ءِ دروشُم ءَ کٹّگی اِنت۔ اگاں بلوچ جُنز ءِ بُنشون ءَ چارگ بہ بیت گُڑا  پاکستان ءَ ہمک باریگ ءَ بلوچ زانت کُشی ءِ شوربندی ءُ پروگرام   ھترناکیں رنگے ءَ کارمرز کُتگ اَنت۔ اِشی ءَ چہ استان ہمے لوٹ ءَ کنت کہ بلوچ ءِ دانائی  بلوچ جُنز ءِ جتائیں پِڑانی گہتری ءُ دیمروی ءَ      عمل ءَ مئیت۔

شرپمندیں بلوچ راج!

انسانی بُندپتر ءَ زوراکی ءِ ناشریانی ھترناکیں بہر کواسچینی اِنت۔اوٹومن ایمپائر ءِ زمانگ ءَ آرمینیا ءِ مہلوک زوراکی ءِ آماچ کنگ بیت۔ اے زوراکیانی دروراں چہ یکے اود ءِ کواسچینی پالیسی اِنت کہ ”Decapitation ” اسٹریٹجی ءِ  گالبند ءَ جاہ آرگ بیت۔ آرمینیا ءِلس مہلوک ءِ تہ ءَ ڈاکٹر، اُستاد، لبزانت، جرنلسٹ، نبشتہ کار ءُ سیاست دان  زورانسری کُشگ بنت۔ ہمے رنگ ءَ بلوچ ءِ زانت کُشی ءُ کواسچینی پاکستان ءِ نیمگ ءَ ٹارگٹ کلنگ ءِ دروشُم ءَ گیچین  کنگ ءُ کُشگ ءِ پیٹرن ہاسیں اسٹریٹجی یے ءِ شون ءَ دنت۔ اے پیٹرن ءَ کہ ہما مردم نمیران کنگ بوتگ اَنت ،آھاں بلوچ  جُنز ءُ راجمان ءَ کردے ءِ   واھُندی ءِ گوائی داتگ۔ بلوچ ءِ سیاسی  جہدکار، آشوبی سنگت، اُستاد، کواس ،لبزانت، نبشتہ کار، موبلائزر، ایجوکیٹر ءُ جرنلسٹ، ہمے ہاسیں پیٹرن ءَ  کُشگ بوتگ اَنت۔ کمبر چاکر،الیاس نزر، لمہ کریمہ، سباء دشتیاری، پروفیسر رزاک، زاہد آسکانی، عارف بارکزئی، ساجد ھُسین، لطیف بلوچ، اے تہنا نام نہ اَنت بلکیں بلوچ آشوب ءُ راجی آجوئی جُنز ءِ جہد ءَ ہما کردار اَنت کہ اِشانی  تہ ءَ ہمک نام ءَ را  یک بُندپتری کردے گون بوتگ۔ بلوچ ءِ زانت ایوک ءَ یک ہاسیں وھد ے ءَ گُٹگیر کنگ نہ بوتگ بلکیں اے  دْرچ ءُ اسٹریٹجی ہمک دور ءُ باریگ ءَ دژمن ءِ  دلگوش ءِ بہرے بوتگ۔ بلوچ زانت ءِ پدریچ درپدریچ ٹرانزیشن ءُ پدریچ در پدریچ کواسچینی برجم گِندگ ءَ کیت۔ انچوشکہ اللہ داد، روف بلوچ، بالاچ خالد ءُ غمخوار ھیات ہما  کواسچینی ءِ دْرچ اِنت کہ دژمن ءَ سوھوئیں سر ءُ آشوبی کردانی واھُند اوپار نہ بوتگ اَنت۔ بلوچ کواسچینی تہنا دژمن ءِ اوشتری کینگ ءَ پیش نہ دار ایت، اِشی ءِ تہ ءَ چیریں نیّت ءُ گُمانے ہست کہ بلوچ چہ راجی جوڑشت ءُ استان سازی ءِ عمل ءَ پُشت ءَ دور دیگی اِنت۔ بُندپتر ءَ ھولوکاسٹ ءُ کواسچینی ءِ ھزاراں چوشیں درور دست کپ اَنت کہ اود ءَ ہاس کواسچینی ءِ درگت ءَ بازیں پوجی آپریشن بندات کنگ بوتگ اَنت۔ 1971 ءَ پاکستان ءِ دستاں بنگلہ دیش ءِ کواسچینی ءَ آپریشن لکویڈیشن، 1979ءَ کمبوڈین  کواس ہاسیں  ٹارگٹ کلنگ ءِ رنگ ءَ ناشرکارانی  کمک ءَ کُشگ بوتگ اَنت ءُ دومی جھانی جنگ ءِ وھداں ایڈولف ھٹلر پولش کواسانی  کوشت ءُ کوش ءِ دْرچ ءَ  نازی جرمنی ءِ پوجی  آپریشنے پولینڈ ءِ زمین ءَ”Intelligence Action Pomerania” ءِ نام ءَ سرجمی ءَ پولینڈ ءِ زانت کُشی ءَ بندات کنت۔   

