شائر ء آشوب، مبارک قاضی گوں وتی شائری ازم ءَ بلوچ ءَ سیاسی درس دیان ءَ نمیران بوت۔
شولان بلوچ، ترجمان- بلوچ اسٹوڈنٹس آرگنائزیشن آزاد

ایردستی ءِ دور ءَ وہدے راجے زوراکیانی آماچ بیت، آئی ءِ ہمک شئے تاوانبار ءُ ہستانک پروشگ بیت۔ مھلوک ءِ لس زِندمان تکانسر کنگ بیت، چہ آئی ءَ ہمک وڑیں وشی ءُ شادھانی پُلگ بیت۔ ہمے کُلیں زوراکیانی تہ ءَ زوراک ءِ جھد بیت کہ ایردست ءِ سر ءَ گیش ھکمرانی کنگ ءِ ھاتر ءَ ہمک زانتکار ءُ نبشتہ کاراں بے توار بہ کنائین اِیت۔ پرے ہاتر ءَ آیاں باز جاھ ءَ لب ءُ لالچ دیگ بیت، زِندانیگ کنگ ءَ ہوار آیاں تُرس ءُ بیم ءِ آماچ کنگ بیت داں ایردستیں راج ءِ گُنگی گیش کنگ بہ بیت ءُ آیاں مہکمیں توارے رست مہ کنت۔ دنیا ءِ ایردستیں راجانی تہ ءَ چوشیں بازیں درور دست کپ ایت کہ اود ءِ نبشتہ کار، شائر ءُ زانتکار تُرسینگ ءُ چہ راجمان ءَ گستہ کنگ بوتگ اَنت۔ بلے دنیا ءِ دپتر چہ چوشیں ہم زانتکار ءُ نبشتہ کاراں سریچ اِنت کہ آیاں زوراک ءِ دیم ءَ وتی ند بے توار نہ کتگ ءُ ناں کہ چہ راجمان ءَ عملی دروشم ءَ وت ءَ یکِر کتگ۔ ہمے پیم بلوچ راج ہم چہ ہمے رنگیں سراں پُر اِنت کہ آیاں وتی راجمان گُنگ بوگ ءَ نہ اِشتگ ءُ مدام پہ راج ءَ رہشونی ءِ کردار اِش پیلو کتگ۔ ہمے سرانی تہ ءَ شائر ء آشوب نمیرانیں مبارک قاضی ہوار اِنت کہ آئی ءَ وتی زِند ءِ ہمک شئے پہ بلوچ راج ءُ ڈیھ ءَ ببا داتگ ءُ پہ بلوچ ءُ بلوچستان ءَ شائری کتگ ءُ نبشتہ کنان بوتگ۔

ہما دور ءَ کہ بلوچ ڈیھ چہ درانی زیردستی ءَ زھمیگ کنگ بوتگ داں مبارک قاضی ءِ وڑیں شائر ءُ نبشتہ کاراں ہمے ایردستی ءِ کسہ ءُ مارشت وتی شائری ءِ کالب ءَ رنگ داتگ ءُ مھلوک ءِ دیم ءَ درشان کتگ اَنت۔ آئی ءَ بلوچ ڈیھ ءِ ھزام جتیں نوبت، راج ءِ کُشت ءُ کوش، بلوچ بچانی بیگواہی ءَ بہ گِر داں مُرگ ءُ دلوت، درچک ءُ دارانی دردیگں کسہ ہم وتی شائری ءِ تہ ءَ جاہ داتگ ءُ نازینتگ اَنت۔ آئی ءِ شائری ءَ تہنا لبزانی امبارے پہمگ گوں آئی ءِ ازمی بالاد ءُ پگر ءَ بے ایمانی یے بیت۔ آئی ءِ راستیں شائری ءِ ابرم آشوبی شائری یے کہ بلوچ ڈیھ ءَ گوں بندوکیں ہمک راجمانی چِست ءُ ایرانی سر ءَ اَنت بہ زاں بلوچ راجمان ءِ آدینک اَنت۔ آئی ءَ ہرچی کہ دِست ءُ مار اِت گوں نیک ءُ تچکیں روشت ءَ بلوچ راج ءِ دیم ءَ ایر ئِے کُت داں بلوچ مھلوک باسما بہ بیت ءُ گوں راجی جُھد ءَ ایماندار بوان ءَ عمل بہ کنت۔