آشوبی جہدکاراں!

پاکستان بلوچ ءِ تہنا ہست ءَ تباہ کنگ ءَ نہ اِنت، انوگیں لس مہلوک ءَ کُشگ ءَ نہ اِنت، ہستیں راجی جُنز ءِ ترندی ءَ ہلاس کنگ ءَ نہ اِنت بلکیں یک اَنچیں پیٹرنے بلوچ چُکچینی ءِ مشینری ءَ کاربندگ ءَ اِنت کہ آ بلوچ استان سازی ءِ جہد ءَ بلوچ پدریچ ءِ علمی، شعوری ءُ دانشوری بُود ءِ نزور کنگ ءَ بلوچ راجمان ءِ زانتکاراں دْرچنگ ءُ نشانگ جوڑ کنگ ءَ اِنت۔ کوزہ گیریں پاکستان ءِ تھینک ٹینک ءِ گْورا بلوچ ءِ  راجی جوڑشت ءِ  تیاری یک ہاسیں ٹارگٹے ءِ بُنیاد ءَ زُورگ ءِ ھمرائی ءَ پالیسی سازی کنگ بوتگ دانکہ بلوچ ءِ باندات ءَ چوشیں تمردے پش مہ کپ ایت کہ آ بلوچ ءِ راجی جوڑشت ءِ رھشونی ءَ کُت بہ کنت۔ پوجی زوراکی ءُ ھندی دلّارانی کمک ءَ اے دابیں  چُکچینی پیٹرن ءِتجربگ پاکستان ءِ پوجی زہنیتءَ بنگلہ دیش ءَ کارمرز کنگ ءَ پد انگت  ہست اِنت۔ 1971 ءِ زمانگ ءَ جنرل یحیٰی خان ءِ پوجی کمانڈنک سسٹم گوں ھندی بنگالی دلاّرانی کمک ءَ ”Operation Liquidation”ءَ  بنگلہ دیش ءِ زانتکار، سیاسی شہزانت،وکیل،نودربر، کواس ءُ سوھوئیں کردانی   ھونریچی ءَ بنا کنت۔ اے آپریشن ءَ پاکستان ءِ نیّت ہمیش بیت کہ بنگلہ دیش ءِ راجی جوڑشت ءِ ہمک  آسراتی  مَرگ ءِ آماچ کنگی اِنت ءُ بنگلہ دیش ہما جاہ ءَ رسینگی اِنت کہ آ استان سازی ءِ جہد ءَ دوبر سر چست کُت مہ کنت۔ پاکستانی کوزہ گیریں آرمی ءَ بنگلہ دیش ءِ راجی آجوئی جہد ءَ کساس 1200ءَ  گیش  کواس کُشتگ ءُ جتائیں مُچانکی کبرانی دروشُم ءَ کَل کُتگ اَنت۔ مروچی پاکستان ءِ پوجی کارپداں اے پیٹرن بلوچ ءِ زمین ءَ کارمرز بوئگءَ اِنت کہ اِد ءَ مستریں دست ھندی دلّار ءُ آئی ءِ وترودیں کُشندہ ٹولی ئیگ اِنت۔