مبارک قاضی ہما آشوبی ءُ دلیریں شائر اَت کہ ہمک ڈولیں سکی ءُ ازاباں گوزان بوت بلے راجی جھد ءُ بلوچستان ءِ نازینگ ئِے یلہ نہ دات۔ آ بازیں رند ءَ زِندانیگ کنگ بوت، تُرسینگ ءُ بیھار دیگ بوت، بچ ءِ نمیرانی ئِے سگّت، وتیگانی ھبر ءُ تھمت ئِے اوپار کت اَنت بلے چہ بلوچ جھد ءَ پشت کِنز نہ بوت ءُ ناں کہ گلگ ءُ زاری ئِے کت بلکیں آ گیش مہکم بوت ءُ بلوچ راجمان ءِ کسہاں درنگازگ ءَ بوت۔ آئی ءَ بد ءُ رد کنگ بوت بلے ناں تہنا آئی ءَ کِمار نہ کت بلکیں بلوچ راج ءَ ہم قاضی ءِ کردار بدیں نگاہاں نہ چار اِت۔ قاضی ءَ وتی زِند ءَ مزن نام ءُ کرداریں ہستی یے جاھ رست ءُ ہمک مردم ءَ آ گوش داشت ءُ دوست ئِے داشت، ایشی ءِ سوب اِش اَت کہ قاضی راجی شائرے اَت، بلوچ ءُ بلوچستان ءِ کسہ ءَ درانگاز ءَ اَت ءُ اے کسہ ءِ تہ ءَ ہمک بلوچ نپر ہوار اَت پمیشکا آئی ءِ شائری پہ ہمک بلوچ نپر ءَ اَت، ہمک کس ءَ وت ءُ وتی کسہ شائری ءِ تہ ءَ دِست اَنت۔ قاضی ءَ بام ء آجوئی ءِ سپر ءَ شائری کنان ءَ 16 ستمبر 2023 ءَ اے دنیا ءَ سپر کُت ءُ داں ابد بلوچ گلزمین ءِ باہوٹ بوت۔

نمیرانیں مبارک قاضی ءِ پہ بلوچ ءُ بلوچستان ءَ آشوبی شائری کنگ ءِ دروت ءَ بی ایس او آزاد ءَ آئی ءَ شائر ء آشوب ءِ پنام دات۔ اے پنام پہ آئی ءِ شائری ءُ پگر ءِ پہمگ ءَ مستریں چیدگ اِنت۔ آئی ءِ زِند ازاباں گوں سریچ اِنت بلے قاضی اِنت کہ اوشتاتگ ءُ بلوچ راج ءَ وتی شائری ءِ دروشم ءَ درس دیگ ءَ اِنت۔ قاضی ءِ رنگیں نبشتہ کار ءُ شائر کزا ودی بہ بنت، بلے ہردے کہ ودی بوت اَنت داں آ وتی اِزمی بالاد ءَ زوراک ءِ چماں سیاھ ءُ تہاریں ھیروپ بنت ءُ دیم ءَ کائینت۔ قاضی ءَ جسدی دروشم ءَ سپر کتگ بلے داں بلوچ سرزمین ءِ سر ءَ یک جھدکارے جھد ءَ اِنت ءُ بلوچ ڈیھ ءِ سر ءَ بووکیں یک ہم زوراکی ءِ تہ ءَ قاضی ءِ شائری الہان کنت ءُ پہ بلوچ ءَ پنتے ءُ پہ دژمن ءَ جوریں کھرے بیت ءُ کئیت۔